Mark 6

Jesus Nazareth whutꞌenne hitsꞌu disnih

1ꞋEt Jesus usda-un whuchꞌa nasja ꞌinkꞌez dukeyoh tsꞌe whenája. Yugha hodulꞌehne cha huyulh whenadil. 2Nahulyis dzin ꞌet Lizwif bulugliz whubodulhꞌeh whe lhane dune ꞌet dilhtsꞌíne hidántsꞌo whe tube buba hooncha ꞌinkꞌez ꞌuhútni, “Ndun dune ntsꞌez de ha hónla whe ꞌutni? Whunih-i be ntsꞌez de ha hónla whe ꞌutni? Ntsꞌenꞌa ꞌutꞌen sdabe huwa ꞌítꞌen teneꞌútꞌen?

3Yoh ꞌuwhulhꞌen-un, ꞌen iloh lakw ꞌuntꞌoh? Mary ooyeꞌ bulhutsinke James, Joses, Judas, Simon, ꞌinkꞌez bulhtuske cha iloh njan huwhutꞌi?” ꞋInkꞌez buba dzoh suliꞌ.

4ꞋEt Jesus ubúlhni, “Yakꞌusda be nus hóoꞌen-un yalhduk te ndulcho whe hidílhtiꞌ, ꞌet hoontsꞌi ookeyoh whutꞌenne, oonadneke ꞌinkꞌez ooyoh whutꞌine cha, ꞌaw lhuhidílhtiꞌ.” 5ꞋEt huwa nyo ꞌet Jesus ꞌaw huwa ꞌítꞌen te neꞌóotꞌen ꞌaítꞌoh, whulohne ndudáne, ꞌenne za bukꞌudílhni whe soo náꞌbalhꞌen. 6ꞋEt ꞌaw be ꞌalha ꞌuhoontꞌoh-i lhahuyítꞌih, ꞌet Jesus ooba hooncha. ꞋInkꞌez whunat keyoh ꞌoh nuya ꞌinkꞌez dune hubodulhꞌeh.

Yugha hodulꞌehne whunizyane ꞌon ꞌat nane, ꞌenne Jesus whébalhꞌaꞌ

7ꞋEt whunizyane ꞌon ꞌat nane, “ꞋAnih,” hubudániꞌ#6:7 ꞋEnne whelꞌaꞌne ꞌuhintꞌoh. ꞌinkꞌez nane hinli whe lhelhtsꞌun whe balhꞌaꞌ. ꞋInkꞌez hiye úlhtus-i bugha nínꞌai ntsiꞌ-i nudúdeh-i dune yudúltsꞌine butsꞌa ha náhinooyoot ha.

8ꞋInkꞌez khuni ulhtus-i butlꞌa dánꞌai, “Tihꞌus tsꞌe hoonli te toohlaꞌ junih! Tꞌalh-i cha, ꞌézdla-i cha, kꞌus sooniya te bulh tsꞌúdolhꞌoo junih! Tuz ꞌi za dutóohtan. 9Be ketsꞌalhꞌa-i ꞌinkꞌez dzoot ꞌilhiz be súhke-i, ꞌi za be ꞌóohneh.” 10ꞋUdun cha ubúlhni, “Keyoh nahꞌaz de dune duyoh dano honilhti de, yoh ꞌet oohkeꞌ ꞌutsꞌun keyoh tsꞌe tíhꞌus whutsꞌun. 11ꞋInkꞌez keyoh nenáhꞌaz-un dune nohtsꞌu hódilhꞌoh de kꞌus lhunohodústsꞌo de huwu nátóohtꞌas ꞌinkꞌez whulez chꞌa nohke naóohghat. ꞋEt dahúja-un tꞌehonoozeh. Tsꞌihꞌun nohdúsni Sodom ꞌinkꞌez Gomorrah whutꞌenne buba nus hootatsiꞌ. ꞋUdékꞌez dzin de huyé dzoh nutízut-i ba nús ꞌet lhunohdústsꞌone dzoh nahutideh.”

12ꞋEt whe la hándil ꞌinkꞌez dune Yakꞌusda ooghuni be bubulh yáhulhduk, “Nohlubeshi chꞌa lhtꞌananoohdilh,” hubuhútni. 13Lhane ntsiꞌ-i nudúdeh-i ooghu dilhtsꞌíne bughu whenábonanyoot ꞌinkꞌez dune lhane undudáne khe be ꞌubuhulho whe soo náꞌbuhalhꞌen.

John dune too be ꞌulhꞌen-un, hizilhghi

14Bulerwe Herod huyúlhni-un yulh ꞌúdantsꞌo Jesus ndulcho whe búlh nukhuni uzut. ꞋInkꞌez ꞌutni, “John dune too be ꞌulhꞌen-un ꞌutꞌen. Dazsai inleꞌ ꞌinkꞌez nahítnaꞌ ꞌet huwa Yakꞌusda ye ulhtus-i ooghi dizꞌai whe ꞌútꞌen whunulꞌen teneꞌútꞌen.”

15Whulohne cha, “Elijah ꞌutꞌen,” hutni. ꞋEt ꞌuyoonne cha ꞌuhutni, “ꞋUdaꞌ hukwꞌunꞌa Yakꞌusda be nus hóoꞌen-un ꞌutꞌen,” hutni.

16ꞋEt bulerwe Herod whulh ꞌúdantsꞌo whe ꞌet ꞌutni, “John dune too be ꞌulhꞌen-un ꞌutꞌen. Ootsi sba kꞌuhiníntsel inleꞌ daꞌ, nakhítnaꞌ,” ni.

17Herod dichꞌoh John dune too be ꞌulhꞌen-un ꞌahuyooꞌalh huwá bulhꞌa ínleꞌ. Huyulhghel ꞌinkꞌez ꞌahuyánꞌai. Ndun tsꞌeke Herodias huyúlhni-un, ꞌen yughusda. ꞋEn ghaꞌ yinla ínleꞌ. Dulhutsin Phillip ooꞌat yuzih usda ꞌet huwa. 18John dune too be ꞌulhꞌen-un Herod lhkꞌuz te yulhni, “Yakꞌusda ooghuni kꞌuninyis whe ꞌintꞌoh nyulhutsin ooꞌat zih silda.” 19ꞋEt huwa ooꞌat Herodias John dune too be ꞌulhꞌen-un yutsꞌu dutni ꞌinkꞌez yuzoolhghelh hukwaꞌ ninzun. ꞋEt hoontsꞌi duki, Herod, ꞌen gha ꞌaw yuzoolhghelh ꞌaítꞌoh. 20Herod John dune too be ꞌulhꞌen-un yé nuljut, tꞌeoonínzun John dune tsꞌihꞌun dune unli, ꞌinkꞌez Yakꞌusda ooduneꞌ ꞌuntꞌoh. ꞋEt huwa yugha ꞌóoli yoozílhtsꞌai hóontꞌiꞌ, ꞌet hóontsꞌi yoozílhtsꞌai totsuk oodzi dútultsꞌuk.

21ꞋEt ꞌilhudzin Herodias ooghá whultsꞌut Herod whuzdli dzin ꞌet dune díztiꞌne, lhuganne moodih, ꞌinkꞌez Galilee whutꞌenne diztiꞌne tubulh bughu nusúya. 22Herodias ootseꞌ danínya ꞌinkꞌez buba nidai. Herod ꞌinkꞌez ooghu nusjáne tubulh buba hoonzoo. ꞋEt Lerwe Herod tsꞌeke uyúlhni, “Ndai stsꞌo ookaꞌ dini, ꞌi ngha tísdlelh,” yúlhni.

23Lhat whe yutsꞌu náhizya whe uyúlhni, “Ndai stsꞌo ookaꞌ dini-i ngha tísdlelh lerwe be usdli-i lhulcho ngha tísdlelh,” yúlhni.

24ꞋInka tsꞌekeyaz ꞌaz whenája ꞌinkꞌez duloo yoodalhkut, “Di suba ootsꞌu kaꞌ doosniꞌ?” yúlhni, “John dune too be ꞌulhꞌen-un ootsi,” yúlhni, ooloo.

25Tsꞌeke ꞌahoh lerwe yutsꞌu naóosja ꞌinkꞌez uyúlhni, “John dune too be ꞌulhꞌen-un ootsi ꞌandit ꞌahoh tsetsꞌai be sgha nínꞌaih,” yúlhni.

26ꞋEt lerwe ꞌahoh ni suliꞌ ꞌet hoontsꞌi ꞌaw yuchꞌa tsédootni ꞌaitꞌoh, ooghu nusjáne bunalh yutsꞌu náhizya ꞌet huwa. 27ꞋInka ꞌahoh ꞌilhoghun huwunli-un, ꞌadinlane dilhtsꞌi tsꞌe whe yálhꞌaꞌ John dune too be ꞌulhꞌen-un ootsi whusaínooꞌalh wheni. Huwunlí-un, ꞌadinlane dilhtsꞌi tsꞌe whénya ꞌinkꞌez John dune too be ꞌulhꞌen-un yutsi kꞌúnintsel. 28Tsetsꞌai bé nanꞌai ꞌinkꞌez tsꞌeke yutlꞌa yánkai. ꞋOn ꞌun tsꞌeke duloo tlꞌa yánkai. 29ꞋEt John dune too be ꞌulhꞌen-un yugha hodulꞌehne huyulh ꞌúdantsꞌo oozi hikunásdil ꞌinkꞌez ꞌahayalhti.

5,000ne dunene Jesus huyooꞌalh-i bugha nínla

30ꞋEt whelꞌaꞌne whusanáhidil ꞌinkꞌez Jesus te ꞌilhuhozdil ꞌet hidániꞌ ntsꞌoh te néꞌhustꞌen ꞌinkꞌez ndet dune whubuhodalhꞌeꞌ. 31Lhane dune whusahúdulh ꞌinkꞌez whenáhudilh ꞌet huwa Jesus ꞌinkꞌez yugha hodulꞌehne tubulh ꞌuhútíꞌulh ꞌet hoontsꞌi búgha lhúwhulhtsꞌit ꞌinka ndúbulhni, “ꞋUtsꞌun uztoodilh ntsꞌe whenichꞌoh ꞌúztitꞌelh-un, ꞌet la ꞌatsul naoolhyis.”

32ꞋEt nus tsꞌi be hutizki disoh tsꞌe whuz nehúninki. 33ꞋEt hoontsꞌi lhane dune hubanꞌen hutizki whe ꞌinkꞌez ꞌahoh tꞌehonínzun mbe ꞌuntꞌoh ꞌet huwa keyoh totsuk whutꞌenne lhane hilwus whe Jesus ꞌinkꞌez yugha hodulꞌehne tubulh butso ꞌet whuz hoolhghaz. 34ꞋEt Jesus tsꞌi be hainya whe lhane ꞌilhozdil ꞌet ꞌubunilhꞌen tube bugha téꞌninzun ꞌantsꞌi ꞌusbaiyaz ooghulhídloh-i léꞌhintꞌoh ꞌinka lhat-un ꞌet whubuwhéoodunilhꞌeꞌ.

35ꞋAwet yoo ꞌún hoozulh whe yugha hodulꞌehne highu nindil ꞌinkꞌez ꞌuhuyúlhni, “ꞋAwet tube yoo ꞌún hoozulh ꞌinkꞌez njan disoh cha ꞌuhoontꞌoh. 36Nyoonne dune nabalhꞌalh nꞌaho keyoh whutoh ꞌoho tꞌalh-i náhoodoket huyooꞌalh-i hooloh ꞌet huwa.”

37ꞋEt Jesus ubúlhni, “Nohni hitiꞌulh-i bugha náhꞌaih dah.” ꞋEt huyoodulhkut, “Whuz uztidulh hukwaꞌ ninzun ꞌinkꞌez $200.00 kꞌoh tꞌalh-i tsꞌonket ꞌinkꞌez eh bugha ꞌúztiꞌalh?”

38ꞋEt hoontsꞌi Jesus uboodulhkut, “Lhes dáltsuk ahtꞌi whunulhꞌen.” ꞋEt nahuhoonꞌai whe ꞌet ꞌuhuyúlhni, “Kwulaiꞌ liba ꞌinkꞌez nanki lho cha.”

39Jesus ꞌet yugha hodulꞌehne ubúlhni, “Tsꞌiyawh dune lhelhdun nébunulhle ꞌinkꞌez tlꞌoyaz kꞌut hudóltsꞌiꞌ.” 40ꞋEt dune nétlꞌa hudiltsꞌiꞌ tlꞌoyaz kꞌut whunizyat whunizyai ꞌinkꞌez kwulat whúnizyai whe lhaniwh te lhuhúsguz. 41ꞋEt Jesus liba ꞌinkꞌez lho bulh yílhchoot ndo yakꞌuz tsꞌe yutánꞌen ꞌinkꞌez, “Musi,” ni whe tenadidli. Lhes taidanyuz ꞌinkꞌez yugha hodulꞌehne whutahayólelh ha butlꞌa yánla. Nanki lho cha ꞌet ndúyinla whe butainínla. 42Tsꞌiyawh ꞌuhanꞌal ꞌinkꞌez ꞌuhunisdai. 43ꞋEt yugha hodulꞌehne whunizyat ꞌon ꞌat nanki chalhyal dizbun-i lho ꞌinkꞌez lhes bulh ꞌet nenínkat-i nahúyalhdzoo. 445,000ne dunene butsꞌekooꞌ ꞌinkꞌez bubuzkeh cha lhes huyanꞌal.

Jesus too kꞌut nuya

45ꞋAhoh Jesus yugha hodulꞌehne tsꞌi be nábalhꞌaꞌ ꞌinkꞌez Bethsaida huwhútni keyoh whuz dutso whe balhꞌaꞌ nyan tadatus tsꞌe whuzꞌai. ꞋEt didut nyoonne ꞌilhozdílne whe nábalhꞌaꞌ. 46Whenáhidil whe tenadutidli ha ꞌawet buchꞌa násja ꞌinkꞌez dzulh kꞌuz tsꞌe whénya.

47ꞋAwet húlhgha suliꞌ, ꞌet tsꞌi be taniz hikelh ꞌinkꞌez Jesus dichꞌoh yun kꞌut ꞌuntꞌoh. 48Yugha hodulꞌehne ꞌubunilhꞌen nilhtsꞌi dulhyo hikelh tube hunintꞌi whe hutꞌo. ꞋEt bundadaꞌ yutilhkaí-un, ꞌet Jesus too kꞌut uyalh whe nus whuz bughu ninya ꞌankwꞌus bube nghoozya. 49Hitilhꞌen too kꞌut uyalh whe, “Dune tsin ꞌutꞌen,” huninzun. Tube whé hunilhjoot ꞌinkꞌez ꞌuhúlhdzul. 50ꞋEt Jesus ꞌahoh bubulh yátilhduk, “Nohdzi ulhtus úlhtsi! Si ꞌustꞌen. Whenulhjut íloh,” ubúlhni.

51ꞋEt tsꞌi bet bughu dénya. ꞋEt ꞌawet ooztsꞌi ꞌinkꞌez yugha hodulꞌehne tube buba hooncha. 52Whutsodaꞌ liba dáyinla la ꞌet ꞌaw tsꞌihꞌun nelhúhohooꞌal, ꞌet huwa njan lhes ghun dahóoja-un budzi dutsꞌun ꞌet huwa.

Gennesaret whutꞌenne undudáne Jesus soo náꞌbulhꞌen

53ꞋEt bun kꞌut yahúninki ꞌinkꞌez keyoh Gennesaret huwhútni-un, ꞌet tsꞌi whehídinguz. 54Tsꞌi be ha hándil whe ꞌahoh Jesus nahuyóolhtsꞌit. 55Ndulcho nahúlhghaz ꞌinkꞌez ntsꞌoh la Jesus usda huyulh ꞌúditsꞌo ꞌoh ndudáne hikꞌustez bulh hitsꞌú butule. 56ꞋInkꞌez ntsꞌoh la Jesus nuya keyoh whuyaz kꞌus keyoh whuti kꞌus nꞌaho keyoh ꞌeꞌóoket-un whutoh dune ꞌilhodúlh-un whuz ndudáne nébuhunle ꞌinkꞌez Jesus híghu tédudlih, “Nyunaih ꞌantsꞌi ooban ꞌet ndudáne hitꞌa óonalh,” huyúlhni. ꞋEt mbene yutꞌaíznaine tsꞌiyawh soo náꞌhuja.

Currently Selected:

Mark 6: crx

Highlight

Copy