Mareko 15
15
O Iesu i Luma o Pilato
(Mata 27.1-2, 11-14; Luka 23.1-5; Ioane 18.28-38)
1‘Ua ao, ‘ona taupulepule loa lea o le ‘au ositaulaga sili ‘atoa ma toeaina ma le ‘au tusi‘upu, ma le taupulega uma, ‘ua latou noanoa ‘iā Iesu, ma ta‘ita‘i atu ‘iā te ia, ma tu‘uina atu ‘iā Pilato. 2‘Ona fesili mai lea o Pilato ‘iā te ia, “O oe ‘ea o le tupu o tagata Iutaia?”
‘Ona tali atu lea o Iesu#15.2 Iesu: O le fa‘aliliuga tuai; ia. ‘iā te ia, “O lea lava.”
3‘Ua momoli fo‘i ‘iā te ia e le ‘au ositaulaga sili i mea e tele. 4‘Ona toe fesili mai lea o Pilato ‘iā te ia, “‘E te lē tali mai ‘ea? Fa‘auta i le tele o mea ‘ua latou molimau ai ‘iā te oe.”
5A ‘ua lē tali atu Iesu sina ‘upu; o le mea lea ‘ua ofo ai Pilato.
O le Fa‘asalaina o Iesu i le Oti
(Mata 27.15-26; Luka 23.13-25; Ioane 18.39—19.16)
6O lea tausamiga ma lea tausamiga, e tatalaina atu e Pilato ‘iā te i latou se tasi pagotā, latou te fai ane ai. 7Sa i ai le tasi ‘ua igoa ‘iā Parapa, ‘ua noatia fa‘atasi ma ē na fouvale ma ia, ē na fasioti tagata i le fouvale sa fai. 8‘Ona ‘alalaga atu ai lea o le motu o tagata, ma fai atu, ‘ina ‘ia faia e ia ‘iā te i latou fa‘apei ‘ona masani ai o ia. 9‘Ona tali atu lea o Pilato ‘iā te i latou, “Tou te loto ‘ea ‘ina ‘ia ‘ou tatalaina atu ‘iā te ‘outou le tupu o tagata Iutaia?” 10Auā ‘ua na iloa o le matau‘a na tu‘uina atu ai o ia e le ‘au ositaulaga sili.
11A o le ‘au ositaulaga sili, ‘ua latou fa‘aoso i le motu o tagata, ‘ina ‘ia tatalaina mai e ia o Parapa ‘iā te i latou, ‘ae tu‘u pea Iesu. 12‘Ona toe tali atu ai lea o Pilato ‘iā te i latou, “Se a fo‘i se mea tou te loto i ai ‘ou te faia ‘iā te ia e ta‘ua e ‘outou o le tupu o tagata Iutaia?”
13‘Ona latou toe ‘alalaga ai lea, “‘Inā fa‘asatauro ia ‘iā te ia.”
14‘Ona fai atu lea o Pilato ‘iā te i latou, “Se a fo‘i se mea leaga ‘ua na faia?”
A ‘ua atili ai ‘ona latou ‘alalaga, “‘Inā fa‘asatauro ia ‘iā te ia.”
15‘Ua loto Pilato e fa‘alotomalie i le motu o tagata, ‘ua ia tatalaina atu ai Parapa ‘iā te i latou; ‘ua uma ‘ona sasaina o Iesu e ia, ‘ona ia tu‘uina atu lea o ia ‘ia fa‘asatauroina.
O le Tauemu o Fitafita tau ‘iā Iesu
(Mata 27.27-31; Ioane 19.2-3)
16‘Ona ta‘ita‘iina atu lea o ia e le ‘au i le maota, o le maota lea o le ali‘i, ‘ua latou fa‘apotopotoina fo‘i le ‘au uma. 17‘Ona latou fa‘a‘ofu lea ‘iā te ia i le ‘ofu pāuli, ma latou ta‘ata‘ai la‘au tuitui ‘ua fai ai le pale, ‘ua fa‘apaleina ai o ia. 18‘Ona latou alolofa mai lea ‘iā te ia, “Talofa le tupu o tagata Iutaia!” 19‘Ua latou tā fo‘i i lona ao i le u, ma feanu ‘iā te ia, ma to‘otuli ma ifo ‘iā te ia. 20‘Ua uma, ‘ona latou fa‘atauemu ‘iā te ia, ‘ona latou tō‘eseina lea o le ‘ofu pāuli ‘iā te ia, ma fa‘a‘ofu ‘iā te ia i ona lava ‘ofu; ‘ona latou ta‘ita‘i atu lea ‘iā te ia ‘ia fa‘asatauroina o ia.
O le Fa‘asatauroina o Iesu
(Mata 27.32-44; Luka 23.26-43; Ioane 19.17-27)
21‘Ua alu ane le tasi tagata, o Simona le Kurene, na sau mai le vao, o le tamā fo‘i o ia o Alesana ma Rufo, ‘ona latou fa‘atauānau lea ‘iā te ia, ‘ina ‘ia ‘ave e ia o lona satauro.#Roma 16.13 22‘Ua latou ‘ave fo‘i ‘iā te ia i Kolokota, o lona uiga pe a fa‘amatalaina, o le mea o i ai le ulupo‘o; 23‘ona latou avane lea ‘iā te ia le uaina ‘ua fefiloi ma le muro, e inu ai; a ‘ua lē talia e ia. 24‘Ua latou fa‘asatauroina o ia, ‘ona latou tufatufa lea i ona ‘ofu, ma fai ai le vili, e iloa ai le mea a le tagata.#Sala 22.18 25O le aoauli na latou fa‘asatauro ai ‘iā te ia. 26‘Ua tusia fo‘i le tusi i le mea na molia ai o ia, “O LE TUPU O TAGATA IUTAIA.” 27‘Ua latou fa‘asatauro fo‘i fa‘atasi ma ia tagata fao mea e to‘alua; o le tasi i lona itū taumatau ma le tasi i lona itū tauagavale. 28Na taunu‘u ai le Tusi, ‘ua fa‘apea: Na faitauina o ia fa‘atasi ma pagotatā.#15.28 O nisi fa‘aliliuga e lē maua ai le fuai‘upu e 28.
29O i latou fo‘i na ui ane ‘ua latou fāifai ‘iā te ia, ma lialia‘i o latou ulu, ‘ua fa‘apea mai, “Ue! O oe na o lē lepeti le malumalu, ma toe faia i aso e tolu,#Sala 22.7; 109.25; Mare 14.58; Ioane 2.19 30‘inā fa‘aola ia oe ‘iā te oe ma alu ifo i le satauro.”
31‘Ua fa‘apea fo‘i le ‘au ositaulaga sili ‘ua fa‘atauemu i latou fa‘atasi, ‘atoa ma le ‘au tusi‘upu, ‘ua fa‘apea ane, “Na ia fa‘aolaina isi tagata, na te lē mafaia ‘ona fa‘aola o ia ‘iā te ia. 32‘Inā alu ifo nei lava le Keriso, le tupu o Isaraelu, i le satauro, tatou te iloa ai ma tatou fa‘atuatua ai.”
O ē na fa‘asatauroina fo‘i fa‘atasi ma ia, ‘ua la ‘upu leaga ‘iā te ia.
O le Maliu o Iesu
(Mata 27.45-56; Luka 23.44-49; Ioane 19.28-30)
33‘Ua o‘o i le tutonu o le lā ‘ona pogisā uma ai lea o le nu‘u, ‘ua o‘o lava i le itūlā e tolu. 34O le itūlā e tolu fo‘i ‘ua ‘alaga ai Iesu, ‘ua leo tele, ‘ua fa‘apea atu, “Eloi, Eloi, lama sapatani?” O lona uiga pe a fa‘amatalaina, “Lo‘u Atua e, lo‘u Atua e, se a le mea ‘ua e tu‘ulafoa‘i mai ai a‘u?”#Sala 22.1
35‘Ua fa‘alogo ai nisi o ē na tutū mai, ‘ona latou fa‘apea ane ai lea, “Fa‘auta, o lo‘o vala‘au atu o ia ‘iā Elia.” 36‘Ona momo‘e lea o le tasi, ma fufui le omomi i le vineka, ‘ua tu‘u i luga i le pito la‘au, ma fa‘ainu ‘iā te ia, ‘ua fa‘apea atu, “Tu‘u pea ia; se‘i tatou iloa pe sau Elia e ‘ave ifo ‘iā te ia.”#Sala 69.21
37‘Ua ‘alaga Iesu ‘ua leo tele, ‘ona tō ai lea o lana mānava.
38‘Ona saeluaina lea o le ‘ie puipui o le malumalu, ‘ua amata mai i luga, ‘ua o‘o lava i lalo.#Eso 26.31-33 39O le ta‘ita‘i o le to‘aselau, o lē na tu atu i ona luma, ‘ua iloa e ia ‘ua fa‘apea ‘ona tō o lana mānava ‘ona fa‘apea atu ai lea o ia, “E moni, o le Alo o le Atua lenei tagata.”
40Sa i ai fo‘i fafine o matamata mamao mai, sa i ai fo‘i ‘iā te i latou o Maria le Makatala, ma Maria le tinā o Iakopo le itiiti ma Iose, ‘atoa ma Salome.#Luka 8.2-3 41O ē na mulimuli atu ‘iā te ia ‘ina o i Kalilaia o ia, ma ‘au‘auna ‘iā te ia; ‘atoa ma isi fafine e to‘atele, o ē na ō a‘e fa‘atasi ma ia i Ierusalema.
O le Tu‘uina o Iesu i le Tu‘ugamau
(Mata 27.57-61; Luka 23.50-56; Ioane 19.38-42)
42‘Ua o‘o i le afiafi, auā o le aso e sauni ai, o le aso lea i tua atu o le sapati. 43‘Ua alu ane ai Iosefa le Arimataia, o le tasi faipule sili, o ia fo‘i sa fa‘atalitali i le mālō o le Atua, ‘ua loto tele o ia ma alu atu ‘iā Pilato, ma fa‘anoi atu ai i le tino o Iesu. 44‘Ona ofo lea o Pilato ‘ina ‘ua vave maliu o ia; ‘ua na vala‘au atu fo‘i i le ta‘ita‘i o le to‘aselau, ma fesili atu i ai, po o ‘ua leva lona maliu. 45‘Ua iloa o ia i le ta‘ita‘i o le to‘aselau, ‘ona avatu ai lea o le tino ‘iā Iosefa. 46Na fa‘atau mai e Iosefa#15.46 na fa‘atau mai e Iosefa: O le fa‘aliliuga tuai; na taulia fo‘i e ia. le ‘ie lino, ‘ua ‘ave ifo fo‘i ‘iā te ia, ‘ona aui lea i le ‘ie lino, ‘ua tu‘u fo‘i ‘iā te ia i le tu‘ugamau na foa i le papa, ‘ona fuli ane lea o le ma‘a i le gutu o le tu‘ugamau. 47‘Ua va‘ava‘ai fo‘i Maria le Makatala, ma Maria le tinā o Iose i le mea na tu‘uina ai o ia.
Currently Selected:
Mareko 15: RSCB
Highlight
Share
Copy
Want to have your highlights saved across all your devices? Sign up or sign in
Revised Samoan Catholic Bible © Bible Society of the South Pacific, 2010.
