GENESA 22
22
Ta Abrahama loko a ringiwa ha Isaka.
1Endzhaku ka timhaka teto, Xikwembu xi ringa Abrahama, xi ku eka yena: “Abrahama!” A hlamula a ku: “Hi mina loyi!”
2Kutani xi ku: “Teka n'wanaku, loyi a nga swakwe eka wena, loyi u n'wi rhandzaka, a nga Isaka, u ya etikweni ra Moriya, u n'wi tlhavela kona egandzelweni, entshaveni yin'wana leyi ndzi nga ta ku kombisa yona.”
3Kutani Abrahama a vindzuka, a boha mbhongolo ya yena, a teka malandza mambirhi, na Isaka n'wanakwe; a pandzela ni tihunyi ta gandzelo, kutani a suka a ya exivandleni lexi Xikwembu xi n'wi kombiseke xona. 4Hi siku ra vunharhu, Abrahama a tlakusa mahlo, a vona xivandla xexo a ha ri kule. 5Kutani Abrahama a ku eka malandza ya yena: “Tshamani la, n'wina ni mbhongolo; mina ni jaha, hi ta ya kwale hi gandzela kona, kutani hi ta tlhela hi mi kuma.”
6Kutani Abrahama a teka tihunyi ta gandzelo, a rhwexa Isaka, n'wana wa yena, a teka evokweni ra yena ndzilo ni mukwana, kutani va famba havambirhi swin'we. 7Kavaloko Isaka a vutisa Abrahama, tata wa yena, a ku: “Tatana!”
Yena a ku: “Hi mina loyi, n'wananga.”
Isaka a ku: “Ndzilo hi lowu ni tihunyi hi leti, kambe nyimpfu yi kwihi leyo tlhavela?”
8Abrahama a ku: “N'wananga, Xikwembu xi ta vona ku tilavela nyimpfu ya mhamba.” Kutani a va ri karhi va famba havambirhi swin'we.
9Va fika exivandleni lexi Xikwembu xi n'wi byeleke xona. Abrahama a aka gandzelo, a lunghisa tihunyi, a boha Isaka, n'wana wa yena, a n'wi tlhandleka egandzelweni, ehenhla ka tihunyi. 10Kutani Abrahama a tshambuluta voko, a teka mukwana a ku a tlhava n'wanakwe. 11Kavaloko ntsumi ya Yehovha yi n'wi vitana yi ri etilweni, yi ku: “Abrahama, Abrahama!”
Yena a ku: “Hi mina loyi!”
12Kutani yi ku: “U nga yisi voko ra wena eka n'wana, u nga n'wi endli nchumu; hikuva sweswi, ndza swi tiva leswaku u chava Xikwembu, ni leswaku a u ndzi alelanga n'wanaku, loyi a nga swakwe.”
13Abrahama a tlakusa mahlo, a languta, a vona khuna ri ri ndzhaku ka yena, ri phasiwile exihlahlaneni hi timhondzo; Abrahama a ya teka khuna, a ri tlhavela magandzelo ematshan'weni ya n'wanakwe. 14Kutani Abrahama a thya ndhawu leyi vito ra Yehova-yire (hileswaku Yehovha u ta swi vona); hilaha va nga te ni namuntlha: Swi ta vonaka entshaveni ya Yehovha.
15Ntsumi ya Yehovha yi tlhela yi vitana Abrahama yi ri etilweni, 16yi ku: “Ndzi hlambanyile ha mina, ku vula Yehovha, ndzi ri: ‘Leswi u endliseke sweswo, u nga ndzi alelanga n'wana wa wena, loyi a nga swakwe, 17ndzi ta ku katekisa kunene, ndzi andzisa vatukulu va wena ngopfungopfu, va ta kotisa tinyeleti ta le tilweni, ni sava ra le ribuwini ra lwandle, kambe rixaka ra wena ri ta fuma nyangwa ya valala va rona. 18Kutani matiko hinkwawo ya misava ma ta tikhensa hi rixaka ra wena, hikuva u yingisile rito ra mina.’ ” 19Abrahama a tlhelela eka malandza ya yena; kutani va pfuka va famba swin'we eBerexeba. Kutani Abrahama a tshama kona eBerexeba.
20Endzhaku ka timhaka teto, va ta ambela Abrahama, va ku: “Waswivo, Milika na yena, u velekele Nahoro, makwenu, vana; 21a ri Usi, lowa hosi, na Buzi, ndzisana, na Kemuwele, tata wa Aramu, 22na Kesede, na Hazo, na Pilidaxi, na Yidilafu, na Betuwele. 23Betuwele u veleke Rhaveka. Milika u velekele Nahoro, makwa wa Abrahama, vana lava ntlhanu na vanharhu. 24Nkatikulobye wa yena, loyi va nge i Rhewuma, na yena u veleke Tebaka, na Gahamu, na Tahaxi, na Maaka.”
Currently Selected:
GENESA 22: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
