Yaburina 144
144
Mangana Ala maxandina
1Dawuda gbeena.
Barikan bira Alatala xa,
n kantan muxuna,
naxan n maxaranma yɛngɛ sodeni.
2A tan nan hinanma n na,
n ma yinna,
n ma faran makantanxina,
n xunba muxuna,
e nun n yɛ masansan wure lefana.
N na n luxunma a tan nin.
A tan nan siyane luma n sanna bun.
3Alatala, nanse muxun na
alogo i xa i ɲɔxɔ lu a xɔn?
Nanse adamadiin na
alogo i xa i miri a ma?
4Adamadiin luxi nɛn alo foyedina.
A siimayaan luxi nɛn
alo nininna naxan danguma.
5Alatala, kuyen tintin, i godo.
I yiin din geyane ra,
e tutin xa te.
6Kuye sarinne rasiga,
i yi yaxune raxuya ayi.
I ya xalimakunle woli,
i yi e kedi.
7I yiin nagodo keli kore,
i yi n ba tilinna ma.
N ba xɔɲɛne sɛnbɛn bun
8naxanye wulen falama,
naxanye mi e fala xuine rakamalima.
9Ala, n bɛti nɛnɛn bama nɛn i xa,
n yi i tantun kondenna ra.
10A tan nan mangane rakisima.
A tan nan a walikɛɛn Dawuda rakisima silanfanna ma.
11N xunba,
i n ba xɔɲɛne sɛnbɛn bun ma,
naxanye wulen falama,
naxanye mi e fala xuine rakamalima.
12Ala xa en ma dii xɛmɛne rasabati
alo wudi binle.
Ala xa en ma dii tɛmɛne xa tofanɲɛ ayi
alo gɛmɛ sɛnbɛtɛn nayabuxin
naxanye manga banxine bun.
13Ala xa en ma sagane rafe donseen sifan birin na.
Ala xa en ma xuruseene rawuya ayi xɛɛn ma,
dɔxɔɲa ma wuli keden han wuli fu.
14Ala xa en ma ɲingene rasabati.
Ala xa en tanga yɛngɛn ma
alogo muxe nama suxu,
wuga xuiin yi te taani.
15Sɛwan na yamaan xa,
na feene ligama naxanye xa.
Sɛwan na yamaan xa,
naxanye Ala findixi Alatala ra.
Currently Selected:
Yaburina 144: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license
