EZRA 8
8
Lava yeke na Ezra.
1Hi leti tihosana ta tindlu ta vatata wa vona, ni mavito ya tinyimba leti nga huma eBabilona na mina, enkarhini wa hosi Ataserkisi: 2Eka vana va Finiyasi, Gerixomu; eka vana va Itamara, Daniele; eka vana va Davhida, Hatuxi; 3eka vana va Xekaniya eka vana va Paroxi Zakariya; ku tsariwile na yena vavanuna va 150. 4Eka vana va Pahata-Mowabu, Eli-Howenayi, n'wana Zerahiya, a ri ni vavanuna va 200; 5eka vana va Xekaniya, n'wana Yahaziele, a ri ni vavanuna va 300, 6eka vana va Adina, Ebede, n'wana Yonatani, a ri ni vavanuna va 50; 7eka vana va Elamu, Yexaya, n'wana Ataliya, a ri ni vavanuna va 70; 8eka vana va Xefatiya, Zebadiya, n'wana Mikaele, a ri ni vavanuna va 80; 9eka vana va Yowabu, Obadiya, n'wana Yehiele, a ri ni vavanuna va 218; 10eka vana va Xelomiti, Beni-Yosifiya, a ri ni vavanuna va 160; 11eka vana va Bebayi, Zakariya, n'wana Bebayi, a ri ni vavanuna va 28; 12eka vana va Azigadi, Yohanani, n'wana Hakatani, a ri ni vavanuna va 110; 13eka vana va Adonikama, va nga vo hetelela, hi lawa mavito ya vona: Elifelete na Yuwele, na Xemaya, va ri ni vavanuna va 60; 14eka vana va Bigivhayi, Utayi na Zabudu, va ri ni vavanuna va 70.
15Ndzi va hlengeleta enambyeni lowu khulukelaka eAhavha, kutani hi gova kona masiku manharhu. Kuteloko ndzi kamberile tiko ni vaprista, ndzi nga kumi na un'we wa vana va Levhi; 16ndzi rhuma vanhu ku ya vita Eliezere, na Ariele, na Xemaya, na Elinatani na Yaribi, na Elinatani, na Natani na Zakariya, na Mexulama, ti nga tihosana na Yoyaribi, na Elinatani, vavanuna va ku anakanya; 17ndzi va lerisa ematshan'weni ya Ido, hosana ya tikonyana ra Kasifiya, ndzi va nyika timhaka leti va nga ta byela Ido makwavo wa vona, ni Vanetinimi lava akeke etikwanyaneni ra Kasifiya, ndzi ku: “A va nehe vanhu ku ta khoma ntirho wa yindlu ya Xikwembu xa hina.” 18Hilaha voko ra vunene ra Xikwembu xa hina ingi ri ri eka hina hakona, va hi nehela wanuna wa miehleketo wa vana va Maheli, n'wana wa Levhi, n'wana Israele, a nga Xerebiya ni vana va yena, ni vamakwavo, va ri 18; 19un'wanyana i Haxabiya, na Yexaya, wa vana va Merari, ni vamakwavo, ni vana va vona, va ri 20; 20ku ta ni Vanetinimi va 220, va hlawuriwa hinkwavo hi mavito, va nga Vanetinimi lava Davhida ni tihosana ingi va va nyikile ku tirhela Valevhi.
21Loko ha ha ri enambyeni wa Ahavha, ndzi vula siku ra ku titsona swakudya, hi ta titsongahata emahlweni ka Xikwembu xa hina, leswaku hi tikombelela eka xona riendzo lerinene ra hina, ni ra vana va hina ni ra swilo hinkwaswo swa hina. 22Hikuva a ndzi ri ni tingana ku kombela vandla ra tinhenha, ni vakhandziyi va tihanci eka hosi, leswaku va hi lwela eka valala endleleni, hikuva a hi byerile hosi, hi ku: “Voko ra Xikwembu xa hina ri yimela hinkwavo lava xi lavaka, kasi matimba ni vukari bya xona byi lwa ni hinkwavo lava xi fularhelaka.” 23Hi titsona swakudya sweswo, hi lava ku pfuniwa hi Xikwembu xa hina hikwalaho ka mhaka leyi, kutani xi hi yingisa.
24Kavaloko ndzi hlawula tihosana ta vaprista ta khume na timbirhi, a nga Xerebiya, na Haxabiya, ni vamakwavo va vona va khume. 25Ndzi va pimela ku tika ka silivhere ni nsuku, ni swigotso swa nhlengo lowu humeseriweke yindlu ya Xikwembu xa hina hi hosi ni tindhuna ta huvo, ni tihosana ta yena, ni Vaisraele hinkwavo lava ngi va ri kona. 26Ndzi pima, ndzi va nyika titalenta ta silivhere ta 650, ni swibya swa silivhere leswi endlaka titalenta ta dzana, ni titalenta ta nsuku ta dzana; 27ni mindzheko ya makume mambirhi ya nsuku, ya nxavo wa tidarika ta khume ra madzana, ni timbita timbirhi ta koporo leto saseka, leto vangama kukotisa nsuku, leti ngi i nsuku hi nxavo; ndzi ku eka vona: 28“Mi hlawuleriwe Yehovha, timbita na tona ti hlawulekile loko yi ri silivhere ni nsuku, swilo leswi humeseriwaka Yehovha, Xikwembu xa vatata wa n'wina, hi ku rhandza. 29Hanyanyani, mi swi hlayisa ku fikela siku mi nga ta pima ku tika ka swona emahlweni ka vakulukumba va vaprista, ni Valevhi, ni tihosana ta tinyimba ta vatatana va Vaisraele eYerusalema, evuhlayiselweni bya yindlu ya Yehovha.” 30Sweswo, vaprista ni Valevhi va amukela silivhere ni nsuku, ni swigotso swin'wana hi ku tika ka swona, leswaku va swi heleketa eYerusalema, endlwini ya Xikwembu xa hina.
31Hi sukile enambyeni wa Ahavha, siku ra khume na mambirhi ra n'hweti yo rhanga hi kongoma eYerusalema; voko ra Xikwembu xa hina a ri ri na hina, xi hi lamulela emavokweni ya valala, ni lava tumbeleke etindleleni, 32hi kondza hi fika eYerusalema, kutani hi wisa kona masiku manharhu. 33Hi ra vumune, hi pima ku tika ka silivhere, ni nsuku, ni swigotso hi ri endlwini ya Xikwembu xa hina hi swi veka emavokweni ya muprista Meremoto, n'wana Uriya, a ri na Eliyazara, n'wana Finiyasi, na Yozabadi, n'wana Yexuwa, na Nowadiya, n'wana Binuyi, va ri Valevhi, 34hi ntsengo ni ku tika ka swona hinkwaswo; ku tika ka swona hinkwaswo, ku tsariwa kona enkarhini wolowo.
35Kutani va le ku bohiweni lava tlheleke va humesela Xikwembu xa Israele tiholokosta; ku tlhaveriwa Vaisraele hinkwavo tinkunzi ta khume na timbirhi, ni makhuna ya 96, ni swinyimpfana swa 77; ni swiphongo swa 12 swa magandzelo ya swidyoho hinkwaswo leswi swi tlhaveriwa Yehovha hi mukhuva wa ku hisa. 36Kambe va nyika tindhuna ta hosi ni vafumi va hase ka nambu, ku lerisa ka hosi, kutani valavo va yimela tiko ni yindlu ya Xikwembu.
Currently Selected:
EZRA 8: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
