GENESA 19

Ta Sodoma na Gomora.

1Tintsumi letimbirhi ti fika eSodoma enkarhini wa madyambu, kutani Lota a a tshamile ehubyeni ya Sodoma. Kuteloko Lota a ti vona, a suka a ya hlangana na tona, a khinsama ehansi, 2a ku: “Vonani, tihosi tanga, ndza mi khongela, hambukelani endlwini ya nandza wa n'wina, mi etlela kona, mi hlamba milenge; kutani mi ta vindzuka nimixo mi famba hi ndlela ya n'wina.”

Va ku: “E-e, kambe hi ta etlela ehubyeni.”

3Kutani Lota a phikelela ngopfu, va ko va hambukela eka yena, va nghena endlwini ya yena; kutani a va lunghisela xilalelo, a sweka xinkwa lexo kala comela, va dya.

4Kambe kuteloko va nga si ya etlela, vanhu va muti, vanhu va Sodoma, va rhendzelekela yindlu, ku suka ka lavantshwa ku fika eka swikoxa, muti hinkwawo wa matlhelo hinkwawo. 5Kutani va vitana Lota, va ku eka yena: “Va kwihi vanhu lava ngheneke eka wena hi vusiku lebyi? Va humesele ehandle hi va tiva.”

6Kutani Lota a humela eka vona enyangweni, a pfala nyangwa endzhaku ka yena. 7Kutani a ku: “Ndza mi khongela, vamakwerhu, mi nga endleni leswo biha. 8Vonani, ndzi ni vanhwana vambirhi lava nga tivanangiki na wanuna; ndzi pfumeleleni ndzi mi humesela vona ehandle, mi va endla hilaha mi rhandzaka hakona. Kambe ntsena, mi nga tshuki mi endla nchumu eka vanhu volavo, hikuva va nghene kwalaho endzhutini wa lwangu ra mina.”

9Kambe va ku: “Suka laho.” Va engeta va ku: “Munhu yeloyi u tile ku luvela halenu, kasi sweswi a rhandza ku hi avanyisa! Sweswi, hi ta ku endla ku tlurisa vona.” Kutani va kandziyela Lota, va va va tshinelela ku tshova rivanti. 10Kambe vanhu valavo va tshambuluta voko, va nghenisa Lota endlwini eka vona, va pfala rivanti. 11Kutani va ba hi riphume vanhu lava ngi va ri enyangweni ya yindlu, ku suka ka lontsongo ku fika eka lonkulu, va ko va karhala ku lava nyangwa.

12Kutani vanhu volavo va ku eka Lota: “U na mani kwalaho? Humesa vakon'wana va wena emutini lowu, ni vana va xinuna ni va xisati, ni hinkwavo lava u nga na vona emutini, 13hikuva hi ta herisa muti lowu, hikuva huwa ya wona yi kurile emahlweni ka Yehovha, kutani Yehovha u hi rhumile ku ta wu lovisa.”

14Lota a huma, a ya byela vakon'wana va yena lava ngi va vutile vana va yena, a ku eka vona: “Pfukani mi huma exivandleni lexi, hikuva Yehovha u ta lovisa muti.” Kambe eka vakon'wana va yena, a va swo ngi wa hleka.

15Kutani kakuloko vurhonga byi xa, tintsumi ti sindzisa Lota ti ku: “Pfuka u teka nsati wa wena, ni vana va wena lava u nga na vona la, u nga ti tshuka u lova hikwalaho ka ku homboloka ka muti.” 16Kambe a hlwela, kutani vanhu valavo va khoma voko ra yena, ni voko ra nsati wa yena, ni mavoko ya vana lavambirhi va yena, hikwalaho ka tintswalo ta Yehovha eka yena; va n'wi humesa handle, va n'wi tshika ehandle ka muti. 17Kuteloko va va byisile ehandle, un'wana wa vona a ku: “Baleka, hikwalaho ka vutomi bya wena, u nga languti endzhaku, u nga yimi kwihi na kwihi erivaleni; balekela entshaveni u nga ti tshuka u lova.”

18Kutani Lota a ku eka vona: “E-e, Hosi, 19waswivo, nandza wa wena u kume tintswalo emahlweni ka wena, kutani u ndzi kombisile nsovo lowukulu loko u hlayisile vutomi bya mina, kambe a ndzi nga swi koti ku tsutsumela entshaveni khombo ri nga si ndzi khoma ndzi lova. 20Vona, ndza ku khongela, muti lowuya, wu kusuhi, a wu kulanga; ndzi pfumelele ndzi balekela kona, (kasi a hi wu ntsongo xana?) ndzi va ndzi hanya!”

21Kutani a ku eka yena: “Vona, ndza ku tsetselela ni le mhakeni yeleyo, a ndzi nga mbundzuxi muti lowu u wu vulaka. 22Ntsena, hatlisa u tsutsumela kona hikuva a ndzi nga swi koti ku endla nchumu u nga si fika kona.”

Hikwalaho va nga thya muti wolowo vito ra Sowara (hileswaku vutsongo).

23Kutani dyambu a ri ri karhi ri huma emisaveni loko Lota a nghena eSowara. 24Kavaloko Yehovha a nisela Sodoma na Gomora xivavula ni ndzilo swi huma etilweni eka Yehovha. 25A herisa miti yeleyo ni rivala hinkwaro, ni vaaki hinkwavo va miti, ni timbewu ta misava. 26Nsati wa Lota a languta ndzhaku, kutani a hundzuka tshuka ra munyu.

27Kutani Abrahama a vindzuka ka hari mixo, a ta exivandleni lexi laha a nga yima emahlweni ka Yehovha. 28Kutani a languta tlhelo ra Sodoma na Gomora, ni ra tiko hinkwaro ra rivala, kutani a vona musi wa misava wu tlhlandlukela ehenhla, wu fana ni musi wa xivumbi. 29Kambe kakuloko Xikwembu xi herisa miti ya rivala, xi tsundzuka Abrahama, xi ponisa Lota ekhombyeni lero siku xi lovisaka miti leyi Lota a nga aka eka yona.

30Kutani Lota a suka eSowara a ya tshama entshaveni ni vanhwana lavambirhi va yena, hikuva a a chava ku tshama eSowara. A hanya ebakweni ni vana lavambirhi va yena. 31Kutani lowa hosi a byela ndzisana, a ku: “Tatana u dyuhele, kutani a ku na wanuna etikweni la nga ta ta eka hina hi mukhuva wa matiko hinkwawo. 32Tana, hi ta nwisa tatana vhinyo, hi etlela na yena, hi hanyisa hakona rixaka ra tata wa hina.” 33Kutani va nwisa tata wa vona vhinyo hi vusiku lebyi, kutani lowa hosi a ya etlela ni tata wa yena; kambe yena a nga tivanga nchumu ni loko a ya etlela ni loko a pfuka.

34Kuteloko ri xa, lowa hosi a byela ndzisana a ku: “Waswivo, ndzi etlele tolo na tatana, a hi n'wi nwiseni kambe ni vusiku lebyi, u ya etlela na yena; sweswo hi ta hanyisa rixaka ra tata wa hina.” 35Va nwisa tata wa vona vhinyo na byona vusiku lebyi, kutani lowa ndzisana a pfuka a ya etlela na yena; kambe yena a nga tivanga loko a ta etlela ni loko a pfuka. 36Vanhwana lavambirhi va Lota va xurha tinyimba hi tata wa vona. 37Kutani lowa hosi a veleka n'wana wa wanuna, a n'wi thya vito ra Mowabu (hileswaku mbewu ya tatana); hi yena a nga tata wa Vamowabu ku fikela namuntlha. 38Lowa ndzisana na yena a veleka n'wana wa wanuna, a n'wi thya vito ra Benami, (hileswaku n'wana wa tiko ranga); hi yena tata wa Vaamoni ku fikela namuntlha.

Currently Selected:

GENESA 19: TSO29

Highlight

Copy