Génesis 25

Ebꞌ Yuninal Abraham Yetoj Ix Queturá

(1a Crónicas 1:32-33)

1Jix yiꞌ junxa yistil naj Abraham, jaꞌton ix Queturá. 2Jaꞌ ebꞌ yuninal tiꞌ yetoj ix, jaꞌton ebꞌ tiꞌ: Zimrán, Jocsán, Medán, Madián, Isbac cꞌal Súah. 3Jaꞌ naj Jocsán jaꞌton smam naj Sebá cꞌal Dedán. Jaꞌ ebꞌ yicꞌaal Dedán tuꞌ, jaꞌton ebꞌ Asureo, cꞌal ebꞌ Letuseo yetoj cꞌal ebꞌ Leumeo. 4Jaꞌ ebꞌ yuninal Madián, jaꞌton: Efá, Éfer, Hanoc, Abidá, cꞌal Eldaá, masanil ebꞌ tuꞌ yicꞌaal ix Queturá ebꞌ. 5Jaꞌ yet iquisto ecꞌ naj Abraham tuꞌ, jix yakꞌ can masanil sbꞌeomal tet scꞌaal Isaac. 6Jal pax tet ebꞌ yuninal Abraham yetoj wanxa ebꞌ yistil tuꞌ, asan cꞌal saꞌbꞌeal jix akꞌle tet ebꞌ yu naj. Jaꞌ yet iquisto ecꞌ naj, jix chejle can el ebꞌ naj scꞌatan scꞌaal naj Isaac tuꞌ. Jix chejletoj ebꞌ naj yetcꞌulal bꞌey chi aol cꞌu.

Scamichal Naj Abraham

7Jaꞌ naj Abraham ey 175 abꞌil yet jix cami. 8Icham winajxa cꞌal jix iꞌon camoj. 9Jaꞌ ebꞌ scꞌaal, jaꞌton Isaac yetoj Ismael jix bꞌet smujcan smam ebꞌ tuꞌ bꞌey chꞌen nachꞌen bꞌey Macpelá, bꞌey scawilal txꞌotxꞌ yet naj Mamré bꞌey txꞌotxꞌ txꞌotxꞌ yet taꞌ naj Efrón scꞌaal Sóhar, naj Hitita. 10Jaꞌton txꞌotxꞌ txꞌotxꞌ tuꞌ manbꞌil yu Abraham tet ebꞌ Hitita. Jaꞌ tituꞌ junne jix mujle naj Abraham tuꞌ yetoj camom yistil chi yij Sara. 11Jaꞌ yet jix camtoj naj Abraham tuꞌ, caw jix yakꞌ syaaxilal Jehová yibꞌan naj Isaac, jix caey ecꞌ naj scawilal jaꞌ ucꞌbꞌal jaꞌ chi yij, Naj Iquis cꞌal Ecꞌoj chin Iloni.

Ebꞌ Yicꞌaal Naj Ismael

(1a Crónicas 1:28-31)

12Jaꞌton ebꞌ yuninal naj Ismael tiꞌ, naj scꞌaal naj Abraham yetoj ix Agar a Egipto, ix yakꞌomal servil ix Sara. 13Xolilal tzet jix yun yali ebꞌ: Nebaiot, jaꞌton naj bꞌabꞌel unin tuꞌ, catuꞌ jix ali Quedar, Adbeel, Mibsam, 14Mismá, Dumá, Masá, 15Hadar, Temá, Jetur, Nafís, cꞌal Quedmá. 16Jaꞌton sbꞌi ebꞌ lacawan scꞌaal naj Ismael tiꞌ. Jaꞌ sbꞌi ebꞌ naj tuꞌ jix oc sbꞌioj xꞌotxꞌ ebꞌ naj bꞌey jix caey ecꞌ junjun ebꞌ naj; junjun cꞌal ebꞌ, yaaw jix yun oc ebꞌ yin junjun conobꞌ. 17Jaꞌ naj Ismael ey 137 abꞌil skꞌinal, catuꞌ jix cami. 18Jaꞌ masanil ebꞌ yicꞌaal tuꞌ jix apni oc caan ebꞌ bꞌey snan xol txꞌotxꞌ Havilá yetoj Sur, bꞌey sattajto txꞌotxꞌ Egipto bꞌey chi too sbꞌeal Asiria. Jaꞌ tituꞌ jix caey ecꞌ ebꞌ, caxcꞌal mi cꞌam chi yal scꞌul ebꞌ yican ebꞌ tuꞌ jix apni cꞌaltaꞌ oc caan ebꞌ.

Yalubꞌal Jacob Yetoj Esaú

19Jaꞌton ebꞌ yicꞌaal naj Isaac tiꞌ, scꞌaal naj Abraham. 20Jaꞌ naj Isaac ey 40 abꞌil skꞌinal yet jix nupi yetoj ix Rebeca ix scutzꞌin Betuel, yanabꞌ naj Labán, ebꞌ Arameo caan bꞌey Padán-aram. 21Jaꞌ ix Rebeca tuꞌ cꞌam yuneꞌ ix. Jaꞌ Isaac jix txali tet Jehová yu yistil yet watxꞌ chi yijoc yuneꞌ ix. Jix abꞌle xa naj yu Jehová, catuꞌ jix yijon oc yuneꞌ ix Rebeca tuꞌ. 22Jaꞌ ebꞌ unin tuꞌ, tioẍ unin ebꞌ, jaꞌ yet ijbꞌilto oc ebꞌ yu xutx chi yakꞌle jowal ebꞌ, yuxan jix snaꞌ ix jaxca tiꞌ: ¿Tzet yuxan chi jul jun tiꞌ wibꞌan? ẍi ix. Jix lawi tuꞌ, jix yalon syaꞌilal tet Jehová. 23Jix takꞌwi Jehová tet ix:

Caabꞌ mimej nación eyoc ja win, caabꞌ mimej conobꞌal oj yun ebꞌ naj yet oj aloj ebꞌ. Jun naj caw ey yip yintaj junxa naj. Jaꞌ naj bꞌabꞌel tuꞌ oj can naj yalan ẍejbꞌanil naj tzunan unin tuꞌ, ẍi Dios.

24Jix apni oc scꞌual yet jix ali yuneꞌ ix Rebeca tuꞌ, tioẍ unin ebꞌ jix ali tuꞌ. 25Naj bꞌabꞌel jix ali, cajin yili, ey cꞌal xil smimanil, jix yakꞌon yij sbꞌi Esaú ebꞌ.#25:25 Esaú jacꞌalaꞌ chi yij pax Seír. Jaꞌ yin Hebreo laan yetoj jun kꞌane, “ey xil”. 26Tzajan sjul pax junxa yuẍtaj tuꞌ, lakꞌan oc skꞌabꞌ yin ẍop yajan Esaú tuꞌ, yu jun tuꞌ jix yakꞌ yij sbꞌi Jacob ebꞌ.#25:26 Jaꞌ yin Hebreo, jaꞌ jun bꞌie chi yij Jacob, laan skꞌaneal yetoj jun kꞌane “ẍop yajan,” ma tol junoj tzetyetal chi yiꞌcan ocoj, ilwej bꞌey Génesis 27:36. Ey 60 abꞌil skꞌinal naj Isaac yet jix ali ebꞌ yuneꞌ ix Rebeca tuꞌ.

Jix Xontoj Smajul Yet Sbꞌabꞌel Uninal Naj Esaú

27Jix chꞌibꞌ cꞌal a cawan unin tuꞌ. Jaꞌ naj Esaú jix ẍaꞌ scꞌul naj yecꞌabꞌ xol-laj teꞌ. Caw watxꞌ jix yun yeloc naj yin ujte noꞌ. Jal naj Jacob xin, cꞌam bꞌey chi too naj naat, ey cꞌal ecꞌ naj bꞌey bꞌulan ecꞌ ebꞌ tuꞌ. 28Caw ey scamcꞌulal naj Isaac yin naj Esaú, yutol caw chi ẍaꞌ scꞌul naj chi ẍiꞌ noꞌ xol-laj teꞌal noꞌ chi bꞌet sjul naj. Jal pax ix Rebeca xin, yel chi yoche pax naj Jacob ix.

29Ey jun cꞌual ipan yakꞌon ta loꞌbꞌe naj Jacob tuꞌ, yet jix jul naj Esaú tuꞌ ecꞌabꞌ xol-laj teꞌ, caw chi cꞌuumbꞌi naj. 30Jix yalon naj jaxca tiꞌ: Akꞌ wal niꞌoj cajin tan loꞌbꞌe tuꞌ jin loꞌ, yutol caw chin cam yu wail, ẍi naj.

(Yu jun tuꞌ xin, Edom,#25:30 Jaꞌ yin Hebreo, Edom laan skꞌaneal jaxca jun kꞌane “cajin”. jix akꞌle can yij sbꞌi naj.)

31Yin sbꞌabꞌelal cha wakꞌcan ja majul yet ja bꞌabꞌel uninal ey jin, catuꞌ chi wakꞌon ja loꞌbꞌe tiꞌ, ẍi naj Jacob tuꞌ.

32Catuꞌ jix yalon Esaú tuꞌ:

—Ilaꞌ tol lalan jin cam yu wail tiꞌ, yilxa jun jin majul yet jin bꞌabꞌel uninal tuꞌ. ¿Tzet taꞌ wal oj oc wu an? ẍi naj.

33—Akꞌ ja tiꞌ ey jin yet jun txolan tiꞌ xin, ẍi naj Jacob tuꞌ.

—Ye xin, ẍi naj Esaú, catuꞌ jix yakꞌon can stiꞌ naj, yet chi xꞌoxon eloj tol chi yakꞌ can smajul yet sbꞌabꞌel uninal tuꞌ tet Jacob. 34Jix lawi tuꞌ xin, jix yakꞌon pan cꞌal jun secꞌ loꞌbꞌe tuꞌ naj Jacob tet Esaú. Jaꞌ yet jix xew slowi, jix a waanoj cꞌam cꞌal niꞌoj tzet jix snaꞌ yin smajul yet sbꞌabꞌel uninal tuꞌ.

Currently Selected:

Génesis 25: knj

Highlight

Copy