LUKA 23

Ta Yesu loko a yisiwa emahlweni ka Pilato na Heroda.

1Kutani hinkwavo va suka va yima, va n'wi yisa eka Pilato, 2va sungula ku n'wi hehla, va ku: “Hi kumile munhu loyi a hlohlotela tiko, a tshimbisa vanhu ku humesela Khezari ndzuvo; naswona u tivula Kriste, hosi.” 3Kutani Pilato a n'wi vutisa, a ku: “Xana hi wena hosi ya Vayuda-ke?” Yesu a hlamula a ku: “Wa vurisa.”

4Kavaloko Pilato a ku eka vaprista lavakulu ni ka vunyingi: “A ndzi kumi nandzu eka munhu loyi.” 5Kambe va chivirika, va ku: “U pfilunganya tiko hinkwaro ra Yudiya hi ku dyondzisa, ka hari mpfhuka a sungula eGaleliya, ku fika kwala.”

6Kuteloko Pilato a va twa va vula vito ra Galeliya, a vutisa, a ku: “Xana munhu loyi i wa Galeliya xana?” 7Kuteloko a twile leswaku i munhu wa ku fuma ka Heroda, a n'wi rhumela eka Heroda, loyi ngi a ri eYerusalema na yena, hi masiku walawo.

8Kuteloko Heroda a vona Yesu, a tsaka ngopfu, hikuva a ku ri khale a rhandza ku n'wi vona hikwalaho ka timhaka ta yena leto tala leti a ti tweke; kutani a tshemba leswaku u ta n'wi vona a endla masingita. 9A n'wi vutisa timhaka to tala, kambe Yesu a nga n'wi hlamulanga nchumu. 10Kambe vaprista lavakulu ni vatsari va yima, va n'wi hehla hi matimba. 11Kutani Heroda a n'wi sandza a ri ni tinhenha ta yena, a n'wi tseketsela; kuteloko a n'wi funengetile hi nguvu leyi vangamaka, a n'wi tlherisela eka Pilato. 12Kutani hi siku rero, Pilato na Heroda va sungula ku rhandzana, hikuva khale a va vengana.

13Kambe Pilato a hlengeleta vaprista lavakulu, ni vakulu va tiko, ni vunyingi, a ku eka vona: “Mi tisile munhu loyi eka mina, mi ku: ‘U hambukisa tiko,’ 14kutani vonani, ndzi n'wi vutisile mi ri kona, kambe a ndzi kumanga eka yena, hambi wu ri nandzu wun'we wa leswi mi n'wi hehlaka ha swona. 15Swi tano na Heroda, hikuva u n'wi tlheriserile eka hina; kutani vonani, a nga endlanga xilo ni xin'we lexi fanekeriwaka hi ku fa. 16Hikwalaho, ndzi ta n'wi ba, kutani ndzi ta n'wi tshunxa.”

17Kambe a a fanele ku va tshunxela un'wana hi nkhuvo. 18Kutani va huwelela hinkwavo swin'we va ku: “Susa loyi, u hi tshunxela Barabasi.” 19Munhu yeloyi a nghenisiwile ekhotsweni hikuva a a pfuxile dzolonga exikarhi ka muti, ni hikwalaho ka ku dlaya munhu. 20Pilato a engeta a vulavula na vona, hikuva a a rhandza ku tshunxa Yesu. 21Kambe va engeta va huwelela, va ku: “N'wi vambe! N'wi vambe!” 22A vulavula na vona ra vunharhu, a ku: “Loyi, u dyohile yini xana? A ndzi kumi eka yena nandzu lowu a nga dlayeriwaka wona; hikwalaho ndzi ta n'wi ba, kutani ndzi ta n'wi tshunxa.” 23Kambe va huwelela hi marito lamakulu, va kombela leswaku a vambiwa; kutani ku huwelela ka vona ni ka vaprista ku va ku hlula.

24Kutani Pilato a tsema mhaka, a ku: “A ku endliwe hilaha va kombelaka hakona.” 25Kutani a va tshunxela la komberiweke hi vona la khotsiweke hikwalaho ka dzolonga ni ku dlaya munhu, kutani a nyiketa Yesu eku rhandzeni ka vona.

Ta ku vambiwa ka Yesu.

26Kakuloko va n'wi yisa eku dlaweni, va teka un'wana la vuriwaka Simoni wa Kirene, la humaka emasin'wini, va n'wi rhwarisa xihambano endzhaku ka Yesu.

27Kutani vunyingi lebyikulu bya tiko, ni vavasati lavo tala, a va n'wi landza, va ri karhi va tiba swifuva, va n'wi rila. 28Kambe Yesu a rhendzelekela eka vona, a ku: “Vanhwanyana va Yerusalema, mi nga ndzi rileli; tirileleni n'wina ni vana va n'wina. 29Hikuva vonani, masiku ma ta, lawa va nga ta ku: ‘Ku katekile timhika, ni makhwiri lama nga velekangiki, ni mavele lama nga an'wisangiki.’ 30Enkarhini wolowo, va ta ku eka tintshava: ‘Hi weleni ehenhla,’ ni ka switsunga: 31‘Hi funengeteni,’ hikuva, leswi va endliseke sweswo eka rikunyi leri tsakamaka, ku ta endlisiwa yini eka leri omeke?”

32A va yisa ni van'wana vambirhi, swi ri swidyohi, ku ya dlawa na yena.

33Kuteloko va fikile exivandleni lexi va nge i Ripala, va n'wi vamba kona ni swidyohi; xin'wana xi va evokweni ra xinene, xin'wana eka lera ximatsi. 34Kambe Yesu a ku: “Tatana, va rivalele, hikuva a va tivi leswi va swi endlaka.” Kutani va avelana tinguvu ta yena hi ku ti hlahluva hi vuhlolotwana.

35Vunyingi a byi yimile byi languta; na tona tihosi ti n'wi tseketsela, ti ku: “U hanyisile van'wana! A a tiponise na yena loko a ri Kriste, muhlawuriwa wa Xikwembu!” 36Na tona tinhenha ti n'wi tseketsela, ti tshinela, ti n'wi nyika ntsuvi, ti ku eka yena: 37“Loko u ri Hosi ya Vayuda, tiponise-ke!”

38Kambe a ku ri ni papila enhlokweni ya yena, leri nge: “Loyi, i Hosi ya Vayuda.”

39Xidyohi xin'wana xa leswi vambiweke, xi n'wi tseketsela na xona, xi ku: “Loko u ri Kriste, tiponise, na hina, hi ponise!” 40Kambe xin'wana xi n'wi holovela, xi ku: “Xana a ku chavi Xikwembu ha yini; kasi u avanyisiwe swin'we na loyi. 41Kasi, loko hi ri hina, swi hi lulamele; hikuva hi amukela leswi fanekelaka leswi hi swi endleke; kambe loyi, a nga dyohanga nchumu.” 42Kutani xi ku eka Yesu: “Hosi, ndzi anakanye loko u nghenile eku fumeni ka wena.” 43Yesu a ku eka xona: “Kunene, ndzi ri eka wena: Namuntlha u ta va na mina eParadeyisini.”

44Hi nkarhi lowu laveke ku va wa ntlhanu na wun'we (ninhlekanhi), munyama wu va kona emisaveni hinkwayo, ku fika enkarhini wa ntlhanu na mune (ni ndzhenga). 45Dyambu rona ri endla ntima, kutani nguvu leyi tsemakanyisaka tempele, yi handzuka hi le xikarhi.

46Kutani Yesu a huwelela hi rito lerikulu, a ku: “Tatana, ndzi nyiketa moya wa mina emavokweni ya wena.” Loko a ri karhi a vula sweswo, a fa.

47Ndhuna ya dzana, kuteloko yi vonile leswi humeleleke, yi dzunisa Xikwembu, yi ku: “Kunene munhu loyi a a lulamile.” 48Kutani vanhu hinkwavo lava hlengeletaneke ku languta, va tlhelela ekaya, va tiba swifuva, loko va vona leswi humeleleke.

49Kutani lava tivanaka na yena hinkwavo, ni vavasati lava n'wi landzeke loko a huma eGaleliya, a va yimile ekule, va langutisa swilo leswo.

Ta ku lahliwa ka Yesu.

50Kutani ndhuna yin'wana leyi vuriwaka Yosefa, a yi ri kona, a a ri munhu wa tintswalo, la lulameke. 51A nga pfumelelanga makungu ya vona, ni ku endla ka vona; a a ri wa Arimatiya, muti wa Vayuda; na yena a a langutela ku fuma ka Xikwembu. 52Yeloyi a ya eka Pilato, a kombela ntsumbu wa Yesu. 53Kuteloko a wu hawurile, a wu phutsela hi nguvu, a wu lahla esirheni leri vatliweke eribyeni, laha ku nga siki lahliwa munhu kona. 54Siku rero a ri ri ra ku lunghisela, hikuva Savata a ri ri kusuhi.

55Na vona vavasati lava humeke eGaleliya na yena, a va tshinela, va languta sirha, ni mukhuva lowu ntsumbu wa Yesu wu vekiwaka ha wona. 56Kutani va tlhelela ekaya, va ya lunghisa mirhi ya risuna; kambe hi siku ra Savata, va wisa hi nawu.

Currently Selected:

LUKA 23: TSO29

Highlight

Copy