Iesui Potmuꞌeria 19

Haga 19

1Uruwy Apauru tiꞌatumuꞌe kahato tawa Kurintiu piaria pe turan Pauru hewyry kahato yityꞌok totiat muap upi tawa Ewesu kape. Putꞌok e itote turan toiꞌatupuẽti itotiaria imohey haria. 2Miꞌi hawyi apo e iꞌatuepe -Eweimohey hawyi apo ewehewaku raꞌyn Tupana Paꞌãu Wakuat e ipotmuꞌeria pe. Miꞌi hawyi taꞌatuwesat -Yt uruikuap i ti Tupana Paꞌãu sio toineꞌen sio yt iꞌatuꞌe. 3-Uwe set upi kahu pyno eipe eiwoꞌosetꞌok e Pauru. -Taꞌi Iuwãu mienoi ewy ti urutoria uhyt iꞌatuꞌe. 4Miꞌi hawyi Pauru toꞌe -Are paĩ Iuwãu ti henoi mio tã e -Uhaipepe ti aru wẽtup ok Tupana Mipoꞌoro Miitꞌin Porekuat nuat tuut e Pauru. Miꞌi ro -Eweimohey e ti Iuwãu. Miꞌi tupono eweiꞌatoiat ro yt nakuap i koꞌi eiminug hawyi worohoꞌosetꞌok e ti Iuwãu miitꞌin me e. Miꞌi ti Iesui raꞌyn uhytꞌiꞌin e Pauru. 5Taꞌatukuap hawyi ti Aiporekuat Iesui set upi i raꞌyn toꞌosetꞌok. 6Miꞌi hawyi Pauru tuweponug miꞌi hawyi Tupana Paꞌãu wakuat putꞌok e raꞌyn iꞌatuete. Miꞌi hawyi taꞌatumoherep kahato Tupana ehay iraniaꞌin pusu puo. 7Miꞌiria ti 12 ok ihainiaꞌin itote tukupteꞌen.

8Miꞌi hawyi Pauru henoi miitꞌin me itote aikotã Tupana toineꞌen miitꞌin me hap itote. Aikotã Tupana toineꞌen Miitꞌin Porekuat no hap. Myẽꞌym ewaty ipypap i kahato mekewat Iuteuria wat Tupana yat kape. Toiꞌatumuꞌe haty wo toiꞌatuekyi miitꞌin Tupana etama kape. 9Maꞌato iraniaꞌin itotiaria Pauru mienoi yt taꞌatumotypot i. Toꞌokyryꞌi kahato miitꞌin Iesui enoi hap ete. Yt taꞌatumohey hin i. Miꞌi pote Pauru hokiwat raꞌyn iraniaꞌin Iesui mohey haria wywo. Miꞌi hawyi mehin Tiranu woꞌomuꞌe hawe yne eꞌat pe Pauru tiꞌatumuꞌe. 10Typy anu raꞌyn Pauru tiꞌatumuꞌe Aipotypot ehay ete. Miꞌi tupono yne itotiaria Iuteuria ywania tikuap taꞌyn iꞌewyte Kereku ywania ikuap taꞌyn wy e. 11Miꞌi hawyi miitꞌin teꞌeruwanetup kahato katupono Pauru tunug yt kat kuap i topo wo wakuap maꞌato Tupana esaika hamo yn tutunug. 12Miꞌi hawyi iꞌahuu rakaria kape Pauru esokpe taꞌatuereto hawyi taꞌatupag iꞌatupiit pe. Miꞌi hawyi meremo raꞌyn iꞌatuꞌahuu kosap. Iꞌewyte ahiagnia paꞌãu wywuat haria toiꞌatuporenotem naꞌyn miitꞌin myi. 13Miꞌi hawyi paini huꞌat teran Iesui set ahiag sytpok hamo. Miꞌiria Iuteuria uruto e haria maꞌato yt miꞌi sese i. 14Sewa saꞌyruꞌin 7 ok takaria Iuteuria epaꞌi koro saꞌyruꞌin miꞌiria. 15Miꞌi hawyi maꞌãu saꞌag teꞌeruwẽpowat 7 ok takaria kape -Uruikuap ti emisuꞌat koꞌi sehay iꞌatuꞌe. Iesui set Pauru set uruikuap iꞌatuꞌe maꞌato eipe yt uruikuap i paĩ uweĩ eipe Uweꞌin eipe pyno e ahiag miit piit pyi. 16Mio tã taꞌatuꞌe hawyi maꞌãu saꞌag ipiit piat rakat pesoꞌe mekewat paini wato saꞌyruꞌin kape. Miꞌi hawyi haꞌyruꞌin tuꞌuka mekewat miit wywo maꞌato poꞌog hesaika iꞌatukai. Miꞌi hawyi teꞌeruwehep taꞌyn mekewat miit po pyi yt kat taꞌatuesokpe wywo i iꞌatupak pak hap yn naꞌyn iꞌatupiit ete. 17Miꞌi hawyi tawa Ewesu piaria Iuteuria Kerekuria tikuap taꞌyn hawyi iꞌatuwuwu raꞌyn Iesui set pupi. Yt toꞌokyryꞌi teran i poꞌog. 18Miꞌi pote typyꞌi poityꞌi teꞌeropyhuꞌat imohey haria itote tawa Ewesu pe. Miꞌi hawyi wuatꞌi mikuap mo teꞌeroꞌe -Yt nakuat i nug kahato saꞌawyꞌi wuat hat uito aikotã aikotã saꞌag nug hap sepap hat sese ti uito iꞌatuꞌe. Maꞌato mesup ti atoiat raꞌyn mekewat muap saꞌag wẽtup iꞌatuꞌe toꞌope. Miꞌi tupono ti atiwuk taꞌyn ehehamo paini miium popera sok iꞌatuꞌe toꞌope. 19Miꞌi hawyi taꞌatukat karania upi rakat paini miwan koꞌi iꞌatumiwuk koꞌi. Miꞌi hawyi taꞌatupuẽti saꞌup iwato kahato 50 miu eꞌat iꞌatupotpap miꞌi tã kyiꞌat hamo iꞌatuꞌe. Maꞌato taꞌatuwuk yne raꞌyn. 20Tupana sese yn waku aheTupana wo iꞌatuꞌe. Miꞌi ehay upi yn watopyhuꞌat teran iꞌatuꞌe.

Masetunia Piaria Taꞌatukyꞌesat Kahato Pauru Uut Hap

21Wẽtup eꞌat pe Pauru toꞌe topyꞌa pe -Pywo ti Tupana Paꞌãu tikyꞌesat areto tawa Ierusarẽi kapiat hap yi Masetunia puo yi Akaia puo e. Miꞌi rẽ Ierusarẽi kaipyi ti aru areto tawa Huma kape Tupana Paꞌãu mikyꞌesat ewy e tuwepe. 22Miꞌi hawyi Pauru tipoꞌoro typy ok tekatuwyria yi Masetunia piaria kape. Wẽtup ok Timoteu wẽtup ok Eratu toipoꞌoro maꞌato Pauru topyhuꞌat porapꞌi tawa Ewesu pe.

Temetiu Sehay Saꞌag Tupana Etiat

23Mekewat eꞌat pe tuꞌuka kahato tawa Ewesu piaria Iesui puꞌap upiaria ete. 24Wẽtup ok itote tupanaria iãꞌãkap nug hat toineꞌen Temetiu e hap het rakat. Miꞌi ti tupana mana Tiana yat nug hat. Miꞌi ti tupanaria eiam parata kawiat nug hat koro iꞌatuꞌe. Miꞌi nug hap kaipyi hemiitꞌin hekat rakaria wo teꞌeropyhuꞌat. 25Miꞌi hawyi toiꞌatukay kay tuwewawi topotpap tuwyriaꞌin iraniaꞌin tupanaria eiam nug haria. Tõꞌẽ hawyi toꞌe iꞌatuepe -Mehinꞌin e watikuap taꞌyn koitywy aikotã watopyhuꞌat aito mesup hekat rakaria wo raꞌyn hap e. 26Taꞌi aipo wuat aiminug kaipyi wyti ahekat raꞌyn e. Miꞌi hawyi eweiꞌakasa raꞌyn Pauru potpap hap. Eweikuap taꞌyn ihay aikotã tohenoi tawa Ewesu piaria pe iꞌewyte wuatꞌi yi Asia wato hap oktan hap. Mio tã e -Mo wuat minug tupanaria wyti yt Tupana kahato i e hap eweikuap taꞌyn e. Miꞌi hawyi ti mesup taꞌyn miitꞌin toiat kahato ahetupanaria. -Waureꞌiꞌatuꞌe raꞌyn e. 27Miꞌi hap ewy ti meiũran aiwat aipotpap yt kat i aru topyhuꞌat paĩ e. Yt naku i topyhuꞌat aru katupono meiũran tupana mana Tiana yat pe yt uwe i imotypot hanuaria paĩ e. Yt kat i imotypot hap hawyi yt naku i ahepe. Yi Asia piaria etupana mana Tiana iꞌewyte yi wato oktan miitꞌin timotypot kahato mana Tiana e Temetiu tupanaria nug haria pe.

28Miꞌi e hap taꞌatukuap hawyi iꞌatupyꞌahak kahato Pauru ete Iesui mohey haria ete. Miꞌi hawyi iꞌatuehay pirik kahato itote -Wakuat ti ahetupana mana Tiana tawa Ewesu wat iꞌatuꞌe haty wo. 29Miꞌi hawyi tõꞌẽ tõꞌẽ kahato miitꞌin. Miꞌi hawyi topyhuꞌat tawa Ewesu pe sehay saꞌag yn naꞌyn. Miꞌi hawyi Pauru wyriaꞌin mehin Kaiu mehin Aritaku yi Masetunia kaipywiaria taꞌatupytyk. Miꞌi hawyi taꞌatuereto yi upi taꞌatuwaꞌatunug hap kape. Miꞌi hawyi meremo tuwehytꞌok taꞌyn mekewat yat wato pe. 30Miꞌi hawyi Pauru teke teran iꞌatuweꞌatunug yat pe miitꞌin sok napin hamo towyriaꞌin Kaiu Aritaku powyro hamo. Teke teran maꞌato iraniaꞌin Iesui mohey haria yt tikyꞌesat i. 31Iꞌewyte tuꞌisaria itotiaria Pauru kuap haria tipoꞌoro sehay Pauru pe -Mehin iꞌatuꞌe yt naku i ereke iꞌatuwaꞌatunug hap yat wato pe iꞌatuꞌe. Yt uruikyꞌesat i uruto iꞌatuꞌe tuꞌisaria. 32Miꞌi hawyi itote iꞌatuehay pirik kahato. Ipatꞌok wẽtup sehay etiatno. Yt taꞌatukuap i kahato itotiaria kat hamo kat hamo teꞌeruwaꞌatunug hap e. 33Miꞌi hawyi Iuteuria tikyꞌesat uhyt Aresãtere ihay itotiaria kape hamo. Miꞌi hawyi ipoĩꞌam iꞌatupyꞌasetpe tehay hamo. Topoĩꞌam haype topo wo toiꞌatumopoꞌinik teran ihay pirik takaria. Maꞌato yt taꞌatukyꞌesat i Aresãtere ehay hap katupono Iuteu ywania neꞌi miꞌi. 34Miꞌi hawyi poꞌog naꞌyn iꞌatuehay pirik typy ora kape itote. Wẽtup ehay yn iꞌatuehay itote -Wakuat ahetawa Ewesu etupana mana Tiana iꞌatuꞌe taꞌatuehay pirik wo. 35Miꞌi hawyi wẽtup ok popera piat sehay moheg hat tawa Ewesu piat ihay teran iꞌatuepe. Taꞌatukuap taꞌyn hawyi iꞌatupoꞌinik taꞌyn. Miꞌi hawyi ihay raꞌyn -Uiwyriaꞌin e tawa Ewesu piaria ti aito paĩ e. Taꞌi watikuap kahato wuatꞌi miitꞌin mesuwat yi totiaria aikotã Tupana wakuat haryporia kawiat mana Tiana motypot haria aito hap. 36Taꞌi taꞌatukuap kahato aikotã saꞌawyꞌi aheman Tiana taꞌat waikiru kaipywiat hap e. Wuatꞌi miitꞌin miꞌi hap kuap haria teꞌeropyhuꞌat mesuwe e. Kan hamo pyno mio tã ehehay pirik aat mesuwe e. Eiweꞌeg wo o eweikupteꞌen e. Yt ewetunug neiꞌo mopyꞌahak hap sehay e. 37Taꞌi meimuẽwaria miitꞌin eimipyhyp koꞌi ti yt kat iꞌatuꞌe i ahetupana Tiana ete. Yt karamuo i wyti taꞌatusereꞌok ahetupanaria yat koꞌi e. 38Pyno mehin Temetiu woronapin neran. Miꞌi hawyi karapeĩ wẽtup ok eimopyꞌahak hat toineꞌen meikope pote waku eweterut woꞌonapin hap getap kape miꞌi hat e aikotã hamuat kuap tuereto hap kape e. Miꞌi hawyi waku itote ewehenoi aikotã aikotã eiwanetup hap waku sio yt kuap hamo e. 39Katupono woꞌonapin hap eꞌat toineꞌen mesuwat tawa pe. Miꞌi pote mekewat eꞌat pe waku eweterut eiwewywo iꞌaparap hat e. Miꞌi hawyi itote waku watiꞌatunapin miꞌi miitꞌin pyhik hat akag wywo e. 40Yt naku i mesup ewetunug mesuwe miꞌiria ete. Eiweꞌeg wo o eipotpyhik hap pupi mehinꞌin e. Kat watoꞌe aru woꞌopyhik hat ete. Yt kat watoꞌe kuap i aru woꞌopyhik hat akag me mesuwat eꞌat piat hap ete e popera piat sehay moheg hat itotiaria pe. 41Mio tã e iꞌatuepe hawyi -Waku eweiwat e. Miꞌi hawyi iꞌatuperup i raꞌyn tuwat itote pyi.

Currently Selected:

Iesui Potmuꞌeria 19: mav

Highlight

Copy