Revelation 4

John ndo yakꞌuz ꞌilho dati ꞌudun diztan whunilhꞌen

1ꞋEt hukwꞌelhꞌaz whunusꞌen ꞌinkꞌez ndo yakꞌuz ꞌilho dati ꞌudun diztan whutísꞌen. ꞋEt ꞌudechoo yatilhduk-i duzústsꞌai, ꞌantsꞌi be tsꞌujih be yálhduk leꞌ ꞌutni. “Ndiz stsꞌu dugha inyaih, ꞌinkꞌez ꞌandit hukwꞌelhꞌaz daóotanelh-un whúnyuntistun,” sulhni. 2ꞋEt ꞌaho Ndoni bulh sulh wheóodande léꞌusja. ꞋInkꞌez yakꞌuz kwꞌutsꞌuzda cho diztiꞌ-i ꞌusꞌai ꞌi kꞌut ꞌilhoghun yukꞌusda, ꞌet whutísꞌen. 3ꞋInkꞌez nyoon hukwusda-un ꞌantsꞌi tse duníztiꞌ-i, jasper huyulhni, ꞌinkꞌez carnelian tse cha, ꞌet ndoútꞌen. ꞋInkꞌez ndi kwꞌutsꞌuzda cho diztiꞌ-i, ꞌi ditni nayúgus-i, ꞌi oonayuztꞌi, ꞌantsꞌi tse emerald huyulhni ꞌi ndoútꞌen. 4Ndi kwꞌutsꞌuzda cho diztiꞌ-i oonat nat whunizyai ꞌon ꞌat dunghi kwꞌutsꞌuzda cho diztiꞌ-i, ꞌi oonaidilhya. ꞋInkꞌez ndi kwꞌutsꞌuzda cho diztiꞌ-i nat whunizyai ꞌon ꞌat dine útso whudilhdzulhne hikꞌu dilhtsꞌi. Naih ꞌulhyul-i be dune hinli. Gold naniztsꞌun-i butsi kꞌéyuzdla. 5Ditni oolhges, ditni cha, ꞌinkꞌez lhai yaduk-i cha ndi kwꞌutsꞌuzda cho diztiꞌ-i ootsꞌu haídukat. ꞋInkꞌez ndi kwꞌutsꞌuzda cho diztiꞌ-i oobut lhtakꞌantꞌi be hootꞌen-i dizkꞌun. ꞋI ndi lhtakꞌantꞌi Yakꞌusda oonududeh-i, ꞌi ꞌuntꞌoh. 6ꞋEt ndi kwꞌutsꞌuzda cho diztiꞌ-i oobut ꞌet bunghun whucho dizghel kꞌet too ꞌantsꞌi khe leꞌ ꞌuntꞌoh, ꞌet whuzꞌai leꞌ hoontꞌoh. Lhum dantꞌoh la ookiúntꞌen ꞌet ndó hotꞌen. Ndi kwꞌutsꞌuzda cho diztiꞌ-i ookꞌut cha ꞌinkꞌez oonat cha dunghi hoonliyaz ꞌusjiz-i, ꞌuna za unli, bubut tsꞌe cha ꞌinkꞌez butꞌa tsꞌe cha ꞌuna bughu nizdla.

7ꞋUdechoo ꞌusjiz-i, ꞌi khuna-iti, lion, doútꞌen. Bulh nanki ꞌusjiz-i, ꞌi musdoosyaz doútꞌen. Bulh ta-i ꞌusjiz-i, ꞌi dune kꞌunꞌa oonin hoonli. Bulh dunghi ꞌusjiz-i, ꞌi ꞌantsꞌi tsibalyan utꞌoh-i leꞌ ꞌuntꞌoh. 8ꞋI nyoo dunghi ꞌusjiz-i, ꞌilho whe lhkꞌuta ye nutꞌo-i ooghu yuzdla. ꞋInkꞌez ndulcho whe ꞌuna za unli ooyo tsꞌe cha. ꞋAw ꞌulhdzis ꞌinkꞌez dzenis ibulh nalhuhulhyiz whe njan duhútni,

“Lubeshi ooghu hooloh-un,

lubeshi ooghu hooloh-un,

Yakꞌusda neMoodihti,

ꞌen tsꞌiyaitsuk anus ulhtus-un ꞌuntꞌoh.

Mbe ꞌantꞌeꞌ-un, ꞌinkꞌez ꞌuntꞌoh-un,

ꞌinkꞌez whusatiyalh-un,” hutni.

9Ndun ꞌilhiz ꞌinkꞌez ꞌilhiz wheni khuna-un, kwꞌutsꞌuzda cho diztiꞌ-i usda-un, ꞌen ndowhi hoonliyaz ꞌusjiz-i, soo cho neꞌhiduniꞌ, ꞌinkꞌez hidilhtiꞌ, ꞌinkꞌez nenachailꞌen huyúlhni totsuk, 10ꞌet ndunne nat whunizyane ꞌon ꞌat dine dune ꞌutso whudilhdzulhne, mbe kwꞌutsꞌuzda cho diztiꞌ-i kꞌut usda-un, ꞌilhiz ꞌinkꞌez ꞌilhiz wheni khuna-un, ꞌen hibut nacháhunuldulh, hitsꞌu téniꞌ hunilhdzun chaꞌ hutꞌen. ꞋInkꞌez butsi kꞌéyuzdla-i hibut nehíninla, ꞌinkꞌez ꞌuhutni,

11“O neMoodihti ntsꞌu ha ꞌánduz, díntiꞌ, ꞌinkꞌez ilhtus cha ꞌintꞌoh. ꞋI tsꞌiyawh ꞌet ndun tsꞌídoniꞌ huba soo ꞌíldzooꞌ, tsꞌiyaitsuk ꞌinla ꞌet huwa. Nyun ꞌinla ꞌet huwa ꞌuntꞌoh, ꞌet whuz unꞌa hukwaꞌ ninzun.”

Currently Selected:

Revelation 4: crx

Highlight

Copy