EKSODA 1
1
Ta ku vaviseka ka vana va Israele eEgipta.
1Hi wona mavito ya vana va Israele lava yeke Egipta na Yakobo va ya un'wana ni un'wana ni va yindlu ya yena: 2Rhuveni, na Simiyoni, na Levhi, na Yuda, 3na Isakara, na Zebuloni, na Benjamini, 4na Dani, na Neftali, na Gadi, na Asere. 5Vanhu hinkwavo va yindlu ya Yakobo a va ri 70. Yosefa a a tshamile Egipta.
6Kutani Yosefa a fa ni vamakwavo hinkwavo, ni ntangha yoleyo hinkwayo. 7Kutani vana va Israele va engeteleka, va andza, va tala ngopfu, va kuma matimba, va tata tiko ra Egipta.
8Kambe ku humelela eEgipta hosi leyintshwa, leyi nga tivangiki Yosefa. 9Yi ku eka tiko ra yona: “Langutani rixaka ra vana va Israele, ri hi tlula hi ku tala ni matimba. 10A hi va endleni hi mano, leswaku va nga andzi ngopfu; va nga tshuki, loko ku humelela muvango, va hlangana ni valala va hina, va lwa na hina, kutani va suka etikweni leri.” 11Kutani ku vekiwa valanguteri ehenhla ka vona va ta va karhata hi mitirho yo vavisa. Hi mukhuva wolowo va akela Faro miti ya switlati ya Pitomu na Ramsese. 12Kambe, loko va xanisiwa sweswo, hi loko va andza ngopfu, va tala. Kutani vana va Israele va vengiwa hakona. 13Kutani Vaegipta va tirhisa vana va Israele hi vukhumbi; 14va vavisa ku hanya ka vona hi mitirho leyo tika ya switina, ni mitirho hinkwayo ya masimu; ntirho hinkwawo lowu, va va tirhisa hi ku va xanisa.
15Kutani hosi ya Egipta yi byela masungakati ya Vaheveru (vito ra un'wana a a ri Xifira, ni ra un'wana, Puwa), yi ku: 16“Loko mi tshamela vasati va Vaheveru, loko mi va vona va veleka, loko n'wana a ri wa wanuna, mi n'wi dlaya; kambe loko a ri wanhwanyana, n'wi tshikeni a hanya.” 17Kambe masungakati ma chava Xikwembu; a ma endlanga hilaha hosi ya Egipta yi ma byeleke hakona; kambe ma ponisa vandzisanyana. 18Kambe hosi ya Egipta yi vitana masungakati, yi ku eka wona: “Mi endlele yini sweswo mi ponisa vandzisanyana?”
19Masungakati ma ku eka Faro: “Hi leswi vasati va Vaheveru va nga faniki na Vaegipta; va ni matimba, kutani loko sungakati ri fika eka vona, ri va kuma va velekile.” 20Kutani Xikwembu xi katekisa masungakati; tiko ri andza ri tala ngopfu. 21Kambe, hikuva masungakati ma chavile Xikwembu, Xikwembu xi katekisa tindlu ta vona. 22Kutani Faro a lerisa tiko ra yena hinkwaro, a ku: “Vandzisanyana hinkwavo lava nga ta velekiwa, va cukumeteni enambyeni; kambe vanhwanyana hinkwavo, mi va tshika va hanya.”
Currently Selected:
EKSODA 1: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
