Revelation 3
3
Keyoh Sardis dune Yakꞌusda ba ꞌilhunaoodulhne, lhane dune ꞌuhutni, khahna whe ꞌahtꞌoh hutni, ꞌet hoontsꞌi yaidlane ꞌahli whe ꞌahtꞌoh, sba budóniꞌ
1“ꞋEt keyoh Sardis dune Yakꞌusda ba ꞌilhunaoodulhne bulizas, ꞌen ootsꞌó kꞌeinges. Njan ndudini:
Mbe Yakꞌusda lhtakꞌantꞌi ndudeh-i ꞌinkꞌez lhtakꞌantꞌi sum cha nule-un, ꞌen ꞌutni:
Nohꞌeꞌutꞌen kꞌoh tꞌeoonúszun. Tꞌeoonuszun nohooziꞌ hooni, khahna hutni, ꞌet hoontsꞌi yaidlane ꞌahli whe ꞌahtꞌoh.
2Yakꞌusda ba nohꞌeꞌutꞌen ꞌaw soo lheꞌildzooꞌ, ꞌet nawhusꞌai. ꞋEt huwa soo cho huwahli! Whulohkhi ꞌutꞌen unzoo-i nohbulh ꞌuntꞌoh, ꞌawet nilhdukw whe gak tileh. ꞋInka ꞌutꞌen unzoo-i cha ꞌon nus ulhtus ꞌulhtsi.
3ꞋEt huwa whunalhnih ntsꞌenꞌa la ndi khuni dáhtsꞌo ꞌinkꞌez úlhchoot. Soo cho oohtun ꞌinkꞌez lhtꞌananoohdilh! ꞋEt ꞌaw huwu lháhloh de, soo ꞌundunutꞌih-un kꞌunꞌa nohgha óontazꞌilh. ꞋInkꞌez ntsꞌowhúya ꞌuhunitꞌoh-un nohtsꞌun tísyalh ꞌaw tꞌewhuntuzáhzin.
4Whulohne nyulh ꞌuntꞌohne Sardis whutꞌenne, whulohneyaz, ꞌenne ꞌaw dunaih lhuhudílhtsun. ꞋEnne ꞌulhyul-i be hudilhtsꞌi whe sulh nótidulh. ꞋEt huba sooꞌ huldzooꞌ ꞌet huwa.
5Mbene la ꞌutꞌen untsiꞌ-i chꞌaꞌ ꞌulhdehne, naih ꞌulhyul-i be húdutaltsꞌilh. Ndi ꞌilhiz tsꞌukhuna-i be ꞌudustlꞌus kꞌut, ꞌaw bubooziꞌ ꞌukꞌu natoosges ꞌaitꞌoh. SBá ꞌinkꞌez oolizas bulh ꞌenne bubut ꞌenne schꞌeꞌne hinli budutásnelh.
6Mbe ꞌuditsꞌone, Ndoni Yakꞌusda ba ꞌilhunaoodulhne, dája ꞌubulhni, ꞌen huyoozólhtsꞌai.”
Keyoh Philadelphia dune Yakꞌusda ba ꞌilhunaoodulhne, dzoh nusahde-un soo whulh nudalhyaꞌ, sba budóniꞌ
7“ꞋEt keyoh Philadelphia dune Yakꞌusda ba ꞌilhunaoodulhne bulizas, ꞌen ootsꞌó kꞌeinges. Njan ndudini:
Ndun lubeshi ooghu hooloh-un, tsꞌihꞌun ꞌuntꞌoh-un cha, ꞌinkꞌez lerwe David oolugli naꞌa-un. Ndun dáhaꞌ daꞌaih-un, ꞌaw dune danaꞌ doꞌalh ꞌaitꞌoh. ꞋInkꞌez dánaꞌ diꞌaih-un ꞌaw dune daha naꞌdooꞌalh ꞌaitꞌoh. ꞋEn ꞌutni:
8Nohꞌeꞌutꞌen tꞌenuszun. Whunulhꞌen dati ꞌudun ꞌudiztan-un nohbut neóonusꞌai. ꞋInkꞌez ꞌaw dune dánaꞌ dotan ꞌaitꞌoh. Be ulhtus-i ntsool-iyaz ahtꞌi, sghuni cha oohtun, ꞌinkꞌez sooziꞌ ꞌaw ootsꞌu lhoodáhdlai ꞌet huwa.
9Soo zulhtsꞌai, nyoonne Satan oolugliz whutꞌenne, ꞌenne lizwif hinli hutni ꞌet hoontsꞌi huwhutsꞌit wheꞌ hutni, ꞌaw lizwif lhuhiloh. ꞋAw nawh lheꞌhootꞌoh, nohghu bunúsdla ꞌinkꞌez nohbut teniꞌ hunilhdzun ubutiselh. ꞋEt huwa tꞌehonózin nohkꞌesiꞌ inleꞌ.
10Nohdásniꞌ dzoh nusahde-un soo whulh nudalhyaꞌ. Whuz unꞌa skꞌuneꞌ zahtꞌen. ꞋEt huwa ndi yun kꞌut ndulcho whe dune dzoh nutidoh-un whusaóotiltsꞌulh ubootálhdzih ha. ꞋEt whutso whuchꞌa nanohtásdlelh.
11Soo zúlhtsꞌai, khuntsul ꞌutisnelh whusatísyalh. Tsꞌihꞌun ꞌahtꞌoh-un soo cho hoohtun. ꞋEt de whuchꞌaꞌ whunílhde-un hukwꞌelha ꞌahtꞌen-un ꞌaw ꞌuyoonne nohgho hólhchoot ꞌaitꞌoh.
12Mbene la ndi ꞌutꞌen untsiꞌ-i chꞌaꞌ ꞌulhdehne, nduntꞌohne sYakꞌusda oolugliz whucho whutꞌah nainꞌa-i ubutiselh. ꞋInkꞌez ꞌaw tenálhotisdulh. SYakꞌusda booziꞌ, ꞌi bukꞌeyítasgus. ꞋInkꞌez sYakꞌusda ookeyoh whuti-un ooziꞌ, ꞌandit-un Jerusalem huwhutni, ꞌi cha bukꞌeyítasgus. Yakꞌuz tsꞌe sYakꞌusda ootsꞌu ha ootiltsꞌulh. ꞋInkꞌez ꞌandit-i sooziꞌ, ꞌi cha bukꞌeyítasgus.
13Mbe ꞌuditsꞌone, Ndoni Yakꞌusda ba ꞌilhunaoodulhne, dája ꞌubulhni, ꞌen huyoozólhtsꞌai.”
Keyoh Laodicea dune Yakꞌusda ba ꞌilhunaoodulhne, whulohne sghuni ꞌantsꞌi nohba ꞌuntꞌoh, sba budóniꞌ
14“ꞋEt keyoh Laodicea dune Yakꞌusda ba ꞌilhunaoodulhne bulizas, ꞌen ootsꞌó kꞌeinges. Njan ndudini:
Mbe la ndó honeh-un, ꞌinkꞌez oonalh ꞌúwhutꞌen-un cha, ꞌinkꞌez ootꞌa niuznintan-un cha ꞌinkꞌez tsꞌihꞌun unꞌa ꞌuntꞌoh-un cha. Ndi Yakꞌusda ꞌuyinla-i ꞌen ꞌudechoo whéꞌ whudilhꞌen-un ꞌuntꞌoh, ꞌen ꞌutni:
15Nohꞌeꞌutꞌen kꞌoh tsꞌiyawh tꞌeoonúszun. Ntsꞌenꞌa Yakꞌusda ba ꞌahtꞌen-un, ꞌaw tube cha lhnáhkꞌuz ꞌinkꞌez ꞌaw tube cha lhnúlhwus, soo cho náhkꞌuz kꞌus nulhwus ꞌet daꞌ nohba hukwaꞌ nooszin ooleꞌ.
16ꞋAw lhnáhkꞌuz cha ꞌahtꞌoh ꞌinkꞌez ꞌaw lhnúlhwus cha ꞌahtꞌoh. Nulhwusyaz leꞌ ꞌahtꞌoh. ꞋEt huwa sze whe nꞌun nohtisdzoh.
17Lheꞌdahni, ‘Hoonzooꞌ tsꞌintꞌoh ꞌon nus cha hoonzoo tsꞌuja. ꞋAw ꞌuyoo hoonliyaz ka lheꞌuznízun,’ dahni. ꞋEt dahitꞌoh dalhtsiꞌ la tsꞌiyantsuk nohba nekꞌeꞌ hootꞌoh cha ꞌahtꞌoh. Teilhꞌen cha ꞌahtꞌoh. Whuzihꞌen cha ꞌahtꞌoh, ꞌinkꞌez ꞌustꞌet ꞌahtꞌoh.
18Ndai gold kwun be ꞌon nus ꞌuldzooꞌ suliꞌ-i, ꞌi si stsꞌun óohket nohdusni. ꞋEt de la hoonzoo oohtꞌeꞌ. ꞋInkꞌez naih ꞌulhyul-i, ꞌi cha stsꞌun óohket. ꞋEt de la ꞌet dune oohleꞌ, ꞌinkꞌez nohye ꞌustꞌet ꞌahli-un cha la hukwa yálhuzoohleꞌ. Na yoo, ꞌi na kꞌet dúlhye, ꞌet de la soo hóohꞌen.
19Mbene la kꞌeke kꞌunꞌa bukꞌesiꞌne, ꞌenne tsꞌiyawh khuni ulhtus-i be bubulh yasduk ꞌinkꞌez tsꞌihꞌun unꞌa nenábusdlih. ꞋEt huwa nohdzi ulhtus cho ulhꞌi ꞌinkꞌez noheni náhandunoohlelh.
20Soo zulhtsꞌai, dati susyin ꞌinkꞌez dati dunuzkwꞌuz. Mbe suditsꞌo-un ꞌinkꞌez sba dáhaꞌ dantan-un, ooghu datisyalh ꞌinkꞌez bulh naꞌtistꞌulh ꞌinkꞌez didut cha sulh naꞌtitꞌulh.
21Mbe la ndi ꞌutꞌen ntsiꞌ-i chꞌaꞌ ꞌulhdeh-un, skwꞌutsꞌuzda cho kꞌut szih tidalh-un oogha óotasꞌalh. Whuz unꞌa Si cha cha whuchꞌaꞌ nus de ꞌinkꞌez ꞌuBá ookwꞌutsꞌuzda cho diztiꞌ-i, ꞌi kꞌut oozih natlꞌa disdaꞌ.
22Mbe la ꞌuditsꞌone, Ndoni Yakꞌusda ba ꞌilhunaoodulhne, dája ꞌubulhni, ꞌen huyoozólhtsꞌaiꞌ.”
Currently Selected:
Revelation 3: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
