Ndanyele 1
1
VIN̄ANDA VYA NDANYELE NA VASAMBA VENDI (1:1–6:28)
Vakwenje vali mu mbanja ya Nevukaneza
1 #
2 Vim 24:1; 2 Miz 36:5-7 Mu mwaka wamucitatu omo Yehoyakime wapwile mwene wa mu Yunda,#1:1 YEHOYAKIME: Washwanene mu mwaka wa 609 kweta mu 598 BC. Mwene Nevukaneza wa Mbambilone walwisile Yelusalema nakuzengeleka nganda. 2#2 Vim 20:17-18; 24:10-16; 2 Miz 36:10; Isa 39:7-8 Shukulu Kalunga watavele Nevukaneza ngeci afungulule Mwene Yehoyakime nakwambata vivala vimo vya mu Njuvo ya Shukulu Kalunga. Co omo Nevukaneza welukile ku Mbambilone, wakaakele vije vivala vyakafungulwile mu mulili wakutulikila wa mu njuvo ya njambi yendi.
3Co mwene washikile Ashepenaze mwata wa mukulunu, ngeci aangule vamo akati ka vinzinda va vaIsalele vakwenje va ku naanga ya vumwene na ku cikota ca vakulunu va kasingimiko. 4Vakevo vanapande kupwa vavavwa akuvakenga, vakunyanyama, vaje vavalongesa mwamuvwa, vaka-mana mukulilongesa, vakujeneka kapenga ngeci vakapange mu lipela lya mwene. Co Ashepenaze avalongese kulava nakusoneka ndaka ya vaMbambilone. 5Ngecivene, mwene washikile lalo lishiko ngeci a litangwa na litangwa vanapande kuvana vyakulya na vinyu vya cifwa cimo ngwe vije vivalinakwana mwene na naanga yendi. Co omo myaka itatu inahu, vanapande kuvanena kuli mwene nakumupangela. 6Co akati ka vakwenje vaje vavaangwile akele Ndanyele, na Hananiya, na Mishaele, na Azaliya, voshe vapwile va ku muyati wa Yunda. 7Co uje mwata wa mukulunu wavalukile mazina amaha a vaMbambilone. Ndanyele wamulukile Mbeletesezale, Hananiya wamulukile Shandelaki, co Mishaele wamulukile Meshake, co Azaliya wamulukile Ambendenengo.
8Oloni Ndanyele wayongwele mu mbunge yendi ngeci kapandele kulijwalesa ikeye vavenya akulya vyakulya nakunwa vinyu vya vumwene, co walombele Ashepenaze, mwata wa mukulunu ngeci amukwase, 9Njambi walingisile Ashepenaze kukala na mema ku mbunge nakutetela Ndanyele. 10Oloni Ashepenaze walekele Ndanyele ngwendi, “Yange njili na lyova kuli shukulu yange mwene, ikeye washikile vimunapande kulya nakunwa, co nga yove kuukanunu ngwe vakweni vakwenje veka, co yange vakanjitapa mutwe.”
11Ngecivene, Ndanyele waile kuli muka-kunyunga uje yaakele Ashepenaze ngeci anyunge vaje vakwenje vawana. 12Co wendekele ngwendi, “Tweseke a matangwa likumi. Twane lika visapa-sapa tulye na mema tunwe. 13Asinoni ukatwesekese amo na vakwenje vaje valinakulya vyakulya vya vumwene, co mwoshe muukamwena mukemwo muukalinga netu.”
14Co uje muka-kunyunga watavele Ndanyele na vasamba vendi kuveseka a matangwa likumi. 15Omo matangwa likumi aje vavesekele ahwile, vanunile mwamuvwa, co vakele na nzili kutuvakana voshe vaje vakele nakulya vyakulya vije vyavashikile mwene ngeci vavilye. 16Ngecivene, uje muka-kunyunga walikelele kuvana vyakulya vya vumwene, co wavanene visapa-sapa.
17Ngecivene, Njambi waanene vaje vakwenje vawana mana nakuzivisisa na vutongwe mu vilongesa vyavo. Co lalo waanene Ndanyele mana akulumbununa vimona na vinjozi.
18Omo myaka itatu ije yemikile mwene yetele, Ashepenaze watwalele vaje vakwenje voshe kuli Nevukaneza. 19Co mwene wendekele navo voshe, kukwakele umo akati ka vakwenje voshe vaje uje wakele na mana ngeci mwa Ndanyele, na Hananiya, na Mishaele, na Azaliya. Ngecivene, vakwenje vaje vawana vapangelele mwene. 20Co mu vyuma vyoshe vya mana na vyakuzivisisa vije vyavehwile mwene, wavawanene ngeci vaje vakwenje vawana vakele na mana manene visimbu likumi kutuvakana vaka-kutaa nambe vaka-manseno va mu lifuti lyendi lyoshe. 21Co Ndanyele wakele mu mbanja ya vumwene noo Siluse mwene wa Pelesha wafungulwile Mbambilone.
Currently Selected:
Ndanyele 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
