1 Mizimbu 28
28
Mashiko a Ndaviti a Njuvo ya Shukulu Kalunga
1Mwene Ndaviti washikile vamyata va mu Isalele voshe kukungulukila mu Yelusalema. Ngecivene, vamyata voshe va miyati, na vamyata vaka-kwendesa vipangi vya vumwene, na vantwama va vikota, na vaka-kunyunga vufuko, na vimuna vaje vafukile mwene na vana vendi, na vamyata voshe va mu lipela, na vantwama va mashwalale, na vanu va vulemu, vakungulukile mu Yelusalema.
2Mwene Ndaviti wemanene kulutwe lwavo, wendekele kuli vakevo ngwendi, “Vavushoko vwange, njitolilileni mwamuvwa. Njashakele kutungila Cikasa ca Cikumiiyo njuvo yakukola ije inapu litanda lya Shukulu Kalunga Njambi yetu. Njalivwaeselele cimweja vyakutungisa Njuvo ya Shukulu Kalunga mukumusingimika, 3oloni nanjivindika kulinga ngacije, omwo yange njapwile nji lishwalale, co njinatsii vanu vavangi manene. 4Shukulu Kalunga, Njambi ya Isalele, wanjangwile yange na vatekulwila vange kushwana Isalele ku myaka yoshe. Co ikeye waangwile muyati wa Yunda kupwa vantwama, muli Yunda lalo waangwilemo muyati wa tate. Co mu naanga eyi yoshe camuvwaesele ku mbunge kwangula yange, nakunjipwisa mwene wa Isalele yoshe. 5Co ikeye wanjanene vana vavangi manene, co vakevo ava voshe waangwileo Solomoni kushwana Isalele, vumwene vwa Shukulu Kalunga.
6“Shukulu Kalunga wendekele kuli yange ngwendi, ‘Munove Solomoni ikeye akanjitungila Njuvo. Njinamwangula kupwa munange, co yange njikapwa nji ishe. 7#2 Sam 7:1-16; 1 Miz 17:1-14 Co njikakolesa vumwene vwendi ku myaka yoshe, nga ikeye akononoka mwamuvwa mashiko ange oshe, nakushika kwao ngwe mwalinakulinga ololo.’
8“Ngecivene, ololo, vanu vange, ku mesho a Njambi yetu na cikungulukilo coshe eci ca Isalele, vanu va Njambi, njimishika ngeci munyanyame nakwononoka vyuma vyoshe vije vyanatushiki Shukulu Kalunga Njambi yetu, ngeci mushwane lifuti eli lyalivwa, ngeci mukalikundike kuli vana veni ku visemwa vyeni vyoshe.”
9Co kuli Solomoni wendekele ngwendi, “Munange, njikushika ngwange kavangeya Njambi ya isho, nakumupangela na mbunge yoshe, co likundike na cizango ca mana ove. Ikeye azivuka viyongola vyetu vyoshe na mashungu avyo. Nga umushakezeka, co ukamuwana, oloni nga umuseza, co akakujenjuka ku myaka yoshe. 10Zivuka ngeci Shukulu Kalunga nakwangula umutungile Njuvo yendi yakujela. Kolesa ngeci uyitunge.”
11Ndaviti waanene Solomoni vutumbe vwoshe vwakutunga Njuvo ya Shukulu Kalunga, na milili yakutulikila, na milili ikwavo, na Mwela Wakujela Manene, muje mwakusambesela vuvi. 12Co lalo wamwanene matumbe oshe aje ayongwele a vipango na milili ije yavizengelekele, na milili yakutulikila vivala vya mu Njuvo ya Shukulu Kalunga, na vwana vwakukundika kuli Shukulu Kalunga. 13Co Ndaviti lalo wamwanene matumbe aali vaka-kukombelela, na vaLevi akupanga vipangi vyavo, akupanga vipangi vya mu Njuvo ya Shukulu Kalunga, nakunyunga mwamuvwa vivala vyoshe vya mu Njuvo ya Shukulu Kalunga. 14Co Ndaviti waanene mashiko a siliva na ngolinde ingai ivanapande kupangesa akulinga vivala vya mu Njuvo ya Shukulu Kalunga, 15na a ndeya imo na imo amolika na citumbikilo ca ndeya, 16na vimesa vya siliva, na a mesa ya ngolinde imo na imo, aje avakele nakwaka mikasha ya makende akukombelela kuli Njambi. 17Ikeye lalo waanene mashiko akumona ngeci ngolinde yakujela ingai ivanapande kupangesa vinguto vya mishomo, na malonga, na vinjava, co lalo siliva na ngolinde ingai ivanapande kupangesa vimbashiya, 18co na ngolinde yakujela ingai ivanapande kupangesa mutula wakwenyekela insense, na yakupangesa litemba lya vakelumbi va mambava vaje vajangumwine mambava avo a Cikasa ca Cikumiiyo ca Shukulu Kalunga. 19Mwene Ndaviti wendekele ngwendi, “Vyoshe evi vili mu vutumbe vuvasonekele ngwe ku mashiko aje anjanene vavenya Shukulu Kalunga ngeci njivilinge.”
20Mwene Ndaviti wendekele kuli munendi Solomoni ngwendi, “Pwa muka-kukolesa nakulisingimika. Shangumuka vipangi, co kesi utave cuma cimo cikuvindike embwe. Shukulu Kalunga Njambi, uje injipangela, akakala amo nove. Ikeye kakakuseze embwe, oloni akakala amo nove noo ukamanesa kupanga vipangi vya a Njuvo yendi. 21Vaka-kukombelela na vaLevi vanavaana vipangi vyakupanga mu Njuvo ya Shukulu Kalunga. Co vaka-kupanga voshe vaje vali na vutongwe vwakuliseza-seza valinakushaka kukukwasa, na vanu voshe na vantwama vavo vakakavangeya lishiko lyove.”
Currently Selected:
1 Mizimbu 28: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
