Kutuuka 33

Shukulu Kalunga ashika vaIsalele kutunda ku Munkinda wa Sinai

1 # Kus 12:7; 26:3; 28:13 Shukulu Kalunga wendekele kuli Mosesa ngwendi, “Tundeni ku mwela uno, yove na vanu vove vaje watundisile mu Ingito, yeni ku lifuti lije njalisingile na Avilahama, na Isake, na Yakomba kulyana kuli vatekulwila vavo. 2Njikatuma kangelo wakumitwamenena, co njikasheka vaKanana, na vaAmoli, na vaHiti, na vaPelezi, na vaHivi, na vaNjevushi. 3Mulinakuya ku lifuti lyalivwa, nevi vyakujenekamo vyai. Oloni yange kunjikai neni amolika, omwo yeni mu vanu vakukaluwa vimbunge, kutewa njikaminyongesela a ngila.”

4Omo vanu vazivile ngeci, co vashangumukile kulila, naumo wai wazalele vyuma vya senga lalo. 5Co Shukulu Kalunga washikile Mosesa kuleka vanu vaIsalele ngwendi, “Yeni mu vanu vakukaluwa vimbunge. Nga yange njiya neni, nameme kasimbu lika kakandondo, njikaminyongesa njwa. Ngecivene, ololo tundiseni vya senga, ngeci njiyongole vatijo njilinga neni.” 6Co omo vatundile ku Munkinda wa Sinai, vanu va Isalele kuvazalele lalo vyuma vya senga embwe.

Mbalaka Mwakuliwanena

7Oshe aje vanu va Isalele vakele nakutungila cilombo, co Mosesa wakele nakutungila Mbalaka yakujela alyala kamandondo anja ya cilombo, waitumbwile ngwendi, “Mbalaka Mwakuliwanena,” co munu woshe uje washakele kukehula Shukulu Kalunga wapandele kutuuka anja nakuyako. 8Oshe aje Mosesa wakele nakuyako, co vanu vemanene ku vikolo vya vimbalaka vyavo nakukengelela Mosesa noo nakovelamo. 9Co omo Mosesa nakovelamo laja, manda ya lishelwa yazezumukilile asi nakwimana ku cikolo ca Mbalaka, co Shukulu Kalunga wendekele kuli Mosesa oku ali mu lishelwa. 10Co omo vanu vamwene manda ya lishelwa yakele ku cikolo ca Mbalaka, vatsikamene a mavuli nakulemesa munu na munu ku cikolo ca mbalaka yendi. 11Co Shukulu Kalunga wakele nakwendeka na Mosesa mesho na mesho, ngwe munu alinakwendeka na musamba wendi. Asinoni Mosesa welukile ku cilombo. Oloni uje mukwenje mukwasi wendi Yoshwa muna Nune, ikeye kakele nakutundamo muje mu Mbalaka.

Shukulu Kalunga akulaesa kukala na vanu vendi

12Mosesa wendekele kuli Shukulu Kalunga ngwendi, “Mwa vushunga vene yove wanjilekele kutwamenena vanu ava nakuvatwala ku lifuti lije, oloni kuwanjilekele iya umo wasa kutuma amo nange. Yove wendekele kuli yange ngwove unjizivuka mwamuvwa, co muli yange ulinakuvwaelela. 13Co ololo nga mwa vushunga njilinakukuvwaelelesa, cooni njileke viyongola vyove, ngeci njikupangele simbu yoshe mukukuvwaelelesa. Co anuka lalo ngwove yove unaangula muyati ou kupwa wove vavenya.”

14Shukulu Kalunga wendekele ngwendi, “Yange vavenya njikaya amo nove, co njikakuhyanesa.”

15Mosesa wamukumbulwile ngwendi, “Nga kuuyi amo netu, co kesi ututundise ku mwela uno. 16Vatijo vanu vakazivuka ngeci yove ulinakuvwaelela na vanu vove amo nange, nga yove kuuyi amo netu? Nga yove uya amo netu, co cikatwangununa ku vanu voshe veka vali ano asi.”

17Co Shukulu Kalunga wendekele kuli Mosesa ngwendi, “Njikalinga ngwe omo yove unanjilombo, omwo njikuzivuka mwamuvwa, co muli yove njilinakuvwaelela.”

18Asinoni Mosesa walombele ngwendi, “Shukulu yange, njishaka kumona ceke ca vumpau vwove.”

19 # Lom 9:15 Co Shukulu Kalunga wamukumbulwile ngwendi, “Njikaita na vuvwa vwange vwoshe kulutwe lwove, co njikatumbula lizina lyange lyakujela. Yange Kalunga, njimwesa kutetela na mema ku mbunge kuli voshe vaje njaangula. 20Kunjikakutava ngeci umone cihanga cange embwe, omwo naumo wai anjimona yange, co ayoye, 21oloni kuuli mwela umo kuyehi nange, kuje yove wasa kwimanako a limanya. 22Omo ceke ca vumpau vwange cikaita, co yange njikakwaka mu mwanzi wa limanya, co njikakufwika livoko lyange noo yange njineti. 23Co njikatundisa livoko lyange, asinoni yove ukamona mu mwongo wange oloni kuukamono cihanga cange embwe.”

Currently Selected:

Kutuuka 33: MBB

Highlight

Copy