Lucas 5
5
Jaꞌ Noꞌ Pescado Jix Michꞌcha Yin Milagroal*
(Mateo 4:18-22; Marcos 1:16-20)
1Jaꞌ yet junel jix too Jesús stiꞌ jaꞌ mar Genesaret.#5:1 Jaꞌ Genesaret, junxa sbꞌi yu mar Galilea. Ecꞌal mac jix syambꞌa sbꞌa yin Naj tituꞌ. Caw chi switzꞌle oc sbꞌa ebꞌ yin Naj, yutol chi yoche ebꞌ chi yabꞌ skꞌane Dios. 2Jix yilon Jesús, ey caabꞌ barco eyecꞌ stiꞌ jaꞌ tuꞌ. Cꞌam yaaw teꞌ eyoctoj yul, yutol lalan xꞌaon wan xim ebꞌ chi mitxꞌon pescado. 3Yuxan jix octoj Naj yul jun teꞌ yet naj Simón. Catuꞌ jix yalon tet naj, tol chi sjitztoj sbꞌa ebꞌ niꞌojxa bꞌey naat yich jaꞌ. Jix lawi tuꞌ xin, jix ey chotan Jesús tuꞌ. Jaꞌ tituꞌ jix cuywatej tet ebꞌ ánima tuꞌ. 4Jix lawi scuywa tet ebꞌ xin, catuꞌ jix yalon tet naj Simón tuꞌ jaxca tiꞌ:
—Cu jitzwej toj cu bꞌa bꞌey naat yich jaꞌ. Jaꞌ tituꞌ oj je yaeytoj je txim mitxꞌbꞌal pescado tiꞌ, ẍi Jesús tet ebꞌ.
5—Jaach Cuywam, masanil cꞌal akꞌbꞌalil maꞌi, jix kakꞌle jon, ma kiꞌ jon. Yutol jaach cha walaꞌ, oj ka eytoj cu txim tiꞌ junelxa, ẍi naj Simón tet Jesús.
6Jaꞌ yet jix yaon eytoj xim ebꞌ tuꞌ, manxa jantajoj noꞌ jix michꞌchai. Jix cꞌoli snicꞌchatoj yul-laj sat xim ebꞌ tuꞌ yu noꞌ. 7Jix yakꞌon skꞌabꞌ ebꞌ tet wanxa ebꞌ yetbꞌi bꞌey junxa teꞌ barco, yet watxꞌ chi tit ebꞌ colwa stokꞌon atej ebꞌ, jix yakꞌon no teꞌ barco tuꞌ ebꞌ scaabꞌil yu noꞌ. Ian chi too teꞌ yich jaꞌ yu yalil noꞌ. 8Jaꞌ yet jix yilon naj Simón Pedro jun tuꞌ, jix ey kaan sattaj Jesús. Jix yalon tet:
—Jaach Cuywam, cꞌam mi chach el jin cꞌatan an, yutol jain tiꞌ, caw penawom jin an, ẍi naj tet Jesús.
9Queytuꞌ jix yute yalon jaxca tuꞌ, yutol caw jix qꞌueya scꞌul naj sicꞌlebꞌil. Jacꞌalaꞌ ebꞌ yetbꞌi yul sbarco naj, caw jix qꞌueya scꞌul ebꞌ yilon noꞌ pescado tuꞌ. 10Yetoj pax naj Jacobo cꞌal naj Juan, ebꞌ naj scꞌaal naj Zebedeo, ebꞌ yetbꞌi naj Simón tuꞌ, caw jix qꞌuey pax a scꞌul ebꞌ yiloni. Jix yalon Jesús tet naj Simón jaxca tiꞌ:
—Manche jaach xiwi. Jaxca jix ja wute ja mitxꞌon noꞌ pescado tiꞌ, jaxca tuꞌ, oj ja wute ja wiꞌontej ebꞌ ánima ey jin an, ẍi Jesús tet naj Simón.
11Jaxa yet jix apni ebꞌ stiꞌ jaꞌ yetoj teꞌ barco tuꞌ xin, jix sbꞌejoncan masanil stzettaj yetal ebꞌ. Catuꞌ jix oc tzajan ebꞌ yintaj Jesús tuꞌ.
Jaꞌ Naj Yaꞌey Yu Lepra Jix Waꞌxi Can Scꞌul
(Mateo 8:1-4; Marcos 1:40-45)
12Jaꞌ yet junel, yet eyecꞌ Jesús bꞌey jun conobꞌ, jix apni jun winaj scawilal Jesús. Caw yaꞌey sicꞌlebꞌil yu jun yaꞌbꞌil chi kꞌaꞌtoj ánima yu, lepra* sbꞌi. Jaꞌ yet jix yilon yin Jesús naj, jix ey kaanoj, catuꞌ jix ey noan naj sat txꞌotxꞌ sattaj Jesús. Jix oc tean naj yin. Jix yalon naj jaxca tiꞌ:
—Jaach Cuywam, ta chi yal ja cꞌul, chi skeꞌ chin ja wakꞌcan waꞌxoj an, ẍi naj tet Jesús.
13Catuꞌ jix sbꞌatxbꞌan oc skꞌabꞌ Jesús yibꞌan naj tuꞌ:
—Chi yal jin cꞌul, tol chach wakꞌcan waꞌxoj, ẍi Jesús tet naj. Jix lawi cꞌal yalon jun tuꞌ, catuꞌ jix taj wan yaꞌbꞌil tuꞌ yin naj. 14Catuꞌ jix cam yalon Jesús tet naj jaxca tiꞌ:
—Manche ja wal tet ánima. Asiꞌ txꞌox ja bꞌa tet naj yakꞌomal xaambꞌal tet Dios, catuꞌ cha wakꞌon ja saꞌbꞌeal tet Dios, jaxca yalon can sley Moisés. Jaxca tuꞌ oj yun xeclo eloj tol jix jaach waꞌxi, ẍi Jesús tet naj.
15Caw jix el skꞌumal Jesús tuꞌ xol ánima. Yuxan ecꞌal ebꞌ jix syambꞌa sbꞌa yin Jesús. Chi yoche pax ebꞌ chi waꞌxi can scꞌul yin tzettaj yaꞌbꞌilal chi ion ebꞌ. 16Jal Naj Jesús xin, chi bꞌet cꞌal bꞌey cꞌam ánima. Jaꞌ tituꞌ jix bꞌet txaloj.
Jix Waꞌxi Can Jun Naj Sicbꞌinaj El Smimanil
(Mateo 9:1-8; Marcos 2:1-12)
17Jaꞌ yet jun cꞌual, jix cuywa Jesús tet ebꞌ ánima. Ey wan ebꞌ naj Fariseo* chotan ey tituꞌ yetoj wan ebꞌ cuywam yin sley Moisés.* Jaꞌ bꞌey junjun conobꞌ yul yet Galilea yetoj yul yet Judea jix tit ebꞌ. Ey pax ebꞌ jix tit bꞌey Jerusalén. Caw jix xꞌoxel yipal Dios yin Jesús tituꞌ yet jix yakꞌon waꞌxoj scꞌul ebꞌ yaꞌey. 18Jaꞌ yet lalan scuywa tuꞌ, jix apni jaywan winaj, yetbꞌi oc ebꞌ jun winaj sicbꞌinaj el smimanil. Bꞌatxbꞌil oc yu ebꞌ sat bꞌatxbꞌal. Chi yoche ebꞌ chi octoj yetoj naj yul na, catuꞌ chi stelbꞌan ey ebꞌ sattaj Jesús. 19Caw ma pax skeꞌ yoctoj ebꞌ yetoj naj yutol caw nonaj yul na tuꞌ yu ánima. Yuxan jix atoj ebꞌ yibꞌan ẍumuc spananil na. Catuꞌ jix sjolontoj ebꞌ. Catuꞌ jix yaon eytoj tꞌununoj naj ebꞌ sat bꞌatxbꞌal xol ebꞌ ánima. Jix ey apnoj naj sattaj Jesús. 20Jaꞌ yet jix yilon Jesús tol jix yaoc scꞌul ebꞌ yin, jix yalon Jesús tet naj sicbꞌinaj el smimanil tuꞌ jaxca tiꞌ:
—Wuẍtaj, tol chi lawi can el ja penail, ẍi Jesús tet naj.
21Jaꞌ ebꞌ cuywam yin sley Moisés, cꞌal ebꞌ Fariseo, jix snaꞌ ebꞌ jaxca tiꞌ: “¿Mactxequel jun winaj tiꞌ, yuxan chi xꞌem cajtza scꞌul Dios? ¿Tumi ey junoj mac chi skeꞌ yakꞌon mimancꞌulal yin cu penail? Asanne Dios,” ẍi ebꞌ yin snaꞌbꞌal.
22Jal Jesús xin, yotaj xa tzet lalan snaꞌon ebꞌ. Yuxan jix yal jaxca tiꞌ:
—¿Tzet yuxan che naꞌ wan tiꞌ jaxca tiꞌ? 23¿Bꞌeytet junoj yel subꞌo yali che naꞌ? Ta cu chi jaxca tiꞌ: “Tol jix lawi can ja penail,” ma tol, “aan waanoj, bꞌeyan”. 24Jaꞌ tinaniꞌ, oj jin txꞌoxel ey jex, tol jain Akꞌbꞌil Wopiso yu Dios xol ebꞌ ket animail tiꞌ an,* ey wip wakꞌon can lawoj spenail ánima yul yibꞌankꞌinal tiꞌ an, ẍi Jesús tet ebꞌ.
Jix lawi tuꞌ xin, catuꞌ jix yalon tet naj sicbꞌinaj el smimanil tuꞌ jaxca tiꞌ:
—Chi wal ey jaach an, aan waanoj, Iꞌa ja bꞌatxbꞌanil tiꞌ, paxantoj bꞌey ja na, ẍi Jesús tet naj.
25Yet xacꞌal jun txolan tuꞌ, jix a waan naj sattaj ebꞌ, jix yiꞌon a sbꞌatxbꞌal naj bꞌey telan ey tuꞌ, catuꞌ jix paxtoj naj bꞌey sna. Lalan yalon watxꞌ kꞌane naj tet Dios yet lalan sbꞌey naj tuꞌ. 26Yuxan caw jix qꞌueya scꞌul masanil ebꞌ jix ilon tuꞌ, jix yalon pax watxꞌ kꞌane ebꞌ tet Dios tuꞌ. Caw chi xiw pax ebꞌ. Yuxan jix yal ebꞌ jaxca tiꞌ:
—Jaꞌ wan tzetyetal lalan kilonwej yet jun cꞌu tiꞌ, cꞌamto bꞌey chi kil jaxca tiꞌ, ẍi ebꞌ.
Yet Jix Awtele Naj Leví Yin Yoc Cuywomal
(Mateo 9:9-13; Marcos 2:13-17)
27Jix lawi tuꞌ xin, catuꞌ jix too Jesús. Yet lalan sbꞌeyi jix yilon yin jun tejom el toolabꞌal, Leví sbꞌi naj.#5:27 Jaꞌ naj Leví chi yij pax naj Mateo bꞌey Evangelio Mateo 9:9. Chotan ey naj bꞌey chi tejwi el toolabꞌal tet ánima.
—Ocan jin cuywom oj an, ẍi Jesús tet naj.
28Jix a linan naj, catuꞌ jix sbꞌejoncan masanil stzettaj yetal. Catuꞌ jix ẍaꞌon el yich yecꞌ cꞌal cuywoj yintaj Jesús tuꞌ.
29Jaꞌ naj Leví tuꞌ, jix yakꞌ waꞌxoj jun miman loꞌbꞌe bꞌey sna, yet watxꞌ chi low Jesús yetoj. Ecꞌal ebꞌ tejom el toolabꞌal yetoj wanxa ánima jix oc chotan yin smeẍa naj yetoj ebꞌ. 30Jal ebꞌ Fariseo* xin, yetoj ebꞌ cuywam yin sley Moisés,* pena tzet jix yal ebꞌ yin ebꞌ scuywom Jesús tuꞌ. Jix yalon ebꞌ jaxca tiꞌ:
—¿Tzet yuxan chex low yetoj ebꞌ tejom el toolabꞌal cꞌal yetoj wanxa ebꞌ pena sbꞌeybꞌal tiꞌ? ẍi ebꞌ tet ebꞌ cuywom.
31Jix yalon Jesús jaxca tiꞌ:
—Cꞌam yopiso junoj anwam yu ebꞌ watxꞌ scꞌul, asan ebꞌ yaꞌey, jaꞌ ebꞌ tuꞌ ey yopiso yu. 32Man yu oj wawten ebꞌ watxꞌ sbꞌeybꞌal an, yuxan jix jin jul an. Yu cꞌal ebꞌ pena sbꞌeybꞌal, yuxan jix jin jul an, yet watxꞌ chi snaꞌ sbꞌa ebꞌ yin spenail, ẍi Jesús tet ebꞌ.
Cꞌam Chi Ẍaꞌle Sbꞌa Icham Bꞌeybꞌale Yetoj Acꞌ Bꞌeybꞌale
(Mateo 9:14-17; Marcos 2:18-22)
33Jix lawi tuꞌ xin, jix yalon ebꞌ tet Jesús jaxca tiꞌ:
—Jaꞌ ebꞌ scuywom naj Juan Bautista yetoj ebꞌ scuywom ebꞌ Fariseo,* ecꞌal el chi yijle nocha sbꞌa ebꞌ catuꞌ chi txali ebꞌ. Jal ebꞌ ja cuywom jaach tiꞌ, ¿tzet yuxan, tucꞌal chi low ebꞌ catuꞌ chi yuqꞌuen ebꞌ? ẍi ebꞌ tet Jesús.
34Catuꞌ jix takꞌwi Jesús:
—Kꞌinaloj ey junoj nupil chi oc tinaniꞌ. Jaꞌ ebꞌ awtebꞌil bꞌey jun nupil tuꞌ, ¿tumi oj skeꞌ tol man oj low ebꞌ yet eyecꞌ naj lalan snupi tuꞌ yetoj ebꞌ? 35Jaꞌ yet manxa eyoj ecꞌ naj, jatuꞌ cꞌamxa chi low ebꞌ, ẍi Jesús tet ebꞌ.
36Catuꞌ jix yalontej junxa kꞌane tet ebꞌ:
—Cꞌam junoj jon chi cu lotꞌel niꞌoj yin junoj cu acꞌ pichil catuꞌ chi kaon oc snipiloj junoj xil pichile. Ta ey bꞌey queytuꞌ chi kute xin, chi ketne el an acꞌ tuꞌ. Yetoj pax oj, man watxꞌoj yili an xil tuꞌ yu an acꞌ snipil tuꞌ. 37Yetoj pax oj, cꞌam mac chi aon ey vino tol to chi waꞌxi yul junoj icham neet tzꞌuum,#5:37 Jix stzꞌisey stzꞌuumal noꞌ ebꞌ sneetal oj vino. Jaꞌ yet chi chꞌibꞌa vino tuꞌ, catuꞌ chi nicꞌcha wan icham neet tuꞌ yu, yutol caw ey yip. Yuxan asanne acꞌ tzꞌuum chi skꞌan ebꞌ yetoj acꞌ vino. yutol jaꞌ yet chi chꞌibꞌa jun vino tuꞌ, chi nicꞌchatoj noꞌ neet tzꞌuum tuꞌ yu. Catuꞌ tucꞌal chi etex el vino tuꞌ, cꞌal noꞌ tzꞌuum tuꞌ. 38Yuxan, asan yul acꞌ tzꞌuum chi ey wan vino tol to chi waꞌxi tuꞌ, yet watxꞌ cꞌam cꞌal junoj tucꞌal chi etex eloj. 39Yetoj pax oj, jaꞌ mactxequel jix uqꞌuen vino eyxa swaꞌxi, cꞌam chi yoche jun tol to chi waꞌxi tuꞌ. Catuꞌ chi yalon jaxca tiꞌ: “Jaꞌ wan peyxa taxa, yel watxꞌ,” ẍi ebꞌ, ẍi Jesús.
Currently Selected:
Lucas 5: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
