1 Timothy 4
4
Whuchꞌa nahusdilh whutáleh-un
1ꞋEt Ndoni soo tsꞌihꞌun unꞌa tsꞌet gaih yalhduk whe ndutni, kꞌat le ntsiꞌ-i nududehne whulohne dune nabuntiꞌah. ꞋEt huwa ndet la whubodutilhꞌeh-un, ꞌet za huhootuzalhtsꞌilh. ꞋInkꞌez ndi be ꞌalha ꞌuhoontꞌoh-i, ꞌi hila dutitnih wheꞌ hoontꞌoh, 2duba naꞌudzooꞌ whe whutsꞌit-i be za yahalhduk. ꞋEt buyo tsꞌe oogha tꞌetsꞌoninzun-i ꞌantsꞌi kwun be kꞌeyiguz leꞌ hutꞌih, 3lhghu dutaltsꞌilh-un, ꞌet cha whuchꞌa hontayoot, ꞌinkꞌez whulohkhi ꞌutꞌalh-i, ꞌi cha hichꞌa buntáyulh. ꞋEt hoontsꞌi ooba ꞌalha ꞌuhoontꞌohne ꞌinkꞌez khuni ꞌalhaꞌ ꞌuntꞌoh-i tꞌeininzunne, ꞌenne hikaꞌ ninzun-i tsꞌiyawh huyooꞌalh hubaꞌ hoontꞌoh, Yakꞌusda ꞌuyinla ꞌet huwa. ꞋEt ndi tꞌalh-i ha Yakꞌusda tsꞌun musi hudooniꞌ ꞌinkꞌez huyooꞌalh. 4Yakꞌusda ꞌuyinla-i, ꞌi tsꞌiyawh ꞌuzooꞌ whe ꞌuntꞌoh, ꞌinkꞌez ookwa lheꞌtsꞌunooszin junih. ꞋEt huwa Yakꞌusda tsꞌun musi tsꞌutni ꞌinkꞌez tsꞌooꞌalh. 5Yakꞌusda ooghuni ꞌinkꞌez tenadudli bulh ꞌi be neba unzoo ꞌulhih whe tsꞌuꞌalh.
Jesus Christ ba soo neꞌutꞌen-un ꞌonleꞌ
6Lhulhutsinke unline, ꞌenne Yakꞌusda ghun hubodilhꞌeh de, ꞌet de la Jesus Christ ba soo neꞌútꞌen-un tanleh. ꞋInkꞌez ndi khuni be ꞌalha ꞌuhoontꞌoh-i, ꞌi ghun tꞌeoonanzin, ꞌinkꞌez ꞌi soo cho ookꞌuneꞌ zintꞌen. 7ꞋEt hoontsꞌi khuni lhizooꞌ-i, ꞌinkꞌez laitꞌoh-i khuni, ꞌi oozólhtsꞌaiꞌ junih! Kꞌus Yakꞌusda ba ndi yun kꞌut uzdoltsꞌiꞌ ha, ꞌi be ilhtus ꞌonleꞌ. 8ꞋEt neyustꞌe ba neꞌuzdunuldzeꞌ te, ꞌatsul za neba hootazooꞌ, ꞌet hoontsꞌi Yakꞌusda ba ndi yun kꞌut uzdoltsꞌiꞌ ha, ꞌet tsꞌiyantsuk whe whudíztiꞌ. ꞋI gha la ndi yun kꞌut uzdilhtsꞌi-un nelaꞌ ꞌewhudutitꞌelh ꞌinkꞌez yakꞌuz neztiyalh ꞌet cha nelaꞌ ꞌewhudutanelh.
9Ndi khuni be nyulh yasduk-i, ꞌi ootꞌa nínontan ꞌinkꞌez itálhchulh huba soo ꞌuldzooꞌ whe ꞌuntꞌoh. 10ꞋEt wheni ꞌutsꞌutꞌen ꞌinkꞌez dzóh nutsꞌudeh. Yakꞌusda khuna-un, ꞌen ootꞌa niuznitan ꞌet huwa. ꞋEn tsꞌiyanne butilhyis hukwaꞌ ninzun, ndunne yuba ꞌalhaꞌ yintꞌohne, ꞌenne soo ubulhyis.
Yakꞌusda ba neꞌintꞌen-un, soo cho howinli
11ꞋEt ndohwhi ꞌubudini ꞌinkꞌez hubodilhꞌeh. 12Chilh inli hoontsꞌi ꞌuyoonne ba ꞌantsꞌi ꞌonleꞌ junih. Kꞌus ooba ꞌalha ꞌuhoontꞌohne, nyun nyuhunilhꞌen de, ꞌet huwa huhodoolꞌeh. Ndai khuni be yailhduk-i, ꞌi be ntsꞌenꞌa la ndi yun kꞌut sinda, ntsꞌenꞌa la ꞌuyoonne kꞌeinsiꞌ, nyughi be cha, mba ꞌalha ꞌuhoontꞌoh-i, ꞌi cha, ꞌinkꞌez ntsꞌenꞌa la lubeshi chꞌaz ꞌun duniltꞌi cha. ꞋEt ꞌohwhi be sih ooba ꞌalha ꞌuhoontꞌohne whubunolhtun. 13ꞋEt ndet la ntsꞌun tisyalh whutsꞌun, khun ndi Yakꞌusda ooghuni buba ookꞌu yailhduk-un, ꞌet ꞌetsul lheꞌduzonih. Khuni be hoolhtus ha be bubulh yailhduk, ꞌinkꞌez khuni tsꞌihꞌun unꞌa ꞌi be hubodulhꞌe. 14ꞋEt ꞌoh daꞌ ndunne ꞌutso whudilhdzulhne dula ntsi kꞌut hudalni. ꞋEt whe mba nus huhonꞌen ꞌinkꞌez ꞌi nghantꞌai-i ꞌantsꞌi mba ooleꞌ junih.
15ꞋEt njan howun nuni ninzut ꞌinkꞌez whutlꞌaꞌdudiltih. ꞋEt de la ootꞌaz ninyeh-i, tsꞌiyanne hinoolhꞌen. 16Nyunchꞌoh soo cho khindli ꞌinkꞌez khuni be whutsꞌodulꞌeh-i cha. ꞋI be bulh za ꞌontꞌeꞌ. ꞋEt ndintꞌoh de, ꞌet de nyunchꞌoh ꞌuduzilyih ꞌinkꞌez ndunne nyuditsꞌone, ꞌenne cha ubalhyiz whe ꞌintꞌoh.
Currently Selected:
1 Timothy 4: crx
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.