Hosia 11
11
God hemi lavem tumas olketa blong Israel
1Yawe hemi tok moa olsem, “Bifoa, taem pipol blong Israel jes kamap pipol blong mi, mi lavem olketa tumas olsem wea olketa i fasbon san blong mi. An mi kolem disfala san blong mi fo kamaot from Ijip.#Eksodas 4:22; Matiu 2:15. 2Bat evri taem mi kolem olketa fo kam long mi, olketa les an go farawe nomoa from mi. Olketa gohed nomoa fo mekem sakrifaes long laea god ya Baal, an bonem insens go long olketa narafala god tu. 3Mi nomoa mi tisim olketa olsem man hemi tisim pikinini fo wakabaot, an mi karim olketa long han blong mi. Bat nomata mi nao mi lukaftarem olketa olsem, olketa nating luksave nomoa long mi. 4Mi bin duim evrisamting fo olketa olsem wanfala pikinini blong mi wea mi lavem tumas, an mi sore tumas long hem. Oltaem, mi pulum hemi kam long mi an mi liftim hem ap fo karim hem insaet long han blong mi, an mi holetaet long hem long sest blong mi, an mi sidaon wetem fo fidim hem.
5“Bat bikos olketa les fo kambaek moa long mi, bae olketa mas gobaek moa long Ijip, an Asiria bae hemi rul moa ovarem olketa. 6Ya, bikos olketa gohed fo falom nomoa tingting blong olketa seleva, bae olketa enemi i kam an barava spoelem olketa taon ya blong olketa. An olketa geit blong olketa taon ya bae i brek finis an lus nao. 7Olketa bikhed tumas. Oltaem nomoa olketa les long mi. Nomata olketa luk goap fo kol kam long mi, bat bae mi no helpem olketa.
8“!Olketa blong Israel!
?Hao nao bae mi save finis from yufala?
!Yufala i pipol blong mi nao!
?Hao nao bae mi save lusim yufala?
Mi no save spoelem yufala evriwan
olsem wea mi bin duim bifoa
long tufala taon long Adma an Seboeim.
Long haat blong mi,
mi lavem yufala tumas.
Mi nating laekem nomoa
fo duim eni nogud samting olsem long yufala.#Jenesis 14:2, 8; Diutronomi 29:23.
9Nomata mi kros tumas long yufala olsem,
bae mi no panisim yufala moa,
an mi no spoelem yufala moa.
Mi nao mi God wea mi holi,
an mi stap wetem yufala.
Wei blong mi hemi no olsem wei blong man.
Nomata mi kros long yufala,
bae mi no lukaotem yufala
fo panisim yufala.
10“Taem mi singaot bikfala agensim olketa enemi blong olketa pipol blong mi, olsem laeon wea hemi kros, bae olketa pipol ya i falom mi moa. Ya, taem mi singaot bikfala olsem, bae olketa seksek an ran kambaek long mi from evri ples. 11Bae olketa seksek fogud an kam kuiktaem from Ijip long saot, olsem bed wea hemi flae kam. An stat long Asiria long not, bae olketa kam kuiktaem, olsem kurukuru wea hemi kambaek stret long nest blong hem. An bae mi putum olketa moa long barava ples blong olketa. Hem nao mesij blong mi Yawe.”
Bae Yawe hemi panisim olketa blong Israel an Jiuda
12Yawe hemi tok moa olsem, “Mi nao mi God wea mi holi, an oltaem mi tingim tumas olketa pipol blong Israel. Bat taem olketa kam long mi, olketa laea nomoa long mi an wei blong olketa hemi ravis tu. Olketa blong Jiuda i agensim mi finis an nating lusim nomoa disfala ravis wei.
Currently Selected:
Hosia 11: SIDC
Highlight
Share
Copy
Want to have your highlights saved across all your devices? Sign up or sign in
Pijin Catholic Bible © Bible Society of the South Pacific, 2008.
