Éxodo 3

Jix Awtele Naj Moisés Yu Dios

1Jaꞌ Moisés jix ocan ilo meꞌ yintaj sniꞌ chi yij Jetró,#3:1 Jaꞌ sniꞌ naj Moisés chi ilcha oxebꞌ sbꞌi: Reuel, Jobab yetoj Jetró. jaꞌton naj yalomal oc stiꞌ ebꞌ ánima tet sdiosal caan bꞌey txꞌotxꞌ Madián, ey jun cꞌual jix too Moisés teyne meꞌ bꞌey jun cusiltaj txꞌotxꞌ, masantaꞌcꞌal jix apni oc naj bꞌey yich jun wonan chi yij Horeb,#3:1 Jaꞌ wonan Horeb yel xacꞌal otajbꞌil yin junxa sbꞌi, jaꞌton “Sinaí”. jaꞌ bꞌey jun wonan tuꞌ jix xꞌox sbꞌa Dios tet. 2Jaꞌ tituꞌ jix xꞌox sbꞌa naj yángel Jehová xol jun teꞌ qꞌuix, chi chaw xaj kꞌakꞌ yin. Eyoc skꞌakꞌal, cam pax chi tzꞌaꞌeyoj. 3Caw chi qꞌueya scꞌul naj Moisés, catuꞌ jix yalon jaxca tiꞌ: Tzet yuxan cꞌam chi tzꞌaꞌ jun teꞌ qꞌuix tuꞌ, watxꞌ chi too wil an, ẍi Moisés.

4Jaꞌ yet jix yilon Jehová tol lalan sjitzontoj sbꞌa Moisés scꞌatan jun teꞌ qꞌuix tuꞌ, jaꞌ xol xaj kꞌakꞌ tuꞌ jix kꞌanabꞌ eltej Dios:

—Jix yaloni: Moisés, Moisés.

—Ti ey jin an jaach jin Diosal, ẍi naj Moisés.

5Jix yalon Dios tet jaxca tiꞌ:

—Manche ja jitztej ja bꞌa titiꞌ. Iꞌeltej ja xanabꞌ yutol jain ey jin ecꞌ bꞌey jun txꞌotxꞌ tiꞌ. Tol lalan jin txꞌoxon jin bꞌa ey jaach. 6Jain ton tiꞌ, sDiosal jin ebꞌ ja wichmam, sDiosal jin Abraham, Isaac cꞌal Jacob.

Jaꞌ yet jix yabꞌen Moisés jaxca tuꞌ, catuꞌ jix smajchen el sat yutol jix xiw yoc tꞌanan yin Dios. 7Catuꞌ jix oc cꞌal ian yalon Dios tet jaxca tiꞌ:

—Caw chi wil an tol okꞌbꞌal cꞌul ebꞌ jin conobꞌ bꞌey Egipto. Caw chi wabꞌ yokꞌ ebꞌ yu tzet chi utele ebꞌ yu ebꞌ eyoc yilomaloj ebꞌ. Wotaj caw okꞌbꞌal cꞌul chi yun ebꞌ jin conobꞌ tuꞌ. 8Yuxan jix jin eyol yu jin colon ebꞌ yul skꞌabꞌ ebꞌ a Egipto. Oj wiꞌeltej ebꞌ bꞌey jun txꞌotxꞌ tuꞌ, catuꞌ oj wiꞌontoj ebꞌ bꞌey jun txꞌotxꞌ caw wal watxꞌ, tol lean, ey tzetyetal watxꞌ sloꞌlei. Jaꞌton txꞌotxꞌ bꞌey caan ebꞌ conobꞌ cꞌam chin ocheni: Ebꞌ Cananeo, ebꞌ Heteo, ebꞌ Amorreo, ebꞌ Ferezeo, ebꞌ Heveo, cꞌal ebꞌ Jebuseo. 9Caw chi a yaw ebꞌ jin conobꞌ Israel yalon sbꞌa ey jin, yutol caw chi etex ebꞌ bꞌey conobꞌ Egipto. 10Yu tuꞌ xin, asiꞌ tinaniꞌ, jaach chach watoj sattaj naj sreyal Egipto tuꞌ, yet chach too kꞌanabꞌ yetoj, cꞌal yu ja wiꞌon eltej ebꞌ jin conobꞌ bꞌey Egipto tuꞌ, ẍi Jehová.

11Jix yalon Moisés jaxca tiꞌ tet Dios:

—¿Mac jin txequel jain tiꞌ, yuxan oj jin toj kꞌanabꞌ sattaj naj rey tuꞌ, catuꞌ oj wiꞌon eltej ebꞌ wet conobꞌ Israel? ẍi Moisés.

12Catuꞌ jix takꞌwi Dios tet naj:

—Oj jin colwa ja wetoj, ey jin oc ja wetoj. Oj wakꞌ jun txꞌoxbꞌanil ey jaach yet xax eltej ebꞌ jin conobꞌ bꞌey Egipto, queytuꞌ oj yun ja wotajne eloj tol jain chach jin chejtoj: Jaꞌ yet tuꞌ, oj jul je yiꞌey je bꞌa ey jin bꞌey jun wonan tiꞌ.

13Jix takꞌwi Moisés tet Dios jaxca tiꞌ:

—Ta jain chi too wal xol ebꞌ Israel tuꞌ jun kꞌane tiꞌ, yet chi walon tet ebꞌ an: Tol jaꞌ cu Diosal yetoj ebꞌ cu mam icham, jaꞌ jix jin chejontej yu jul walon ey jex, ta jin chi tet ebꞌ, catuꞌ chi skꞌanlen ebꞌ ey jin. ¿Tzet sbꞌi jun cha wal tuꞌ? ẍim ebꞌ ey jin. ¿Tzet chi yun jin takꞌwi tet ebꞌ? ẍi Moisés.

14Catuꞌ jix takꞌwi Dios tet:

—“JAIN TON EY JIN CꞌALTAꞌ ECꞌOJ.”#3:14 Jaꞌ jun kꞌane “JAIN TON EY JIN CꞌALTAꞌ ECꞌOJ” jaꞌ yin Hebreo, jun kꞌane tiꞌ laan chi yun yal-le yetoj jun kꞌane “sbꞌi cu Mam Dios,” jacꞌal ton oc jun chi tzꞌibꞌele yin Jehová. Jaxca tuꞌ chi yun ja walon tet ebꞌ ja wet conobꞌ tuꞌ; jaꞌton jun mac EY CꞌALTAꞌ ECꞌOJ, jaꞌ chach chejoni, ẍi Dios.

15Jix yalon cꞌal Dios tet Moisés jaxca tiꞌ:

—Al jaxca tiꞌ tet ebꞌ ja wet conobꞌ tuꞌ: Jaꞌ Jehová sDiosal cu mam icham Abraham, Isaac, cꞌal Jacob, jaꞌ jix jin chejontej colwa je yin, ja chi tet ebꞌ. Jaꞌ jin bꞌi tiꞌ ey cꞌal yin tobꞌalkꞌinal, jaꞌton jin bꞌi tiꞌ oj bꞌina yu ebꞌ je yicꞌaal. 16Asiꞌ xin, chi too ja yambꞌan oc ebꞌ icham winaj yeoc xol conobꞌ Israel, catuꞌ cha waloni: Jaꞌ Jehová cu Diosal yetoj ebꞌ cu mam icham, jaꞌton Abraham, Isaac, cꞌal Jacob, jaꞌ naj jix xꞌox sbꞌa ey jin, tol jix yilaꞌ tzet chex utelei bꞌey conobꞌ Egipto tiꞌ. 17Jix yalon ey jin tol oj jex col-le eltej yu bꞌey ey jex oc yin syaꞌtajil tiꞌ, catuꞌ oj jex yiꞌontoj bꞌey jun txꞌotxꞌ caw wal watxꞌ, caw ey syaxil sat, bꞌey caan ebꞌ Cananeo, Heteo, Amorreo, Ferezeo, Heveo cꞌal ebꞌ Jebuseo, ja chi tet ebꞌ. 18Oj ẍaꞌ ebꞌ yabꞌ ey jaach, ebꞌ icham winaj yeoc xol conobꞌ tuꞌ tzet oj ja walaꞌ, catuꞌ oj toj ebꞌ ja wetoj sattaj naj sreyal Egipto tuꞌ, catuꞌ cha waloni: Jaꞌ Jehová cu Diosal jaon Hebreo jon tiꞌ, jaꞌ jix xꞌox sbꞌa ey jon, jon. Yu tuꞌ xin, chaꞌontoj bꞌey cusiltaj txꞌotxꞌ yet chi kakꞌon cu xaambꞌal tet cu Diosal jon, ey oxebꞌ cꞌu stecꞌbꞌanil jun txꞌotxꞌ bꞌey chi cu too tuꞌ jon, ja chi tet naj. 19Wotaj an tol man oj jex chaꞌle eltej yu jun rey tuꞌ, asan yin akꞌbꞌil ipalil oj yun je chaꞌle eltoj yu. 20Yu tuꞌ xin, oj jin txꞌox wipalil tet ebꞌ a Egipto, oj waoc syaꞌilal yibꞌan jun nación tuꞌ, yu tzet qꞌueyubꞌtaj xacꞌal oj yun yilon ebꞌ tuꞌ, catuꞌ oj jex jajle el yu naj. 21Yetoj pax oj, jain oj waoc yin snaꞌbꞌal ebꞌ Egipto caan ja cawilal, tol ey je yeloc apnoj yul sat ebꞌ, yet watxꞌ oj jex waoc yin watxꞌcꞌulalil yetoj ebꞌ, yet watxꞌ oj jex jajle el yu ebꞌ yetoj cꞌal je tzettaj yetal. 22Junjun cꞌal ebꞌ ix ix a Israel oj skꞌan ebꞌ ix tzetyetal tet ebꞌ ix a Egipto caan scawilal tuꞌ, oj yakꞌ plata ebꞌ, cꞌal chꞌen oro, cꞌal pichile yet chi skꞌanbꞌalne ebꞌ yetoj yuninal; jaxa ebꞌ ix a Egipto xin, ye ẍi cꞌal ebꞌ oj yakꞌon ebꞌ, catuꞌ oj can ebꞌ yin cꞌamxa tzetyetal, ẍi Dios.

Currently Selected:

Éxodo 3: knj

Highlight

Copy