Génesis 29

Yet Jix Apni Oc Jacob Bꞌey Harán

1Jix bꞌey cꞌal stoo naj Jacob, jix apni oc naj bꞌey xꞌotxꞌ ebꞌ naj caan yetcꞌulal bꞌey chi aol cꞌu.

2Jaꞌ yet jix apni oc naj jix yilontoj jun kꞌobꞌ jaꞌ. Jaꞌ bꞌey scawilal tuꞌ, eyecꞌ oxebꞌ bꞌulan noꞌ meꞌ, yutol jaꞌ tituꞌ chi yucꞌ jaꞌ noꞌ, ey jun miman chꞌen eyoc smajiloj stiꞌ jaꞌ. 3Jaꞌ yet chi syambꞌan oc smeꞌ ebꞌ naj ilom meꞌ, chi yiꞌatej jaꞌ ebꞌ naj yucꞌ smeꞌ tuꞌ. Chi lawi tuꞌ, chi smajchen can jun kꞌobꞌ ebꞌ yetoj jun miman chꞌen tuꞌ. 4Catuꞌ jix skꞌanlen Jacob tet ebꞌ naj ilom meꞌ tuꞌ jaxca tiꞌ:

—¿Mac jex txequel? ẍi Jacob.

—Jix yalon ebꞌ naj, jaꞌ bꞌey txꞌotxꞌ Harán chi cu tit jon, ẍi ebꞌ naj.

5—¿Je yotaj mi naj Labán, yuninal naj Nahor? ẍi Jacob.

—Jaaꞌ, kotaj naj jon, ẍi ebꞌ naj.

6—¿Watxꞌ mi scꞌul naj che yilaꞌ? ẍi Jacob tuꞌ.

—Watxꞌ scꞌul naj. Jaꞌ ix scutzꞌin naj chi jul tiꞌ la, jaꞌton ix Raquel chi jul ix yetoj smeꞌ tiꞌ, ẍi ebꞌ naj.

7Jix yalon cꞌal Jacob tet ebꞌ jaxca tiꞌ:

—¡Caw ey too cꞌu! ¿Tzet yuxan man tucꞌal oj che yakꞌ can jaꞌ yucꞌ noꞌ je meꞌ tiꞌ, catuꞌ che teynen low niꞌojxa noꞌ? ẍi naj tet ebꞌ.

8Catuꞌ jix yalon ebꞌ tet naj jaxca tiꞌ:

—Cꞌam chi skeꞌ, sowalil tol chi kechbꞌane syambꞌan oc sbꞌa masanil noꞌ meꞌ tiꞌ, catuꞌ oj kiꞌon el chꞌen miman chꞌen eyoc smajiloj stiꞌ jun kꞌobꞌ tiꞌ, catuꞌ oj kakꞌon jaꞌ yucꞌ jaꞌ noꞌ jon, ẍi ebꞌ naj.

9Lalan wal skꞌanabꞌ ebꞌ, catuꞌ jix apni oc ix Raquel yetoj noꞌ smeꞌ smam, yutol ilom meꞌ ix. 10Jaꞌ yet jix yilon Jacob yapni oc ix yetoj noꞌ smeꞌ naj Labán, jaꞌton yican Jacob, eyman jix too jininoj yiꞌon el chꞌen smajil stiꞌ jun kꞌobꞌ tuꞌ, catuꞌ jix yakꞌon jaꞌ yucꞌ noꞌ meꞌ tuꞌ. 11Yin eymanil, jix yakꞌon scawil scꞌul ix Raquel, catuꞌ jix stzꞌubꞌon el stiꞌ ix naj, catuꞌ jix okꞌa naj. 12Catuꞌ jix yalon Jacob tuꞌ tet ix, tol yuneꞌ ix Rebeca naj, ix yanabꞌ naj Labán. Jix cꞌal yabꞌ ix Raquel jaxca tuꞌ, eyman jix too ix yal tet smam.

13Jaꞌ yet jix yabꞌen naj Labán tol jaꞌ tituꞌ eyecꞌ Jacob, yuneꞌ yanabꞌ, jix too yilon yin eymanil, catuꞌ jix oc lakꞌan yin, catuꞌ jix stzꞌubꞌon el stiꞌ, catuꞌ jix yiꞌontoj bꞌey sna. Catuꞌ jix oc ian Jacob yalon tzet cꞌal jix yun sbꞌeytej. 14Jix yalon Labán tet naj jaxca tiꞌ: Caw yel jaonto cꞌal ocoj, ẍi tet naj.

Jix Cancan Jacob Yin Mulnail Yu Ix Raquel

Jix can Jacob yetoj naj Labán yin jun xꞌaaw. 15Yet jix ecꞌ el jun xꞌaaw tuꞌ, catuꞌ jix yalon naj Labán tet naj Jacob jaxca tiꞌ:

—Jaꞌ tinaniꞌ caxcꞌal kuẍtaj to cu bꞌa ja wetoj, ma skeꞌ tol tucꞌal oj jaach mulna wetoj an, al ey jin jantajoj jaach jin toolane, ẍi naj.

16Jaꞌ naj Labán tuꞌ ey cawan scutzꞌin naj, jaꞌ ix bꞌabꞌel chi yij Lía, jal junxa ix chi yij Raquel. 17Jaꞌ ix Lía tuꞌ, sakꞌal yili sbꞌakꞌ sat ix, jal ix Raquel xin, yel xacꞌal sakꞌal chꞌan yili ix. 18Jaꞌ naj Jacob jix can xacꞌal snaꞌbꞌal naj yin ix Raquel, jix yalon jaxca tiꞌ:

—Chin cancan jujebꞌoj abꞌil jaach wakꞌon servil, yu ix ja tzunan cutzꞌin tiꞌ, jaꞌton ix Raquel, ẍi naj Jacob.

19Jix yalon naj Labán jaxca tiꞌ:

—Canan can xin, watxꞌ chi wakꞌ ix ey jaach, yintaj tol jaꞌ tet junojxa txꞌoj winajil bꞌey chi watoj ix.

20Jaxca tuꞌ jix yun smulna Jacob yin jujebꞌ abꞌil yu ix Raquel, yutol caw ey scamcꞌulal naj yin ix, yuxan ma yabꞌ naj yecꞌ el jujebꞌ abꞌil tuꞌ. 21Jaꞌ yet jix ecꞌ el jujebꞌ abꞌil tuꞌ xin, jix yalon Jacob tet naj Labán jaxca tiꞌ:

—Jaꞌ tinaniꞌ xin, jix lawi stiempoal jin mulna ja wetoj, jaxca jun cu kꞌane albꞌilcan ku ja wetoj. Akꞌ ix Raquel tiꞌ ey jin an, yet watxꞌ chin nupi yetoj ix yu yoc ix wistiloj, ẍi Jacob.

22Jaꞌ naj Labán, jix yawte masanil ebꞌ ánima caan scawilal tuꞌ, jix yaon oc skꞌinal snupil jun scutzꞌin naj tuꞌ. 23Jaꞌ yet jix kꞌejbꞌi can eyoj, jix yiꞌontej ix Lía naj Labán tet Jacob, catuꞌ jix wey naj yetoj ix. 24Jix yakꞌon naj Labán jun ix yakꞌomal servil ix Lía tuꞌ, chi yij sbꞌi ix Zilpá. 25Jaꞌ yet jix sajbꞌi a yet junxa cꞌu, catuꞌ jix yilontej naj Jacob tol jaꞌ ix Lía jix wey yetoj naj, catuꞌ jix too naj yalon tet Labán jaxca tiꞌ:

—¿Tzet yuxan queytuꞌ jix jin ja wute? Yu ix Raquel yuxan jix jin mulna ja wetoj, ¿tzet yuxan jaꞌ ix Lía jix ja wakꞌ ey jin, caw chin ja wetne? ẍi Jacob.

26Catuꞌ jix takꞌwi Labán tet naj jaxca tiꞌ:

—Jaꞌ cu bꞌeybꞌal jon, tol jaꞌ ebꞌ ix bꞌabꞌel ix chi oc yichamil, tet pax ebꞌ ix tzunan ix. 27Jije cꞌal jun semana skꞌinal ja nupil yetoj ix Lía tiꞌ, catuꞌ oj el yich ja mulna jujebꞌojxa abꞌil wetoj an, catuꞌ oj ja wiꞌon ix Raquel tiꞌ, ẍi naj Labán.

28Catuꞌ jix ẍaꞌon scꞌul Jacob jun kꞌane tuꞌ. Jix sjije jun semana skꞌinal snupil yetoj ix Lía tuꞌ. Jix lawi tuꞌ, jix yakꞌon naj Labán ix Raquel tuꞌ yistiloj naj Jacob tuꞌ. 29Jix yakꞌon pax naj Labán jun ix yakꞌomal servil ix Raquel tuꞌ, jaꞌton ix chi yij Bilhá. 30Jix lawi tuꞌ, jix nupi naj Jacob yetoj ix Raquel, yel xacꞌal chi camcꞌulnele ix Raquel tuꞌ yu, yintaj pax ix Lía tuꞌ. Yuxan jix mulna jujebꞌxa abꞌil yintaj naj Labán.

Ebꞌ Yuninal Jacob

31Jaꞌ yet jix yilon Jehová tol cꞌam chi ochele ix Lía tuꞌ, jix yalon Jehová tol chi uneꞌwi a ix, jal pax ix Raquel xin, cꞌam yuneꞌ ix. 32Jix ali yuneꞌ ix Lía tuꞌ, jix yakꞌ yij sbꞌi Rubén,#29:32 Jaꞌ yin Hebreo, jun bꞌie chi yij Rubén, laan skꞌaneal yetoj jun kꞌane “Jix yil jin cuscꞌulal”. yutol jix yal ix, jaꞌ Jehová jix yilaꞌ tol intajnebꞌil jin el yu wichamil, jaꞌ tinaniꞌ oj jin camcꞌulnele yu, ẍi ix.

33Jix bꞌey cꞌaltoj tiempo xin, jix ali junxa yuneꞌ ix, jix yakꞌon ix yij sbꞌi Simeón,#29:33 Jaꞌ yin Hebreo, jun bꞌie chi yij Simeón laan yetoj jun kꞌane, “Chi abꞌlei”. yutol jix yal ix jaxca tiꞌ: Yutol jix yil Jehová tol cꞌam chin ochelei, yuxan jix yakꞌ junxa wuneꞌ tiꞌ, ẍi ix.

34Catuꞌ jix yijon pax oc junxa yuneꞌ ix Lía tuꞌ, jix yakꞌon yij sbꞌi Leví,#29:34 Jaꞌ yin Hebreo, jun bꞌie chi yij Leví, laan chi yun yal-le yetoj jun kꞌane “junxane chi yun can eyoj”. jix yalon ix: Jaꞌ tinaniꞌ oj jin scamcꞌulne xacꞌal wichamil tiꞌ, yutol eyxa oxwan wuneꞌ yetoj, ẍi ix.

35Jix jul junxa yuneꞌ ix Lía tuꞌ; jix yakꞌon ix yij sbꞌi Judá,#29:35 Jaꞌ yin Hebreo, jaꞌ jun bꞌie Judá laan chi yun yal-le yetoj jun kꞌane. “Chi al-le watxꞌ kꞌane tet”. jix yalon pax ix: Jaꞌ tinaniꞌ chi wal watxꞌ kꞌane tet Jehová, ẍi ix. Jix lawi tuꞌ jix oc tucan yuneꞌwi ix.

Currently Selected:

Génesis 29: knj

Highlight

Copy