Hechos 24

Jaꞌ Yet Jix Yal Sbꞌa Naj Pablo Sattaj Naj Félix

1Jobꞌix tax apni Pablo bꞌey Cesarea, catuꞌ jix apni pax naj Ananías, naj yaawil yakꞌomal xaambꞌal ebꞌ Israel tet Dios. Jix apni jaywan ebꞌ naj ichamtaj winaj ey yopiso yetoj. Yetoj jun naj licenciado chi yij Tértulo. Jix apni ebꞌ sattaj Félix tuꞌ, yu bꞌet yakꞌle queja Pablo yu ebꞌ tuꞌ. 2Jaꞌ yet jix apni Pablo tuꞌ, catuꞌ jix cꞌoli yaon oc Tértulo tuꞌ queja yibꞌan. Jix yalon tet naj Félix tuꞌ jaxca tiꞌ:

—Yuwal dios ey jaach Mamin yaaw. Ja wu, yuxan cꞌam cꞌal jowal cu xol. Watxꞌ cꞌal ja wakꞌon cuenta masanil tzet eyoc yalan ja wopiso, yutol jelan jaach. 3Yel xacꞌal watxꞌ jaach Mamin Félix. Jaꞌ bꞌey junjun lugar chi txeclo eloj, tol watxꞌ cꞌal tzet chi el ja waꞌneni. Yuwal dios ey jaach. 4Yet watxꞌ man mimanoj ja tiempo chi kiꞌecꞌoj, ¿cꞌam mi cha maj ja wabꞌ xacꞌal wan kꞌane chi koche chi kal ey jaach? 5Jaꞌ naj Pablo tiꞌ, caw chi cu yetne naj. Ianxa cꞌam chi techa naj ku. Chi ecꞌ naj ucho a jowal xol ebꞌ ket Israelal bꞌey junjun lugar. Yaaw yeoc naj yin jun qꞌuexan cuybꞌanil, jaꞌton ebꞌ chi yaoc scꞌul yin jun naj a Nazaret. 6Jix yakꞌle naj yiꞌon octoj ebꞌ man Israeloj yul stemplo Dios, yet watxꞌ chi etex el templo tuꞌ yul sat Dios tuꞌ. Yuxan jix cu mitxꞌ naj jon. Jix koche jix cu naꞌoc yin naj jaxca chi yal ley eyecꞌ yul cu kꞌabꞌ. 7Jal pax naj coronel chi yij Lisias, jaꞌ naj jix jul iꞌontoj naj cu xol. 8Jix yalon naj tet ebꞌ chi akꞌon queja Pablo tiꞌ, tol sowalil chi jul ebꞌ ey jaach tiꞌ. Jaach tiꞌ chi skeꞌ ja kꞌanlen tet Pablo tiꞌ. Catuꞌ oj ja wotajnen eloj, tol yel, man tucꞌal oj chi kal jon, ẍi naj Tértulo tuꞌ.

9—Caw yel chi yal Tértulo tiꞌ, ẍi ebꞌ Israel yaman yetoj tuꞌ.

10Catuꞌ jaꞌ naj yaaw tuꞌ, jix yakꞌ eltoj skꞌabꞌ tet naj Pablo tuꞌ. Catuꞌ jix cꞌoli yalon naj jaxca tiꞌ:

—Jaach tiꞌ, Mamin yaaw, wotaj an tol ecꞌalxa abꞌil yaaw jaach bꞌey jun miman conobꞌ tiꞌ. Yuxan, caw chin tzalai, chi walon jin bꞌa ey jaach an. 11Chi skeꞌ ja wotajnen can el wan tzet oj wal ey jaach tiꞌ an, tol yel. Lacawebꞌ jix too chꞌan cꞌu wapni bꞌey Jerusalén yu bꞌet wiꞌon ey jin bꞌa tet Dios. 12Cꞌam junoj ánima chin teele jin bꞌa yetoj. Cꞌam pax junoj lugar bꞌey jix ecꞌ wuch a somna ánima. Catuꞌ cꞌam yul stemplo Dios. Cꞌam yul snail sculto ebꞌ wet Israelal. Cꞌam bꞌey junoj lugar bꞌey Jerusalén tuꞌ. Cꞌam niꞌoj jin penail jix ilcha el yu ebꞌ an. 13Jaꞌ ebꞌ naj chin akꞌon queja tiꞌ, cꞌam niꞌoj tzet chi xꞌox ebꞌ naj, ta yel wan chi yal ebꞌ naj win tiꞌ an. 14Yel toni, jaꞌ Dios, bꞌey yalnaj sbꞌa ebꞌ wichmam, jaꞌ chi wakꞌ servil, jatacꞌalaꞌ cu cuybꞌanil, jaꞌton jun tuꞌ chi yal ebꞌ naj jun qꞌuexan cuybꞌanile. Jal jin jain tiꞌ, chi waoc jin cꞌul yin masanil tzet tzꞌibꞌebꞌilcan yul sley Moisés, cꞌal jantaj tzet tzꞌibꞌebꞌilcan yu ebꞌ ẍejabꞌ Dios. 15Caw chi waoc Dios yipoj jin cꞌul tol oj pitzcꞌu a ebꞌ camnaj masanil. Masanil ebꞌ watxꞌ sbꞌeybꞌal cꞌal ebꞌ pena sbꞌeybꞌal. Quey pax tuꞌ snaꞌon ebꞌ naj tiꞌ. 16Yuxan, caw chi wakꞌ cꞌal cuenta jin bꞌa yetoj jin naꞌbꞌal, yet watxꞌ manche oc jin penail yul sat Dios, cꞌal tet ebꞌ wet animail an.

17Eyxam jayebꞌoj abꞌil ma jin ecꞌ bꞌey Jerusalén. Yuxan jix jin apni pax junelxa, yu jin colwa yin ebꞌ wet Israelal cꞌal wakꞌon niꞌoj jin xaambꞌal tet Dios. 18Yul stemplo Dios ey jin octoj catuꞌ jix wakꞌon jin xaambꞌal tuꞌ. Tuxa jix jin sajbꞌane jin bꞌa, jaxca yalon cu ley. Jaywanne ánima eyoctoj wetoj an, cꞌam mac bꞌulan ecꞌoj, cꞌam cꞌal jowal chi el wuneni. Jal pax yet tuꞌ, jix jin mitxꞌle yu wan ebꞌ Israel a Asia. 19Ta ey jin penail jix yil ebꞌ, tit ojabꞌ ebꞌ ja sattaj tiꞌ, jul ojabꞌ yal ebꞌ tzet jin penail tuꞌ. Smoo tol jaꞌ ebꞌ chi juli. 20Jaꞌ tinaniꞌ xin, yal ojabꞌ ebꞌ chin akꞌon queja tiꞌ, ta ey jin penail jix ilcha el yu ebꞌ sat yaaw ebꞌ wet Israelal, yet jix snaꞌon oc win an. 21Asan ta yutol jaꞌ yet ey jin ecꞌ sattaj ebꞌ yaaw tuꞌ xin, catuꞌ jix walon yin ipal tet ebꞌ jaxca tiꞌ: “Lalan je naꞌon oc win an yutol chi waoc yin jin cꞌul, tol oj pitzcꞌu a ebꞌ camnaj,” jin chi tet ebꞌ, ta jaꞌ yu niꞌan tuꞌ, ẍi Pablo tuꞌ tet Félix tuꞌ.

22Jaꞌ Félix tuꞌ, yotaj xa scuybꞌanil ebꞌ creyente sicꞌlebꞌil. Yuxan, jaꞌ yet jix yabꞌen naj wan jaxca tuꞌ, catuꞌ jix yalon naj jaxca tiꞌ:

—Jaꞌ yet oj jul naj coronel Lisias, jatuꞌ oj cu naꞌoc ja win. Can ojabꞌ jaxca tuꞌ bꞌel, ẍi naj Félix tuꞌ. 23Catuꞌ jix yalon naj tet naj capitán, tol jacꞌalaꞌ ojabꞌ steynele Pablo tuꞌ. Tol jajbꞌil ojabꞌ el niꞌoj, catuꞌ chi skeꞌ skꞌanabꞌ yetoj yamigo, cꞌal chi yakꞌle can servil niꞌoj yu ebꞌ.

24Caabꞌ oxebꞌxa semana tuꞌ xin, jix jul naj Félix bꞌey Cesarea tuꞌ junelxa. Eyecꞌ yistil yetoj, Drusila sbꞌi ix, catuꞌ a Israel ix. Jix yawten naj Pablo naj tuꞌ, catuꞌ jix skꞌanlen el naj tet, tzet wal yeoc xolilal scuybꞌanil ebꞌ creyente. 25Jaꞌ yet jix yalon naj Pablo tuꞌ tet naj, tol sowalil watxꞌ chi kute cu bꞌeybꞌal, catuꞌ chi cu mitxꞌon oc tucan cu bꞌa yin spenail. Catuꞌ jix yalon pax oj, tzet utbꞌil tol Dios oj snaꞌoc yin masanil ánima. Jaꞌ yet jix yabꞌen naj tol jaxca tuꞌ yoqui, jix xiwa naj, catuꞌ jix yalon naj tet Pablo tuꞌ jaxca tiꞌ:

—Jaꞌ tinaniꞌ xin, paxan. Ta ey jin tiempo junelxa oj jaach wawten junelxa an, ẍi Félix tet naj.

26Jaꞌ naj Félix tuꞌ, jix yoche naj tol chi yakꞌ niꞌoj tumin naj Pablo tet yin ewantajil, catuꞌ chi sjajon eloj. Yuxan, ecꞌal el cꞌal jix yawte kꞌanabꞌ yetoj.

27Caabꞌ abꞌil jaxca cꞌal tuꞌ jix yute sbꞌa yetoj Pablo tuꞌ. Catuꞌ jix el naj yin yopiso. Jaꞌ naj Porcio Festo jix oc can sqꞌuexeloj naj. Jaꞌ yet jix el Félix yin yopiso tuꞌ, tol jix cancan naj Pablo preso, yet watxꞌ chi ochele yu ebꞌ a Israel.

Currently Selected:

Hechos 24: knj

Highlight

Copy