Nambas 4
4
Olketa waka blong laen blong Kohat
1Yawe hemi tok moa olsem long Mosis an Eron, 2“Yutufala mas mekem sensas fo kaontem evriwan long laen blong Kohat. Yutufala mas falom olketa laen an famili blong olketa, 3an raetemdaon nem blong olketa man hu i teti yia go kasem fifti yia. Hem nao olketa wea i save waka long Tambu Haostent.
4“Waka blong olketa hemi fo lukaftarem olketa tambu samting long Tambu Haostent. 5Taem yufala redi fo muv go long narafala ples, trifala prist ya, Haeprist Eron wetem tufala san blong hem, bae trifala nao mas kam insaet long Tambu Haostent fo redim olketa samting blong hem. Trifala mas tekemdaon bikfala kaleko wea hemi satem disfala Barava Tambu Rum wea Tambu Boks hemi stap long hem. An trifala mas yusim bikfala kaleko ya fo kavaremap Tambu Boks. 6Den trifala mas tekem wanfala skin blong jiukong, an kavaremap moa Tambu Boks ya. An bihaen, trifala mas tekem wanfala blu kaleko, an kavaremap moa long hem. Den trifala mas putumbaek tufala spesol stik fo karim Tambu Boks ya.
7“An trifala mas tekem narafala blu kaleko, an kavaremap Tebol fo Tambu Bred. Nao trifala mas tekem olketa plet an besin, an olketa kap, an olketa botol waen, an trifala mas putum long Tebol, antap long datfala blu kaleko. An Tambu Bred hemi mas stap long disfala Tebol olowe. 8An trifala mas tekem wanfala red kaleko, an kavaremap disfala Tebol wetem olketa samting long hem, an trifala mas kavaremap moa long wanfala skin blong jiukong. An bihaen, trifala mas putumbaek tufala spesol stik fo karim disfala Tebol.
9“An trifala mas tekem narafala blu kaleko, an kavaremap Spesol Frem fo putum Lam an samting fo kilim laet, an olketa trei, an olketa botol oel. 10Den trifala mas tekem wanfala skin blong jiukong, an rolemap olketa samting ya long hem, bifoa trifala putum long wanfala frem fo karim.
11“An narafala samting, trifala mas tekem wanfala blu kaleko fo kavaremap olta wea olketa wakem long gol, an trifala mas tekem wanfala skin blong jiukong fo kavaremap olta ya moa. Den trifala mas putumbaek tufala spesol stik fo karim disfala olta. 12Bat olketa narafala samting wea trifala yusim long olta long Tambu Haostent, trifala mas rolemap long wanfala blu kaleko, an trifala mas rolemap olketa moa long wanfala skin blong jiukong, an trifala mas putum long wanfala frem fo karim.
13“Den trifala mas tekemaot olketa asis long olta wea hemi stap long disfala open tambuples, an trifala mas kavaremap disfala olta long wanfala papol kaleko. 14Oraet, trifala mas putum evrisamting wea olketa yusim fo waka long disfala olta antap long hem. Hem nao olketa tul fo mekem faea, an olketa huk, an savol, an besin. Nao trifala mas tekem wanfala skin blong jiukong an kavaremap disfala olta moa. An bihaen, trifala mas putumbaek tufala spesol stik fo karim disfala olta. 15Taem yufala redi fo muv go long narafala ples, olketa long laen blong Kohat mas kam karim evrisamting ya. Bat fastaem, Eron wetem tufala san blong hem i mas kavaremap evrisamting fo mekem redi, bikos olketa long laen blong Kohat i no save tasim olketa tambu samting ya. Sapos olketa tasim, bae olketa dae.
16“Nao Eleasa, san blong Haeprist Eron, hemi prist fo lukaftarem Tambu Haostent wetem evrisamting wea hemi stap long hem. Olketa samting ya nao i oel blong olketa lam long Spesol Frem fo putum Lam, an spesol insens, an olketa nambawan flaoa blong sakrifaes, an disfala oel fo mektambu long olketa samting, an olketa narafala tambu samting blong Tambu Haostent.”
17Yawe hemi gohed fo tok olsem long Mosis an Haeprist Eron, 18-20“Taem olketa long laen blong Kohat i kam fo karim olketa samting wea i barava tambu fogud, yutufala mas lukaot gudfala, nogud laen ya hemi lus from traeb blong Livae. Yutufala mas duim evrisamting long stretfala wei mekem olketa stap laef taem olketa kam kolsap long olketa tambu samting. Eron, wetem tufala san blong hem nomoa, trifala mas kam insaet fastaem fo givimaot waka blong olketa. An trifala mas talemaot evrisamting wea bae olketa mas karim, bikos sapos olketa kam insaet long Tambu Haostent an lukim olketa tambu samting, nomata hemi lelebet taem nomoa, bae olketa dae long hem.”
Olketa waka blong laen blong Geson
21Yawe hemi gohed fo tok olsem long Mosis, 22“Yu mas mekem sensas fo kaontem evriwan long laen blong Geson. Yu mas falom olketa laen an famili blong olketa, 23an yu mas raetemdaon nem blong olketa man hu i teti yia go kasem fifti yia. Hem nao olketa wea i save waka long Tambu Haostent. 24Waka blong olketa fo pakemap an karim olketa kaleko an kava blong Tambu Haostent. 25Olketa samting wea olketa ya mas karim hemi olsem: kaleko blong wol blong Tambu Haostent, wetem kava wea olketa wakem long skin blong man sipsip, an narafala kava wea olketa wakem long skin blong jiukong, an bikfala kaleko fo satem doa, 26an olketa kaleko blong fens raonem Tambu Haostent an olta, an kaleko fo satem doa blong datfala ples, an olketa rop blong fens ya, an evrisamting moa wea olketa yusim fo putumap Tambu Haostent. Oltaem olketa man long laen blong Geson mas duim evrisamting fo lukaftarem olketa samting ya. 27Haeprist Eron, wetem tufala san blong hem nao mas talem olketa long laen blong Geson olketa samting fo lukaftarem. 28Hem nao evri waka blong olketa long laen blong Geson long Tambu Haostent. An Itama, san blong Haeprist Eron, hem nao hemi bos blong olketa long olketa waka ya.”
Olketa waka blong olketa laen blong Merari
29Yawe hemi gohed fo tok olsem long Mosis, “Yu mas mekem sensas fo kaontem evriwan long laen blong Merari. Yu mas falom olketa laen an famili blong olketa, 30an yu mas kaontem olketa man wea i kasem teti yia, an go kasem fifti yia. Hem nao olketa wea i save waka long Tambu Haostent. 31Waka blong olketa fo karim olketa samting blong Tambu Haostent. Olketa samting wea olketa mas karim hemi olsem: olketa longfala pis timba, an olketa frem, an olketa spesol botom fo holem olketa frem ya. 32An olketa mas karim tu olketa pos blong fens wea hemi raonem Tambu Haostent, wetem evri spesol botom blong olketa pos ya, an olketa samting fo holem fens an olketa rop blong hem, an evri tul fo duim waka long hem. An yu mas talemaot nem blong samting wea evri man mas karim. 33Hem nao olketa waka blong laen blong Merari long Tambu Haostent. Nao Itama, san blong Haeprist Eron, hemi bos blong olketa long olketa waka ya.”
Mosis hemi kaontem olketa long traeb blong Livae
34-48Nao Mosis wetem Haeprist Eron an olketa lida blong pipol i obeim toktok blong Yawe. Olketa mekem sensas. Olketa kaontem olketa long laen blong Kohat, an long laen blong Geson, an long laen blong Merari. Olketa kaontem falom laen an famili blong olketa man. An olketa kaontem nomoa olketa man wea i kasem teti yia an goap kasem fifti yia. Hem nao olketa hu i save duim waka long Tambu Haostent an karim olketa samting blong hem.
Long laen blong Kohat, namba blong olketa kasem 2,750.
An long laen blong Geson, namba blong olketa kasem 2,630.
An long laen blong Merari, namba blong olketa kasem 3,200.
Nao namba blong olketa evriwan tugeta ya i kasem 8,580 man.
49So falom olketa samting wea Yawe hemi bin talem Mosis, olketa kaontem olketa man ya an talemaot waka long evri man, wanem evriwan mas pakemap an karim.
Currently Selected:
Nambas 4: SIPB
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.