1 Timothy 5
5
Yakꞌusda ba ꞌilhunaoodulhne, soo cho néꞌbilhꞌen
1Dune nyanus whudilhdzulh-un hoonli hukwa dóniꞌ junih. Kꞌus mbá kꞌunꞌa bulh yailhduk. Dune nkꞌoh whudilhdzulhne, nyulhutsinke kꞌunꞌa bubulh yailhduk. 2Tsꞌekoo nyanus whudilhdzulhne, nloo kꞌunꞌa bubulh yailhduk. ꞋInkꞌez tsꞌekoo nkꞌoh whudilhdzulhne, nyulhtuske kꞌunꞌa khuni ootsun hooloh-i be bubulh yaoolhduk.
Mbene la soo tsandilh unline ubuzdólhtiꞌ
3Ndunne soo tsꞌihꞌun tsandilh unline, ꞌenne cha ubudólhtiꞌ. 4ꞋEt hoontsꞌi ndunne tsandilh buzkeh hoonline, kꞌus oochaike hoonline, ndunne tsandilh yutsꞌu haindene, ꞌenne duloo tsꞌihꞌun unꞌa higholeꞌ. ꞋEt whe Yakꞌusda be ꞌutꞌen kꞌoh whutaleh. ꞋEt ꞌudechoo duyoh dilhtsꞌine bubodólhtiꞌ, ꞌinkꞌez dudusneke bulaꞌ hootꞌen. ꞋEt hoonzoo wheꞌ hoontꞌoh ꞌinkꞌez Yakꞌusda butsꞌu hukwaꞌ ninzun. 5Ndun soo tsꞌihꞌun tsandilh unli-un ꞌinkꞌez oonat ꞌe hooloh de, Yakꞌusda tꞌanintan yulaꞌ titꞌelh huba. ꞋEt dzin ꞌinkꞌez ꞌulhdzis ibulh Yakꞌusda tsꞌun teniꞌ nilhdzun whe tenadudli. 6ꞋEt hoontsꞌi tsandilhne, dichꞌoh dukꞌunꞌa za whe ndi yun kꞌut usda, nduntꞌohne hukhuna whe dahuzsai wheꞌ hintꞌoh. 7Daja nyudasniꞌ la ꞌi khuni ulhtus ꞌi be tsꞌiyanne bubulh yailhduk. ꞋEt whe bukꞌeholtsꞌit-un hooloh. 8ꞋEt hoontsꞌi mbene ꞌaw dunatneke ghu lhilohne, ꞌinkꞌez duyoh dilhtsꞌine, ꞌenne ghu lhuhiloh de, ꞌet nduntꞌoh-un ndi be ꞌalha ꞌuhoontꞌoh-i yuchꞌaz nalꞌalh, ꞌinkꞌez ooba ꞌalhaꞌ lheꞌhootꞌohne ba nus lheꞌhizooꞌ whe ꞌuntꞌoh.
9Tsandilh lhkꞌu tat whunizyat ꞌon ꞌun be yus kꞌut (60) de, ꞌinkꞌez ꞌilhoghun za ghindaꞌ de, ꞌen za booziꞌ ꞌukꞌoguz hubaꞌ hoontꞌoh. 10Unzoo-i ꞌutꞌen ꞌulhꞌen ooghu tꞌeoohunoodzun. Tsꞌoodunne nilhyai de, dune tꞌebunuszunne, ꞌenne hoontsꞌi yoh dabulih, Yakꞌusda oochꞌeꞌne buke tunagus, dzoh nuzutne la ꞌutꞌen de, ꞌet ndi ꞌutꞌen unzoo-i soo cho tsꞌiyawh ꞌuyalhꞌen de.
11ꞋEt hoontsꞌi ndunne tsandilh tꞌet unline, ꞌenne bubooziꞌ ꞌukꞌeonges junih. ꞋUtꞌen ntsiꞌ-i haꞌ huninzun suliꞌ, ꞌinkꞌez Christ chꞌaz nahulhꞌa de, ki hutitꞌelh hukwaꞌ huninzun. 12ꞋInkꞌez ꞌudechoo dughuni huye nahizya-i kꞌahinínyuz de, ꞌet de buba nahutideh. 13ꞋInkꞌez cha tsehudutni-un huhodilꞌeꞌ ꞌinkꞌez kwun toh nuhuya. ꞋInkꞌez ꞌaw tsehudutni za iloh, ꞌughu yahulhduk ꞌinkꞌez ꞌuyoonne eꞌutꞌen kꞌoh huwu hinli chaꞌ hintꞌoh. ꞋAw neꞌhudooniꞌ huba lheꞌhootꞌoh, ꞌoh te neꞌhuduniꞌ. 14ꞋEt huwa butsꞌu hukwaꞌ nuszun, ndunne tsandilh ꞌaw yoo ꞌun lhiszulhne, ki náhootꞌeꞌ ꞌinkꞌez bubuzkeh holeꞌ, ꞌinkꞌez duyoh cha huwo hooleꞌ. ꞋEt njan nduhutꞌen de, ꞌaw nechꞌaz ditni-un yatilhduk-un ooghá holtsꞌit ꞌaitꞌoh. 15Whulohne ꞌudaꞌ Jesus Christ hichꞌaz nalhꞌa whe Satan hikꞌuneꞌ ꞌutꞌen ꞌet huwa.
16Mbe dune kꞌus tsꞌeke ꞌen ooba ꞌalha ꞌuhoontꞌoh unli-un, ꞌinkꞌez ooloo tsandilh unli de, ꞌet de ndai la ye ndunidzit-i, ꞌi be bulaꞌ hootꞌen. ꞋEt whuz unꞌa ꞌonghohne Yakꞌusda ba ꞌilhunaoodulhne hoonliyaz bugha hooꞌalh ꞌaitꞌoh. ꞋEt nduhutꞌen de, ꞌet de la soo tsꞌihꞌun tsandilh unline, ndai hiye ndunidzit-i, ꞌi be bughu hooleꞌ.
Mbene la netso whudilhdzulhne ubuzdólhtiꞌ
17Netso whudilhdzulhne soo dune tso nuyane, nawh whe ubudúlhtiꞌ. Mbe ꞌutꞌen ulhtus-i be ꞌutꞌen whe Yakꞌusda be ꞌutꞌen kꞌoh dune hodulhꞌeh ꞌinkꞌez Yakꞌusda ooghuni be yalhdukne, ꞌenne ꞌukꞌenus soo neꞌboolhꞌen. 18Yakꞌusda ooghuni ꞌet cha ndutni, “Ndet la musdoos dune tlꞌo maiꞌ ꞌuztiꞌulh wheni ꞌuyulhꞌen te, ꞌaw ꞌutiꞌulh whuchꞌa ꞌenolꞌaꞌ junih.” ꞋInkꞌez ꞌet cha ndutni, “ꞋUtꞌen-un be ꞌutꞌen ooba ꞌukꞌelha whutaleh wheꞌ hoontꞌoh.” 19Ndunne ꞌutso whudilhdzulhne hoonli huwun bukꞌehuhootaꞌalh de, ꞌet nane kꞌus tane te, ꞌenne hiyulh tꞌewhuninzun de, ꞌet de za huwu yahoolhduk hubaꞌ hoontꞌoh. 20Mbene la lubeshi ilhchootne, tsꞌiyanne nalh whe nintaꞌhantꞌen-un hukwaꞌ bodóniꞌ hubaꞌ hoontꞌoh. ꞋEt de la ꞌonghohne whe hunooljut.
21Yakꞌusda cha, Jesus Christ neMoodihti cha, ꞌinkꞌez lizas ꞌutahalyane cha, ꞌenne tsꞌiyawh bunalh soo tsꞌihꞌun unꞌa nyudusni, ndi khuni be daja nyudasniꞌ ꞌet huwa ꞌilhiz ooleꞌ ontun. Ndai la ꞌutalhꞌelh-i, ꞌi tsꞌiyawh dune dachꞌe holeꞌ hukwꞌunꞌa ꞌoneh junih. ꞋInkꞌez ꞌaw ꞌilhoghun za kꞌentsiꞌ ꞌinkꞌez hoonli ootsꞌu nolhtꞌi junih.
22Soo ꞌa dune kꞌedolnih junih. ꞋInkꞌez ꞌuyoonne lubeshi ꞌulhꞌenne eꞌutꞌen bubulh ꞌoneh junih! Nyunchꞌoh lubeshi yit ꞌududoldzin.
23ꞋEt lhat whe mbut gha ndinda, ꞌet huwa ꞌaw too za ontnaiꞌ junih, tsꞌekoo tooꞌ ntꞌum-iyaz tsꞌekoo tooꞌ ontnaiꞌ.
24Whulohne bulubeshi tsꞌiyanne yunilhꞌen, ꞌet huwa ndai la ye buba nahutideh whutso, ꞌi dahaja la, tsꞌiyanne tꞌehontazin. ꞋInkꞌez whulohne bulubeshi nahinuꞌiꞌ, ꞌet hukwꞌelhꞌaz ndai la ye nahizya-i, ꞌi dahaja la, tsꞌiyanne tꞌeyuntizeh wheꞌ hoontꞌoh. 25ꞋInkꞌez whuz ꞌunꞌa za mbene ꞌutꞌen unzoo-i ꞌulhꞌenne tsꞌiyanne tꞌewhuntizeh ꞌinkꞌez ꞌutꞌen unzoo-i nahinuꞌiꞌ de, ꞌi hoontsꞌi tsꞌiyanne tꞌewhuntizeh.
Currently Selected:
1 Timothy 5: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.