GENESA 30

1Kuteloko Rahele a vona leswaku a nga velekeli Yakobo vana, a pfukela hosi ya yena, a ku eka Yakobo: “Ndzi he vana, loko swi nga ri tano ndzi ta fa.”

2Kutani Yakobo a karihela Rahele, a ku eka yena: “Xana ndzi tshamile ematshan'weni ya Xikwembu lexi ku aleke ku veleka?”

3Yena a ku: “Nandza wa mina, Biliha, hi loyi; yana eka yena, a ta veleka ematsolweni ya mina, kutani na mina ndzi ta kuma vana ha yena.” 4Kavaloko a n'wi nyika Biliha, nandza wa yena, leswaku a va nsati wa yena. Yakobo a ya eka yena. 5Biliha a xurha nyimba, a velekela Yakobo n'wana wa wanuna. 6Kutani Rahele a ku: “Xikwembu xi ndzi avanyisele mhaka, xi twile rito ra mina, xi ndzi nyika n'wana”; hikwalaho-ke a n'wi thya vito ra Dani (ku avanyisa). 7Biliha, nandza wa Rahele, a engeta a xurha nyimba, a velekela Yakobo n'wana wa wanuna lowa vumbirhi. 8Rahele a ku: “Ndzi lwile ni makwerhu hi ku lwa ka Xikwembu, hi laho-ke ndzi nga n'wi hlula!” Kutani a n'wi thya vito ra Neftali (ku lwa ka mina).

9Kuteloko Leya a vona leswaku a nga ha veleki vana, a teka Zilipa, nandza wa yena, a n'wi nyika Yakobo leswaku a va nsati wa yena. 10Kutani Zilipa, nandza wa Leya, a velekela Yakobo n'wana wa wanuna. 11Leya a ku: “Ndzi fuwile!” Kutani a n'wi thya vito ra Gadi (ku fuwa). 12Zilipa, nandza wa Leya, a engeta a velekela Yakobo n'wana wa wanuna lowa vumbirhi. 13Kutani Leya a ku: “Ndzi katekile! Hikuva vanhwana va ta ndzi vula lowa nkateko”; a n'wi thya vito ra Asere (ku kateka).

14Kutani, kakuloko Rhuveni a huma a ya emasin'wini, enkarhini wa ku tshovela mavele, a kuma mandragora (marhanga ya rirhandzu), a ya neha eka Leya, mana wakwe. Kambe Rahele a byela Leya, a ku: “Wa nga ndzi ha mandragora man'wana ya n'wanaku.”

15Leya a ku eka yena: “Xana i xilo lexitsongo loko u ndzi tekele nuna wa mina, kutani u lava ku ndzi tekela ni mandragora ya n'wananga?”

Rahele a ku: “Hi swona, Yakobo u ta etlela na wena hi vusiku lebyi, kutani ndzi ta kuma mandragora ya n'wanaku.”

16Kuteloko Yakobo a vuya emasin'wini enkarhini wa madyambu, Leya a huma a ya hlangana na yena, a ku eka yena: “U ta ta endlwini ya mina, hikuva ndzi ku lombile, ndzi ku lombile hi mandragora ya n'wananga.” A etlela na yena hi vusiku byebyo.

17Xikwembu xi yingisa Leya, kutani a xurha nyimba, a velekela Yakobo n'wana wa wanuna lowa vuntlhanu. 18Leya a ku: “Xikwembu xi ndzi nyikile hakelo ya mina, hikuva ndzi nyikile nuna wanga nandza wa mina”; a n'wi thya vito ra Isakara (hakelo). 19Leya a engeta a xurha nyimba, a velekela Yakobo n'wana wa wanuna wa ntlhanu na un'we; 20kutani Leya a ku: “Xikwembu xi ndzi fuwisile ntsengo lowunene; sweswi, nuna wa mina u ta tshama eka mina, hikuva ndzi n'wi velekele vana va vavanuna va ntlhanu na un'we.” A n'wi thya vito ra Zebuloni (ku tshama). 21Endzhaku ka swona, a veleka n'wana wa wanhwanyana, a n'wi thya vito ra Dina.

22Kavaloko Xikwembu xi tsundzuka Rahele; Xikwembu xi n'wi yingisa, xi n'wi pfulela mbeleko. 23A xurha nyimba, a veleka n'wana wa wanuna, a ku: “Xikwembu xi ndzi susele tingana ta mina.” 24Kutani a n'wi thya vito ra Yosefa (a xi engete!) a ku: “Yehovha a a ndzi engetelele n'wana un'wanyana wa wanuna!”

Ta ku fuwa ka Yakobo.

25Kuteloko Rahele a velekile Yosefa, Yakobo a byela Labani a ku: “Ndzi tshike ndzi muka ekaya ka mina eka rikwerhu. 26Ndzi nyike vasati va mina volavo ndzi va tirheleke eka wena, ni vana va mina, ndzi tiva ku tifambela; hikuva u tiva swinene mitirho ya mina leyi ndzi ku tirheleke yona.”

27Labani a ku eka yena: “I ngi ndzi nga kuma tintswalo emahlweni ka wena! Ndzi tsundzukile leswaku Yehovha u ndzi katekisile hikwalaho ka wena.” 28A engeta a ku: “Ndzi byele hakelo ya wena, ndzi ta ku nyika yona.”

29Yakobo a ku eka yena: “Wa swi tivisisa na wena hilaha ndzi nga ku tirhela hakona, ni laha mitlhambi ya wena yi nga hundzuka hakona yi ri na mina. 30Hikuva a wu ri ni swilo swi nga ri swingani, ndzi nga si ta, kambe sweswi, swi andzile ngopfungopfu, Yehovha u ku katekisile mpfhuka ndzi ta. Kutani sweswi, ndzi ta tirhela rini yindlu ya mina?”

31Labani a ku eka yena: “Ndzi ta ku nyika yini?”

Yakobo a ku: “U nga ka u nga ndzi nyiki nchumu; kambe kungakuloko u rhandza ku ndzi endlela mhaka leyi, ndzi ta tlhela ndzi risa, ndzi hlayisa swifuwana swa wena; 32namuntlha ndzi ta hundza exikarhi ka swifuwana swa wena hinkwaswo; wena u pambula exikarhi ka swona xifuwana xin'wana ni xin'wana lexi nga ni mavala ni mavalavala, ni xifuwana xin'wana ni xin'wana lexa ntima exikarhi ka swinyimpfana, ni hinkwaswo leswi nga ni mavala ni mavalavala exikarhi ka timbuti, kutani yi ta va hakelo ya mina. 33Ku suka siku ra mundzuku, ku lulama ka mina ku ta ndzi hlamulela siku u hlanganaka ni hakelo ya mina emahlweni ka wena: hinkwaswo leswi nga ka swi nga ri na mavala ni leswi nga riki na mavalavala exikarhi ka timbuti, ni loko swi ri swa ntima exikarhi ka swinyimpfana, loko swi ri eka mina, ku ta va ku yiva ka mina.”

34Kutani Labani a ku: “Hi swona, a swi ve hilaha u vuleke hakona.” 35Kutani hi siku lero, a pambula swiphongo swa mavala ni swa mavalavala, ni timbuti hinkwato ta mavala ni ta mavalavala, hinkwaswo leswi nga hava ntima ni hinkwaswo leswa ntima exikarhi ka swinyimpfana, a swi vekela emavokweni ya vana va yena. 36Kutani a veka mpfhuka wa masiku manharhu exikarhi ka yena na Yakobo, kutani Yakobo a tshama a risa ntlhambi lowu seleke wa Labani.

37Kutani Yakobo a tsema mikhavi leyo tsakama ya ndhlulameti ni ya xirhomberhombe ni ya murhi wa alimondi, a yi vandlela tindlela to basa, ku vonaka mbilu leyo basa ya mikhavi. 38Kutani a veka mikhavi leyi a nga yi vandla emahlweni ka swifuwana, eswitsengeleni ni le swihlobyeni laha timbuti ti tshamaka ti nwa, leswaku ti ta navetisa makhuna loko ti ta nwa; 39swifuwana a swi naverisiwa loko swi vona mikhavi, swi tswala swinyimpfana swa mavala, ni swa mavalavala ni leswa mindzhati.

40Swinyimpfana leswo, Yakobo a swi pambulela etlhelo, kutani a hlanganisa swin'we leswi nga ni mavala ni leswa ntima hinkwaswo swa ntlhambi wa Labani; a tipambulerisa sweswo mitlhambi ya yena, a nga yi hlanganisi ni ntlhambi wa Labani.

41Kutani kakuloko tinyimpfu ta matimba ti navela makhuna, Yakobo a veka mikhavi emikambaneni emahlweni ka tinyimpfu, leswaku ti khandziyana kusuhi ni mikhavi. 42Kambe loko ti ri tinyimpfu leti nga riki na matimba, a a nga veki mikhavi, swi va leswaku swinyimpfana leswo tsana swi ri swa Labani, ni leswa matimba swi ri swa Yakobo. 43Sweswo munhu yeloyi a fuwa ngopfungopfu, a va ni swifuwana leswo tala ngopfu, ni malandza ya vavasati ni ya vavanuna, ni tikamela, ni timbhongolo.

Currently Selected:

GENESA 30: TSO29

Highlight

Copy