Jon 8

Wanfala woman hu brekem lo blong marit wetem nara man

1Bihaen, evriwan i gobaek long haos blong olketa nao. Bat long taem ya, Jisas hemi go long disfala hil blong Oliv tri. 2Taem hemi kasem barava moning long neks de, Jisas hemi kambaek moa long eria blong Tambuhaos ya. An evriwan i hipap raonem Jisas, so hemi sidaon an hemi stat fo tisim olketa. 3Nao olketa tisa blong Lo an olketa Farasi, olketa tekem kam wanfala woman wea olketa bin kasholem hem taem hemi brekem lo blong marit wetem nara man. So olketa mekem disfala woman fo stanap go long frant blong olketa evriwan, 4an olketa tok olsem, “Tisa, disfala woman ya, olketa lukim dat hemi barava brekem lo blong marit wetem nara man ya. 5Insaet#Levitikas 20:10; Diutronomi 22:22-24. long Lo, Mosis hemi talem finis dat diskaen woman ya yumi mas sutim hem dae long ston. ?So waswe, wanem nao yu save talem abaotem diswan?” 6Olketa askem Jisas olsem bikos olketa laek fo trikim hem nomoa ya, mekem olketa save ripotem hem. Bat Jisas hemi bendaon nomoa, an hemi raet long graon wetem fingga blong hem.

7Long taem ya, olketa go-gohed fo askem olketa kuestin long hem. So hemi luk goap moa, an hemi tok olsem long olketa nao, “Eniwan long yufala hu hemi nating duim eni rong samting yet, hem nao hemi fas man fo sutim ston go long woman ya.” 8An hemi bendaon moa an hemi gohed fo raet long graon. 9Taem olketa herem toktok blong hem ya nomoa, olketa stat fo go-goaot nao, an olketa oloman nao olketa stat fo go-goaot fastaem. Olketa go olsem, go-go Jisas nomoa hemi stap, an disfala woman tu hemi stanap yet. 10So Jisas hemi luk goap moa an hemi askem woman ya olsem, “?Woman, wea nao olketa ya? ?Waswe, eniwan long olketa hemi tok agensim yu?”

11Nao woman ya hemi sei, “Masta, no eniwan nao.”

Nao Jisas hemi sei, “Mi tu mi no talem enisamting agensim yu. So yu gobaek, bat yu mas no duim eni rong samting moa.”#8:1-11 Samfala olfala kopi long Jon olketa no garem olketa ves ya. An samfala kopi moa olketa garem olketa ves long nara ples long Jon o long Luk.

Jisas nao laet blong wol

12Jisas#Matiu 5:14; Jon 9:5. hemi toktok olsem moa long olketa pipol, “Mi nao mi laet#8:12 “laet” Long wanfala taem long Bikde fo Stap long Smolfala Lif Haos fo Lelebet Taem, olketa Jiu save karim kam plande lam long Tambuhaos. fo pipol long disfala wol ya. Man hu hemi falom mi, bae hemi no save wakabaot long tudak ya, bat bae hemi garem laet wea hemi save givim laef ya.”

13Nao#Jon 5:31. olketa Farasi tok olsem long hem, “Yu nomoa yu talemaot evrisamting abaotem yu seleva ya, so hemi had fo mifala bilivim wanem yu talem ya.”

14Bat Jisas hemi sei, “Nomata mi nomoa mi talemaot evrisamting abaotem mi seleva, wanem mi talem hemi tru. Bikos mi save long ples wea mi stap kam long hem, an ples wea bae mi go long hem. Bat yufala nating save long ples wea mi stap kam long hem ya, an long ples wea bae mi go long hem. 15Yufala jajem olketa samting falom barava wei blong man long wol nomoa. Mi no save jajem eniwan. 16Bat sapos mi jajem eniwan, mi jajem hem long wei wea hemi barava stret. Bikos mi no jajem eniwan mi seleva, bat mitufala Dadi blong mi hu hemi sendem mi kam, mitufala nao duim. 17Lo#Diutronomi 19:15. blong yufala hemi talem finis nao, wea sapos toktok blong tufala man i barava semsem nomoa, wanem tufala talem hemi barava tru nao ya. 18Mi nao talemaot evrisamting abaotem mi seleva, an Dadi blong mi hu hemi sendem mi kam, hemi talemaot semsamting tu abaotem mi.”

19Nao olketa askem Jisas olsem, “?Wea nao dadi blong yu?”

Bat Jisas hemi ansarem olketa olsem, “Yufala nating save long mi, an yufala nating save long Dadi blong mi tu. Bat sapos yufala save long mi, yufala save long Dadi blong mi tu ya.”

20Jisas hemi talem olketa samting ya long taem hemi tisim olketa pipol insaet long Tambuhaos, kolsap long ples blong olketa boks fo putum seleni long hem. Long taem ya, no eniwan kasholem hem bikos hemi no kasem taem blong hem yet.

Jisas wonem olketa lida blong Jiu

21Jisas hemi tok moa olsem long olketa, “Bae mi go ya an bae yufala lukaotem mi, bat olketa sin blong yufala i stap yet, mekem yufala dae. An bae yufala no save go long ples wea bae mi go long hem.”

22So olketa bikman blong olketa Jiu ya, olketa toktok tugeta long olketa seleva olsem, “Hemi sei bae yumi no save go long ples wea hemi go long hem ya. !Maet hemi minim wea bae hemi go an kilim dae hem seleva ya!”

23Nao Jisas hemi sei, “Yufala stap kam long disfala ples long daon nomoa ya, bat mi blong antap. Yufala blong disfala wol, bat mi no blong disfala wol ya. 24Dastawe nao mi talem long yufala finis, wea olketa sin blong yufala i stap yet, mekem yufala dae. Sapos yufala no biliv wea ‘Mi nao Mi Stap Olowe’#8:24 “Mi nao Mi Stap Olowe” Disfala toktok ya God nao hemi yusim fastaem abaotem hem seleva taem hemi stori wetem Mosis. Lukim Eksodas 3:14. oraet, olketa sin blong yufala i stap yet, mekem yufala dae.”

25Nao olketa askem olsem, “?Yu hu ya?”

So Jisas hemi ansarem olketa olsem, “Mi nao man wea mi talem yufala finis ya#8:25 “Mi nao man wea mi talem yufala finis ya.” Nara wei fo talem moa,“?Waswe nao mi toktok wetem yufala?” 26Mi garem plande samting tumas wea mi save talem abaotem yufala, an fo jajem yufala long hem. Bat bae mi talemaot nomoa long evriwan long disfala wol wanem mi herem long disfala man hu hemi sendem mi kam. Bikos hem nao yumi save trastem hem finis.”

27Nao olketa nating minim wea Jisas hemi tokabaotem Dadi ya. 28So hemi tok olsem long olketa moa, “Taem yufala putum mi San Blong Man antap long kros fo dae, bae yufala save dat ‘Mi nao Mi Stap Olowe’. An long taem ya, bae yufala save nao dat mi nating duim enisamting falom tingting blong mi seleva. Bat wanem Dadi ya hemi tisim mi nomoa, hem nao mi tisim yufala long hem. 29An hem nao hemi sendem mi kam, an hemi stap wetem mi. Hemi no save lusim mi, bikos mi duim olowe evrisamting wea hemi laekem mi fo duim.”

30Nao taem Jisas hemi talem olketa samting ya, plande pipol nao olketa biliv long hem.

Laen blong Ebraham

31So Jisas hemi sei long olketa Jiu hu i biliv long hem, “Sapos yufala obeim olowe tising blong mi, yufala barava disaepol blong mi nao. 32Bae yufala save long tru samting abaotem God, an disfala tru samting bae hemi mekem yufala fri.”

33Nao#Matiu 3:9; Luk 3:8. olketa talem Jisas olsem, “Mifala ya, mifala pipol long laen blong Ebraham ya, an mifala nating kamap slev blong eniwan yet ya. ?So waswe nao yu sei bae mifala fri ya?”

34Jisas hemi tok olsem long olketa moa, “Mi talem yufala tru samting nao, evriwan hu i falom rong wei, hemi barava slev blong disfala rong wei blong hem ya. 35Man hu hemi bon long famili, hemi save stap olowe long haos blong dadi blong hem. Bat olketa slev ya, olketa no save stap olowe. 36Nao sapos San Blong God hemi mekem yufala fri, hem nao bae yufala barava fri finis. 37Mi save dat yufala nao long laen blong Ebraham ya. Bat yufala no laek fo falom tising blong mi, an dastawe yufala trae fo kilim mi dae nomoa. 38Mi save tisim yufala abaotem wanem Dadi blong mi hemi som long mi, bat yufala duim nomoa wanem dadi blong yufala hemi talem long yufala.”

39Nao olketa tok olsem long hem, “!Ei, Ebraham nao hemi dadi blong mifala!”

Bat Jisas hemi sei long olketa, “Sapos yufala laen blong Ebraham tru, yufala save duim semsamting wea hemi bin duim tu ya. 40Bat yufala traehad nomoa fo kilim mi dae, nomata mi nao mi talem yufala tru samting wea mi herem kam long God. Ebraham hemi no duim enisamting olsem ya. 41Yufala ya, yufala duim semsamting wea dadi blong yufala hemi duim nomoa.”

Taem ya, olketa tok olsem long hem nao, “God nomoa hemi Dadi blong mifala, an mifala nao barava tru pikinini blong hem.”

42Nao Jisas hemi tok olsem long olketa, “?Bat sapos God hemi barava Dadi blong yufala, waswe nao yufala no lavem mi? Mi nao mi kamaot long God, an distaem mi stap wetem yufala long hia. An mi no kam falom tingting blong mi seleva, bat God nao hemi sendem mi kam. 43?Waswe nao yufala nating save minim nomoa toktok blong mi? Hemi bikos yufala no laek fo herem tising blong mi ya. 44Seitan nao hemi dadi blong yufala ya an yufala laek fo duim wanem disfala dadi blong yufala hemi laekem. Olowe nomoa, Seitan hemi save kilim man dae ya, an hemi nating laekem wanem hemi tru bikos hemi nating garem enisamting wea hemi tru long hem. Taem hemi laea long eniwan, hemi barava falom wei blong hem seleva nao ya, bikos hemi man fo laea an hemi barava dadi blong evri laea nao. 45Bat mi ya, mi talem yufala tru samting, dastawe nao yufala no wande fo bilivim mi. 46?Waswe, eniwan long yufala i save somaot enisamting wea mi bin duim rong? ?Bat sapos mi talem olketa tru samting nomoa, waswe nao yufala no bilivim mi? 47Olketa hu i blong God, olketa nao herem toktok blong hem, bat yufala ya yufala no blong God ya, dastawe nao yufala no laek fo herem hem.”

Jisas an Ebraham

48Nao olketa bikman blong olketa Jiu ya olketa talem Jisas olsem, “Oo, mifala talem tru ya, taem mifala sei yu man blong Samaria#8:48 “yu man blong Samaria” Diswan olketa talem bikos olketa laek fo spoelem Jisas nomoa ya. an wanfala devol hemi stap long yu.”

49Nao Jisas hemi sei, “Nomoa, no eni devol i stap long mi. Mi haemapem Dadi blong mi, bat yufala tokspoelem mi nomoa. 50Mi no traehad fo haemapem mi seleva. Bat wanfala nao hemi haemapem mi, an hem nao hemi save jajem evriwan. 51Mi talem yufala tru samting nao, man hu hemi obeim tising blong mi, bae hemi nating save dae nao.”

52Olketa bikman i tok olsem moa long Jisas, “!Distaem mifala barava save dat wanfala devol hemi stap long yu ya! Bikos Ebraham hemi dae, an olketa profet tu olketa dae, bat yu sei man hu hemi obeim tising blong yu bae hemi nating save dae ya. 53?Waswe, yu tingse yu nao bikfala moa winim Ebraham, dadi blong mifala? Hemi dae finis an olketa profet tu olketa dae finis. ?So yu tingse yu hu nao ya?”

54Nao Jisas hemi sei long olketa, “Sapos mi nomoa mi haemapem mi seleva, diswan hemi minim nating nomoa ya. Bat Dadi blong mi hemi haemapem mi. An hem nao yufala sei hemi God blong yufala. 55Bat yufala nating save long hem ya, mi nomoa mi save long hem. Nao sapos mi sei mi no save long hem, bae mi kamap wanfala man fo laea olsem yufala tu ya. Bat mi barava save long hem an mi obeim toktok blong hem. 56Ebraham, dadi blong yufala, hemi hapi tumas from hemi tingim dat bae hemi save lukim taem blong mi ya. Nao hemi lukim diswan finis an hemi hapi long hem ya.”

57Olketa talem hem olsem, “!Maewat, yu sei yu bin lukim Ebraham,#8:57 “yu sei yu bin lukim Ebraham” Samfala olfala kopi long Jon olketa sei,“yu sei Ebraham bin lukim yu”. bat nomata fifti yia yu nating kasem yet ya!”

58Bat#Jon 1:1, 15. Jisas hemi tok olsem, “Mi talem yufala tru samting nao, taem Ebraham hemi no bon yet, Mi nao Mi Stap Olowe.”#8:58 “Mi nao Mi Stap Olowe” Disfala toktok hemi semkaen wetem Jon 8:24. Bat distaem olketa bikman olketa minim wea Jisas hemi barava sei hemi God, an dastawe olketa kros tumas.

59Long taem ya, olketa lukaotem kam olketa ston fo sutim hem dae nao ya. Bat Jisas hemi go haed nomoa, an hemi lusim Tambuhaos ya nao.

Currently Selected:

Jon 8: SIDC

Highlight

Copy