Vilinga vya Miluwa 4

Petulu na Yowano ku mesho a Munga

1Co Petulu na Yowano omo vakele nakwendeka na vanu omo vaka-kukombelela vamo, na mukulunu wa vaka-kunyunga Njuvo ya Shukulu Kalunga, na vaSanduki vamo vezile. 2Vaviililile manene omwo miluwa ava vavali vakele nakulongesa vanu ngwavo Yesu nasanguka ku vatsi, eci casholwele ngeci vatsi vakasanguka. 3Ngecivene, vavakwatele nakuvaka mu kamenga noo alikaki, omwo kwapwile cingwezi. 4Oloni vavangi vaje vazivile lijwi vakulaelele, co vungi vwa vanalume vapwile 5,000.

5Alikaki vantwama va vaYunda, na vakulunu, na valongisi va majwi a Lishiko vakungulukilile mu Yelusalema. 6Valiwanene amo na Anase Muka-kukombelela Wakama na Kayafase na Yowano na Alekizanda na voshe vaje vapwile vaka-naanga ya Muka-kukombelela Wakama. 7Co vemikile miluwa ku mesho avo vavehwile ngwavo, “Vati munalingi eci? Nzili yeyayo mulinayo? Nambe mu lizina lyeyajo munalingi cuma eci?”

8Asinoni Petulu akushula na Munzinzime Wakujela, wavakumbulwile ngwendi, “Yeni vantwama va vanu na vakulunu, 9nga mulinakutwihula lelo a vilinga vyavivwa vinalingiwa kuli munalume ou cilema na vati munu ou nakanguka, 10asinoni yeni voshe munapande kuzivuka, na vanu voshe va mu Isalele vanapande kuzivuka ngeci munu ou nemana ku mesho eni nakanguka mwamuvwa mu nzili ya lizina lya Yesu Kilistu wa ku Nazaleta, uje imwashukikile a cilindakano, uje yasangwile Njambi ku vatsi. 11#Mya 118:22 Yesu ikeye uje visoneka vyendekele ali ikeye ngwavyo,

‘Limanya lije limwayeluwisile yeni vaka-kutunga

likelyo linapu lya seo yakama kutuvakana oshe.’

12Kutwasa kuwana kwovoka muli weka lalo embwe, omwo kukwesi lizina lyeka muno mu kaye lyanaana Njambi ku vanu litunapande kwovokelamo.”

13Vaka-Munga vakomokele omo vamwene kusimpa kwa Petulu na Yowano nomu vavamwene ngeci vapwile vanu vangoco vakujeneka kulilongesa. Co vavanongonwene ngeci vakevo vakele amo na Yesu. 14Oloni akumona uje munu nakanguka nemana amo na Petulu na Yowano, kuvasele kwendeka cuma cimo. 15Ngecivene, vavalekele vatuuke mu njuvo ya Munga, co vashangumukile kulyendekesa akati kavo ngwavo, 16“Vika tulinga na ava vanalume? Omwo munu woshe mu Yelusalema nazivuka ngeci eci cizivukiso caciha civanalingi, co kutwasa kucivyana. 17Oloni kuvindika cuma eci ngeci kesi citsimane lalo akati ka vanu, tunanguleni ava vanalume ngeci kesi vendeke lalo kuli munu mu lizina lya Yesu.”

18Ngecivene, vavasanene mukati vavashikile ngeci kesi vendeke nambe kulongesa lalo mu lizina lya Yesu. 19Oloni Petulu na Yowano vavakumbulwile ngwavo, “Yeni vavenya waneni cuma muka cacivwa ku mesho a Njambi, kwononoka yeni nambe kwononoka Njambi. 20Omwo kutwasa kwoloka kwendeka vyuma vije vitwamono nevi vitwazivi.” 21Ngecivene, Munga ije vavanangwile manene, co vavecelele. Vamwene ngeci capwile cacikalu kuvanyanyamesa, omwo vanu voshe vashangazalele Njambi a vije vyalingiwile. 22Omwo uje munalume ivalingilile cikomokeso cakumukangwisa wakele na myaka makumi awana.

Vaka-kukulaela valomba a kusimpa

23Omo Petulu na Yowano vavecelele, velukile kuli vasamba vavo nakuvaleka vije vivendekele vakulunu va vaka-kukombelela na vakulunu. 24#Kut 20:11; Neh 9:6; Mya 146:6 Co omo vaka-kukulaela vazivile vyuma evi, voshe vakungulukile amo nakulombela kuli Njambi ngwavo, “Shukulu na Ishamatanga wa lilu na asi, na mema a kalunga na vyoshe vilimo! 25Yove wendekele na Munzinzime Wakujela muli kukulwila yetu Ndaviti, ngamba yove, omo ikeye wendekele ngwendi,

‘Omwo vika ava kesi vaYunda valuvalele?

Omwo vika vanu vatumba matumbe angoco?

26 # Mya 2:1-2 Vimyene va ano asi valivwaeselele cimweja vakevo vavenya,

na vaka-kushwana valikungulwile amo nakutumba matumbe amavi

akulwisa Shukulu Kalunga na Wakuvwavesa.’

27 # Mat 27:1-2; Mak 15:1; Luk 23:1,7-11; Yow 18:28-29 “Omwo mwa vushunga vene Helonde na Pontiyu Pilato valikungulwile amo mu nganda ino amo na ava kesi vaYunda na vanu va Isalele nakulwisa Yesu, Ngamba yove wakujela uje iwavwavesele. 28Valikungulwile nakulinga vyoshe vije viwashakele laja na nzili yove na cizango cove ngeci vikalingiwe. 29Co ololo, Shukulu Kalunga, kenga muvali nakutushungwiya, co twane kusimpa yetu vangamba vove, ngeci twambulule lijwi lyove. 30Sholola livoko lyove mukukangwisa, co tava ngeci vikomokeso na vizivukiso vavipange mu lizina lya Ngamba yove wakujela Yesu.”

31Co omo vamanesele kulombela, mwela uje vakungulukilile wajajele. Co voshe vashulile na Munzinzime Wakujela, co vambulwile lijwi lya Njambi nakusimpa.

Vaka-kukulaela valipangezela vufuko vwavo

32 # Vil 2:44-45 Mbunga ya vaka-kukulaela vakele na mbunge imolika na viyongola vimolika, naumo wai watumbwile vyuma vyendi vije vyafukile kupwa vyendi, oloni valipangezelele vyoshe vyavo vije vivakele navyo. 33Co na nzili yakama miluwa vambulwile vukaleo vwakusanguka kwa Mwene Yesu, co voshe Njambi wavavezikisile na vivezikiso vyakama. 34Kukwakele umo akati kavo wajenekele cuma. Omwo vaje vakele na mahya nambe vinjuvo vavilandesele, co vanenele vije vimbongo vivatambwile ku vyuma vije valandesele, 35co vavyanene kuli miluwa, co vije vimbongo vavipangelele ku munu na munu ngwe kukujeneka kwendi.

36Co Yosefa, kaLevi uje wasemukilile mu Sepulasi, uje miluwa vamutumbwile ngwavo Mbanambasa (kulumbunuka ngwavo, “Muka-kuzembeleka”), 37walandesele lihya lyendi, co wanenele vimbongo, wavyanene kuli miluwa.

Currently Selected:

Vilinga vya Miluwa 4: MBB

Highlight

Copy