GENESA 10

Tinxaka ta vana va Nowa.

1Vatukulu va vana va Nowa hi volavo: Xeme, na Hamu, na Yafeta; kutani va kume vana va vavanuna endzhaku ka ndhambi.

2Vana va Yafeta: Gomere, Magogo, Madayi, Yavhani, Tubala, Mexeke na Tirasi. 3Vana va Gomere: Axikenazi, Rifata na Togarima. 4Vana va Yavhani: Elixa na Tarxixi, Kipra na Rhoda. 5Ku hambanyisiwe xikarhi ka volavo swihlale swa matiko hi matiko ya vona, un'wana ni un'wana hi ririmi ra yena, ni tinyimba ta vona, ematikweni ya vona.

6Vana va Hamu: Kuxi, Egipta, Putu na Kanana. 7Vana va Kuxi: Seba, Havhila, Sabita, Rhama, Sabiteka. Vana va Rhama: Xeba na Dedani. 8Kuxi a veleka Nimrodo; hi yena loyi a sunguleke ku va ni matimba emisaveni. 9A xi ri xihloti xa matimba emahlweni ka Yehovha; hikwalaho-ke va nga te: “Kukotisa Nimrodo, xihloti xa matimba emahlweni ka Yehovha.” 10Masungulo ya ku fuma ka yena a ri Babele na Ereke na Akade na Kaline, etikweni ra Xinara. 11Kuteloko a suke etikweni lero, a ya Asiriya, a aka eNinivha na Rehoboto-Ira na Kala, 12na Resene, exikarhi ka Ninivha, na Kala; hi wona muti lowukulu.

13Mitsrayimi a veleka Valudu, na Vaanamu, na Valehaba, na Vanafetuhi, 14na Vapatroso, na Vakasiluhi, (hi vona ku nga humelela Vafilista eka vona), na Vakafitoro.

15Kanana a veleka Sidoni, lowa mativula, na Heti, 16na Vayebusi na Vaamori na Vagirigaxi, 17na Vahivhi na Vaariki na Vasini, 18na Vaarivhada na Vasemari na Vahamata; endzhaku, tinyimba ta Vakanana ti hangalaka. 19Kutani maavana ya Vakanana ma suka eSidoni ku ya fika eGerara na Gaza, ni hitlhelo ra Sodoma na Gomora, na Adama na Seboyimi, ku fika eLaxa. 20Hi vona vana va Hamu hi tinyimba ta vona ni tindzimi ta vona, emaavaneni ni le matikweni ya vona.

21Ku velekiwe vana ni le ka Xeme, a nga tata wa vana hinkwavo va Ebere, ni makwa wa Yafeta lowa mativula. 22Vana va Xeme: Elamu, Axuru, Aripakixada, Ludu, Aramu. 23Vana va Aramu: Usi, Hulu, Getere na Maxa. 24Aripakixada a veleka Xela, Xela a veleka Ebere. 25Eka Ebere, ku velekiwe vana vambirhi; vito ra un'wana a a ri Pelege, hikuva enkarhini wa yena, misava yi avanyisiwile, vito ra makwavo a a ri Yokotani. 26Yokotani a veleka Alimodada, Xelefi, Hasari-Mavheti, Yera, 27Hadorama, Uzala, Dikila, 28Obala, Abimaele, Xeba, 29Ofira, Havhila na Yobabu; volavo hinkwavo a va ri vana va Yokotani. 30A va akile entshaveni ya Vuxa ku suka eMexa, tlhelo ra Sefara. 31Hi vona vana va Xeme hi tinyimba ta vona, ni tindzimi ta vona, ni maavana ya vona, ni matiko ya vona.

32Hi tona tinyimba ta vana va Nowa, hi tinxaka ta vona, ematikweni ya vona; matiko lama hangalakeke emisaveni endzhaku ka ndhambi, ya humile eka vona.

Currently Selected:

GENESA 10: TSO29

Highlight

Copy