Lucas 13

Sowalil Chi Cu Naꞌ Cu Bꞌa Yin Cu Penail

1Jaꞌ yet jun tiempoal tuꞌ, ey wan ebꞌ jix apni scꞌatan Jesús. Jix yalontej ebꞌ skꞌaneal tzet utbꞌil jix yun yakꞌle cam wan ebꞌ a Galilea yu naj Pilato, yet lalan yakꞌon wan xaambꞌal ebꞌ tet Dios. 2Jix yalon Jesús tet ebꞌ jaxca tiꞌ:

—¿Tzet yuxan queytuꞌ jix utele ebꞌ a Galilea tuꞌ che naꞌ? ¿Yu mi tol yel xacꞌal pena sbꞌeybꞌal ebꞌ yintaj yet conobꞌ tuꞌ? 3Jain chi wal ey jex, cꞌamaj. Jal jex jaex tiꞌ, ta cꞌam che naꞌ je bꞌa yin je penail, oj jex cam je masanil jaxca ebꞌ tuꞌ. 4Naꞌwejtej tol ey 18 ebꞌ jix cam bꞌey Siloé tuꞌ, yet jix eyqꞌuey jun na miman steel yibꞌan ebꞌ. ¿Tzet yuxan queytuꞌ jix yun ebꞌ che naꞌ? ¿Yu mi tol caw pena sbꞌeybꞌal ebꞌ yintaj ebꞌ yet a Jerusalén ebꞌ tuꞌ? 5Jain chi wal ey jex, cꞌamaj. Jal jex jaex tiꞌ, ta cꞌam che naꞌ je bꞌa yin je penail, oj jex cam je masanil jaxca ebꞌ tuꞌ, ẍi Jesús tet ebꞌ.

Skꞌaneal Jun Teꞌ Higo Cꞌam Sat

6Catuꞌ jix yalontej Jesús tuꞌ jun kꞌane tiꞌ tet ebꞌ:

—Jaꞌ junel ey jun winaj, ey jun steꞌal higo* awbꞌil yu sat xꞌotxꞌ. Jix too yiloni ta ey sat teꞌ. Jaxa yet jix apni tuꞌ, cꞌam junoj sat teꞌ jix ilcha yu. 7Jix yalon tet naj chi mulna sat xꞌotxꞌ tuꞌ jaxca tiꞌ: “Ilaꞌla, oxebꞌxa abꞌil cꞌal cꞌoli wilon jun teꞌ tiꞌ an. Cꞌam cꞌal junoj sat chi wiꞌel an. Yuxan tzokꞌaoj. Naꞌbꞌacꞌal majbꞌil el txꞌotxꞌ tiꞌ yu,” ẍi naj. 8Jix yalon naj ilom mulnail tuꞌ tet naj jaxca tiꞌ: “Patrón, cꞌamto chi cu tzokꞌa teꞌ yet jun abꞌil tiꞌ. Oj wakꞌle jin kꞌuon cꞌuumbꞌoj txꞌotxꞌ yich, catuꞌ oj waon oc yabonoal. 9Ta oj satnoj, watxꞌ chi yal tuꞌ. Ta cꞌam chi satni xin, oj cu tzokꞌon a jaxca cha wal tuꞌ,” ẍi naj tet spatrón.#13:9 Ey bꞌey chi oc teꞌ higo yin txꞌoxbꞌaniloj sconobꞌal ebꞌ Israel.

Ix Ix Jix Waꞌxi Can Scꞌul Yu Jesús Yet Scꞌual Xewilal

10Jaꞌ yet jun scꞌual xewilal ebꞌ Israel jix octoj Jesús yul snail sculto ebꞌ yet Israelal. Jix cꞌoli scuywa snan xol ebꞌ. 11Ey jun ix ix eyecꞌ tituꞌ, 18 abꞌil xa yaꞌ cꞌal ey ix yu jun pena espíritu. Eynaj can locan snan ix yu. Cꞌamxa chi jichlo a linan ix. 12Jaꞌ yet jix yilon Jesús tol eyecꞌ ix, jix awteletej ix yu Naj scꞌatan. Jix yalon Naj tet ix jaxca tiꞌ:

—Txo ix, tol chach waꞌxi yin jun ja yaꞌilal tiꞌ wu an, ẍi Jesús tet ix.

13Catuꞌ jix sbꞌatxbꞌan oc skꞌabꞌ Jesús yibꞌan ix. Yet jun txolan tuꞌ, jix jichlo can snan ix. Jix cꞌoli yalon watxꞌ kꞌane ix tet Dios. 14Jaꞌ naj yaawil snail culto tuꞌ, jix tit sjowal naj, yutol jaꞌ yet scꞌual xewilal jix waꞌxi can scꞌul ix yu Jesús tuꞌ. Yuxan jix yal tet ebꞌ ánima yaman ecꞌ tuꞌ jaxca tiꞌ:

—Wajebꞌne cꞌu smoo chi cu mulna yul semana. Jaꞌ yin wajebꞌ cꞌual tuꞌ, yal cꞌal tzet cꞌualil chi skeꞌ je jul je yakꞌon waꞌxoj can je cꞌul. Man pax smoo oj chi akꞌle can waꞌxoj je cꞌul yet scꞌual xewilal tiꞌ, ẍi naj tet ebꞌ masanil.

15Jix yalon Naj Kaawil tuꞌ tet naj jaxca tiꞌ:

—Jaꞌ Jaach tiꞌ, caw caabꞌ sat jaach. Ta ey junoj je wacax, ma junoj je bꞌuru pixbꞌil oc yet scꞌual xewilal, ¿tumi cꞌam che jajeloj catuꞌ chi too je yakꞌon yucꞌ jaꞌ? 16Jal jun ix ix tiꞌ, yicꞌaal naj Abraham ix. Ilaꞌ tol eyxa 18 abꞌil smichꞌcha ix yu Satanás, jaxca tol pixbꞌil ey ix yu. ¿Tumi man smoo oj scolcha can el ix tet jun syaꞌilal yet scꞌual xewilal tiꞌ che naꞌ? ẍi Jesús tet naj.

17Jaꞌ yet jix yalon Jesús jaxca tuꞌ, jix qꞌuixwi a masanil ebꞌ chi jowi oc yin Naj. Jal masanil ebꞌ ánima xin, caw chi tzala ebꞌ yilon wan tzet jix el yunen Jesús tuꞌ, yutol caw miman yeloc apnoj Naj yul sat ánima tuꞌ.

Skꞌaneal An Sbꞌakꞌ Mostaza

(Mateo 13:31-32; Marcos 4:30-32)

18Jix yalon pax Jesús jaxca tiꞌ:

—¿Tzet utbꞌil chi yun ẍꞌibꞌ sbꞌisil ebꞌ ánima chi oc Dios Yaawiloj che naꞌ? Oj waltej jun kꞌane tiꞌ je yabꞌe. 19Jaꞌ ebꞌ ánima tuꞌ, laan ebꞌ jaxca junoj jinat mostaza chi yaw junoj ánima sat xꞌotxꞌ. Jaꞌ jun jinat tuꞌ, chi aoloj, chi chꞌibꞌi. Laan chi yun jaxca teꞌ teꞌ mimejtaj. Chi chꞌibꞌ teꞌ masantaꞌcꞌal chi skeꞌ swey noꞌ tzꞌiquin xol skꞌabꞌlaj, ẍi Jesús.

Skꞌaneal Yich Pan

(Mateo 13:33)

20Jix yalon pax Jesús junxa tiꞌ:

—Oj waltej junxa skꞌaneal tiꞌ ey jex, tzet utbꞌil chi yun ẍꞌibꞌ sbꞌisil ebꞌ ánima chi oc Dios Yaawiloj. 21Jaꞌ jun tuꞌ, laan jaxca niꞌoj yich pan chi yatoj ix ix xol junoj arroba jarina. Yu niꞌoj yich pan tuꞌ, chi chꞌibꞌa masanil ixim, ẍi Jesús.

Jun Yaliẍ Puerta

(Mateo 7:13-14, 21-23)

22Jaꞌ Jesús jacꞌalaꞌ sbꞌey stoo yul sbꞌeal Jerusalén. Ey wan conobꞌlaj cꞌal wan aldealaj bꞌey jix ecꞌ Naj cuywal. 23Jaꞌ yet junel, ey jun mactxequel jix skꞌanlen tet Jesús jaxca tiꞌ:

—Jaach Cuywam, ¿jaywanne mi ebꞌ tol oj colchaoj? ẍi naj tet Jesús.

Jix yalon Jesús tet naj tuꞌ:

24—Akꞌwej je yip je yoc bꞌey jun jaxca yaliẍ puerta. Yutol chi wal ey jex, ecꞌal ebꞌ chi yakꞌle yoqui, ma pax skeꞌ yoc ebꞌ. 25Yutol jaꞌ Dios, laan jaxca junoj yaaw na. Chi a waanoj, chi smajchen sna. Oj lawoj tuꞌ, jaxa jaex chex can linan stiꞌ na tuꞌ, oj to je yakꞌle je yawi octoj jaxca tiꞌ: “Mamin, jajon octoj ja wetoj,” je chi tole. “Man wotaj oj jex, catuꞌ man wotaj oj bꞌey ey jex ocoj,” ẍi eltej oj takꞌwoj. 26“Ilaꞌ caw jix cu low ja wetoj. Jix jon ja cuy yul calle bꞌey cu conobꞌ,” je chi, oj je yalon tet. 27Jaxa oj yun stakꞌwoj Dios ey jex jaxca tiꞌ: “Jix wal ey jex, tol man wotaj oj jex, catuꞌ man wotaj oj bꞌey ey jex ocoj. Elanwej je masanil jex che yun spenail,” ẍi Dios ey jex. 28Jaꞌ tituꞌ caw oj michꞌcha je cꞌul je yokꞌi. Yu oj je yilaꞌ tol eyecꞌ Abraham, Isaac, yetoj Jacob cꞌal masanil ebꞌ ẍejabꞌ Dios eyecꞌ ebꞌ bꞌey eyoc Dios yin Yaawiloj. Jal jex pax xin, stiꞌlaj xacꞌal ey jex can eloj. 29Ey ebꞌ oj tit bꞌey junjun lugar. Ey ebꞌ oj tit bꞌey chi aol cꞌu, cꞌal bꞌey chi too can cꞌu. Ey ebꞌ oj tit bꞌey norte, cꞌal bꞌey sur, catuꞌ oj ey chotan ebꞌ low yin meẍa bꞌey eyoc Dios Yaawilal. 30Ey mac cꞌamxa cꞌal niꞌoj yeloc apnoj cu xol tinaniꞌ. Jal yet jun stiempoal tuꞌ, oj oc ebꞌ yin yel miman yeloc apnoj tituꞌ. Ey pax mac caw miman yeloc apnoj cu xol tinaniꞌ. Jaxa pax yet jun tiempoal tuꞌ, oj oc pax ebꞌ yin cꞌamxa niꞌoj yeloc apnoj tituꞌ, ẍi Jesús.

Scuscꞌulal Jesús Yu Ebꞌ A Jerusalén

(Mateo 23:37-39)

31Jaꞌ yet jun cꞌual tuꞌ, jix apni wan ebꞌ Fariseo. Jix yalon ebꞌ tet Jesús jaxca tiꞌ:

—Asiꞌ, elan bꞌey jun lugar tiꞌ, yutol chi yoche naj Herodes chach yakꞌ camoj, ẍi ebꞌ tet Jesús.

32Jix yalon Jesús tet ebꞌ jaxca tiꞌ:

—Jaꞌ jun winaj tuꞌ, caw jelan ton jaxca junoj noꞌ waax. Asiꞌ, al tet naj jaxca tiꞌ: “Ilaꞌla, tinaniꞌ cꞌal yecal, chi wiꞌel ebꞌ pena espíritu yin ebꞌ ánima, catuꞌ chi wakꞌon pax waꞌxoj scꞌul ebꞌ yaꞌey. Jaꞌ yet caabꞌe, chi lawi cꞌal can jin mulnail tiꞌ, je chi tet naj,” ẍi Jesús. 33Jal jin jain tiꞌ, oj jin bꞌey cꞌal tinaniꞌ, yecal cꞌal caabꞌe. Yutol sowalil asan bꞌey Jerusalén chi akꞌle cam ebꞌ ẍejabꞌ Dios.

34Chi wal ey jex tiꞌ jex a Jerusalén, che makꞌ cam ebꞌ ẍejabꞌ Dios. Jaꞌ wanxa ebꞌ chejbꞌiltej yu Dios je xol, che kꞌojchꞌenne cam ebꞌ. Ecꞌal el jix woche jix jex wawtetej jin cꞌatan an, jaxca junoj noꞌ caẍlan chi skꞌuttetej yuneꞌ catuꞌ chi smooni, ma pax yal je cꞌul. 35Abꞌwej, jaꞌ jun je conobꞌ tuꞌ, tzꞌinini oj yun canoj. Chi wal ey jex, cꞌamxa bꞌey oj je yil win an, masantaꞌ yet oj je yalon jaxca tiꞌ: “Kalwej watxꞌ kꞌane tet jun chejbꞌiltej yu Naj Kaawil tiꞌ,”#Salmos 118:26. je chi, ẍi Jesús tet ebꞌ.

Currently Selected:

Lucas 13: knj

Highlight

Copy