Mak 9

1An Jisas hemi gohed moa fo tok olsem, “Mi talem yufala tru samting nao, samfala long yufala wea i stanap long hia, bifoa yufala dae, bae yufala lukim kingdom blong God bae hemi kam wetem bikfala paoa blong hem.”

Bodi blong Jisas hemi sens

(Matiu 17:1-13; Luk 9:28-36)

2Long#2 Pita 1:17-18. meksiks de bihaen, Jisas hemi tekem Pita an Jemes an Jon wetem hem, an olketa seleva i goap long wanfala hae maonten. Taem trifala ya i lukluk go nomoa, bodi blong Jisas hemi sens nao, 3an olketa kaleko blong hem olketa barava waet fogud. No eni man long disfala wol hemi save wasim kaleko, mekem hemi kamap waet olsem. 4Taem ya, trifala ya i lukim Mosis an Elaeja tufala gohed fo stori wetem Jisas nao. 5So Pita hemi sei long Jisas olsem, “Tisa, hemi gud tumas nao mifala stap long hia. Bae mifala wakem trifala smol haos, wanfala fo yu an wanfala fo Mosis an wanfala fo Elaeja.” 6Pita hemi tok olobaot olsem bikos trifala ya barava fraet fogud nao.

7Long#Matiu 3:17; Mak 1:11; Luk 3:22. taem ya nomoa, wanfala klaod hemi kam kolsap antap long olketa nao. An olketa herem toktok wea hemi kamaot long klaod ya wea hemi sei, “Hem ya nao barava San blong mi wea mi lavem tumas. !Yufala mas heremgud wanem hemi talem!” 8Nao semtaem nomoa, olketa lukraonem olketa bat olketa no lukim eniwan moa, bat Jisas nomoa hemi stap wetem olketa.

9Taem olketa wakabaot godaon from maonten ya, Jisas hemi tokstrong long trifala disaepol blong hem olsem, “Disfala samting wea yufala bin lukim ya, yufala mas no talem long eniwan, go-go kasem taem mi San Blong Man, mi laefbaek moa from dae.”

10Trifala ya barava falom nao toktok blong Jisas, bat long midol long olketa seleva nomoa olketa stat fo tokabaotem samting ya olsem, “?Wanem nao mining blong ‘Laefbaek moa from dae’?” 11An#Malakae 4:5; Matiu 11:14. trifala ya askem Jisas olsem, “?Waswe nao olketa tisa blong Lo olketa sei Elaeja nao bae hemi mas kam fastaem?”

12Nao Jisas hemi sei, “Hemi tru ya, Elaeja nao hemi mas kam fastaem, mekem hemi stretem evrisamting moa. ?Bat waswe nao Buktambu hemi talem olsem, bae olketa meksave long San Blong Man, an bae olketa lukim hem olsem wanfala man nogud ya? 13Nao mi talem yufala ya, Elaeja hemi kam finis nao, bat olketa pipol olketa duim enikaen ravis samting long hem falom tingting blong olketa seleva nomoa, olsem Buktambu hemi talemaot finis.”

Jisas raosim devol from wanfala boe

(Matiu 17:14-20; Luk 9:37-43a)

14Taem Jisas wetem trifala disaepol blong hem olketa kam kasem olketa nara disaepol nomoa, olketa lukim dat plande pipol nao olketa hipap raonem olketa. An samfala tisa blong Lo olketa go-gohed fo raoa wetem olketa tu. 15Nao taem olketa pipol ya olketa lukim Jisas nomoa, olketa barava sek tumas long hem nao an olketa resis kam fo mitim hem. 16An Jisas hemi askem olketa olsem, “?Wanem nao yufala raoa long hem?”

17Nao wanfala man long olketa pipol ya hemi tok olsem kam long hem, “Tisa, mi tekem kam boe blong mi long yu ya, bikos wanfala devol hemi stap long hem nao an hemi mekem hem fo no save toktok ya. 18Taem devol ya hemi kam strong long hem, hemi mekem boe ya fo foldaon long graon. An plande spit nao save kamaot long maos blong hem, an hemi save baetem tit blong hem tu, an bodi blong hem hemi save strong olsem stik. Mi askem olketa disaepol blong yu fo raosim devol ya, bat olketa nating save duim nomoa.”

19Nao Jisas hemi sei long olketa olsem, “Maewat, yufala ya nating save biliv long God. ?Haomas taem nao mi mas stap wetem yufala? !Hemi had tumas distaem fo mi stap wetem yufala! !Yufala tekem kam boe ya long mi!” 20So olketa tekem kam boe ya long Jisas nao.

Nao semtaem wea devol ya hemi lukim Jisas nomoa, hemi sekem boe ya fogud nao. An hemi mekem hem fo foldaon long graon an fo rol olobaot, an plande spit nao hemi kamaot long maos blong hem. 21Nao Jisas hemi askem dadi blong boe ya olsem, “?Wataem nao disfala samting ya hemi kasem hem?”

An dadi blong hem hemi ansarem hem olsem, “Hemi kasem hem taem hemi smolfala boe yet ya. 22Plande taem nao devol ya hemi mekem hem foldaon long faea an insaet long wata fo kilim hem dae. Sapos yu save duim, plis, yu sore long mifala an helpem mifala kam.”

23An Jisas hemi sei olsem, “Yu askem mi sapos mi save duim. Eniwan hu hemi biliv long God, hemi save duim evrisamting nomoa ya.”

24Semtaem nomoa, dadi blong boe ya hemi singaot bikfala olsem, “Mi biliv, bat plis yu mekem biliv blong mi fo strong moa.”

25Jisas hemi luksave dat plande pipol olketa stat fo ka-kam kolsap long hem, so hemi tokstrong long ravis devol ya olsem, “Yu nao devol wea ia blong yu hemi pas an yu no save toktok. Mi talem long yu stret: !Yu kamaot from boe ya, an yu nating gobaek insaet long hem long enitaem moa!”

26Nao devol ya hemi singaot bikfala nomoa an hemi mekem boe ya hemi seksek fogud nao. Bihaen nomoa, devol ya hemi kamaot from boe ya. An boe ya hemi luk olsem hemi dae nao, so plande long olketa sei olsem, “Hemi dae finis nao ya.” 27Bat Jisas hemi holem han blong hem nomoa, an hemi helpem hem fo getap, an boe ya hemi stanap nao.

28An bihaen Jisas hemi go insaet long wanfala haos, olketa disaepol olketa kam lukim hem seleva an askem hem olsem nao, “?Waswe nao mifala no save raosim disfala devol ya?”

29Jisas hemi talem olketa olsem, “Yufala save, wei blong prea nomoa hemi save raosim olketa devol olsem ya.”#9:29 “wei blong prea nomoa …” Samfala olfala kopi long Mak olketa sei,“wei blong prea an stop fo no kaikai, hem nomoa save raosim olketa devol olsem ya”.

Mektu taem Jisas tokabaotem dae blong hem

(Matiu 17:22-23; Luk 9:43b-45)

30Taem Jisas an olketa disaepol blong hem olketa lusim ples ya nomoa, olketa gopas long olketa nara vilij long Galili nao. Jisas hemi no laekem pipol fo save dat hemi wakabaot kam long ples blong olketa, 31bikos#Mak 8:31; 10:33-34. hemi go-gohed fo tisim olketa disaepol blong hem nomoa. Hemi talem olketa olsem, “Bae mi San Blong Man, olketa givim mi go long han blong olketa man fo kilim mi dae. Bat bae mi laefbaek moa long mektri de.”

32Nomata olsem, olketa disaepol blong hem olketa nating save lelebet nao long mining blong toktok ya, an olketa fraet fo askem hem tu.

Jisas tokabaotem wei blong nambawan man

(Matiu 18:1-5; Luk 9:46-48)

33Taem Jisas an olketa disaepol blong hem olketa kasem Kapaneam, olketa go insaet long wanfala haos. Nao Jisas hemi askem olketa disaepol blong hem olsem, “?Watkaen samting nao yufala go-gohed fo raoa kam long hem, taem yumi wakabaot kam long rod ya?”

34Bat#Luk 22:24. olketa stap kuaet nomoa, bikos taem olketa wakabaot kam long rod ya, olketa bin gohed fo raoa tugeta long olketa seleva abaotem hu nao hemi nambawan man long olketa. 35So#Matiu 20:26-27; 23:11; Mak 10:43-44; Luk 22:26. Jisas hemi sidaon an hemi kolem tuelfala disaepol blong hem, an hemi tok long olketa olsem, “Sapos wanfala long yufala hemi wande fo kamap bikfala man long yufala, hemi mas mekem hem seleva fo lou an hemi mas waka olsem haosboe blong evriwan.” 36An Jisas hemi tekem wanfala pikinini an hemi mekem hem fo stanap long frant blong olketa. An hemi putum han blong hem goraonem pikinini ya nomoa, an hemi talem olketa olsem, 37“Eniwan#Matiu 10:40; Luk 10:16; Jon 13:20. wea hemi kaen long wanfala pikinini olsem ya long nem blong mi, hemi kaen long mi nao ya. An eniwan hu hemi kaen long mi, hemi no kaen long mi seleva nomoa bat hemi kaen long man hu hemi sendem mi kam tu.”

Jisas tokabaotem man wea hemi no blong seksin blong olketa

(Luk 9:49-50)

38Nao Jon hemi tok olsem long Jisas, “Tisa, mifala lukim wanfala man hu hemi yusim nem blong yu fo raosim olketa devol from olketa pipol ya. Bat man ya hemi no blong seksin blong yumi ya, so mifala stopem hem nao fo no duim diskaen samting.”

39Nao Jisas hemi talem olketa olsem, “Yufala no trae fo stopem hem. Man hu hemi mekem mirakol long nem blong mi, hemi no save talem nogud samting abaotem mi ya. 40Bikos#Matiu 12:30; Luk 11:23. eniwan hu hemi no agensim yumi, hem nao hemi fren blong yumi ya. 41Mi#Matiu 10:42. talem yufala tru samting nao, sapos eniwan hemi givim yufala kapwata bikos yufala olketa disaepol blong mi, God bae hemi blesim disfala man ya.”

Olketa samting wea hemi mekem man fo lusim biliv blong hem

(Matiu 18:6-9; Luk 17:1-2)

42An Jisas hemi sei moa, “Sapos wanfala man hemi mekem wanfala long olketa pikinini#9:42 “olketa pikinini” Jisas hemi minim olketa pipol wea olketa trastem God olsem olketa pikinini save trastem dadi blong olketa. ya fo lusim biliv blong hem long mi, hemi moabeta sapos olketa taemapem wanfala bikfala ston long nek blong man ya an torowem godaon insaet long si. 43An#Matiu 5:30. sapos han blong yu hemi mekem yu fo lusim biliv blong yu, yu mas katemaot nomoa. Moabeta yu garem wanfala han nomoa an yu save go insaet long tru laef. Nogud yu garem tufala han bat yu mas go insaet long hel wea faea hemi no save dae.#9:43 Samfala olfala kopi long Mak olketa adem moa ves 44 an 46 wea hemi semkaen wetem ves 48. 45An sapos lek blong yu hemi mekem yu fo lusim biliv blong yu, yu mas katemaot nomoa. Moabeta yu garem wanfala lek nomoa an yu save go insaet long tru laef. Nogud yu garem tufala lek bat olketa torowem yu go long hel. 47An#Matiu 5:29. sapos ae blong yu hemi mekem yu fo lusim biliv blong yu, yu mas pulumaot nomoa. Moabeta yu garem wanfala ae nomoa an yu save go insaet long kingdom blong God. Nogud yu garem tufala ae bat olketa torowem yu go long hel. 48Long#Aesaea 66:24. ples ya, olketa smolfala wom wea olketa gohed fo kaikaim olketa man ya olketa no save dae, an faea ya tu hemi no save dae enitaem.

49“Bae God hemi mekem evriwan fo klin wetem faea, olsem yumi putum solt long sakrifaes fo mekem hem klin.

50“Solt#Matiu 5:13; Luk 14:34-35. hemi wanfala gud samting, bat sapos hemi lusim strong blong hem, bae yu no save mekem hem fo gudbaek moa.

“So yufala mas garem solt#9:50 “yufala mas garem solt” Solt hemi olsem wanfala piksa fo piis an lav. long laef blong yufala evriwan, an piis mas stap long yufala oltaem.”

Currently Selected:

Mak 9: SIDC

Highlight

Copy