1 Tesaronika 2

Haga Typy 2

1Uiwyriaꞌin eweikuap taꞌyn aikotã uhepiat eimuꞌe hap tuwenug kahato itotiat hap. Eweikuap taꞌyn aikotã miitꞌin iꞌatupap kahato uimienoi upi. 2Eweikuap taꞌyn uiwyriaꞌin karãpe urutuwat ehetawa Tesaronika kape tawa Wiripu piaria muꞌe hamo urutuwat maꞌato itotiaria yt uruꞌoksatꞌi hin i. Iꞌatumikyryꞌi kahato uruete urupiit ete haty. Miꞌi totepyi urutuwat ehewowi uruepiat hoꞌopot rakirẽ. Miꞌi hawyi putꞌok urutoꞌe ehetawa pe hawyi yt paa urutoꞌe hin i Tupana ehay moherep hap ete uruhoꞌopot kahato itotiat pykai. Miꞌi pykai yt uruwẽpohep hin i eimuꞌe hap ete. Sehay pywuat sese yn uruwẽ pyi tuwẽtem. Poꞌog neꞌi urumoesaika Tupana. Miꞌi hawyi urutuꞌuka hap pupi yt urutokenꞌẽ hin i tawa Wiripu piaria uruꞌahyk ahyk pykai. 3Yt kat i eimaꞌat uruepiat hap uruwanetup hawe. Yt kat i eipiit kyꞌesat hap wywo i worohoꞌomuꞌe. 4Taꞌi Tupana eropat haria wo yn urutukupteꞌen miꞌi pote Tupana wẽ wo urutukupteꞌen. Saꞌawyꞌi Tupana toꞌe uruepe -Worohoꞌomohey kahato eipe uhehay enoi hamo e. Uimiꞌairoria sese eipe uhehay wakuat sytpok hanuaria e uruepe. Miꞌi hawyi hãpyk kahato uruiꞌatumuꞌe eipe. Yt eimikyꞌesat ewy i wen maꞌato Tupana mikyꞌesat ewy yn. Maꞌato itote uruiãꞌãg kahato Tupana. Toikuap teran pywuat tokyꞌe hap kaipywiat urupotpap hap haype sio miitꞌin miat urumotypot hap kaipyi neꞌi urupotpap miꞌi hap toikuap teran. 5Yt karãpe i eimaꞌatꞌi maꞌatꞌi wo uruiꞌatumoperupꞌi eipe. Maꞌato ti yt eimikyꞌesat ewy i uruiꞌatunapin. Taꞌi Tupana mikyꞌesat ewy yn uruiꞌatunapin. Yt kat i urutehaꞌat ehekat kyewi hap kape. Miꞌi pote pywo e Tupana eiꞌatumuꞌe uruepiat hap ete. 6Iꞌewyte yt kat i urumotypot hap uruikyꞌesat eimuꞌe turan. Yt uwe kaipyi hin i uruikyꞌesat urumotypot hap. Yt eikaipyi i wyti maꞌato urupoꞌoro hat mowepiit hap yn uruwanetup hawe eimuꞌe turan. 7Uruto ti Iesui potpoꞌororia sese maꞌato miꞌi pykai urumotypot ro urupoi ro yt urutoꞌe i ehepe. Perupꞌi popuo urutukupteꞌen eipyꞌasetpe aikotã aity aimoperupꞌi moperupꞌi temi ete hap ewy. 8Taꞌi eipyꞌasetpe urutukupteꞌen eikyꞌe kahato haria wo. Urutuwehum kahato ehete. Miꞌi pote eheropat haria wo urutopyhuꞌat katupono uruiꞌatukyꞌe kahato eipe. 9Yt sẽtup i sẽtup i haria wo hin i urutukupteꞌen eipyꞌasetpiat turan. Yt kat i hin i uruhẽtup ehepe. Yt eimiꞌu kyewi i ti uruiꞌatumuꞌe Tupana ehay wo eipe. Maꞌato urupotpap urupo wuat kaipyi yn ni urutenuk. Yt eiꞌokpe tote hin i urutukupteꞌen yt ehekat kyewi hin i ti urutukupteꞌen. Yt waureꞌeweiꞌe teiꞌo miꞌi hap kai uruwyriaꞌin. 10Miꞌi hap ete pywo eweiꞌe iꞌewyte Tupana pywo e urutukupteꞌen eipyꞌasetpiat turan katupono wakuap mywo hãpyk puo yt kat i eimaꞌat hap mywo urutukupteꞌen ehehamo iꞌewyte Tupana ehamo. 11Eweikuap taꞌyn eipyꞌasetpe urutukupteꞌen turan eiꞌywot sese ewy urutukupteꞌen einapin haype aikotã aiꞌywot tuwehaponik kahato hap ewy eipyꞌasetpe urutukupteꞌen einapin hanuaria. 12Uruiꞌatumaharaꞌi maharaꞌi kahato eipe urumepytꞌin mote. Ehewyry hãpyk kahato o Tupana mikyꞌesat ewy urutoꞌe. Eikay kay raꞌyn temiitꞌin no tetawa kape aikope toineꞌen Morekuat no hap kape aikope tewaku hap moherep hap kape eikay kay. Miꞌi tote yt tuwemoti hin i Tupana eiminug koꞌi pupi. Miꞌi hap uruikyꞌesat kahato. Yt kat i hin i Tupana wemoti eiminug koꞌi pupiat hap uruikyꞌesat.

Tupana Mohey Haria Hoꞌopot Puo Toineꞌen Turan

13Waku kahato eipe uiwanetup hawe katupono saꞌawyꞌi Iesui kapiat uruehay hap kape ehewaure kaꞌa kahato. -Yt miitꞌin ehay wo hin i urunapin eweiꞌe eipyꞌa pe tawa Tesaronika piaria. Waku kahato eiperia. -Tupana ehay sese wo urumuꞌe katupono Iesui Aimoieineꞌen hat ete urumuꞌe eweiꞌe uruepiat. Miꞌi hawyi Iesui mohey haria wo raꞌyn eweipyhuꞌat kahato itote waku hap ewy are. Miꞌi hap upi urutuwehum kahato Tupana kape aat kaꞌap ehupi are. Yt karamuat i ikahuro rakat uruwehum hap katupono Tupana ehay mio tuwenug kahato raꞌyn eheineꞌen hawuo Iesui mohey hawyi. 14Miꞌi hawyi ehetawa Tesaronika piaria iꞌatuhoiro haria kahato ehete eiꞌatumosoꞌopot kahato itote aikotã saꞌawyꞌi Iesui mohey haria Iuteuria hoꞌopot iꞌatuetawa piaria hap ewy topyhuꞌat ehete eiwoꞌoꞌewy ewy. 15Nimo Iuteuria tuꞌuka Tupana potpoꞌororia tehay moherep haria. Miꞌi hawyi Aikaꞌiwat Iesui taꞌatuꞌauka raꞌyn wy. Miꞌi pote koitywy aiꞌauka teran miꞌiria. Yt Tupana mowepiit hap hin i te taꞌatunug ahete. Iꞌewyte yne ahewanikaptia wo tukupteꞌen miꞌiria Iuteuria. 16Yt ewehenoi teiꞌo iraniaꞌin wẽtup ywania pe iꞌatuꞌe uruepe. Katupono miꞌiria yt tikyꞌesat hin i iraniaꞌin ehakyeraꞌat hap katupono -Howapy yne raꞌyn iꞌatupiit iꞌatuminug saꞌag koꞌi wo. Yt kat i raꞌyn heiam howapy poityꞌi pote e Tupana. Toran naꞌyn putꞌok e raꞌyn koitywy iꞌatuꞌapiheg hap e Tupana Iuteuria pe topyꞌahak popuo.

17Uiwyriaꞌin ehepiat hoꞌopot turan yt uwe hin i uruto eiwywo eipowyro hamo. Urupiit yt uwe i maꞌato uruwanetup hap toineꞌen ehewowi yn are. Taꞌi uruehatꞌat kahato ekyewi kat pote saꞌawyꞌi uruꞌaipok wo urutuwat ehewowi. Miꞌi hawyi poꞌog urupap ehewowi -Toꞌiro wataꞌaipok i ro ahekatuwyria Tesaronika piaria ewowi urutoꞌe urupap haype. 18Iꞌewyte uito Pauru miꞌi hap yn uiwẽ pyi tuwẽtem -Toꞌiro wataꞌaipok i uiꞌe hap ewy. Miꞌi hawyi urutuwat maꞌato yt putꞌok urutoꞌe i. Taꞌi karania wo neꞌi urupyhyp ahiag ehowawiat urutuwat turan. Urutuwat wen maꞌato yt putꞌok urutoꞌe hin i. Urupyhyp yn tuereto ahiag ehowawiat uruwat turan. 19Katupono karapeĩ putꞌok e Aikaꞌiwat Iesui Wuatꞌi Miitꞌin Porekuat nuat turan eipe yn eweipyhuꞌat uimowepiit kahato hanuaria wo aikotã morekuaria teꞌeruwehum kahato hamuat taꞌatuꞌakag painug hap ete. Miꞌi hap ewy hamuat uruto urutuwehum kahato hamuat ehete. Miꞌi hap yn uiwanetup hawe. 20Katupono eipe yn eweipyhuꞌat uimoꞌokpipokꞌi haria wo urutoꞌe Pauruꞌin.

Currently Selected:

1 Tesaronika 2: mav

Highlight

Copy