Hechos 18

Jaꞌ Yet Eyecꞌ Pablo Bꞌey Conobꞌ Corinto

1Yet jix lawi jun tuꞌ xin, jix el Pablo bꞌey Atenas tuꞌ, catuꞌ jix too bꞌey conobꞌ Corinto tuꞌ.#18:1 Yu ecꞌal sman ebꞌ cꞌal xon ebꞌ a Corinto, yuxan caw bꞌinabꞌil sconobꞌ ebꞌ. Catuꞌ miman pax bꞌinabꞌil yu caw ey spenail tituꞌ. 2Jaꞌ bꞌey Corinto tuꞌ eyecꞌ jun naj Israel chi yij Aquila. Jaꞌ bꞌey jun lugar chi yij Ponto jix ali naj. Priscila sbꞌi yistil naj. Ecꞌlenaj naj yetoj yistil bꞌey jun lugar chi yij Italia. Eyecꞌ ebꞌ bꞌey Italia tuꞌ catuꞌ jix ujtele el masanil ebꞌ Israel yul yet Roma yu naj yaaw chi yij Claudio. Yuxan jix el ebꞌ bꞌey Italia tuꞌ, jix too ebꞌ bꞌey Corinto. Jaꞌ tituꞌ jix bꞌet il-le ebꞌ yu Pablo. 3Laan cꞌal smulnail ebꞌ xin, yet waꞌnemal kꞌap na ebꞌ, yuxan jix eyecꞌ naj yetoj ebꞌ tituꞌ, catuꞌ jix mulna ebꞌ. 4Jaꞌ yet junjun scꞌual xewilal, jix bꞌetecꞌ Pablo tuꞌ yalon yabꞌ ebꞌ ánima bꞌey snail sculto ebꞌ yet Israelal. Jaꞌ tituꞌ jix akꞌle snaꞌbꞌal ebꞌ Israel cꞌal ebꞌ man Israeloj.

5Jaꞌ yet jix julecꞌ Silas yetoj Timoteo bꞌey Corinto tuꞌ, yet jix tit ebꞌ bꞌey Macedonia, lalan yakꞌon yip Pablo yalon el skꞌane Dios yin masanil scꞌul. Caw jix akꞌle naꞌcha el yu ebꞌ Israel, tol jaꞌ Jesús, jaꞌton Cristo,* Naj echbꞌanebꞌil sjul yu ebꞌ. 6Caw tucꞌal jix tit pax sjowal ebꞌ yin. Catuꞌ jix cꞌoli sbꞌuchwa a ebꞌ yin. Yuxan jix sicoꞌtane spichil naj Pablo yu xꞌoxon el tet ebꞌ tol cꞌamxa yalon yet yin ebꞌ, catuꞌ jix el naj xol ebꞌ. Jix yal tet ebꞌ jaxca tiꞌ:

—Jaex tiꞌ, che yiꞌtej je yaꞌilal je yibꞌan junelne. Jain tiꞌ, cꞌamxa walon wet je yin an. Jaꞌ tinaniꞌ xin, chin chaꞌel yich jin too walon tet ebꞌ man Israeloj an, ẍi naj tet ebꞌ.

7Catuꞌ jix eltej yul snail sculto ebꞌ tuꞌ, catuꞌ jix too bꞌey sna jun naj chi ijon Ticio Justo tuꞌ. Man Israeloj naj, chi cꞌal yiꞌ pax ey sbꞌa tet Dios. Scawilal snail sculto ebꞌ Israel tuꞌ ey sna naj. 8Ey jun naj yaawil snail sculto ebꞌ Israel tuꞌ chi yij Crispo. Jix yaoc scꞌul naj yin Naj Kaawil yetoj cꞌal sfamilia. Ecꞌal ebꞌ a Corinto tuꞌ jix yaoc scꞌul yin skꞌane Dios yet jix yabꞌen ebꞌ. Catuꞌ jix yakꞌon xacꞌal pax bautizar sbꞌa ebꞌ. 9Jix yalon Naj Kaawil tet Pablo tuꞌ yet jun akꞌbꞌal jaxca yin weyicheal jaxca tiꞌ:

—Manche jaach xiwi. Manche jaach oc tucan ja walon el jin kꞌane an, 10yutol ey jin ecꞌ ja wetoj an. Cꞌam junoj mactxequel oj skeꞌ jaach yetneni, yutol ecꞌal mactxequel sicꞌbꞌilxa el wu bꞌey jun conobꞌ tiꞌ an, ẍi tet naj Pablo.

11Yuxan jix eyecꞌ Pablo nan scaabꞌ abꞌil bꞌey Corinto tuꞌ, catuꞌ jix yakꞌon skꞌane Dios scuy ebꞌ tituꞌ.

12Jaꞌ yet jun tiempoal tuꞌ, eyoc naj Galión yaawil bꞌey jun lugar chi yij Acaya tuꞌ, catuꞌ jix slatiꞌne el sbꞌa ebꞌ Israel yin Pablo. Jix iꞌletoj naj yu ebꞌ sattaj naj yaaw tuꞌ. 13Catuꞌ jix yalon ebꞌ jaxca tiꞌ:

—Jaꞌ jun winaj tiꞌ, chi ecꞌ akꞌle scꞌul ebꞌ ánima catuꞌ chi yalon sbꞌa ebꞌ tet Dios, man pax jaxca oj cu ley, ẍi ebꞌ.

14Catuꞌ jix cꞌoli yalon sbꞌa Pablo tuꞌ, jal pax naj Galión jix yal tet ebꞌ Israel jaxca tiꞌ:

—Manche jex awi octej ey jin titiꞌ an. Ta ey junoj tzet man watxꞌoj jix el yunen naj tiꞌ, ma ey junoj spenail jix el yunen naj yul sat ley, chim jin chaꞌ wabꞌ tzet che yal an. 15Tucꞌal pax che txꞌemle a je bꞌa yu wan kꞌane chi yal naj tiꞌ, cꞌal yu jun bꞌie chi sbꞌinanetej naj, yetoj cꞌal yu je ley. Yuxan, asiꞌwej, waꞌnewej wan tiꞌ je txꞌojli. Jal jin xin, cꞌam chi yal jin cꞌul chin waꞌne wan tiꞌ an, ẍi Galión tuꞌ tet ebꞌ.

16Jaꞌ yet jix yalon jaxca tuꞌ, catuꞌ jix ujtele eltej ebꞌ yu yul sdespacho. 17Catuꞌ jix mitxꞌle naj Sóstenes yu masanil ebꞌ Griego tuꞌ, naj eyoc yaawiloj snail sculto ebꞌ Israel. Catuꞌ jix makꞌle naj yu ebꞌ bꞌey stiꞌ sdespacho naj yaaw bꞌey jun lugar tuꞌ. Tucꞌal jix oc tꞌanan Galión tuꞌ, cꞌam cꞌal niꞌoj tzet jix yal tet ebꞌ.

Jaꞌ Yet Jix Pax Toj Naj Pablo Bꞌey Antioquía

18Ecꞌal tocꞌal cꞌual jix eyecꞌ Pablo bꞌey Corinto tuꞌ, catuꞌ jix yalon toj sbꞌa tet ebꞌ creyente tituꞌ. Jix too Priscila cꞌal Aquila yetoj. Jaꞌ bꞌey conobꞌ Cencreas jix apni ebꞌ. Jix yakꞌ tzujom el sbꞌa naj Pablo tituꞌ yu xꞌoxon eloj, tol ey jun swa kꞌane yakꞌnaj naj yetoj Dios,#18:18 Jaꞌ tzet chi yal titiꞌ, chi kil bꞌey Números capítulo 6, bꞌey chi yaltej sleyal yet chi yakꞌon stiꞌ ánima yunen junoj tzetyetal. catuꞌ jix oc ebꞌ yul jun barco yu stoo bꞌey jun lugar chi yij Siria. 19Jaꞌ yet jix apni ebꞌ bꞌey conobꞌ Éfeso, catuꞌ jix akꞌle can Priscila yetoj Aquila tituꞌ yu naj Pablo. Catuꞌ jix too bꞌey snail sculto ebꞌ yet Israelal tuꞌ. Catuꞌ jix cꞌoli skꞌanabꞌ yetoj ebꞌ eyecꞌ tituꞌ. 20Jix oc tean ebꞌ yin naj tol chi eecꞌ jayebꞌoj cꞌu naj yetoj ebꞌ tituꞌ. Ma pax yal scꞌul. 21Jaꞌ yet jix yalon toj sbꞌa tet ebꞌ, catuꞌ jix yalon can jaxca tiꞌ:

—Sowalil oj jin toj Jerusalén ilo kꞌin. Ta jaxca tuꞌ oj el yin scꞌul Dios, oj jin ecꞌ ey jex tiꞌ junelxa, ẍi naj tet ebꞌ.

Catuꞌ jix too yul barco, catuꞌ jix el ebꞌ bꞌey Éfeso. 22Jix apni bꞌey conobꞌ Cesarea. Catuꞌ jix too kꞌanabꞌ yetoj ebꞌ creyente bꞌey Jerusalén. Jix ecꞌ bꞌey Jerusalén tuꞌ catuꞌ jix too bꞌey conobꞌ Antioquía. 23Jatuꞌ jix eecꞌ jun tiempoal, catuꞌ jix too junelxa, jix ecꞌ yul junjun conobꞌ yul yet Galacia cꞌal yul yet Frigia. Jix cꞌal ecꞌ iptzele ebꞌ creyente yu naj bꞌey jix eqꞌui.

Jaꞌ Yet Jix Yalon El Skꞌane Dios Naj Apolo Bꞌey Conobꞌ Éfeso

24Jaꞌ yet jun tiempoal tuꞌ, ey jun winaj a Israel chi yij Apolo, a conobꞌ Alejandría. Jix apni naj bꞌey conobꞌ Éfeso. Caw jelan skꞌanabꞌ naj, catuꞌ watxꞌ jix yute yalon el naj tzet tzꞌibꞌebꞌilcan yul An Juun, yutol caw yotaj naj sicꞌlebꞌil. 25Cuywinaj naj yin sbꞌeybꞌal Naj Kaawil. Yalnaj el watxꞌ kꞌane naj yin masanil scꞌul. Yin sjichanil jix yun yalon el skꞌaneal Jesús naj. Caxcꞌal asan scuybꞌanil sbautismo naj Juan yotaj xa naj. 26Jaꞌ yet junel jix too naj yalel skꞌane Dios bꞌey snail sculto ebꞌ yet Israelal. Caw tecꞌan yeoc naj yet jix yalon eloj. Jaꞌ yet jix yabꞌen Priscila yetoj Aquila tzet jix yute cuywa sbꞌa naj xin, catuꞌ jix yiꞌontoj naj ebꞌ xꞌojli, catuꞌ jix cꞌoli swatxꞌ scuyle naj yu ebꞌ yin yet Dios tuꞌ. 27Catuꞌ jix el yin scꞌul naj Apolo tuꞌ chi too bꞌey jun lugar chi yij Acaya. Jix colwa ebꞌ creyente yetoj naj yet tuꞌ, jix stzꞌibꞌen el jun scarta ebꞌ jix yiꞌtoj naj bꞌey ebꞌ creyente a lugar tuꞌ, yet watxꞌ, watxꞌ chi yute ẍaꞌon apnoj naj ebꞌ. Jaꞌ yet jix apni naj bꞌey Acaya tuꞌ xin, catuꞌ jix iptzele jantaj ebꞌ xax yaoc scꞌul yin Dios yu swatxꞌcꞌulal Dios tuꞌ. 28Caw jix yakꞌ yip naj xꞌoxon eloj, tzet utbꞌil tol yelcꞌulal tol qꞌueynajtoj ebꞌ Israel tuꞌ. Jaꞌ skꞌane Dios tzꞌibꞌebꞌilcan yul An Juun jix yakꞌbꞌalne, catuꞌ jix yalon tet ebꞌ ánima yet watxꞌ chi naꞌcha el yu ebꞌ, tol jaꞌ Jesús, jaꞌton Cristo,* catuꞌ tol jaꞌ echbꞌanebꞌil sjul yu ebꞌ.

Currently Selected:

Hechos 18: knj

Highlight

Copy