Hechos 23

1Catuꞌ jix oc tꞌanan Pablo yin ebꞌ sat yaaw tuꞌ, catuꞌ jix yalon tet ebꞌ jaxca tiꞌ:

—Jex wuẍtaj, watxꞌ cꞌal jin naꞌbꞌal sattaj Dios masantaꞌcꞌal yet jun cꞌu tiꞌ, ẍi naj tet ebꞌ.

2Catuꞌ jix yalon naj yaawil yakꞌomal xaambꞌal ebꞌ Israel tet Dios chi yij Ananías tet ebꞌ eyecꞌ scꞌatan Pablo tuꞌ, tol chi makꞌletoj stiꞌ naj yu ebꞌ. 3Catuꞌ jix yalon Pablo tet Ananías jaxca tiꞌ:

—Jaꞌ Dios oj jaach makꞌon oj, yutol caabꞌ sat jaach. Chotan jaach yu cha naꞌoc win an jaxca yalon sley Moisés, cꞌam cꞌal pax junoj ley chi aloni tol chin ja chej makꞌle an, ẍi Pablo tet naj.

4Catuꞌ jix yalon wan ebꞌ eyecꞌ tituꞌ, tet naj jaxca tiꞌ:

—¿Tumi chach bꞌuchwa yin naj yaawil yakꞌomal xaambꞌal tet Dios? ẍi ebꞌ tet.

5Jix yalon Pablo tuꞌ jaxca tiꞌ:

—Jex wuẍtaj, man wotaj oj an, ta jaꞌ naj tiꞌ yaawil yakꞌomal xaambꞌal tet Dios. Chi yal yul An Juun Tzꞌibꞌebꞌilcan jaxca tiꞌ: “Manche je yal pena kꞌane yin naj yaawil conobꞌ, queytuꞌ yalon skꞌane Dios,” ẍi Pablo.

6Jaꞌ yet jix yiloni, tol Saduceo wan ebꞌ sat yaaw tuꞌ, jal wanxa ebꞌ xin, Fariseo ebꞌ, yuxan caw ip jix yun yalon Pablo tet ebꞌ jaxca tiꞌ:

—Jex wuẍtaj, jain tiꞌ Fariseo jin, Fariseo pax jin mam an. Lalan je naꞌon oc win an, yutol chi waoc yin jin cꞌul, tol oj pitzcꞌu a ebꞌ camnaj, ẍi naj tet ebꞌ.

7Jaꞌ yet jix yalon jaxca tuꞌ, jix steelen a sbꞌa ebꞌ yet Fariseo yetoj ebꞌ Saduceo tuꞌ. Jix poꞌochatoj ebꞌ, caabꞌxa tujan jix eloc ebꞌ. 8Yutol chi yal ebꞌ Saduceo tuꞌ, tol man oj pitzcꞌu a ebꞌ camnaj. Chi yalon pax ebꞌ tol cꞌam ángel, cꞌam pax espíritu. Jal ebꞌ Fariseo xin, chi yal ebꞌ tol ey ton wan tuꞌ. 9Jix a bꞌulna ebꞌ yel yaw masanil. Ey wan ebꞌ cuywam yin sley Moisés, yetbꞌi sbꞌa ebꞌ yetoj ebꞌ Fariseo tuꞌ. Jix a bꞌulna ebꞌ yalon jaxca tiꞌ:

—Cꞌam niꞌoj spenail chi el yunen Pablo tiꞌ. Tejan ey mi junoj espíritu ma junoj ángel jix alon tet. Yuxan, ma skeꞌ cu tenon tzet chi yal Dios, ẍi ebꞌ.

10Jix scajlen a sbꞌa ebꞌ sicꞌlebꞌil. Jix xiwa naj coronel yu ebꞌ. Jaꞌ snaꞌon naj tol lalan kocꞌtzilneletoj naj Pablo tuꞌ yu ebꞌ. Yuxan jix yawtetej ebꞌ soldado naj, catuꞌ jix bꞌet iꞌle el Pablo xol ebꞌ. Catuꞌ jix iꞌletoj naj yu ebꞌ bꞌey cuartel junelxa.

11Jaꞌ yet junxa akꞌbꞌal xin, catuꞌ jix jul xꞌoxon ecꞌ sbꞌa Naj Kaawil tet naj Pablo tuꞌ catuꞌ jix yalon jaxca tiꞌ:

—Pablo, manche jaach xiwi. Jaxca jix ja wute ja walon el jin kꞌaneal bꞌey Jerusalén tiꞌ, jaxca tuꞌ oj ja wute ja walon el bꞌey Roma, ẍi Naj Kaawil tuꞌ tet naj.

Chi Yoche Ebꞌ Yaawil Ebꞌ Israel Tol Chi Makꞌle Cam Naj Pablo

12Jaꞌ yet jix kꞌinibꞌi a xin, ey jaywan ebꞌ Israel jix syambꞌa oc sbꞌa, catuꞌ jix slatiꞌne el sbꞌa ebꞌ, tol chi makꞌle cam Pablo yu ebꞌ. Jix yalon ebꞌ jaxca tiꞌ:

—Masantaꞌcꞌal chi cam Pablo tiꞌ ku, man oj cu lowoj, cꞌal kuqꞌuen jaꞌ. Ta cꞌam chi kun tzet chi kal tiꞌ, chi ojabꞌ iꞌle el cu kꞌinal yu Dios, ẍi ebꞌ.

13Ecꞌbꞌan cuarenta ebꞌ jix alon jaxca tuꞌ. 14Jix too ebꞌ sattaj ebꞌ yaawil yakꞌomal xaambꞌal tet Dios tuꞌ, cꞌal ebꞌ ichamtaj winaj ey yopiso xol ebꞌ Israel, catuꞌ jix yalon ebꞌ tet jaxca tiꞌ:

—Jix kakꞌ cu tiꞌ, tol man oj cu lowoj, masantaꞌcꞌal chi cam naj Pablo ku. Ta cꞌam chi kun tzet jix kal tuꞌ, chi ojabꞌ iꞌle el cu kꞌinal yu Dios. 15Jaꞌ tinaniꞌ xin, chex oc tean jaex tiꞌ yetoj wanxa ebꞌ sat yaaw tet naj coronel, tol chi iꞌletej naj Pablo tuꞌ ey jex yet yecal. Che yal tet naj, tol eyto tzet che yoche che yabꞌ tet Pablo tuꞌ. Jaon xa watxꞌ xa pax keoc cu makꞌon naj yet chi jul tuꞌ, ẍi ebꞌ Israel tuꞌ.

16Ey pax jun naj yuneꞌ yanabꞌ naj Pablo jix abꞌen skꞌumal tzet jix slatiꞌne el ebꞌ. Yuxan jix too bꞌey cuartel tuꞌ catuꞌ jix bꞌet yalon yabꞌ Pablo tuꞌ. 17Jix yabꞌ cꞌal Pablo jaxca tuꞌ, catuꞌ jix yawtentej jun naj capitán, catuꞌ jix yalon tet naj jaxca tiꞌ:

—Iꞌtoj jun naj achꞌe tiꞌ bꞌey naj coronel, ey tzet chi yoche naj chi too yal tet naj, ẍi naj tet.

18Jix iꞌletoj naj yu naj capitán bꞌey naj coronel tuꞌ. Jaꞌ yet jix apni ebꞌ catuꞌ jix yalon naj capitán tet naj jaxca tiꞌ:

—Jaꞌ naj eyoc preso chi yij Pablo, jaꞌ naj jix jin awteni catuꞌ jix skꞌanon naj ey jin an, yu wiꞌontej jun naj achꞌe tiꞌ ja cꞌatan an. Tol ey tzet chi yoche naj chi yal ey jaach, ẍi naj capitán tuꞌ.

19Jix nicꞌle el naj yu naj coronel tuꞌ catuꞌ jix sjitzon el sbꞌa ebꞌ xꞌojli.

—¿Tzet cha woche cha wal ey jin an? ẍi naj tet naj achꞌe tuꞌ.

20Catuꞌ jix yalon naj jaxca tiꞌ:

—Ey ebꞌ Israel jix slatiꞌne el sbꞌa. Tol oj skꞌan ebꞌ ey jaach, catuꞌ cha wiꞌontoj Pablo sattaj ebꞌ sat yaaw yecal. Catuꞌ oj tzꞌaj yalon ebꞌ ey jaach tol eyto tzet oj skꞌanle el ebꞌ tet. 21Manche ja chaꞌ pax ja wabꞌe. Yutol ecꞌbꞌan cuarenta ebꞌ oj yewbꞌa el sbꞌa, catuꞌ oj smakꞌon cam naj ebꞌ yul-laj bꞌe, yalaꞌ. Tol jix yakꞌ stiꞌ ebꞌ, tzet utbꞌil tol man oj low ebꞌ, masantaꞌcꞌal chi cam naj Pablo tuꞌ yu ebꞌ. “Chi ojabꞌ iꞌle el cu kꞌinal yu Dios,” ẍi ebꞌ ta cꞌam chi yun ebꞌ jun tzet jix slatiꞌne ebꞌ yunen tuꞌ. Jaꞌ tinaniꞌ, watxꞌ xa yeoc ebꞌ. Lalan smajon yabꞌ ebꞌ, ta chi too Pablo tuꞌ sattaj ebꞌ sat yaaw tuꞌ, ẍi naj achꞌe tuꞌ.

22Catuꞌ jix yalon naj tet naj achꞌe tuꞌ jaxca tiꞌ:

—Cꞌam junoj mac bꞌey cha waleloj, tol jix jul ja wal jun tiꞌ ey jin an, ẍi naj tet naj achꞌe. Catuꞌ jix chejle pax toj naj achꞌe yu naj tuꞌ.

Jaꞌ Yet Jix Aletoj Pablo Sattaj Naj Félix

23Catuꞌ jix yawtentej cawan capitán naj coronel tuꞌ, catuꞌ jix yalon naj tet ebꞌ jaxca tiꞌ:

—Che chej swaꞌne sbꞌa junoj 200 ebꞌ soldado oj bꞌey yetoj yajan, yetoj setenta ebꞌ oj a yibꞌan noꞌ che, cꞌal junoj 200 ebꞌ oj yiꞌ slanza yutol oj toj ebꞌ bꞌey conobꞌ Cesarea yet a las nueve yet akꞌbꞌalil. 24Catuꞌ che yiꞌontoj wan noꞌ che yet watxꞌ chi oc naj Pablo yibꞌan. Yutol sowalil oj je yiꞌtoj naj sattaj naj Félix, naj yaaw. Listo cꞌal che yute je bꞌa, ey taꞌ tzet ion naj Pablo tuꞌ yul-laj bꞌe, ẍi naj coronel tuꞌ tet ebꞌ.

25Jix stzꞌibꞌetoj jun carta naj tet Félix tuꞌ. Jix yal jun carta tuꞌ jaxca tiꞌ:

26“Jain Claudio Lisias jin an, chin tzꞌibꞌetoj jun carta tiꞌ ey jaach an, jaach Mamin yaaw Félix. Tol chi watoj scawil ja cꞌul. 27Chi watoj jun winaj chi yij Pablo ey jaach an. Jaꞌ ebꞌ Israel jix mitxꞌoni. Ian jix smakꞌ cam ebꞌ, jain xa jix jin colel naj yetoj ebꞌ soldado, yutol jix wabꞌ an, tol ey yuunal naj bꞌey Roma. 28Jix woche jix wabꞌ an, tzet yuxan jix akꞌle queja naj yu ebꞌ Israel tuꞌ. Yuxan jix wakꞌ tit naj sattaj ebꞌ sat yaawil ebꞌ. 29Jaꞌ jix wabꞌen an, tol yu sley ebꞌ yuxan chi yakꞌ queja ebꞌ. Man pax smoo oj smakꞌle cam naj yu, catuꞌ man smoo oj yoc naj preso yu. 30Jix wabꞌ pax an, tol ey ebꞌ Israel jix slatiꞌne el sbꞌa yin, tzet utbꞌil tol oj smakꞌ cam naj ebꞌ. Yuxan chi watoj naj ey jaach an. Jix wal tet ebꞌ chi akꞌon queja naj tuꞌ, tol chi skeꞌ stoo ebꞌ ey jaach tuꞌ, catuꞌ chi too yalon ebꞌ tzet snaꞌbꞌal ebꞌ yin naj. Asan janicꞌ tiꞌ chi waltoj ey jaach an, xa kil cu bꞌa,” ẍi yul scarta tuꞌ.

31Jaꞌ ebꞌ soldado jix iꞌontoj Pablo tuꞌ, akꞌbꞌalil jix yiꞌtoj ebꞌ jaxca jix yun yal-le tet ebꞌ, catuꞌ jix too ebꞌ yetoj naj bꞌey conobꞌ Antípatris. 32Jaꞌ yet junxa cꞌual, catuꞌ jix meltzo ebꞌ soldado jix too yetoj yajan tuꞌ bꞌey scuartel bꞌey Jerusalén. Jal ebꞌ eya yibꞌan che xin, jix toocan ebꞌ yetoj Pablo.

33Jix apni cꞌal ebꞌ bꞌey conobꞌ Cesarea tuꞌ, catuꞌ jix yaontoj an carta ebꞌ tet naj yaaw. Catuꞌ jix aletoj pax Pablo tet naj yu ebꞌ. 34Jaꞌ yet jix yilon an carta naj, catuꞌ jix skꞌanlen el naj tet Pablo tuꞌ tzet conobꞌal bꞌey eyecꞌ naj. Catuꞌ jix yabꞌen naj tol a Cilicia naj. 35Jix yalon naj tituꞌ jaxca tiꞌ:

—Jaꞌ yet oj jul ebꞌ chach akꞌon queja tuꞌ, catuꞌ oj wabꞌen tzet oj ja wute ja walon ja bꞌa an, ẍi naj tet.

Catuꞌ jix akꞌle teynele naj bꞌey smiman na naj rey Herodes.

Currently Selected:

Hechos 23: knj

Highlight

Copy