Vilinga vya Miluwa 6

Vaangula vakwasi vatanu na vavali

1Munima yevi, omo vandongisi vakele nakupwa vavangi, kwakele vaYunda vaje vendekele ndaka ya ciNgiliki valingile vimata na vaYunda vaje vendekele ndaka ya ciHevelu. VaYunda vaje vendekele ndaka ya ciNgiliki vendekele ngwavo vifwile vavo kuvakele nakuvana vimbongo vya na litangwa na litangwa. 2Ngecivene, vaje miluwa likumi na vavali vasanene vaka-kukulaela voshe vendekele kuli vakevo ngwavo, “Kucitava twecele kwambulula lijwi lya Njambi ngeci tukenge a n̄anda ya vimbongo. 3Ngecivene, vakwetu, anguleni vanalume vatanu na vavali akati keni vaje vamuzivuka ngeci vanashulu na Munzinzime Wakujela vali na mana, tuvake ngeci vapange cipangi eci. 4Oloni yetu tukakala na simbu yakulombela nakupanga vipangi vyakwambulula.”

5Co mbunga yoshe vavwaelelele manene na viyongola vya miluwa, ngecivene, vaangwile Setefano, munalume washulile nakukulaela na Munzinzime Wakujela, na Filipu na Polokolase na Nikanole na Timoni na Palamenase na Nikolau kesi kaYunda wa ku Antyoke uje akulivanga watengulukile nakukava futisi ya vaYunda. 6Mbunga yemikile vaje vanalume ku mesho a miluwa, co vavalombelelele nakuvakambeka mavoko.

7Co lijwi lya Njambi lyashandokele. Co vungi vwa vandongisi mu Yelusalema vapwile vavangi, co mbunga yakama ya vaka-kukombelela vakulaelele.

Setefano vamukwata

8Co Setefano, mukushula na vivezikiso vya Njambi nakushula na nzili, walingile vizivukiso na vikomokeso vyakama akati ka vanu. 9Oloni vamulwisile vanalume vamo vapwile vaka-Sinangonge ya Vanalume Vakupatuka,#6:9 VANALUME VAKUPATUKA: VaYunda ava vapwile vindungo, oloni vavapatwile ku vundungo. (ngwe muje muvaitumbwile), muje mwakele vaYunda vakutunda ku Silene na ku Alekizandiliya. Vakevo na vaYunda vamo vatundile ku mitambela ya Silisiya na ku Asiya valingile vimata na Setefano. 10Oloni Munzinzime Wakujela waanene Setefano mana ngeci omo wendekele naumo wai wamuvindikile. 11Asinoni vaanene vanalume vamo lizika-kanwa ngeci vendeke ngwavo, “Tunamuzivi alinakwendeka majwi akushaula Mosesa na Njambi!” 12Co mu ngila eyi vene vashongangeyeye vanu na vakulunu na valongisi va majwi a Lishiko. Vakwatele Setefano nakumutwala ku Munga. 13Asinoni vanenele vanalume vamo vamuvangelele ngwavo, “Ou munalume simbu yoshe alinakuyeluwisa Njuvo ya Shukulu Kalunga yakujela na Lishiko lya Mosesa. 14Omwo tunamuzivi endeka ngwendi ou Yesu wa ku Nazaleta akasiwula Njuvo ya Shukulu Kalunga nakutengulula futisi yatwanene Mosesa!” 15Co voshe vatumbamene muje mu Munga mesho avo akengele ali Setefano, co vamwene ngeci cihanga cendi casholokele ngwe ca kangelo.

Currently Selected:

Vilinga vya Miluwa 6: MBB

Highlight

Copy