TIMHAKA 4
4
Ta ku khotsiwa ni ku tshunxiwa ka Petro na Yohane.
1Loko va ha vulavula ni vanhu, ku fika vaprista eka vona, va ri ni ndhuna ya tempele ni Vasaduki; 2va holova etimbilwini, hi leswi Petro na Yohane va dyondzisaka vanhu, ni ku vula ku pfuka ka vafi ha Yesu. 3Kutani va va khoma, va va nghenisa ekhotsweni ri ko ri xa, hikuva a ma ri madyambu.
4Hambiswiritano, lavo tala va lava tweke rito, va pfumela: ntsengo wa vavanuna wu lava ku va ntlhanu wa makume ya madzana (5 000). 5Kambe siku leri tlhandlamaka, tihosi ta tiko, ni vakulukumba, ni vatsari va hlengeletana eYerusalema, 6va ri na Anasi muprista lonkulu, na Kayafasi, na Yohane, na Aleksandro, ni hinkwavo va rixaka ra vaprista lavakulu. 7Kuteloko va va yimisile exikarhi ka vona, va va vutisa, va ku: “Mi endlisile sweswo hi matimba wahi xana, kumbe hi vito rihi?”
8Kavaloko Petro a vulavula na vona a tele Moya lowo Kwetsima, a ku: “Tihosi ta tiko, na n'wina vakulu va Israele, 9leswi hi rhambiweke namuntlha hikwalaho ka mhaka leyinene leyi endliweke eka munhu lowa muvabyi, leswaku ku tiviwa hilaha a hanyisiweke hakona, 10tivani n'wina hinkwenu, ni hinkwavo va tiko ra Israele, leswaku munhu loyi a yimeke emahlweni ka n'wina, u hanyisiwile hi vito ra Yesu Kriste wa Nazareta la vambiweke hi n'wina, kambe Xikwembu xi n'wi pfuxile eku feni. 11Hi yena ribye leri cukumetiweke hi n'wina vaaki, kambe ri endliwile ribye lero sungula ra yinhla. 12Kutani a ku na ku hlayiseka ka un'wana, hikuva a ku na vito rimbe ehansi ka matilo, leri nyikiweke exikarhi ka vanhu, leri hi fanelaka ku hanyisiwa ha rona.”
13Kuteloko va vona ku tiya ka Petro na Yohane, kasi a va tiva leswaku i vanhu lava nga dyondzangiki, va ri vanhu ntsena, va hlamala; kambe va va tiva leswaku a va tshamile na Yesu. 14Kutani loko va vona munhu la hanyisiweke, a yimile na vona, va pfumala lexi va nga xi kanetaka. 15Kutani, kuteloko va va lerisile ku huma ehubyeni, va vutisana, va ku: “Vanhu lava, hi ta va endla yini? 16Hikuva i mhaka leyi tiviwaka hi vanhu hinkwavo lava akeke eYerusalema, leswaku mahlori ma endliwile hi vona; swa vonaka swinene, hi nga ka hi nga landzuri. 17Kambe leswaku timhaka leti, ti nga tshuki ti engeta ti hangalaka exikarhi ka vanhu, a hi va layeni hi ku va chavisa, leswaku va nga ha tshami va dyondzisa munhu, hambi a ri mani na mani, hi vito rero.” 18Kuteloko va va vitanile va va lerisa ngopfu, leswaku va nga tshuki va vulavula, hambi ku ri ku dyondzisa hi vito ra Yesu.
19Kambe Petro na Yohane va va hlamula, va ku: “A ku avanyise n'wina: xana swi lulamile emahlweni ka Xikwembu ku yingisa n'wina ku tlula Xikwembu xana? 20Hikuva, loko hi ri hina, hi nga ka hi nga tshiki ku vula leswi hi swi voneke ni leswi hi swi tweke.” 21Kutani va va tshunxa va ri karhi va va holovela, va nga voni hilaha va nga va baka hakona hikwalaho ka tiko, hikuva hinkwavo a va dzunisa Xikwembu hikwalaho ka leswi endliweke. 22Hikuva munhu loyi a nga hanyisiwa hi masingita walawo, a a ri wa malembe lama tlulaka mune wa makume.
Ta ku khensa ka kereke.
23Kuteloko va tshunxiwile va tlhelela eka varikwavo, kutani va va tivisa hinkwaswo leswi nga vuriwa hi vaprista lavakulu, ni vakulukumba va tiko. 24Volavo, loko va twile sweswo, va tlakusa marito ya vona eka Xikwembu hi mbilu yi ri yin'we va ku: “Hosi, hi wena Xikwembu lexi endleke tilo, ni misava, ni lwandle, ni hinkwaswo leswi nga eka swona; u vurile hi nomu wa Davhida, nandza wa wena u ku: 25‘Xana vamatiko va dzumadzumela yini, ni matiko ma kanelela yini timhaka ta hava? 26 Tihosi ta misava ti pfukile, ni tindhuna ti hlangene kun'we ku lwa ni Hosi, na Kriste wa yona.’ 27Hikuva kunene Heroda na Pontiyo Pilato, ni vamatiko, ni tinxaka ta Israele va hlangene kun'we emutini lowo, ku lwa na Yesu, nandza wa wena la hlawuriweke, loyi u nga n'wi tota, 28ku endla hinkwaswo leswi voko ra wena ni makungu ya wena ma swi leriseke eku sunguleni leswaku swi ta humelela. 29Kutani sweswi, Hosi, languta ku xungeta ka vona, u nyika malandza ya wena ku vula rito ra wena, va nga chavi nchumu; 30u tshambuluta voko ra wena leswaku ku ta endliwa ku hanyisiwa, ni swikombiso, ni masingita hi vito ra Yesu, nandza wa wena la hlawuriweke.”
31Kuteloko va khongerile, xivandla lexi va hlengeletaneke eka xona, xi tsekatseka, kutani hinkwavo va tala Moya lowo Kwetsima, kutani va vula rito ra Xikwembu hi ku tiya.
Ta ku tsandzana ka vapfumeri.
32Kambe vunyingi bya lava pfumeleke a yi ri mbilu yin'we ni moya wun'we ntsena; kutani a ku nga ri na munhu la nga vula leswaku swilo leswi a nga na swona, i swa yena swakwe kambe swilo hinkwaswo a va ku i swa vona hinkwavo. 33Vaapostola a va ri karhi va tiyisa hi matimba lamakulu vumbhoni bya ku pfuka ka Hosi Yesu, kutani ku kateka lokukulu a ku tshama ehenhla ka vona hinkwavo. 34Hikuva a ku nga ri na xisiwana exikarhi ka vona, hikuva hinkwavo lava ngi va ri ni masimu, kumbe tindlu, a va swi xavisa, kutani va tisa mali ya leswi xavisiweke, 35va yi veka emilengeni ya vaapostola, kutani va avela un'wana ni un'wana hilaha a pfumaleke hakona. 36Yena Yose, la nga thyiwa Barnaba hi vaapostola, hileswaku N'wana wa ku Chavelela, loyi ingi a ri Mulevhi la tswariweke eKipra, 37a a ri ni nsimu, kuteloko a yi xavisile, a tisa nxavo wa yona, a wu veka emilengeni ya vaapostola.
Currently Selected:
TIMHAKA 4: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
