Ndanyele 3
3
Mwene Nevukaneza ashika vanu voshe valemese kamponya ka ngolinde
1Mwene Nevukaneza wapangele kamponya ka ngolinde, mu vulaja kapwile mamita makumi avali na atanu na avali, mu vwihi kapwile mamita atanu, co wakaakele mu cana ca Ndula, mu lifuti lya Mbambilone. 2Ngecivene, mwene washikile lishiko kuli vamyata vendi voshe vakungulukile amo kuli ikeye, na vana va vimyene, na vanguvulu, na vaka-kwimanena mu myela ya vanguvulu, na vaka-kushika vakama, na vaka-kutulika vyuma, na maako, na vaka-kusompa vakama, vakevo vene vamyata voshe va mu lifuti lya Mbambilone. Valikungulwile amo mukukundika kamponya kaje kemikile Mwene Nevukaneza. 3Ngecivene, vamyata voshe ava vakungulukile nakwimana kulutwe lwa kaje kamponya ngeci vakakundike. 4Co katumwa ka mwene watambekele manene ngwendi, “Yeni vanu munatundu ku mafuti oshe, co lalo mukendeka mu vindaka vyakuliseza-seza! 5Omo mukaziva kwimba kwa malupembo, na vindamba, na visanzi, na misambo, na tulyalya, na vyoshe vyakwimbisa vyeka vikaliwana amo nakwimba. Omo vaka-kwimba vakashangumuka, co yeni voshe mukakulama nakulemesa kamponya kaje kanemika Mwene Nevukaneza. 6Co munu woshe uje kakakulama nakulemesa kamponya, mwa vushunga aje vene vakamumbila mu litende lya tuhya.”
7Ngecivene, a simbu ije vene omo vazivile vyakwimbisa viimba, co vanu va mu mafuti oshe na miyati yoshe ya vanu na vanu vaka-kwendeka mu vindaka vyoshe vakulamene nakulemesa kamponya ka ngolinde kaje kemikile Mwene Nevukaneza.
Vakwenje vatatu va vaYunda vavaana mulonga wa kujeneka kwononoka
8Co vamo vaMbambilone vawanene vukovelelo vwakutengulukila vaYunda. 9Vendekele kuli Mwene Nevukaneza ngwavo, “Yove shukulu yoya ku myaka yoshe. 10Yove shukulu washikile lishiko ngwove omo vashangumuka kwimba, vanu voshe vapande kukulama nakulemesa kamponya ka ngolinde, 11co woshe uje kakulama nakulemesa kamponya, vanapande kumumbila mu litende lya tuhya. 12Oloni kuvali vaYunda vamo vaje vawaanene moko yakushika lifuti lya Mbambilone, Shandelaki, na Meshake, na Ambendenengo, vakevo shavo kwononoka lishiko lyove shukulu. Kuvesi nakulemesa njambi yove, nambe kukulama ku kamponya kaje kaunemika.”
13A simbu ije vene mwene waluvalele manene, washikile ngeci vaje vanalume vatatu vavanene kuli ikeye, co vavanenele. 14Mwene wendekele kuli vakevo ngwendi, “Shandelaki, na Meshake, na Ambendenengo, cinapu ca vushunga ngeci yeni munavyana kulemesa njambi yange, co lalo sheni kukulama nakulemesa kamponya ka ngolinde kaje kanjinemika ndi? 15Ngecivene, ololo, omo mukaziva kwimba kwa malupembo, na vindamba, na visanzi, na misambo, na tulyalya, na vyoshe vyakwimbisa vyeka, co kulameni nakulemesa kamponya. Nga sheni, co vakamyumbila mu litende lya tuhya. Kuma yeni munayongola ngweni kuli njambi weka lalo uje asa kumyamena ndi?”
16Co Shandelaki, na Meshake, na Ambendenengo vakumbulwile mwene ngwavo, “Yove shukulu, yetu kutwapandele kulyamena yetu vavenya embwe. 17Nga Njambi ou itwapangela asa kutwamena mu litende lya tuhya na ku nzili yove, co asa vene.#3:17 NGA NJAMBI OU ITWAPANGELA...ASA VENE: Nambe, nga mwa vushunga tuvyana kulemesa njambi yove nambe kukulama ku kamponya ka ngolinde kaje unemika, Njambi ou itwapangela asa kutwamena ku litende lya tuhya na ku nzili yove, co akalingamo vene. 18Oloni nga ikeye kasa, co yove shukulu zivuka ngwove mwa vushunga yetu kutwasa kulemesa njambi yove, co lalo kutwasa kukulama nakulemesa kamponya ka ngolinde kaje kaunemika.”
Vakwenje vatatu vavombila mu litende lya tuhya
19Co Nevukaneza waluvalele manene, cihanga cendi cafufutukile na vukalu ali Shandelaki, na Meshake, na Ambendenengo. Washikile vanu vendi ngeci vashambeye manene litende lya tuhya visimbu vitanu na vivali ngeci lishukume manene kutuvakana mulikashukuminamo visimbu vyoshe. 20Mwene washikile vanalume va nzili akati ka mashwalale vendi ngeci vakute vaje vakwenje vatatu nakuvombila mu litende lya tuhya. 21Ngecivene, vavakutile, oku vanazala vuzalo vwavo vwoshe, vikoveyo, na vikoveyo vyavilaja mavoko, na tukofwi, co vavombilile mu litende lya tuhya. 22Omwo lishiko lya mwene lyapwile lyakukola manene, co litende lya tuhya lyakele nakwezoka manene milangi, co milangi yenyekele vanalume vaje vombilile Shandelaki, na Meshake, na Ambendenengo mu litende lya tuhya. 23Ngecivene, Shandelaki, na Meshake, na Ambendenengo, vavombilile mukati ka litende lya tuhya anga vakukuta.
24Vwasi-vwasi Nevukaneza wakatukile wemanene nakulikomokela. Co wehwile vaka-kunangula vendi ngwendi, “Vanalume vangai twakutile nakuvombila mu litende lya tuhya? Kuma kuvapwile vatatu ndi?”
Vamukumbulwile ngwavo, “Eyo shukulu, vapwile vene vanalume vatatu.”
25Co wendekele ngwendi, “Omwo vikajo njinamono vanalume vawana valinakwendangana mu tuhya? Vakevo lalo kesi vakukuta embwe, co kuvesi nakusholoka ngwe valinakwenya embwe, co umo wavo wamuciwana nafu ngwe kangelo.”#3:25 KANGELO: Nambe, muna vinjambi, nambe, muna Njambi.
Nevukaneza ecela vanalume vatatu nakuvaka ku vukama
26Ngecivene, Nevukaneza waile ku cikolo ca litende lya tuhya, wasanene ngwendi, “Shandelaki! Meshake! Ambendenengo! Vasamba va Njambi wa Akamwa ya Akamwa! Tuukenimo!” Co aje vene vatuukilemo. 27Co vana va vimyene vyoshe, na vanguvulu, na vaka-kwimanena mu myela ya vanguvulu, na vaka-kunangula mwene valikungulwile nakwilula vaje vanalume kuvenyele ku tuhya, na vin̄ambu vyavo kuvyavavukile, na vuzalo vwavo kuvwenyele, nambe mivila yavo kuyanikile vwisi.
28Ngecivene, mwene wendekele ngwendi, “Shangazaleni Njambi ya Shandelaki, na Meshake, na Ambendenengo! Ikeye natumu kangelo kendi kwamena vanalume ava vaka-kumupangela nakumukulaela. Vakevo kuvononokele lishiko lyange, co valambwile myonyo yavo ngeci kesi vakulame nakulemesa njambi weka kuvanga Njambi yavo lika.
29“Ngecivene, njishika lishiko ngwange, munu woshe wa ku lifuti lika, nambe muyati uka, nambe endeka ndaka yeka vaje vakashaula Njambi ya Shandelaki, na Meshake, na Ambendenengo, vakamutetange vipuka-vipuka, co njuvo yendi vakayinyongese. Omwo kukwesi lalo njambi weka asa kwamena ngacije.”
30Asinoni mwene waakele Shandelaki, na Meshake, na Ambendenengo ku vukama mu lifuti lya Mbambilone kutuvakana akulivanga.
Currently Selected:
Ndanyele 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
