Génesis 28

1Jix lawi tuꞌ, jix awteletej naj Jacob yu Isaac tuꞌ, jix cꞌoli yalon can el watxꞌ kꞌane yibꞌan, catuꞌ jix yalon can jun chejbꞌanile tet jaxca tiꞌ: Cꞌam ojabꞌ bꞌakꞌin cha wiꞌ ja wistil xol ebꞌ ix a Canaán tiꞌ. 2Jatuꞌ chach too yul yet Padán-aram bꞌey sna naj ja mam icham Betuel, jaꞌ tituꞌ chach nupi yetoj junoj ebꞌ ix scutzꞌin naj Labán, sno ix ja txutx. 3Jaꞌ Jehová, Naj miman yeoc Yipalil, oj yakꞌ syaaxilal ja wibꞌan, caw ecꞌal oj yun sbꞌisil ebꞌ ja wicꞌaal. Jaꞌ xol ebꞌ tuꞌ, oj eltej ecꞌaloj mimej conobꞌ. 4Oj yakꞌ masanil syaaxilal ey jaach yetoj masanil ebꞌ ja wicꞌaal, jaꞌton syaaxilal bꞌey jix yakꞌ can stiꞌ Jehová yakꞌon can tet ja mam icham Abraham, yet watxꞌ oj ja wiꞌ can oc txꞌotxꞌ txꞌotxꞌ bꞌey ey jon ecꞌ tiꞌ, yutol jaꞌcaw Jehová jix alon can tet ja mam icham tuꞌ, ẍi naj Isaac tuꞌ tet Jacob.

5Queyton tuꞌ, jix yun ẍejletoj Jacob yu naj Isaac bꞌey txꞌotxꞌ Padán-aram. Jix apni oc naj Jacob bꞌey sna naj Labán, scꞌaal Betuel naj Arameo, sno ix Rebeca, xutx Jacob cꞌal Esaú.

Jix Yiꞌ Junxa Yistil Naj Esaú

6Jaꞌ yet jix yilon naj Esaú yet jix yalon can watxꞌ kꞌane naj Isaac yibꞌan naj Jacob, yet jix chejletoj naj bꞌey Padán-aram, yet watxꞌ chi yiꞌon yistil tituꞌ. Jix snaꞌon cꞌal pax tej yet jix al-le can watxꞌ kꞌane yibꞌan yu smam, yet jix yalon canoj tol cꞌam chi skeꞌ yiꞌon yistil naj xol ebꞌ ix a Canaán tuꞌ, 7yet jix toocan Jacob bꞌey Padán-aram jaxca jix yute yalon smam cꞌal txutx tet naj. 8Jaxca tuꞌ jix yun yotajne el Esaú, tol jaꞌ smam tuꞌ, cꞌam chi yoche ebꞌ ix ix a Canaán. 9Yu jun tuꞌ xin, jix too naj Esaú bꞌey naj yican Ismael scꞌaal naj Abraham, jix yiꞌle sbꞌa naj yetoj jun ix scutzꞌin naj Ismael tuꞌ, Mahalat sbꞌi ix, yanabꞌ naj Nebaiot. Jix oc ix yistiloj naj Esaú tuꞌ yetoj cꞌaltaꞌ ebꞌ ix yistil iꞌbꞌil cꞌaltaꞌ yu.

Jix Xꞌox Sbꞌa Jehová Tet Jacob Bꞌey Betel

10Jaꞌ yet jix el Jacob bꞌey Beerseba, jix toocan bꞌey sbꞌeal Harán. 11Yet jix apni oc bꞌey jun txꞌotxꞌ txꞌotxꞌ, jix can jun akꞌbꞌal tituꞌ, yutol jix ey cꞌu. Jaꞌ yet tuxa chi weya naj, catuꞌ jix yiꞌontej jun chꞌen chꞌen skꞌaanoj sjolom, catuꞌ jix ey telan weyoj. 12Jaꞌ yet jun akꞌbꞌal tuꞌ, jix oc jun sweyich, jix yiloni ey jun bꞌe jaxca kꞌooch bꞌe jix yilaꞌ. Chi too tacꞌal sat txꞌotxꞌ tiꞌ masantaꞌcꞌal chi aapnoj bꞌey satcan. Jix yiloni tol jaꞌ ebꞌ ángel yet Jehová chi atoj ebꞌ, chi eytej ebꞌ yul jun bꞌe tuꞌ. 13Catuꞌ jix yilon pax oj tol jaꞌ Jehová linan oc scawilal bꞌey chi aapnoj jun bꞌe tuꞌ, catuꞌ jix yalon jaxca tiꞌ: Jain ton Jehová, sDiosal ja wichmam Abraham, cꞌal ja mam Isaac. Jaꞌ jun txꞌotxꞌ bꞌey telan jaach ey tiꞌ, oj wakꞌ ey jaach, cꞌal tet masanil ebꞌ ja wicꞌaal.

14¡Jaꞌ ebꞌ ja wicꞌaal tuꞌ, caw miman oj yun sbꞌisil ebꞌ jaxca spojojal txꞌotxꞌ txꞌotxꞌ tiꞌ! Catuꞌ oj toj cꞌal caey ebꞌ yetcꞌulal bꞌey chi aol cꞌu, cꞌal bꞌey chi too cꞌu, cꞌal bꞌey norte, cꞌal bꞌey sur; masanil conobꞌ yul yibꞌankꞌinal tiꞌ, oj ẍaꞌ syaaxilal ebꞌ ja wu jaach tiꞌ, yetoj cꞌal ebꞌ ja wicꞌaal. 15Ey jin cꞌal ecꞌ ja wetoj, catuꞌ oj jaach jin teyne cꞌal bꞌey oj jaach toj, catuꞌ oj jaach wiꞌon meltzo bꞌey jun txꞌotxꞌ tiꞌ junelxa. Cꞌam bꞌakꞌin oj jaach jin bꞌejcanoj, yutol oj wun cꞌal bꞌey jix wakꞌ jin tiꞌ ey jaach, ẍi Jehová.

16Jaꞌ yet jix el sweyan naj Jacob tuꞌ, jix snaꞌon jaxca tiꞌ: ¡Caw yel eyecꞌ Jehová bꞌey jun txꞌotxꞌ tiꞌ! caw wal man wotaj oj, ẍi naj. 17Caw jix xiwa naj sicꞌlebꞌil, catuꞌ jix snaꞌon jaxca tiꞌ: Caw ey smey bꞌey jun txꞌotxꞌ tiꞌ. ¡Jaxam la tiꞌ ey sna Jehová! ma tol smajil stiꞌ satcan xin, ẍi naj.

18Jaꞌ yet jix kꞌinibꞌi a yet junxa cꞌu, caw sebꞌ jix a waan naj Jacob tuꞌ, jix yiꞌontej chꞌen chꞌen jix yaoc skꞌaanoj sjolom tuꞌ, catuꞌ jix slinbꞌa can a jun chꞌen tuꞌ, yet chi cancan chꞌen yin yecheloj, catuꞌ jix stobꞌon ey aceite olivo yibꞌan chꞌen, jix yaon can oc sbꞌi tol jaꞌ Jehová ey yet. 19Jaꞌ bꞌey jun txꞌotxꞌ tuꞌ, jaꞌ tituꞌ ey jun conobꞌ yet peyxa chi yij Luz, jaꞌ naj Jacob jix qꞌuexon can sbꞌi, jix yakꞌon can yij Betel.#28:19 Jaꞌ yin Hebreo, Betel chi yal yeloc apnoj, “Sna Jehová”.

20Jaꞌ tituꞌ jix yakꞌ can stiꞌ Jacob, jix yaloni: Ta jaꞌ Jehová oj jin teyneni, catuꞌ oj oc cꞌal wetoj yin jun jin bꞌeel bꞌey chin to tiꞌ, ta oj yakꞌ cꞌal jin loꞌbꞌe cꞌal jin pichil, 21ta watxꞌ jin cꞌul, catuꞌ ta watxꞌ chi yun jin meltzo bꞌey sna jin mam tiꞌ, ta jaxca tuꞌ, jaꞌton Jehová tiꞌ jin Diosal. 22Jaꞌ bꞌey chin linbꞌa can a jun chꞌen chꞌen tiꞌ, jaxca sna Jehová chi yun can ocoj, jaꞌ masanil tzet oj yakꞌ ey jin, jaꞌ yin junjun laonebꞌ, oj wiꞌel junoj yet Jehová, catuꞌ oj wakꞌon tet.

Currently Selected:

Génesis 28: knj

Highlight

Copy