MATEWU 11

Ta varhumiwa va Yohane Mukhuvuri eka Yesu.

1Kuteloko Yesu a hetile ku lerisa vadyondzisiwa va yena lava khume na vambirhi, a suka kwalaho a ya dyondzisa ni ku hlavutela emitini ya tiko ra vona.

2Kambe Yohane kakuloko a ri ekhotsweni, a twa mitirho ya Kriste, kutani a rhuma vadyondzisiwa va yena vambirhi eka Yesu, va ku eka yena: 3“Xana hi wena la taka, kumbe ha ha langutela un'wana xana?” 4Yesu a hlamula, a ku eka vona: “Yanani mi ya tivisa Yohane leswi mi swi twaka ni leswi mi swi vonaka: 5Vo fa mahlo va tlhela va vona, lavo khwita va famba, va nhlokonho va basisiwa, vo fa tindleve va yingisa, va ku fa va pfuka, swisiwana swi byeriwa Evhangeli; 6kambe ku katekile la nga tiki khunguvanyeka hikwalaho ka mina!”

7Kutani volavo loko va sukile, Yesu a sungula ku vulavula ni ntshungu hi ta Yohane, a ku: “A mi yile mi ya vona yini emananga? Xana a ri ri rihlanga leri tsekatsekisiwaka hi mheho xana? 8Kambe a mi ya vona yini-ke? Xana a a ri munhu la funengeleke tinguvu to bomba xana? Maswivo, lava ambalaka leswo saseka, va le tindlwini ta tihosi. 9Kambe a mi yile mi ya vona yini? A a ri muprofeta xana? Ina, ndza mi byela; ni la tlulaka muprofeta, 10 hikuva ku tsariwe ta yena loko va te: ‘Maswivo, ndzi rhume emahlweni ka wena ntsumi ya mina, yi ku lunghisela ndlela emahlweni ka wena.’ 11Ndzi vurisile ndzi ri eka n'wina: Eka lava velekiweke hi vavasati, a ku humelelanga un'wana la nga nkulukumba eka Yohane Mukhuvuri; kambe lontsongo eku fumeni ka matilo i nkulukumba eka yena. 12Kutani ku sungula enkarhini wa Yohane Mukhuvuri ku fika sweswi, ku fuma ka matilo ku ngheniwa hi matimba, kutani va matimba hi vona lava ku tekaka. 13Hikuva vaprofeta hinkwavo ni tibuku ta nawu va bvumbhile va yisa timhaka ku fika eka Yohane; 14kutani loko mi rhandza ku amukela timhaka leti, hi yena Eliya la fanekeleke ku ta. 15La nga ni tindleve ku yingisa, a a yingise.

16“Kambe rixaka leri, xana ndzi ta ri fanisa na yini? Ri fana ni vana lava tshamiseke entsendzeleni, va byelana ni tintangha ta vona, va ku: 17‘Hi mi bele nanga, kambe a mi cinanga; hi mi yimbelele maxangu, kambe a mi rilanga.’ 18Hikuva Yohane u tile a nga dyi, a nga n'wi, kutani va ku: ‘U ni demona.’ 19N'wana wa munhu u tile a dya, a nwa, kutani va ku: ‘Vonani mudyi ni munwi, nakulobye wa valuvisi ni vadyohi.’ Kambe vutlhari byi kombisile ku lulama ka byona hi mitirho ya byona.”

20Enkarhini wolowo Yesu a sungula ku holovela miti yoleyo a nga endla masingita layo tala eka yona, hikuva a yi hundzukanga, 21a ku: “U ni khombo wena Korazini, u ni khombo wena Betsayida, hikuva mahlori lama nga endliwa eka rikwenu loko ingi ma endliwile eTiri na le Sidoni, miti yoleyo ingi yi hundzukile khale, yi teka tinguvu leto khwaxa ni nkuma. 22Hikwalaho ndzi nge eka n'wina: Ku ta vevuka eka Tiri na Sidoni ku tlula eka n'wina esikwini ra ku avanyisa. 23Na wena Kapernawume, la tlakusiweke ku fika le tilweni, u ta tsongahatiwa ku fikela endhawini ya lava feke; hikuva mahlori lama endliweke eka rikwenu, loko ingi ma endliwe Sodoma, muti wolowo a wu ta va wa ha ri kona ni sweswi. 24Hikwalaho ndzi nge eka n'wina: Ku ta vevuka eka tiko ra Sodoma ku tlula eka n'wina esikwini ra ku avanyisa.”

25Enkarhini wolowo Yesu a vulavula a ku: “Ndza ku dzunisa, Tatana, Hosi ya le tilweni ni ya misava, hikuva timhaka teto u ti fihlele lavo tlhariha ni lava mano, kambe u ti tivisile lavatsongo. 26Ina, Tatana, hi sweswo hikuva hilaha u tirhandzeleke hakona. 27Swilo hinkwaswo swi vekiwe eka mina hi Tatana; a ku na la tivaka N'wana, loko a nga ri Tatana; naswona a ku na la tivaka Tatana loko a nga ri N'wana, ni loyi N'wana a rhandzaka ku n'wi hlavutela yena.

28“Tanani eka mina n'wina hinkwenu lava karheleke, ni lava tikeriwaka, ndzi ta mi wisisa. 29Rhwalani joko ra mina, mi dyondza eka mina, hikuva ndzi ni vunene ni mbilu ya tintswalo, kutani mi ta kumela mimoya ya n'wina ku wisa; 30hikuva joko ra mina ra olova, ni ndzhwalo wa mina wa vevuka.”

Currently Selected:

MATEWU 11: TSO29

Highlight

Copy