Génesis 32

Jix Ẍaꞌle Sbꞌa Naj Jacob Yetoj Esaú

1Jix lawi tuꞌ, jix bꞌey cꞌal stoo naj Jacob, ey jun cꞌual jix ẍaꞌle sbꞌa yetoj wan yángel Dios. 2Jaꞌ yet jix yilon naj Jacob, catuꞌ jix yaloni: Jaꞌ titiꞌ bꞌulan ey ebꞌ yángel Dios, ẍi naj. Yu jun tuꞌ, jix yakꞌ yij sbꞌi Mahanaim,#32:2 Mahanaim chi yal yeloc apnoj, “caabꞌ tujan bꞌulan eyoj”. jun txꞌotxꞌ tuꞌ.

3Jix lawi tuꞌ, jix ẍejontoj wanxa ebꞌ yakꞌomal servil naj Jacob yul yet txꞌotxꞌ Seír, bꞌey yul yet Edom, yet chi too al-le skꞌaneal tet Esaú, yutol jaꞌ yuẍtaj Jacob lalan stit yul-laj bꞌe.

4Jix yalon ẍejbꞌanil tet ebꞌ jaxca tiꞌ: Alwej tet naj wuẍtaj Esaú: Tol jaꞌ naj ja wuẍtaj Jacob chi yaoc sbꞌa yalan ja chejbꞌanil, je chi; catuꞌ che yalon pax oj tol jaꞌ yetoj naj Labán jix jin eecꞌ jun tiempoal yetoj. 5Jaꞌ tinaniꞌ ey jin wacax, ey jin meꞌ, ey jin chiw, ey jin bꞌuru ey ebꞌ naj wakꞌomal servil cꞌal ebꞌ ix wakꞌomal servil. Chi waltoj jun jin kꞌane tiꞌ ey jaach wuẍtaj, yutol chi woche chin ja chaꞌ apnoj yin tzalacꞌulal ja wetoj, je chi tet, ẍi Jacob. 6Jaꞌ yet jix meltzo ebꞌ naj chejabꞌwom tuꞌ xin, jix yalon ebꞌ naj tet naj Jacob jaxca tiꞌ:

—Jix cu bꞌetecꞌ bꞌey naj ja wuẍtaj; jix tit naj jaach ẍaꞌ yul-laj bꞌe. Jaꞌcaw naj oj jaach jul chaꞌonoj, iꞌbꞌil oc 400 ebꞌ winaj yu, ẍi ebꞌ naj chejabꞌwom tuꞌ.

7Jaꞌ yet jix yabꞌen Jacob wan kꞌane tuꞌ, caw jix xiwa naj, jix oc yin bꞌiscꞌulal. Jix lawi tuꞌ, jix spoꞌon ecꞌ ebꞌ ánima jaꞌjun yetoj, cꞌal masanil noꞌ sjobꞌbꞌeal noꞌ, jix spoꞌontoj yin caabꞌ tujan. 8Yutol jix snaꞌ jaxca tiꞌ: Ta chi jul naj Esaú tuꞌ, chi yakꞌon jowal naj yetoj junoj bꞌulan, yajbꞌan tuꞌ, jal junxa bꞌulan chi colcha canoj, ẍi naj. 9Jix lawi tuꞌ, jix txali naj jaxca tiꞌ: Jaach Jehová jin Diosal, sDiosal jaach jin mam icham Abraham, cꞌal jin mam Isaac, jaach jix walaꞌ tol chin meltzo bꞌey jin txꞌotxꞌal bꞌey xol ebꞌ wican; jix ja waloni tol oj jaach colwa wetoj, yet watxꞌ, sakꞌal chin elocoj. 10Caw chin ja camcꞌulne, caxcꞌal man jin moo oj, yutol jain smoo chach wakꞌ servil. Jaꞌ yet jix jin kꞌaxbꞌonen ecꞌ jaꞌ Jordán, tol asanne jun jin kꞌojoch iꞌbꞌil oc wu an, yet watxꞌ chin colon jin bꞌa yetoj; jal tinaniꞌ eyxa caabꞌ miman bꞌulan ebꞌ ánima cꞌal masanil jin jobꞌbꞌeal noꞌ ey wetoj. 11¡Chin oc tean ja win, col jin el yul skꞌabꞌ naj wuẍtaj Esaú tiꞌ! Caw chin xiw tet naj, tala chi jul naj win, catuꞌ chi makꞌle cam ebꞌ ix ix tiꞌ cꞌal ebꞌ unin tiꞌ yu naj. 12Caw watxꞌ jix yun ja walon canoj, tol ey jaach oc wetoj, jaach chin ja teyne, jix ja walon canoj tol ecꞌal oj yun sbꞌisil ebꞌ wicꞌaal, jaxca yarenail stiꞌ jaꞌ mar, tol cꞌam mactxequel chi skeꞌ sbꞌisoni, ẍi naj Jacob yin xa.

13Jaꞌ yet jun akꞌbꞌal tuꞌ, jix can naj wey bꞌey jun txꞌotxꞌ tuꞌ, jaꞌ yet jix kꞌinibꞌi eloj, jix sicꞌon el wan noꞌ sjobꞌbꞌeal noꞌ caw bꞌakꞌech, yet chi yakꞌon saꞌbꞌeal tet yuẍtaj Esaú: 14Ey 200 noꞌ xutx chiw, 20 noꞌ icham chiw; 200 noꞌ xutx meꞌ, 20 pax noꞌ icham meꞌ. 15Catuꞌ ey 30 noꞌ xutx camello yetoj cꞌal yuneꞌ tol to jix ali; 40 noꞌ xutx wacax, 10 noꞌ icham wacax, 20 noꞌ xutx bꞌuru, 10 noꞌ icham bꞌuru. 16Yin eymanil jix yakꞌ naj Jacob junjun tujan noꞌ tet ebꞌ yakꞌomal servil, bꞌulquiltaj jix yute eyoj, jix yalon tet ebꞌ jaxca tiꞌ:

—Bꞌabꞌanwejtoj jaex tiꞌ, catuꞌ jix yalon naj tol naat ta chi yute xol junjun bꞌulan noꞌ ebꞌ.

17Jaꞌ tet naj inen oc jun bꞌulan noꞌ bꞌabꞌel tuꞌ, jix al-le tet naj jaxca tiꞌ:

—Jaꞌ yet oj ja chaꞌlen ja bꞌa yetoj naj wuẍtaj Esaú tuꞌ, ta chi skꞌanle ey jaach, ¿mactxequel ey jaach ẍejabꞌ, bꞌey chach toocoj, mactxequel ey yet noꞌ noꞌ iꞌbꞌil oc ja wu tiꞌ? ta ẍi naj ey jaach, 18catuꞌ cha walon tet naj wuẍtaj Esaú jaxca tiꞌ: Jaꞌ wan tzetyetal tiꞌ saꞌbꞌeal naj ja wuẍtaj Jacob ey jaach, tzajan naj wintaj tiꞌ an, ja chi, ẍi naj.

19Jaxca cꞌal tuꞌ jix yun yalon tet naj yet scaabꞌ ẍejabꞌ, cꞌal tet naj yet yox ẍejabꞌ. Jaxca tuꞌ jix yun yalon tet masanil ebꞌ naj inen oc junjun bꞌulan noꞌ noꞌ tuꞌ:

—Jaꞌ yet oj je chaꞌlen je bꞌa yetoj Esaú tuꞌ, laan cꞌal che yute je yaloni. 20Catuꞌ che yaloni tol jaꞌ naj ja wakꞌomal servil Jacob tzajan kintaj jon, je chi, ẍi naj tet ebꞌ naj yakꞌomal servil tuꞌ.

Yu jun tuꞌ xin, jix snaꞌ naj Jacob jaxca tiꞌ: Tejan oj tan sjowal scꞌul Esaú yu wan saꞌbꞌeal chi wakꞌ bꞌabꞌoj jin sattaj tiꞌ, jaꞌ yet oj jin chaꞌlen jin bꞌa yetoj, catuꞌ oj jin ẍaꞌon yin tzalacꞌulal. 21Queytuꞌ jix yute naj Jacob yakꞌon bꞌabꞌoj saꞌbꞌeal tuꞌ sattaj, jix cancan naj junxa akꞌbꞌal bꞌey bꞌulan tocꞌal ecꞌ ebꞌ tuꞌ.

Jix Yakꞌle Jowal Naj Jacob Yetoj Jun Ángel

22Jaꞌ yet jun akꞌbꞌal tuꞌ jix a waan naj Jacob, jix yiꞌontoj yistil naj, yetoj ebꞌ ix cawan yakꞌomal servil cꞌal juslucꞌwan ebꞌ yuninal, jix skꞌaxbꞌonen ecꞌ ebꞌ jaꞌ jaꞌ chi yij Jaboc. 23Catuꞌ jix yiꞌontoj masanil stzetyetal yetoj. 24Jaꞌ yet jix cancan naj Jacob xꞌojli, jix yakꞌle jowal yetoj jun winaj masantaꞌcꞌal jix sajbꞌi eloj. 25Jaꞌ jun winaj tuꞌ jix yilaꞌ tol cꞌam chi eyqꞌuey Jacob tuꞌ, catuꞌ jix makꞌle xubꞌ naj Jacob tuꞌ yu, yet jix yakꞌlen jowal ebꞌ tuꞌ. 26Jix yalon jun winaj tuꞌ tet naj jaxca tiꞌ:

—¡Jaj jin eloj! ¡yutol lalanxa sajbꞌi! ẍi.

Jix yalon Jacob tet jaxca tiꞌ:

—Cꞌam chach jin jajeloj, ta cꞌam cha wal can watxꞌ kꞌane wibꞌan, ẍi Jacob.

27—¿Tzet ja bꞌi? ẍi naj tuꞌ.

—Jacob jin bꞌi, ẍi naj.

28Jix yalon naj tuꞌ tet jaxca tiꞌ:

—Jaꞌ tinaniꞌ manxa Jacob oj ja bꞌi, jaꞌ tinaniꞌ Israel xa ja bꞌi, yutol jix ja wakꞌle jowal yetoj Jehová,#32:28 Jaꞌ yin Hebreo, jun kꞌane Israel laan chi yun yal-le yetoj jun kꞌane “chi steele sbꞌa yetoj Jehová”. yetoj cꞌal ebꞌ ánima, ẍi naj.

29—Jaꞌ tinaniꞌ alel ja bꞌi ey jin, ẍi Jacob.

Catuꞌ jix yalon jun winaj tuꞌ jaxca tiꞌ:

—¿Tzet yuxan cha kꞌanle jin bꞌi? ẍi naj.

Yin eymanil jix yalon can watxꞌ kꞌane yibꞌan Jacob. 30Yu jun tuꞌ xin, jix yakꞌon yij Jacob jun txꞌotxꞌ tuꞌ Penuel,#32:30 Penuel chi yal yeloc apnoj “sat Jehová”. jix yaloni: Caw wal jix wil yin Jehová yetoj jin sat, catuꞌ iquis jin tocꞌal ecꞌoj, ẍi naj.

31Lalanxa yecꞌtoj naj Jacob bꞌey Penuel tuꞌ, catuꞌ jix aol cꞌu. Yutol jix kꞌatoj xubꞌ, yuxan tuxa cꞌal chi coxlabꞌi sbꞌeyi. 32Yu jun tuꞌ xin, jaꞌ ebꞌ yicꞌaal Israel cꞌam chi ẍiꞌ xꞌanil xubꞌ noꞌ noꞌ ebꞌ, masantaꞌcꞌal yet jun cꞌual tiꞌ, yutol jaꞌ bꞌey xubꞌ naj Jacob tuꞌ jix yabꞌ syaꞌil.

Currently Selected:

Génesis 32: knj

Highlight

Copy