Mark 7

Jesus Lizwif butsodaꞌne whubuhodalhꞌeꞌ-un huwu yalhduk

1ꞋEt Phariseene ꞌinkꞌez Moses be ꞌudustlꞌus ꞌukꞌu nunáguzne tubulh Jerusalem tsꞌe haíndilne Jesus higha óozdil. 2ꞋEt hubonilhꞌen whulohne Jesus yugha hodulꞌehne dula tsun bulh ꞌuhaꞌalh. ꞋUdaꞌ Phariseene ꞌet, “Me” huwhútni inleꞌ ꞌinka butsꞌú ha huhonꞌai. 3Phariseene ꞌinkꞌez ꞌon ꞌawh Lizwifne tsꞌiyawh butsodaꞌne whubuhodalhꞌeꞌ whuz unꞌa ꞌuhintꞌoh tsꞌihꞌun unꞌa dula tunáhugus te za ꞌuháꞌalh. 4Ooket bayoh tsꞌe ha nahudulh te laꞌ huldoh ꞌet ꞌantsꞌiya ꞌuhaꞌalh. Lhat-un buba hoosdzi tenéꞌ hutꞌen, dulubot, dude oosaꞌ, ꞌinkꞌez ꞌuyoo huyé butaꞌutꞌen-i cha, dulili cha, soo bubaꞌ hoontꞌoh kꞌunꞌa za tunáhuyugus.

5ꞋEt huwa Phariseene ꞌinkꞌez Moses be ꞌudustlꞌus ꞌukꞌu nunáguzne Jesus huyoodulhkut, “ꞋEt dáhoontꞌoh huwa ngha hodulꞌehne netsodáꞌne whuneodalhꞌeꞌ kꞌunꞌa lheꞌhustꞌen ꞌinkꞌez dula tunálhuhusgus whe ꞌuhaꞌalh?”

6ꞋEt Jesus ubúlhni, “ꞋAlhaꞌ ꞌazi Isaiah nohghun nus hónꞌen whe ꞌunohúlhni, ‘Dune duba ꞌuzooꞌ naꞌdudilꞌíne,’ whuz unꞌa nohghun ꞌukꞌeꞌánguz inleꞌ Yakꞌusda ꞌutni,

‘Ndunne dughuni be sba hodilhtiꞌ,

ꞌet hoontsꞌi ꞌaw budzi yo whe buba ꞌalhaꞌ lheꞌústꞌoh.

7Stsꞌun téni hunilhdzun doo ka ꞌuhutni,

ndi yun kꞌut dune yugha néꞌulhꞌai-i,

ꞌi Yakꞌusda ooghuni huyilhꞌi whe dune whubuhodulhꞌeh’.”

8ꞋEt Jesus ꞌutni, “Yakꞌusda dughuni nohtlꞌa ídanꞌai, ꞌi ꞌaw lhoozúlhtsꞌai ꞌinkꞌez yinka duneꞌ whubuhodalhꞌeꞌ-un, ꞌet ookꞌúneꞌ ꞌuhtꞌen, tsetsꞌai, lubot, ꞌinkꞌez ꞌuyoo be butaꞌwhutꞌen-i tunáhgus-un, ꞌoh ndúhoontꞌoh-un, dune whubodulhꞌeh.”

9ꞋEt ꞌon ꞌun cha Jesus ꞌutni, “Tube ꞌuyoo ꞌahli Yakꞌusda dughuni nohtlꞌa ídanꞌai oola díhtni, ꞌinkꞌez nohnichꞌoh be dune hodulhꞌeh-i, ꞌi za nulhtꞌi whe whubodulhꞌeh. 10ꞋEt Moses ꞌukꞌu néyuzguz-i njan ndutni, ‘Mbá ꞌinkꞌez nloo bulh hubudólhtiꞌ,’ ꞌinkꞌez ‘Mbe la duloo kꞌus dubá dzoh tsꞌe bughu yatílhduk-un ꞌen daóotsa huba ꞌuntꞌoh.’ 11ꞋEt hoontsꞌi hoonli duloo ꞌinkꞌez dubá ye búla titꞌelh-i dune yutꞌi de ꞌinkꞌez ꞌen ‘Corban ꞌuhoontꞌoh,’ ní de (ndi ‘Corban’ Lizwifne bughuni ꞌet dakelh kꞌunꞌa ‘Yakꞌusda oochꞌeꞌ,’ ni whe ꞌutni), 12ꞌaw duloo ꞌinkꞌez dubá bulh bula ootꞌen whuchꞌa whubodulhꞌe wheꞌ dahni. 13ꞋEt huwa Yakꞌusda ooghuni ꞌaw lhoozúlhtsꞌai ꞌinkꞌez ookꞌú nulheꞌzahtꞌen. Whuz unꞌa dune whúbunulhtun lhat-un whe ꞌudun cha nohnichꞌoh nohkꞌunꞌa neꞌahtꞌen.”

Ntsꞌenꞌa la lubeshi tsꞌilhchuk

14ꞋEt ꞌilhozdílne Jesus doo cha za, “ꞋAnih! Soo zúlhtsꞌai tsꞌiyanne ꞌinkꞌez noheni taóodoltsꞌit,” ubúlhni. 15“Ndai la dune hiyilhchúk-i ꞌaw oogha lubeshi ólhchoot ꞌaítꞌoh, ꞌet hoontsꞌi ndai dune butsꞌu haídultsꞌit-i, ꞌi gha lubeshi hilhchuk.

16Mbene la oodzeh hoonline, ꞌenne huyoozólhtsꞌaiꞌ.” 17ꞋIlhozdílne butá ha nája ꞌinkꞌez yoh daninya, yugha hodulꞌehne hígha hódulꞌeh yé yaílhduk-i hukwa huyoodulhkut. 18ꞋEt ꞌubulhni, “Nohni cha eh ꞌuyoonne kꞌunꞌa, ꞌaw noheni taóodoltsꞌit ꞌaítꞌoh? Di la dune yuꞌalh-i, ꞌi gha lubeshi olhchoot ꞌaítꞌoh. 19ꞋAw oodzi be lhéyuskat oobut be yúkuk ꞌinkꞌez ooyustꞌe ootsꞌahaꞌ náyakat, whuz unꞌa ꞌutsiꞌ-i neyustꞌe táhanakat.”

20ꞋEt ꞌon ꞌun cha ubúlhni, “Di dune tsꞌuhaiduldultsꞌuk-i, ꞌi gha ntsꞌiꞌ ulih. 21ꞋEt dune budzi yo whuz de ꞌaw beni lheꞌízooꞌ, ꞌuyoon dune ꞌat bulh lubeshi hilhchuk, tsꞌeke bulh nintaꞌhutꞌih, nehughan cha ꞌutꞌen, 22ꞌuhundunutꞌih, ꞌuyoonne chꞌeꞌ haꞌ huninzun, hoontsiꞌ kꞌunꞌa túneꞌ hutꞌen, dune nahunaꞌah cha ꞌuhutꞌen, hoontsiꞌ tuneꞌ hutꞌen, ꞌuhoolnih cha, Yakꞌusda chꞌaz yahalhduk, ꞌududíltiꞌ, ꞌinkꞌez huwusni. 23ꞋI tsꞌiyawh dune budzi yo tsꞌe ha dúltsꞌit-i, ꞌi gha lubeshi hilhchuk.”

ꞋUdun keyoh tsꞌeke ooba ꞌalha ꞌuhoontꞌoh-un

24ꞋEt Jesus whenája whe Tyre ꞌinkꞌez Sidon huwhútni-un keyoh ꞌoh whunat tsꞌe naoosja. ꞋEt ꞌilhoghun yoh danínya ꞌinkꞌez usda, ꞌuyoonne tꞌehonózin hukwa lheꞌnízun. ꞋEt hoontsꞌi ꞌaw buchꞌa ntoolꞌih ꞌaítꞌoh. 25ꞋIlhoghun tsꞌeke ooyatsꞌe ntsiꞌ-i nudúdeh-i ooyudínda Jesus yulh ꞌúditsꞌo whe yughu ninya ꞌinkꞌez yubut nachánitno. 26Ndun tsꞌeke ꞌutsꞌiz de haínya ꞌinkꞌez ꞌen Greekne bukꞌuyálhduk ꞌinkꞌez Phonecia, Syria whuzꞌai, ꞌet whuzdli-un ꞌuntꞌoh. ꞋEt Jesus yughu tédudlih whe yúlhni, “Ntsiꞌ-i nudúdeh-i syatsꞌe ootsꞌu ha naíninyoot.”

27ꞋEt hoontsꞌi Jesus tsꞌeke uyúlhni, “Tsꞌoodunne cho bubéꞌ tsꞌoolhꞌalh. ꞋAw tsꞌihꞌun lheꞌhóotꞌoh tsꞌoodunne huyaꞌalh-i tsꞌílhchoot ꞌinkꞌez lhike gha tsꞌóoꞌalh ꞌaítꞌoh.”

28ꞋEt yúlhni, “Moodih, ꞌalhaꞌ dini, ꞌet hoontsꞌi whuloh te lhike hoontsꞌi ludab tꞌah yun nakat-i tsꞌoodunne yughá ooꞌulh-i huyaꞌalh.”

29ꞋEt Jesus ndúyulhni, “ꞋEt ndúdinja-un huwa nyoh tsꞌe naíndalh ntsiꞌ-i nudúdeh-i nyaz yuyáhanadidzut.”

30ꞋInkꞌez duyoh tsꞌu whe naja ꞌinkꞌez ooyaz lili kꞌut ꞌusti ntsiꞌ-i nudúdeh-i yuyáhanadidzut.

Dune lheꞌdústsꞌo ꞌinkꞌez yalhulhduk unli, ꞌen Jesus soo náꞌyinla

31ꞋEt doo cha Jesus keyoh Tyre huwhútni whunat ꞌutꞌen inleꞌ ꞌinkꞌez Sidon huwhútni ꞌoh whuya lhuséya whe whunizyat-un bukeyoh whutulh lhuséya ꞌinkꞌez Galilee Bun whuz oozya. 32ꞋIlhoghun dune lheꞌdústsꞌo ꞌinkꞌez yalhulhduk cha ꞌuntꞌoh, ꞌen Jesus highu hinílhya ꞌinkꞌez Jesus highu tédudlih yukꞌudólni ha.

33ꞋEt Jesus bugheꞌ ꞌudun nénilhya whe yudzeh ꞌádilga, ꞌúntizo, ꞌinkꞌez dune yutsoola tꞌaíznai. 34Jesus ndo yakꞌuz tsꞌe yutánꞌen, yughudzoh ꞌúja whe tenadudli ꞌinkꞌez dune yulhni, “Ephphatha!” ndi lizwif bughuni ꞌet “Mba dáhaꞌ dooltsꞌit” ni whe ꞌutni. 35ꞋAhoh dune ꞌuditsꞌo nasdliꞌ ꞌinkꞌez soo yálhduk cha nasdliꞌ.

36“Khun te dune dóhniꞌ junih!” ubúlhni. ꞋAwet, “Dah” ubúlhni, ꞌet hoontsꞌi ꞌon nus huwu yahalhduk. 37ꞋInkꞌez tsꞌiyawh tube cho buba hooncha, “Sóo ꞌusdla tsꞌiyantsuk néꞌwhulhꞌen, lheꞌdústsꞌone ꞌuhuditsꞌo ꞌinkꞌez yalhulhdúkne cha yahalhduk ꞌubulhtsi,” hutni.

Currently Selected:

Mark 7: crx

Highlight

Copy