2 VATESALONIKA 3
3
Ku khongelela Evhangeli.
1Loko swi ri tano, vamakwerhu, hi khongeleleni, leswaku rito ra Hosi ri tsutsuma, ri dzunisiwa hinkwako kukotisa eka rikwenu; 2ni leswaku hi lamuleriwa eka vanhu lavo homboloka ni lavo biha; hikuva ku pfumela a hi ka vanhu hinkwavo. 3Kambe Hosi ya tshembeka, hi yona leyi nga ta mi tiyisa ni ku mi sirhelela eka lowo biha. 4Kutani loko mi ri n'wina, hi ni ku tshemba ka Hosi leswaku mi endla swilo leswi hi mi lerisaka swona, ni leswaku ma ha ta swi endla. 5Hosi a yi yise timbilu ta n'wina erirhandzwini ra Xikwembu, ni le ku yimeleni ka Kriste hi ntiyiso.
Ku hambana ni lava nga fambiki hi ku lulama, ni ku tirha hi ku rhula.
6Ha mi khongotela, vamakwerhu, hi vito ra Yesu Kriste, Hosi ya hina, leswaku mi hambana ni makwenu wihi ni wihi la nga fambiki hi nawu ni ku dyondzisa loku a ku amukeleke eka hina. 7Hikuva ma swi tiva na n'wina, hilaha mi faneleke ku hi etisa hakona, hikuva a hi fambanga exikarhi ka n'wina hi mukhuva lowu arisiweke hi nawu; 8na swona, a hi dyangi vuswa bya munhu ntsena, kambe a hi tirha nhlekanhi ni vusiku hi ku nonon'hwa ni mikarhalo, leswaku hi nga tshuki hi tikerisa munhu exikarhi ka n'wina. 9Swi nga ri leswaku hi pfumarile timfanelo ta ku endlisa sweswo; kambe a ku ri ku mi endlela ntila ha hina, mi ta hi etisa. 10Hikuva kakuloko ha ha ri karikwenu, hi tshama hi mi byela, hi ku: Loko un'wana a ala ku tirha, ni ku dya, a nga tshuki a dya. 11Kasi hi twile leswaku van'wana va rikwenu va famba hi mikhuva leyi ariwaka hi nawu, va nga tirhi, kambe va nghena etimhakeni leti nga riki ta vona. 12Lavo tano hi va kombela, ni ku va khongotela hi Hosi ya hina, Yesu Kriste, leswaku va tirha hi ku rhula, va ta tiva ku dya swakudya leswi nga swa vona.
13Loko mi ri n'wina, vamakwerhu mi nga tshuki mi karhala ku endla leswinene. 14Kungakuloko un'wana a nga yingisi marito ya hina ya epistola yoleyi, n'wi hlawuleni, kutani mi nga hlangani na yena, a ta va ni tingana. 15Hambiswiritano, mi nga tshuki mi n'wi endla nala, kambe mi n'wi laya kukota makwenu.
Ku lela.
16Sweswi, hosi ya ku rhula, hi xiviri xa yona, a yi mi nyike ku tsaka hi masiku, ematlhelweni hinkwawo. Hosi a yi ve na n'wina hinkwenu.
17Mina Pawulo, ndza mi xeweta hi voko ra mina; hi xona xikombiso xa mina tiepistoleni ta mina hinkwato ndzi tsarisa sweswo.
18Tintswalo ta Yesu Kriste, Hosi ya hina, a ti ve na n'wina hinkwenu.
Currently Selected:
2 VATESALONIKA 3: TSO29
Highlight
Share
Copy
Want to have your highlights saved across all your devices? Sign up or sign in
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.