Ezekiyele 48
48
Kulipangezela lifuti akati ka miyati
1Awa akewo mazina a miyati. Kushangumukila ku nginga ya ku kunto, Ndani akatambula mutambela umo wa lifuti. Co liketa ku Hetelone ku Ngila ya Hamate na ku Hazale Enone kutunda ku tapalo ku nginga ya ku kunto ya Ndamasiku kuyehi na Hamate, kutunda ku nginga ya mu ngangela nakweta ku nginga ya mu kangombe ka yambi. 2Ashele akatambula mutambela umo wa lifuti kushangumukila na nginga ya Ndani ku mbwela. Co liketa ku Nginga ya mu kangombe ka yambi kutunda ku nginga ya ku ngangela. 3Nafetali akatambula mutambela umo wa lifuti kushungama na nginga ya Ashele. Co liketa ku nginga ya mu kangombe ka yambi kutunda ku nginga yangangela. 4Manase akatambula mutambela umo wa lifuti kushungama na nginga ya Nafetali mu mbwela. Co liketa ku nginga ya mu kangombe ka yambi kutunda ku nginga ya ku ngangela. 5Efalime akatambula mutambela umo wa lifuti kushungama na nginga ya Manase mu mbwela. Co liketa ku nginga ya mu kangombe ka yambi kutunda ku nginga ya ku ngangela. 6Luvena akatambula mutambela umo wa lifuti kushungama na nginga ya Efalime mu mbwela. Co liketa ku nginga ya mu kangombe ka yambi kutunda ku nginga ya ku ngangela. 7Yunda akatambula mutambela umo wa lifuti kushungama na nginga ya Luvena mu mbwela. Co liketa ku nginga mu kangombe ka yambi kutunda ku nginga ya ku ngangela.
Mutambela wauvwa wa mukati ka lifuti
8Mutambela wa lifuti umo vanapande kuwaka kumukulo. Upwe makilomita likumi na avali na litambelo mu vwihi kutunda ku kunto nakweta mu mbwela, co vulaja vukapwe mumo kutunda mu ngangela nakweta mu kangombe ka yambi, kupwa mutambela wakwana ku miyati. Co Njuvo ya Shukulu Kalunga ikakale mu mutambela ou.
9Mukati ka mutambela ou, mutambela wakwangula wa makilomita likumi na avali na litambelo mu vulaja, na makilomita likumi mu vwihi vakaukundike kuli Shukulu Kalunga. 10Ou mutambela wakujela ukapwe wa vaka-kukombelela. Kutunda ku mutambela wa mu ngangela nakweta mu kangombe ka yambi mutambela wavo vaweseke kupwa makilomita likumi na avali na litambelo mu vulaja, co kutunda ku mutambela wa ku kunto nakweta ku mutambela wa mu mbwela makilomita akupwa atanu mu vwihi. Co Njuvo ya Shukulu Kalunga ikakale mu mutambela wa mukati. 11Ou mutambela wakujela upwe wa vaka-kukombelela vatekulwila va Zandoke. Vanjipangelele na kulongwa, co kuvalipandakanene na vakwavo vaIsalele mukulinga vuvi, ngwe muvalingile vanu va ku muyati wa Levi. 12Ngecivene, vakakale na mutambela wakwangula, wakwata ku mutambela uje wa vaLevi, co woshe ukapwe wakujela manene. 13VaLevi lalo vakakale na mutambela wakwangula, mutambela wa mu mbwela ya mutambela wa vaka-kukombelela. Na ukewo lalo upwe makilomita likumi na avali na litambelo kutunda ku mutambela wa mu ngangela nakweta ku mutambela wa mu kangombe ka yambi, na makilomita atanu kutunda ku kunto nakweta mu mbwela. 14Mutambela wakukundika kuli Shukulu Kalunga wapwa mutambela wauvwa manene mu lifuti lyoshe, co naumo wai asa kuulandesa nambe kuulandakana nambe kuunungulwila kuli munu weka embwe. Wapwa wakujela, co wakundama kuli Shukulu Kalunga.
15Oloni ku mutambela wakwangula uje wasalako, wakupwa makilomita likumi na avali na litambelo mu vulaja, na mu vwihi unapu makilomita avali na litambelo, kuwapwile wakujela embwe, oloni unapu wakulikwasesa mbunga yoshe ya vanu. Vasa kukakala kuje nakupangesa uje mutambela. Co nganda ikakale mukati kawo, 16co upwe mumo nomu-nomu, wakuseteka mamita 2,250 ku mutambela umo na umo. 17Co kuzengeleka ku nganda yoshe ku mutambela umo na umo kukakale lyasa lya mamita 125 mu vulaja. 18Co livu lije lyasalao omo vanatungu nganda ku mutambela wa mu muyehi mu mbwela mutambela wakujela, upwe makilomita atanu, na makilomita avali na litambelo mu ngangela, na makilomita atanu, na makilomita avali na litambelo mu kangombe ka yambi, vanapande kuupangesa kupwa mutambela wakulima mahya a vanu vaje vakakala mu nganda. 19Munu woshe uje wakala mu nganda, kukwesi mulonga nambe atunda ku muyati uka nambe uka, akalime lije livu.
20Ngecivene, mutambela woshe wa mukati, uje uvatundisileko ukapwe mumo kushungama nomu nomu kupwa makilomita likumi na avali na litambelo ku mutambela umo na umo, kuwezelelako mutambela wa nganda. 21Co livu lili ku mutambela wa mu ngangela na mu kangombe ka yambi likapwe lya muka-kushwana mu Isalele. Livu lyendi liketa ku ngangela ya Ndonga ya Yondau na mu kangombe ka yambi ka Lishali lya Menditelenyani. Akati ka lifuti lyendi akakale lifuti lyange lyakujela, na Njuvo ya Shukulu Kalunga, 22amolika na mutambela wa vaLevi na nganda ya Yelusalema. Ku nginga ya ku kunto ya lifuti lya muka-kushwana likapwa lifuti lya Yunda, co lifuti lya ku nginga ya mu mbwela likapwe lifuti lya Mbenjemani.
Lifuti lya miyati ikwavo
23Evi vikevyo vivakatambula miyati yoshe, Mbenjemani akatambula mutambela umo wa lifuti. Liketa ku nginga ya ku kangombe ka yambi kutunda ku nginga ya ku ngangela.
24Simyoni akatambula mutambela umo wa lifuti kushungama na nginga ya Mbenjemani liketa ku nginga ya ku kangombe ka yambi kutunda ku nginga ya ku ngangela mu mbwela. 25Isakale akatambula mutambela umo wa lifuti kushungama na nginga ya Simyoni mu mbwela. Liketa ku nginga ya ku kangombe ka yambi kutunda ku nginga ya ku ngangela. 26Zembuloni akatambula mutambela umo wa lifuti kushungama na nginga ya Isakale mu mbwela. Liketa ku nginga ya ku kangombe ka yambi kutunda ku nginga yangangela. 27Ngande akatambula mutambela umo wa lifuti kushungama na nginga ya Zembuloni mu mbwela. Liketa ku nginga ya ku kangombe ka yambi kutunda ku nginga ya ku ngangela.
28Ku mutambela wa mu mbwela ya mu mutambela uje vaanene ku muyati wa Ngande, nginga yakengeselele mu mbwela ya kangombe ka yambi kutunda ku Tamale nakweta ku mema a Kandeshe, na ku kunto ya kangombe ka yambi lalo kushwangesa nginga ya Ingito kweta ku Lishali lya Menditelenyani.
29Co Shukulu Kalunga wa Akamwa ya Vyoshe wendekele ngwendi, “Omu mukemwo mumukapangela lifuti mu mitambela ku miyati ya Isalele kupwa vufuko vwavo.”
Vikolo vya Yelusalema
30 #
Kuj 21:12-13
Evi vikapwa vikolo vya mu nganda. Ku mutambela wa ku kunto ukapwe mamita 2,250, co ukakale na vikolo vitatu ku mutambela umo na umo wa civumbe. 31Vikolo vya nganda vakaviluke mazina a miyati ya Isalele. Co vikolo vitatu vya ku mutambela wa ku kunto vikapwe vikolo vya Luvena na Yunda na Levi. 32Ku mutambela wa mu ngangela ukapwa mamita 2,250, co vikolo vitatu vya ku mutambela wa mu ngangela vikapwe vya Yosefa na Mbenjemani na Ndani. 33Ku mutambela wa mu mbwela ukapwa mamita 2,250, co vikolo vitatu vya ku mutambela wa mu mbwela vikapwe vya Simyoni na Isakale na Zembuloni. 34Ku mutambela wa mu kangombe ka yambi ukapwa mamita 2,250, co vikolo vitatu vya ku mutambela wa mu kangombe ka yambi vikapwe vya Ngande na Ashele na Nafetali. 35Co vulaja vwoshe vwa civumbe mu mitambela iwana ya nganda yapwile mamita 900. Co lizina lya ije nganda kutunda lelo na kulutwe likapwa “Shukulu Kalunga ali Kuno!”
Currently Selected:
Ezekiyele 48: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
