Hechos 12

Scamichal Naj Jacobo, Cꞌal Spresoal Naj Pedro

1Jaꞌ yet jun tiempoal tuꞌ, jix ẍaꞌel yich naj rey Herodes#12:1 Jaꞌ jun Herodes chi yal yin titiꞌ, itxiquine yeoc yu naj Herodes, naj jix ochen jix akꞌon cam Jesús yin syaliẍal. Mateo 2:13-16. yetnen ebꞌ creyente. 2Jix akꞌle cam naj Jacobo yuẍtaj Juan yu naj Herodes tuꞌ yetoj espada. 3Jaꞌ yet jix yilon naj rey tuꞌ, tol jix ẍaꞌ scꞌul ebꞌ Israel jun tuꞌ, catuꞌ jix mitxꞌle Pedro. Jaꞌ yet jun skꞌin ebꞌ Israel, yet chi sloꞌon ixim pan ebꞌ cꞌam yich, jaꞌ yet tuꞌ jix mitxꞌle naj. 4Yet jix michꞌchai, jix ale oc yul preso, catuꞌ jix ale oc yul skꞌabꞌ wajlajonwan soldado yu steynelei. Cantajwan ebꞌ chi teynen junjun el. Jaꞌ naj Herodes jix naꞌoni, tol jaꞌ yet chi lawi kꞌin Pascua, oj txꞌoxle eltej Pedro snan xol ebꞌ ánima yet chi snaꞌle oc yin naj. 5Caw teynebꞌil naj Pedro tuꞌ yul preso tuꞌ. Caw chi txali pax ebꞌ creyente yin masanil scꞌul yu naj.

Jaꞌ Yet Jix Iꞌle Eltej Naj Pedro Yul Preso

6Jaꞌ jun akꞌbꞌal yet tꞌinan xa yiꞌle eltej Pedro sattaj conobꞌ yu naj Herodes tuꞌ, chi wey naj Pedro snan xol cawan ebꞌ soldado, pixbꞌil ey yetoj caabꞌ cadena. Ey pax oc steynemal stiꞌ teꞌ preso tuꞌ. 7Yin cꞌal eymanil jix xꞌoxa sbꞌa jun yángel Naj Kaawil. Jix sajbꞌi el yul preso tuꞌ yu. Catuꞌ jix tenle spacꞌul xicꞌ naj Pedro tuꞌ, jix stenle el sweyan naj. Catuꞌ jix yalon tet jaxca tiꞌ:

—Aan linanoj, eyman, ẍi jun ángel tuꞌ tet naj.

Tuxa cꞌal jix yakꞌ el tina sbꞌa chꞌen cadena eyoc yin skꞌabꞌ naj Pedro tuꞌ. 8Catuꞌ jix yalon jun ángel tuꞌ tet jaxca tiꞌ:

—Aoc ja kꞌalil, catuꞌ cha waon oc ja xanabꞌ, ẍi tet naj.

Catuꞌ jix yalon tet junelxa jaxca tiꞌ:

—Aoc ja xotil, catuꞌ chach tzajlo wintaj an, ẍi jun ángel tuꞌ tet naj.

9Jix oc tzajan naj yintaj, catuꞌ jix eltej yul jun cuarto bꞌey eyoctoj tuꞌ. Jaꞌ snaꞌoni, tol chi weyichli eyoj. Man yotaj oj ta yel lalan yeltej. 10Jix ecꞌ eltej ebꞌ bꞌey caabꞌ lugar bꞌey eyecꞌ ebꞌ soldado steynen preso tuꞌ. Catuꞌ jix elol ebꞌ bꞌey jun chꞌen puerta bꞌey scawilal stiꞌ calle. Jaꞌ jun chꞌen puerta tuꞌ, jix sjaj sbꞌa tet ebꞌ xꞌojli, catuꞌ jix eltej ebꞌ. Jaꞌ yet jix ecꞌtoj ebꞌ bꞌey junxa calle, catuꞌ jix bꞌejlecan Pedro tuꞌ xꞌojli yu jun ángel tuꞌ. 11Jaxa jix yilontej Pedro tuꞌ, tol caw yel. Yuxan jix yal jaxca tiꞌ:

—Jaꞌ tinaniꞌ, chi naꞌcha el wu an, tol caw yel jix ẍejtej jun yángel Naj Kaawil. Jix jin jul scolon el yul skꞌabꞌ naj Herodes, cꞌal yu jin colcha pax el yalan jantaj tzet chi yoche ebꞌ wet Israelal chi yaoc wibꞌan an, ẍi naj Pedro tuꞌ.

12Lalanto snaꞌoꞌtanen wan tuꞌ, catuꞌ jix apni bꞌey sna ix María, xutx naj Juan, naj chi yij pax Marcos. Ecꞌal mac yaman ecꞌ txaloj bꞌey jun na tuꞌ yu naj Pedro tuꞌ. 13Jaꞌ yet jix kꞌoxcꞌon octoj bꞌey bꞌabꞌel puerta stiꞌ calle, ey jun kꞌopo ix chi yij Rode jix eltej takꞌwoj. 14Jaxa yet jix yabꞌen ix tol jaꞌ Pedro, ma sjaj puerta ix. Caw jix tzala a ix sicꞌlebꞌil. Catuꞌ jix yakꞌon ani ix spax oc yul na yin eymanil. Catuꞌ jix yalon ix tet ebꞌ yaman ecꞌ tituꞌ, tol jaꞌ Pedro lalan skꞌoxcꞌon octoj stiꞌ puerta. 15Jix yalon cꞌal ebꞌ tet ix jaxca tiꞌ:

—Tejan ey ja yaꞌbꞌil chabꞌil, ẍi ebꞌ tet ix.

Jix cꞌal stecꞌbꞌa sbꞌa ix yaloni, tol caw yel jaꞌ naj Pedro eyecꞌoj, catuꞌ jix yalon ebꞌ jaxca tiꞌ:

—Manaj Pedro tuꞌ. Tejan jaꞌ jun ángel chi teyneni,#12:15 Chi snaꞌ ebꞌ Israel tol junjun ánima ey yángel chi teyneni. Il Mateo 18:10. tejan jaꞌ chi juli, ẍi ebꞌ tet ix.

16Jal pax naj Pedro, jacꞌalaꞌ cꞌal skꞌoxcꞌon octoj bꞌey puerta tuꞌ. Jaꞌ yet jix sjajon ebꞌ, catuꞌ jix yilon ebꞌ, tol jaꞌ Pedro tuꞌ eyecꞌoj. Caw jix qꞌueya scꞌul ebꞌ yu. 17Catuꞌ jix yakꞌon yechel yetoj skꞌabꞌ tet ebꞌ, yet watxꞌ chi tzꞌini ey ebꞌ. Catuꞌ jix yalon tet ebꞌ tzet utbꞌil jix yun yiꞌle eltej yu Naj Kaawil yul preso tuꞌ. Jix yalon pax tet ebꞌ jaxca tiꞌ:

—Che yal wan tiꞌ tet Jacobo cꞌal tet wanxa ebꞌ kuẍtaj, ẍi naj. Yet jix lawi jun tuꞌ xin, jix el xol ebꞌ. Catuꞌ jix too bꞌey junxa lugar.

18Jaꞌ yet jix kꞌinibꞌi a junxa cꞌual xin, cꞌam chi naꞌcha yu ebꞌ soldado bꞌey jix too naj Pedro tuꞌ. Caw jix somcha el snaꞌbꞌal ebꞌ yu. 19Jal naj Herodes xin, caw jix yakꞌ seyle ecꞌ sicꞌlebꞌil, ma pax ilcha naj yu ebꞌ seywawom tuꞌ. Jix kꞌanlen el ebꞌ tet ebꞌ soldado tuꞌ, tzet jix yun yel yet lalan steynen ebꞌ tuꞌ. Catuꞌ jix chejle akꞌle cam ebꞌ.#12:19 Jatacꞌalaꞌ yalon sley ebꞌ a Roma, ta ey junoj a presowom chi jajle el yu naj ilom preso, jaꞌ naj ilom preso tuꞌ chi oc can sqꞌuexeloj. Ey tiempo chi cam naj ilom preso tuꞌ syaꞌiloj ebꞌ. Catuꞌ jix el naj Herodes yul yet Judea bꞌey ey cꞌaltaꞌ ecꞌ tuꞌ. Catuꞌ jix too eyecꞌ bꞌey conobꞌ Cesarea.

Scamichal Rey Herodes

20Jaꞌ yet junel, caw jix tit sjowal naj rey Herodes yin ebꞌ ánima a Tiro cꞌal yin ebꞌ a Sidón. Yuxan jix syambꞌa ey sbꞌa ebꞌ yu snaꞌon tzet watxꞌ chi too yute yalon sbꞌa tet naj rey tuꞌ. Catuꞌ jix smonten jun winaj chi yij Blasto ebꞌ, naj sat yakꞌomal servil naj rey tuꞌ. Jaꞌ naj jix yakꞌbꞌalne ebꞌ, catuꞌ jix bꞌet skꞌanon mimancꞌulal ebꞌ tet naj rey tuꞌ. Jix skꞌan mimancꞌulal yutol jaꞌ bꞌey sconobꞌ naj rey tuꞌ chi tit masanil tzet chi sloꞌ ebꞌ. 21Jix yalon naj rey Herodes tuꞌ bꞌeytet cꞌual chi jul ebꞌ sattaj naj. Yet jun cꞌual jix yal can naj tuꞌ, jix yaoc wan spichil naj caw watxꞌ, jaxca yet masanil ebꞌ rey chi yaocoj. Catuꞌ jix ey chotan naj yul sdespacho. Catuꞌ jix cꞌoli skꞌanabꞌ eltej naj xol ebꞌ ánima tuꞌ. 22Jaꞌ yet jix lawi yabꞌen skꞌanabꞌ naj ebꞌ tuꞌ, catuꞌ jix yalon ebꞌ jaxca tiꞌ:

—Jaꞌ jun chi kꞌanabꞌ eltej tuꞌ, man ánima oj, jaꞌ junoj ebꞌ dios, ẍi ebꞌ ánima.

23Jaꞌ yet jun txolan tuꞌ, jix akꞌle can yaꞌbꞌoj ey yu jun yángel Naj Kaawil yutol ma yalaꞌ, tol asan cu Mam Dios miman yeloc apnoj, catuꞌ jix oc noꞌ lujum yin naj, catuꞌ jix cam naj yin eymanil. 24Jal pax skꞌane Naj Kaawil tuꞌ xin, jix sajlem cꞌal xol-laj ánima. Jix al-le cꞌal el bꞌey junjun lugar.

25Jaꞌ yet jix lawi yunen tzet chi yun Bernabé yetoj Saulo bꞌey Jerusalén, jix too ebꞌ, catuꞌ jix yiꞌontoj naj Juan ebꞌ yetoj, naj chi yij Marcos, catuꞌ jix too ebꞌ bꞌey Antioquía.

Currently Selected:

Hechos 12: knj

Highlight

Copy