1 Corintios 5

Menda re uyuvanga vae uñeãa

1Jeta vae uicuaa quirãi penti pepɨte pe oĩ vae güɨreco ichɨ-raanga. Jocua uyuvanga menda re vae mbae pɨchɨ̃i ete vae uyapo. Echa'ã uicuaa'ã Tumpa vae reta umaeño'ã etei uyapo vaerã jucuarãi. 2Agüɨyeta tẽi piyembɨcate mbae re. Pemara eteta tẽi ma cua re. Pemombota tẽi pepɨte güi jocua cuimbae jucuarãi jeco vae. 3Echa'ã yepe tẽi che aĩ'ã co pepɨ, ẽrei jecuaeño chepɨa pe ayemɨngueta peré, jare aãa ma jocua cuimbae jucuarãi jeco vae. Jucuarãi aãata tẽi pepɨ aĩ yave. 4Piyembatɨ yave pembɨadora vaerã yandeYa Jesús, pemandúa quirãi che chepɨa pe ayemɨngueta aĩ peré jare quirãi yandeYa Jesús imbaepuere penoita co. 5Agüɨye pemaeño jocua cuimbae re uyembatɨ vaerã pe reta ndive. Jucuarãi imarata uyapo vae re, jare jecove uyembɨasacata yandeYa ou ye yave.

6Icavi'ã co piyembɨcate pico vaerã. Picuaa co jocua yae vae: “Mbovɨño levadura umbɨayasɨ opaete masa uñemona vae.” 7-8Yamɨjaanga judío reta pascua pe uyapo vae. Echa'ã judío reta omombo mbɨyape indechi vae levadura güɨnoi vae, jare fiesta uyapo yave jou mbɨyape ipɨau vae levadura güɨnoi mbae vae. Jae ramiño vi pe reta co jae mbɨyape ipɨau vae levadura mbaetɨ güɨnoi vae rami. Jáeramo agüɨye ma yayapo icavi mbae vae yayapose vae. Echa'ã Cristo uyeyucaca yanderé, pascua pe maemɨmba reta uyeyucaca uñemee vaerã Tumpa pe rami. Jáeramo jecuaeño yayapo icavi vae añete vae rupi.

9Che aicuatía peve ĩru tupapire, jare joco pe che poyocui agüɨye vaerã piñemɨĩru aguasa uyapo vae reta ndive. 10Poyocui'ã etei piyembɨyao vaerã opaete cua ɨvɨ pegua aguasa uyapo vae reta güi, jare ĩru vae reta imbaembae uipota vae reta güi, jare ĩru vae reta güi imbaembae upɨ̃ro vae reta güi, jare tumpa-raanga reta umbɨadora vae reta güi. Echa'ã jucuarãi piyapo yave, pepuereta'ã tẽi pico cua ɨvɨ pe. 11Ẽrei aicuatía co peve agüɨye vaerã piñemɨĩru penti upurugüɨrovia vae jei iyupe vae ndive aguasa uyapo yave, ani ĩru vae reta imbaembae uipota yave, ani tumpa-raanga reta umbɨadora yave, ani icavi mbae vae japicha reta cotɨ jei yave, ani jecuaeño usavɨpo yave, ani ĩru vae reta güi imbaembae upɨ̃ro yave. Agüɨye etei pecaru jocua nunga ndive. 12-13Echa'ã chepuere'ã etei aãa upurugüɨrovia mbae vae reta. Tumpa uãata co jocua reta. Ẽrei pe reta penoi mbaepuere peãa vaerã upurugüɨrovia vae reta. Jáeramo pembɨsɨrɨ pepɨte güi cuimbae jocua icavi mbae vae uyapo vae.

Currently Selected:

1 Corintios 5: gwn

Highlight

Copy