1 Timateo 4

Valongisi va makuli

1Munzinzime alinakwendeka nakutungukwa ngwendi vanu vamo a simbu yakukotoka vakaseze kukulaela kwavo, vakononoka minzinzime ya makuli nakukavangeya vilongesa vya minzinzime yakujwala. 2Vilongesa evi vilinakutunda kuli vanu vaka-kuseveleka na vaka-makuli, vaje vitaku-taku vyavo vinatsi, ngwe vyakwenyeka na cikuvo ca tuhya. 3Vanu va cifwa cangacije valinakulongesa ngwavo kesi mwamuvwa kwambata nakulya vyakulya vimo. Oloni Njambi ikeye watangele vyakulya evi ngeci vavilye, omo munalombela lilombelo lyakukandelela, kuli vaje vaka-kukulaela vaje vanete akuzivuka vushunga. 4Omwo vyuma vyoshe vije vyanatanga Njambi vinapu vyavivwa, nacimo twasa kuvyana cai, oloni vyoshe twasa kuvitambula na lilombelo lyakukandelela, 5omwo vanavikundika a lijwi lya Njambi na a kulombela.

Ngamba wamuvwa wa Kilistu Yesu

6Nga ulongesa vakweni vyuma evi, ukapwa ngamba wamuvwa wa Kilistu Yesu, ulinakulilisa yove vavenya vyuma vya munzinzime a lijwi lyakukulaela nakulongesa kwa vushunga kuje ulinakukavangeya. 7Oloni litenge ku visimo vyangoco, vije kuvyapandelemo kuvyambulula. Linyunge yove vavenya mukuyoya kwa vu Njambi. 8Omwo akupangesa muvila cili na seo kamandondo, oloni kupangesa vya munzinzime vili na seo yakama manene mu vyuma vyoshe, omwo muvuvali vwavyo vikulaesa kuyoya kwa lelo nakuyoya kwa kulutwe. 9Evi vinapu vyendeka vya vushunga, ngeci tuvitambule mwamuvwa nakuvikulaela. 10Omwo tuundangana nakupanga manene na nzili, omwo tunaaka cinyangavili cetu muli Njambi wakuyoya, uje napu Muyoyesi wa vanu voshe, vunene kuli vaje vakulaela.

11Vashike nakuvalongesa vyuma evi. 12Kesi utave munu umo ashaule vukwenje vwove, oloni unapande kupwa cimweso kuli vaka-kukulaela mu endekesi yove, mu futisi yove, mu cizemo cove, mukukulaela kwove na mukujela kwove. 13Ana simbu yove kukulava lijwi kuli vanu na kukwambulula na kukulongesa, noo njikaija. 14Kesi wecele vwana vwa munzinzime vuje vuli muli yove, vuje vuvakwanene omo vaka-kwimanena vendekele nomo vakulunu vakambekele mavoko avo ali yove. 15Panga manene a vyuma evi, co lilambule yove vavenya ku vyuma evi, ngeci vipangi vyove visholoke kuli voshe. 16Linyunge yove vavenya, co lalo ilula vilongesa vyove. Twalao nakulinga vyuma evi, omwo nga yove ulinga vyuma evi, ukalyamena yove vavenya na vaje vakakutolilila.

Currently Selected:

1 Timateo 4: MBB

Highlight

Copy