MARKA 9
9
1A engeta, a ku eka vona: “Ndzi tiyisile ndza mi byela, ndzi ri: Van'wana eka lava nga yima kwala, va nga ka va nga nantswi rifu, va nga si vona ku fuma ka Xikwembu ku ta hi matimba.”
Ta ku kwetsima ka Yesu entshaveni.
2Kuteloko masiku ya ntlhanu na rin'we ma hundzile, Yesu a teka Petro, na Yakobo, na Yohane, a ya na vona va ri swavo ehenhla ka ntshava le yo leha. Kutani a hundzuka emahlweni ka vona; 3tinguvu ta yena ti vangama, ti basa tanihi gamboko, hi laha ku nga riki na muhlantswi emisaveni la tivaka ku basisa xisweswo. 4Kutani Eliya na Muxe va humelela eka vona, va vulavula na Yesu. 5Kavaloko Petro a vulavula, a ku eka Yesu: “Rabi, swi sasekile loko hi tshama kwala; a hi akeni mitsonga minharhu; wun'wana wu va wa wena, wun'wana wa Muxe, wun'wana wa Eliya.” 6Hikuva a a nga tivi leswi a swi vulaka, hikuva a va tshukile ngopfu. 7Kambe papa ri ta, ri va funengeta; kutani ku huma rito epapeni, ri ku: “Loyi i N'wananga loyi a rhandzekaka, n'wi yingiseni.” 8Kutani va hatlisa va rhalarhala hinkwako, kambe a va vonanga munhu un'wana eka vona, loko a nga ri Yesu ntsena.
9Kakuloko va xika entshaveni, a va laya leswaku va nga tshuki va byela munhu leswi va swi voneke, ku ko ku fika siku N'wana wa Munhu a nga ta pfuka eku feni. 10Vona va hlayisa rito leri, va vutisana leswaku ku pfuka eku feni i yini xana?
11Kutani va n'wi vutisa, va ku: “Vatsari va vula yini leswaku Eliya u fanele ku rhanga a ta?” 12A va hlamula, a ku: “Kunene Eliya, siku a taka, u ta lulamisa hinkwaswo, kambe ku tsarisiwe ku yini ehenhla ka N'wana wa Munhu leswaku a fanele ku twisiwa ku vaviseka lokukulu, a va a soriwa-ke? 13Kambe ndza mi byela leswaku Eliya u tile, kutani va n'wi endlile hinkwaswo leswi va swi rhandzeke, hilaha ku nga tswariwa hakona ehenhla ka yena.”
Ta ku horisiwa ka munhu la nga ni demona.
14Kuteloko va fikile eka vadyondzisiwa, va vona vunyingi lebyikulu byi va rhendzele, ni vatsari va kanetana na vona. 15Loko vunyingi byi n'wi vona, va hlamala ngopfu, kutani va n'wi tsutsumela ku n'wi xeweta. 16Yena a va vutisa, a ku: “Mi kanetana yini na vona?” 17Un'wana exikarhi ka vunyingi a hlamula, a ku: “Mufundhisi, ndzi tisile n'wana wa mina eka wena; u ni moya lowu nga vulavuriki. 18Hinkwako loko wu n'wi khoma, wa n'wi tlatlalata, a humesa xikhuvi, a getsela meno, kutani a omelela; ndzi komberile vadyondzisiwa va wena leswaku va wu hlongola, kambe va tsandzekile.” 19Yesu a n'wi hlamula, a ku: “Ha! Rixaka leri nga pfumeriki, ndzi ta va na n'wina ku yisa kwihi? Ndzi ta mi lehisela mbilu ku yisa kwihi-ke? N'wi tiseni eka mina.” 20Kutani va n'wi yisa eka yena. Kuteloko n'wana a vona Yesu, moya wu n'wi khoma hi matimba, a wa ehansi, a vumbuluka, a ri karhi a humesa xikhuvi. 21Yesu a vutisa tata wa yena, a ku: “Xana swi n'wi sungule rini?” A ku: “A ha ri ntsongo, 22kutani wu n'wi cukumetele kanyingi endzilweni ni le matini ku n'wi lovisa; kambe loko u swi kota, hi pfune, hi twele vusiwana.” 23Yesu a ku eka yena: “Loko ku ri ku swi kota, hinkwaswo swi nga endleriwa la pfumelaka.” 24Kutani tata wa n'wana a hatlisa a tlakusa rito hi mihloti, a ku: “Ndza pfumela, Hosi! Ndzi pfune eku kanakaneni ka mina!”
25Yesu, kakuloko a vona vunyingi byi n'wi tsutsumela, a tshinya moya wa thyaka, a ku: “Moya lo wu nga vula vuriki, lowu nga twiki, ndza ku lerisa ndzi ri mina, ndzi ku: Huma ka yena, u nga ha ngheni eka yena.” 26Kutani wu huma, wu ri karhi wu huwelela, wu khoma n'wana hi matimba, kutani n'wana a va tanihi mufi, hilaha lavo tala va nga ku: “U file.” 27Kambe Yesu a n'wi khoma hi voko, a n'wi pfuxa, kutani a yima.
28Kuteloko Yesu a nghenile endlwini, vadyondzisiwa va yena va n'wi vutisa hitlhelo, va ku: “Hina hi tsandzekile ha yini ku hlongola demona leri?” 29Yesu a ku eka vona: “Rixaka leri a ri suki, loko ku nga ri hi ku khongela ni ku titsona swakudya.”
Ta Yesu loko a vula ta rifu ra yena.
30Loko va suka kwalaho, va tsemakanya Galeliya, kambe a a nga rhandzi ku tiviwa hi munhu; 31hikuva a a dyondzisa vadyondzisiwa va yena, a ku eka vona: “N'wana wa Munhu u ta nyiketiwa emavokweni ya vanhu, va ta n'wi dlaya; kuteloko va n'wi dlele, u ta pfuka hi siku ra vunharhu.” 32Kambe a va twisisanga mhaka leyi, kutani va chava ku n'wi vutisa.
Lonkulu eku fumeni ka Xikwembu.
33Kutani a ya eKapernawume. Kuteloko va ri endlwini, a va vutisa, a ku: “A mi kanetana hi tihi endleleni?” 34Kambe va miyela, hikuva endleleni a va tengisana vukulukumba. 35Kuteloko a tshamile, a vitana lava khume na vambirhi, a ku eka vona: “Loko un'wana a rhandza ku va lowo rhanga, u ta va wa le ndzhaku ka hinkwavo, ni nandza wa hinkwavo.” 36Kutani a teka n'wana, a n'wi veka exikarhi ka vona; kuteloko a n'wi vukarhile, a ku eka vona: 37“Un'wana ni un'wana la amukelaka un'wana wa vana lava hi vito ra mina, wa ndzi amukela; kutani un'wana ni un'wana la ndzi amukelaka, a nga amukeri mina, kambe u amukela la ndzi rhumeke.”
Ta ku khunguvanyeka.
38Yohane a vulavula na yena, a ku: “Mufundhisi, hi vonile un'wana la nga hi landziki, a hlongola mademona hi vito ra wena, kutani hi n'wi arisile, hikuva a nga hi landzi.” 39Kambe Yesu a ku: “Mi nga tshuki mi n'wi arisa, hikuva a ku na munhu loko a endlile masingita hi vito ra mina a nga hatlisaka ku ndzi vula hi ku biha. 40Hikuva la nga lwiki na hina, wa hi yimela. 41Hikuva un'wana ni un'wana la mi nwisaka ndzheko wa mati hi vito ra mina, hi leswi mi nga va ka Kriste, kunene ndzi ri eka n'wina: a nga ka a nga lahlekeriwi hi hakelo ya yena. 42Un'wana ni un'wana la khunguvanyisaka un'wana wa la vatsongo lava pfumelaka eka mina, swi nga saseka eka yena loko a boheleriwa ribye ra ku sila enhan'wini, a cukumetiwa elwandle.
43“Voko ra wena loko ri ku wisa, ri tseme; swi nga saseka eka wena loko u nghena evutomini u ri xilema, ku nga ri ku ya etiheleni, endzilweni lo wu nga timekiki, u ri ni mavoko mambirhi. [ 44Exivandleni xexo, ‘xivungu lexi xi va dyaka a xi fi, ni ndzilo a wu timeki.’] 45Ni loko nenge wa wena, wu ku wisa, wu tseme; swi nga saseka eka wena loko u nghena evutomini u khwita, ku nga ri ku cukumetiwa etiheleni, endzilweni lowu nga timekiki, u ri ni milenge mimbirhi. [ 46Exivandleni xexo, ‘xivungu lexi xi va dyaka a xi fi, ni ndzilo a wu timeki.’] 47Ni loko tihlo ra wena ri ku wisa, ri xokole, swi nga saseka eka wena loko u nghena eku fumeni ka Xikwembu, u fe tihlo, ku nga ri ku cukumetiwa etiheleni ta ndzilo, u ri ni mahlo mambirhi, 48laha xivungu xa vona xi nga fiki kona, ni laha ndzilo wu nga timekiki kona. 49Hikuva un'wana ni un'wana u ta lungiwa hi ndzilo, ni magandzelo man'wana ni man'wana ma ta lungiwa hi munyu. 50Munyu i xilo lexo nandziha; kambe loko munyu wu phyama, mi ta wu nandzihisa ha yini-ke? Vanani ni munyu eka n'wina, mi akisana hi ku rhula.”
Currently Selected:
MARKA 9: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
