ZAKARIYA 1

Mikhongotelo.

1Hi n'hweti ya ntlhanu na tinharhu ya lembe ra vumbirhi ra ku fuma ka Dariyosi, rito ra Yehovha ri ta eka muprofeta Zakariya, n'wana Berekiya, n'wana Ido, ri ku: 2“Yehovha u karihele vatata wa n'wina hi ku kariha lokukulu. 3U nge eka vona: Yehovha wa tinyimpi u ri: Tlhelelani eka mina, ku vula Yehovha wa tinyimpi, kutani ndzi ta tlhelela eka n'wina, ku vula Yehovha wa tinyimpi. 4Mi nga tshuki mi kota vatata wa n'wina valavo vaprofeta vo rhanga a va huwelela eka vona, va ku: ‘Ku vuriwile hi Yehovha wa tinyimpi, a ku: Hundzukani eku fambeni ka n'wina loko biha, ni le mitirhweni yo biha ya n'wina!’ ... Kambe a va yingisangi, a va hlayisangi rito ra mina, ku vula Yehovha. 5Vatata wa n'wina va kwihi? Ni vaprofeta, xana hi lava hanyaka hi masiku? 6Hambiswiritano, marito ya mina ni ku lerisa ka mina leswi ndzi leriseke vaprofeta, malandza ya mina, xana a swi fikelanga vatata wa n'wina? Va hundzuka, va ku: Hilaha Yehovha wa tinyimpi a tsundzukeke ku hi endla hakona, hikwalaho ka ku famba ka hina ni mitirho ya hina, kunene u hi endlile sweswo.”

Xivono xa tihanci ni vakhandziyi.

7Hi siku ra makume mambirhi na mune ra n'hweti ya khume na yin'we, yi nga n'hweti ya Xebati, hi lembe ra vumbirhi ra ku fuma ka Dariyosi, rito ra Yehovha ri ta eka muprofeta Zakariya, n'wana Berekiya, n'wana Ido, ri ku: 8“Ndzi vonile mahlori nivusiku, munhu la nga khandziya hanci yo tshwuka a yimile xikarhi ka mirhi ya mirta endzhutini; endzhaku ka yena a ku ri ni lava nga khandziya tihanci to tshwuka, ni ya mavala, ni to basa. 9Ndzi ku: ‘Lava hi vahi, hosi yanga?’ Ntsumi leyi vulavulaka na mina yi ku eka mina: ‘Ndzi ta ku komba lexi va nga xona.’ 10Kutani wanuna la yimeke exikarhi ka mirhi ya mirta a vulavula, a ku: ‘Hi lava Yehovha a va rhumeke ku ya kambela misava.’ 11Volavo va hlamula ntsumi ya Yehovha leyi nga yima emirhini ya mirta, va ku: ‘Hi kamberile misava, kutani vona, misava hinkwayo yi tshamile hi ku rhula.’ 12Kutani ntsumi ya Yehovha yi ahlamisa nomu wa yona, yi ku: ‘Yehovha wa tinyimpi! U ta tshika ku ri kungani ku tsetselela Yerusalema, ni miti ya Yuda leyi u nga yi karihela hi malembe lawa ya ntlhanu wa makume ni makume mambirhi xana?’ 13Yehovha a hlamulela ntsumi leyi vulavulaka na mina hi marito lamanene, ni marito ya ku chavelela.

14“Ntsumi leyi vulavulaka na mina yi ndzi byela, yi ku: ‘Tlakusa rito, u ku: Yehovha wa tinyimpi u te: Ndzi ni ritsimbo lerikulu hikwalaho ka Yerusalema, na Siyoni; 15kutani ndzi karihela hi ku tlurisa matiko lama titsakeleke; hikuva a ndzi kariheli tiko ra mina switsanana, kasi wona ma engeta ku endla swo biha. 16Hikwalaho, ku vula Yehovha, ndzi vuyela eka Yerusalema, hi tintswalo, yindlu ya mina yi ta tlhela yi akiwa kona, ku vula Yehovha wa tinyimpi, kutani ngoti ya ku pima yi ta tshambulutiwa ehenhla ka Yerusalema. 17Engeta u tlakusa rito, u ku: Yehovha wa tinyimpi u ri: Miti ya mina yi ta tala mikateko, yi ko yi khapakhapa; Yehovha wa ha ta chavelela Siyoni, a tihlawulela Yerusalema.’ ”

Xivono xa timhondzo ta mune.

18Endzhaku ka swona, ndzi yimisa mahlo ya mina, kutani ndzi vona mune wa timhondzo. 19Ndzi ku eka ntsumi leyi vulavulaka na mina: “Timhondzo leto ta ku endla yini?” Yi ku eka mina: “Leti hi tona timhondzo leti hangalaseke Yuda, na Israele, na Yerusalema.”

20Yehovha a ndzi kombisa vafuri va mune. 21Kutani ndzi ku: “Lava va tele ku endla yini?” A angula, a ku: “Leti i timhondzo leti hangalaseke Yuda, ku nga ri na wumbe la yimisaka nhloko, kambe lava va tile ku ti chavisa, ku tsema timhondzo ta matiko lama pfukeleke tiko ra Yuda matimba ku ri hangalasa.”

Currently Selected:

ZAKARIYA 1: TSO29

Highlight

Copy