NEHEMIYA 3
3
Ta ku aka rirhangu ra Yerusalema.
1Kutani Eliyaxibi, muprista lonkulu ni vaprista vamakwavo va suka va aka nyangwa ya Tinyimpfu, va yi hlawulela Yehovha, va nghenisa timbanti ta kona, kambe va aka va hlawulela Yehovha rirhangu ku fika ekhokholweni ra Mea, ni ku fika ekhokholweni ra Hananele. 2Ku xaxamela na vona, ku aka vavanuna va Yeriko, kusuhi na vona, ku aka Zakuru, n'wana Imri.
3Nyangwa ya Tinhlampfi yi akiwa hi vana va Hasena, va endla timhandze ta kona, va vehela timbanti ni swilotlela ni tinghole. 4Ekusuhi na vona ku lunghisa Meremoto, n'wana Uriya, n'wana Hakosi; ekusuhi na vona, ku lunghisa Mexulama, n'wana Berekiya, n'wana Mexezabele; ekusuhi na vona, ku lunghisa Sadoki, n'wana Baana. 5Ekusuhi na vona, ku lunghisa va Tekowa, kambe vakulu va vona a va pfumelanga ku khoma ntirho wa hosi ya vona.
6Nyangwa ya Khale, yona, yi lunghisiwa i Yehoyada, n'wana Paseyaka na Mexulama, n'wana Besodeya; va veka timhandze ta yona, va vehela timbanti ni swilotlela ni tinghole. 7Ekusuhi na vona ku lunghisa Melatiya, wa Gibiyoni, na Yadoni, wa Meronoti, ni vanhu va Gibiyoni, ni va Mispa, va le kufumeni ka hosi ya hase ka nambu. 8Ekusuhi na vona, ku lunghisa Uziele, n'wana Harahaya, mufuri wa nsuku, ekusuhi na yena, ku lunghisa Hananiya, un'wana wa vaendli va mirhi yo tola. Va lunghisa sweswo rirhangu ra Yerusalema, va tshika muti ku fika erirhangwini ro anama. 9Ekusuhi na vona, ku lunghisa Refaya, n'wana Huru, n'wini wa ku avanyisa kun'wana ka ntsendzele wa Yerusalema. 10Ekusuhi na yena ku lunghisa Yedaya, n'wana Harumafa, a lunghisa ku vandzamana ni yindlu ya yena; ekusuhi na yena, ku lunghisa Hatuxi, n'wana Haxabiniya. 11Loko a ri Malikiya, n'wana Harimi, na Haxubu, n'wana Pahata-Mowabu, va lunghisa xiyenge xin'wana ni khokholo ra Tihondo. 12Ekusuhi na vona, ku lunghisa Xalumi, n'wana Halohexi, n'wini wa ku avanyisa kun'wana ka ntsendzele wa Yerusalema, a ri ni vana va yena va vanhwana.
13Enyangweni ya Nkova ku lunghisa Hanunu, ni lava akeke eZanowaka, va aka va vehela timbanti ta kona ni swilotlela ni tinghole va aka ni swisungunhu swa khume ra madzana swa rirhangu, ku ya fika enyangweni ya Vulongo. 14Enyangweni ya Vulongo ku lunghisa Malikiya, n'wana Rekaba, n'wini wa ntsendzele wa Beta-Hakereme; a aka, a vehela timbanti ta kona, ni swilotlela ni tinghole.
15Nyangwa ya Xihlovo, yona yi lunghisiwa hi Xalumi, n'wana Kolohoza, n'wini wa ntsendzele wa Mispa, a yi aka, a yi fulela, a vehela ni timbanti ta kona, a vehela swilotlela ni tinghole, a aka ni rirhangu ra tiva ra Xihlovo, emahlweni ka nsimu ya hosi, ku ya fika eswikhandziweni swa ku ngirimela, swi suka emutini wa Davhida.
16Emahlweni ka yeloyi, ku lunghisa Nehemiya, n'wana Azibuku, n'wini wa hafu ya ntsendzele wa Beta-Suru, ku ya fika emasirheni ya Davhida, ni le tiveni leri akiweke, ni le ndlwini ya tinhenha. 17Emahlweni ka yena, ku lunghisa Valevhi: a a ri Rehumi, n'wana Bani; ekusuhi na yena ku lunghisa Haxabiya, n'wini wa hafu ya ntsendzele wa Keyila. 18Emahlweni ka yena, ku lunghisa vamakwavo, a a ri Bavhayi, n'wana Henadada, n'wini wa hafu yin'wana ya ntsendzele wa Keyila. 19Ekusuhi na yena, ku lunghisa Ezere, n'wana Yexuwa, n'wini wa Mispa, a lunghisa xiyenge xin'wana xa rirhangu, a lavana ni ndlela leyi tlhandlukaka endlwini ya matlhari, eyinhleni.
20Emahlweni ka yena Baruku, n'wana Zabayi, a lunghisa xiyenge xin'wana hi mapfundzu, ku suka eyinhleni ya rirhangu ku fika enyangweni ya yindlu ya muprista lonkulu, Eliyaxibi. 21Emahlweni ka yena, Meremoto, n'wana Uriya, n'wana Hakosi, a lunghisa xiyenge xin'wana, ku suka enyangweni ya yindlu ya Eliyaxibi, ku fika emakumo ya yindlu ya Eliyaxibi. 22Emahlweni ka yena, ku lunghisa vaprista lava akeke ehandle ka muti. 23Emahlweni ka vona ku lunghisa Benjamini na Haxubu, emahlweni ka yindlu ya vona. Emahlweni ka vona, ku lunghisa Azariya, n'wana Maaseya, n'wana Ananiya, emalunganeni ya yindlu ya yena. 24Emahlweni ka yeloyi ku aka Binuyi n'wana Henadada, a lunghisa xiyenge xin'wana, ku suka endlwini ya Azariya, ku fika eyinhleni yo hela. 25Palala, n'wana Uzayi, a sungula ni yinhla ni khokholo leri humelaka ehandle emahlweni ka yindlu leyo leha ya hosi, leyi ungameleke xivava xa khotso. Emahlweni ka yena, ku aka Pedaya, n'wana Paroxi. 26Vanetinimi va aka laha va tshameke kona eswitsungeni ku ya fika emalunganeni ya nyangwa ya Mati ya tlhelo ra vuxa, ni ka khokholo leri humelaka ehandle. 27Emahlweni ka valavo, va Tekowa va aka xiyenge xin'wana xa rirhangu, va sungula emalunganeni ya khokholo lerikulu, leri humelaka ehandle ku ya fika erirhangwini ra Ofele.
28Emahlweni ka Nyangwa ya Tihanci, vaprista va lunghisa un'wana ni un'wana ku langutana ni yindlu ya yena. 29Emahlweni ka vona, Sadoki, n'wana Imere, a lunghisa ku langutana ni yindlu ya yena; emahlweni ka yena ku lunghisa Xemaya, n'wana Xekaniya, mulanguteri wa nyangwa ya vuxa. 30Emahlweni ka yena, Hananiya, n'wana Xelemiya, na Hanunu, n'wana wa ntlhanu na un'we wa Salafa, va lunghisa xiyenge xin'wana. Emahlweni ka vona, Mexulama, n'wana Berekiya, a lunghisa ku lavana ni kamara ya yena.
31Emahlweni ka yena, Malikiya, mufuri wa nsuku, a lunghisa ku ya fika etindlwini ta Vanetinimi, ni ta vaxavisi, ku lavana ni nyangwa ya Mifikadi, ni ku ya fika laha ku tlhandlukaka, le yinhleni. 32Exikarhi ka yinhla laha ku tlhandlukaka, ni nyangwa ya Tinyimpfu, ku lunghisa vafuri va nsuku ni vaxavisi.
Currently Selected:
NEHEMIYA 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
