Philemon 1
1
Paul, Philemon hadih yúlhni
1Si Paul ꞌustꞌoh. Jesus Christ ba ꞌadusꞌai. Timothy neulhutsin, sulh ꞌuntꞌoh. Philemon nyun ntsꞌo kꞌetisgus. Neulhutsin, nkꞌetsꞌinsiꞌ. Nekꞌeke ꞌinkꞌez nebulh ꞌutꞌen-un inli.
2ꞋEt Apphia ꞌen cha ookꞌetsꞌinsiꞌ. ꞋInkꞌez Archippus neBá ba nebulh lhugan-un unli. ꞋInkꞌez nyoh Yakꞌusda ba ꞌilhunaoodulhne, ꞌenne tsꞌiyawh hadih butsꞌutni.
3Yakꞌusda neBá ꞌinkꞌez Jesus Christ neMoodihti, ꞌen ye unzoo-i ꞌinkꞌez nohdzi doghel-i nohbulh óotꞌeꞌ.
Jesus Christ mba ꞌalhaꞌ ꞌuntꞌoh ꞌinkꞌez ookꞌensiꞌ
4SYakꞌusda musi dusni. Tenadusdli totsuk nghu nuní nuszut. 5Whulh ꞌúdustsꞌo Jesus Christ mba ꞌalhaꞌ ꞌuntꞌoh ꞌinkꞌez ookꞌensiꞌ. ꞋInkꞌez Yakꞌusda oochꞌeꞌne, ꞌenne cha whuz unꞌa za bukꞌentsiꞌ. 6ꞋEt be mba ꞌalha ꞌuhoontꞌoh-i, ꞌi be óodutnih sih. ꞋEt whe Christ Jesus ꞌen gha ꞌutꞌen unzoo-i ooghá izanaꞌ-i, ꞌet la tꞌeoonoodzeh. 7Sulhutsin nyun ngha Yakꞌusda oochꞌeꞌne budzi donáꞌuja. ꞋEt be nékꞌetsꞌinsiꞌ-i ꞌintꞌi-i, ꞌi gha tube tsꞌuhóontꞌiꞌ ꞌinkꞌez sóo kꞌunuznutꞌah chaꞌ ꞌi gha tsꞌutꞌi.
Paul Onesimus ba tedidli
8ꞋEt huwa Christ ꞌen be lhoostoh whe ntsꞌo hukwaꞌ dusni-un ꞌoh tuneꞌ ꞌontꞌen. ꞋEt whuz unꞌa tsꞌihꞌun ꞌuhoontꞌoh. 9ꞋEt hoontsꞌi be nekꞌétsꞌinsiꞌ-i, ꞌi gha ntsꞌu tédusdli. Sunilhꞌen ntsꞌenꞌa dastꞌoh yoo ꞌun uzulh-un usdli. ꞋInkꞌez ꞌandit Jesus Christ ꞌen ba ꞌadusꞌai. 10Syeꞌ Onesimus ꞌen ba ntsꞌun tedusdli. ꞋEn ꞌuntꞌoh lhuztih tlꞌool be suzghel whe ooba ꞌalha ꞌuhoontꞌoh susi. 11Whutsꞌo daꞌ nyun ntsꞌun ꞌaw hoonli huba unzoo-un hooloh inleꞌ. ꞋEt ꞌandit nyun ꞌinkꞌez si sba cha unzoo suliꞌ.
12ꞋAndit ꞌen ntsꞌu whenasꞌaꞌ ꞌinkꞌez naóolhchoot. ꞋEt ꞌantsꞌi sichꞌoh sdzi ilhchoot leꞌ tanelh. 13Njan szih tidalh hukwaꞌ nuszun inleꞌ, njan khuni unzoo-i gha suzghel. ꞋEt daꞌ nyun ngha snat neꞌóotꞌen ooleꞌ daꞌ. 14ꞋEt hoontsꞌi nyun, “Aꞌa,” lhduzinih de za, ꞌaw hoonli ꞌuwhutislelh-un hukwa lheꞌnuszun. ꞋEt whuz unꞌa nyunchꞌoh hooníntꞌiꞌ de za. 15ꞋEt huwa tilah ꞌatsulyaz nghu whinya inleꞌ. ꞋEt de ꞌilhiz wheni naóolhchoot de, ꞌilhiz la nzih oodaꞌ, 16ꞌaw ꞌon ꞌun nye ꞌulhna lhtisdle. ꞋEt ꞌandit ꞌulhna unli-un whanus ꞌuntꞌoh. Neulhutsin ookwꞌetsꞌinsiꞌ-un unli. Si tube sba díztiꞌ ꞌet hoontsꞌi dalcho-i be suba nyun ꞌon nus mba díztiꞌ. ꞋEt náwhultꞌoh, ndi yun kꞌut huba cha ꞌinkꞌez neMoodihti ba cha.
Si skꞌunꞌa nailhchoot
17Si nyulh ꞌústꞌen suninzun de, si nasilhchoot hukwꞌunꞌa nailhchoot. 18ꞋEt ndun hoonliyaz whe ntsꞌu níntaꞌ ꞌantꞌen de, kꞌus ntsꞌu whulhꞌai de, si sba ꞌukꞌehoonges. 19Si, Paul, sichꞌoh sla be ntsꞌo kꞌeꞌusges. Si la ookꞌelha hooselh. ꞋEt hoontsꞌi hoonliyaz mba whunatizni, nyunchꞌoh be khina-i, ꞌi be hoontsꞌi ntsꞌún whuzusꞌai leꞌ hoontꞌoh. 20A, sulhutsin neMoodihti be nyun ngha ꞌon nus hoonzoo-un ntsꞌun hukwaꞌ nuszun. Ntsꞌenꞌa la syo tsꞌe whedúsni, ꞌet neMoodihti be sdzi donaꞌ ꞌinleh. 21Ntsꞌó kꞌesges-i, ookꞌunꞌa ꞌutanelh-un sba ꞌalha ꞌuhoontꞌoh. Daja dusni-un, ꞌi be ꞌon nus ꞌutantꞌelh nuszun.
22ꞋEt hoontsꞌi tisdálh-un sba lhaóodonleh. Nohtenadudli gha la ꞌet ndó honeh. ꞋInkꞌez la ntsꞌun sla nahudootnih.
Ye unzoo-i nyulh óotꞌeꞌ
23Epaphras, Jesus Christ gha sulh ꞌadinꞌai-un, ꞌen cha hadih nyulhni. 24Mark, Aristarchus, Demas, ꞌinkꞌez Luke cha, sulh ꞌutꞌenne, ꞌenne tsꞌiyawh hadih nyuhutni.
25NeMoodihti Jesus Christ ꞌen ye unzoo-i nyughi bulh óotꞌeꞌ. ꞋEt ndo honeh.
Currently Selected:
Philemon 1: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
