Ingoma Yetingoma 1
1
1Ingoma yetingoma yaSolomoni.
Ingoma yekucala
Makoti:
2Akangicabuze ngekwanga kwemlomo wakhe,
ngobe lutsandvo lwakho lumnandzi, kwendlula liwayini.
3Liyajabulisa liphunga lemakha akho;
libito lakho linjengemakha latfululwako.
Nguko nje tintfombi tikutsandza kangaka!
4Ngitsatse ngihambe nawe, asisheshise!
Inkhosi ayingingenise esigodlweni sayo.
Bangani:
Siyajabula sikutsakasele;
sitaludvumisa lutsandvo lwakho,
siludvumise kwendlula liwayini.
Makoti:
Kufanele kutsi bakutsandze.
5 Ngiluhlata, kodvwa ngiyatsandzeka,
awu, madvodzakati aseJerusalema,
ngiluhlata njengemathende aseKhedari;
yebo, njengetindvwangu temathende aSolomoni.
6 Ningangibukisisi ngobe ngiluhlata,
ngobe ngifuswe lilanga.
Emadvodzana amake angitfukutselela,
angenta ngalindza tivini,
sakami sivini ngasiyekelela.
7Ngitjele-ke, wena lengikutsandzako,
ngukuphi lapho udlisa khona umhlambi wakho,
nalapho tihlabulela khona timvu takho emini.
Kudzingeke ngani kutsi ngifanane nemfati
longaphansi kweveyili,
ngehle ngenyuka
ngasemihlambini yebangani bakho?
Umyeni:
8Nangabe awati,
wena mfati lomuhle kakhulu,
landzela etinyatselweni temhlambi wetimvu,
uyewudlisa khona emazinyane etimbuti
ngasemathendeni ebelusi.
9 Sitsandvwa sami, ngitakufananisa
nelihhashi lelisikati leliboshelwe
kulenye yetincola taFaro.
10Tihlatsi takho timomondziya nje nase tinemacici,
nentsamo yakho nase yegatjiswe ingcibo.
11Sitakwentela emacici egolide
lahlotjiswe ngesiliva.
Makoti:
12Kwatsi inkhosi isesetafuleni layo,
emakha ami ayitsela ngeliphunga lelimnandzi.
13Longitsandzako unjengemgodla wemakha emure kimi,
lolele emkhatsini wemabele ami.
14Lotsandzekako wami, usicheke setimbali tehena kimi,
letivela etivinini tase-Eni Gedi.
Umyeni:
15 Maye, umuhle, sitsandvwa sami bo!
Awu, maye, mahle emehlo akho!
Kimi angematuba.
Makoti:
16Maye, umuhle, sitsandvwa sami bo!
Awu, maye, kona uyakhanga!
Yebo, nembhedze wetfu utsite klaba!
Umyeni:
17Emakabha endlu yetfu angimisedari;
imishayo yetfu ingimisayiphuresi.
Currently Selected:
Ingoma Yetingoma 1: SWT
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.
