Matiu 4

Seitan traem Jisas

(Mak 1:12-13; Luk 4:1-13)

1Bihaen#Hibrus 2:18; 4:15. moa, Spirit blong God hemi lidim Jisas fo go insaet long wanfala drae eria nao, fo letem Seitan hemi traem Jisas. 2Jisas hemi stop fo no kaikai fo fotifala de an fotifala naet, an bihaen ya, hemi hanggre fogud nao. 3Long taem ya nomoa, Seitan hemi kam fo traem Jisas, an hemi tok olsem, “Sapos hemi tru wea yu San Blong God, yu talem go long olketa ston ya fo sens go olsem bred nao.”

4Bat#Diutronomi 8:3. Jisas hemi ansarem Seitan olsem, “Buktambu hemi sei, ‘Man hemi no save laef long kaikai seleva nomoa. Bat evri toktok blong God nao, man hemi save laef long hem.’”

5Nao Seitan hemi tekem Jisas go moa long Jerusalem.#4:5 “Jerusalem” Long langguis long Grik hemi sei, “Holi Taon ya”. An hemi mekem hem fo stanap long wanfala ples wea hemi hae tumas antap long disfala Tambuhaos.#4:5 “Tambuhaos” Lukim “Tambuhaos blong God” long diksonari. 6An#Sams 91:11-12. Seitan hemi sei, “Sapos hemi tru wea yu San Blong God, yu jam go long daon. Bikos Buktambu hemi sei olsem,

‘God bae hemi talem go long olketa enjel blong hem,

fo olketa mas karim yu go wetem han blong olketa,

mekem yu no bangam lek blong yu long olketa ston ya.’”

7Bat#Diutronomi 6:16. Jisas hemi sei moa, “Buktambu hemi sei tu, ‘Yufala mas no traem God Masta blong yufala.’”

8Bihaen, Seitan hemi lidim Jisas moa fo go antap long wanfala maonten wea hemi hae tumas. An Seitan hemi som hem evri kantri long disfala wol, an hemi som hem tu enikaen samting wea i barava lukgud tumas wea olketa kantri ya i garem. 9An Seitan hemi sei long Jisas, “Sapos yu nildaon fo mekhae long mi distaem, oraet, evrisamting wea yu lukim go ya, bae mi givim go long yu nao.”

10Long#Diutronomi 6:13. taem ya, Jisas hemi tok olsem moa, “!Seitan, yu giraot! Buktambu hemi sei, ‘Yufala mas mekhae long God Masta blong yufala an hem nomoa yufala mas wosipim hem.’”

11So distaem nomoa, Seitan hemi goawe from Jisas nao. An long semtaem ya tu, olketa enjel olketa kam long Jisas fo helpem hem.

Jisas stat fo tisim pipol

(Mak 1:14-15; Luk 4:14-15)

12Nao#Matiu 14:3; Mak 6:17; Luk 3:19-20. taem Jisas hemi herem dat olketa putum Jon Baptaes insaet long prisin nomoa, hemi gobaek long provins long Galili nao. 13Long#Jon 2:12. taem ya, Jisas hemi no stap long taon long Nasaret moa, bat hemi go stap long taon long Kapaneam wea hemi kolsap long leik long Galili. Long bifoa kam, disfala eria hemi lan wea olketa givim long traeb blong Sebulun an Naftali. 14Jisas hemi go stap long ples ya, mekem toktok wea profet Aesaea hemi talemaot bifoa hemi kamtru, wea hemi sei,

15“Lan blong Sebulun an Naftali,

long rod wea hemi go kasem si,

long narasaet go long Jodan,

hem nao Galili wea plande long olketa pipol hu i no Jiu olketa stap long hem.

16Olketa pipol ya wea olketa stap long tudak,

olketa lukim wanfala bikfala laet.

An olketa hu i stap andanit paoa blong dae,

disfala laet hemi saen go long olketa.”

17Taem#Matiu 3:2. Jisas hemi go stap long Kapaneam hemi stat fo talemaot toktok blong God long olketa pipol nao, wea hemi sei, “Yufala evriwan mas lusim olketa ravis wei blong yufala, bikos kingdom long Heven hemi kolsap kam nao.”

Jisas kolem fofala fisingman

(Mak 1:16-20; Luk 5:1-11)

18Taem Jisas hemi wakabaot go long saet long leik long Galili, hemi lukim tufala brata wea waka blong tufala nao fo fising. Wanfala hemi Saemon wea mektu nem blong hem nao hemi Pita, an narawan hemi brata blong hem, Andru. Tufala go-gohed fo fising wetem net long leik ya. 19Nao Jisas hemi sei long tufala, “Yutufala kam falom mi. Mi nao bae mi som yutufala hao fo fising fo kasem pipol.” 20So long semtaem nomoa, tufala lusim olketa net blong tufala, an tufala go wetem Jisas nao.

21Taem Jisas hemi wakabaot go, hemi lukim nara tufala brata moa. Tufala ya nao Jemes an Jon, tufala san blong Sebedi. Tufala brata ya wetem dadi blong tufala, olketa stap nomoa insaet long bot, an olketa go-gohed fo mekem gudbaek moa net blong olketa. Nao Jisas hemi kolem tufala brata ya fo kam falom hem tu. 22So long semtaem nomoa, tufala lusim dadi blong tufala insaet long disfala bot ya, an tufala go wetem Jisas nao.

Plande pipol stat fo go wetem Jisas

(Luk 6:17-19)

23Jisas#Matiu 9:35; Mak 1:39. hemi goraon long evri ples insaet long provins long Galili, an hemi gohed fo tis insaet long olketa preahaos#4:23 “preahaos” Lukim long diksonari. blong olketa. An hemi gohed fo talemaot Gudnius abaotem kingdom long Heven. An evri pipol wea olketa garem enikaen siknis an olketa wea bodi blong olketa hemi wik tumas, Jisas hemi mekem olketa gudbaek moa. 24Nao nius abaotem Jisas hemi go kasem evri ples insaet long provins long Siria ya. So olketa tekem kam plande pipol wea olketa garem enikaen sik long bodi blong olketa. Samfala, bodi blong olketa hemi filsoa tumas, an samfala, olketa devol hemi stap long olketa. Samfala, olketa garem sik wea hemi mekem olketa save foldaon an hafded, an samfala, bodi blong olketa hemi no save muv. An Jisas hemi mekem evriwan long olketa ya fo gudbaek moa. 25An long taem ya, plande pipol nao olketa go-go wetem Jisas. Samfala long olketa i kam from provins long Galili, an samfala from provins long Dekapolis, an samfala from provins long Jiudia an Jerusalem, an samfala moa from narasaet go long Jodan.

Currently Selected:

Matiu 4: SIPB

Highlight

Copy